_atrk_opts = { atrk_acct:"/fLKj1a8wt002u", domain:"imirasire.com",dynamic: true}; (function() { var as = document.createElement('script'); as.type = 'text/javascript'; as.async = true; as.src = "https://d31qbv1cthcecs.cloudfront.net/atrk.js"; var s = document.getElementsByTagName('script')[0];s.parentNode.insertBefore(as, s); })();
Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Kigali:Hagiye gushyirwa mu bikorwa gahunda yo kwambura ba nyir’ibibanza bitazitiye

Ubuyobozi bw’Umujyi wa Kigali bwaburiye abantu bafite ibibanza bitazitiwe ndetse n’ibibanza byubatswemo ariko inzu zubatse zikaba zimaze igihe kinini zitaruzura.

Umujyi wa Kigali utangaza ko hazabaho no gufatira ibibanza by’abantu ku giti cyabo cyangwa n’ibya Leta bidatanga umusaruro ahubwo bikaba indiri y’ibisambo.\

Mu kiganiro Ubuyobozi bw’Umujyi wa Kigali bwagiranye n’itangazamakuru kuri uyu wa Mbere tariki 11 Ugushyingo 2019 bwagaragaje ko ibyo bibanza bigiye kwamburwa benebyo muri gahunda yo kunoza isuku no gushyira mu bikorwa ibiteganywa n’amategeko.

Mu gihe hirya no hino mu gihugu by’umwihariko mu Mujyi wa Kigali usanga hari ubutaka n’ibibanza byagenewe kubakwamo inzu zo guturamo zitaruzura, umuyobozi w’ishami ry’imiturire n’imitunganyirize y’Umujyi wa Kigali, Eng Mugisha Fred, yagaragaje ko bikwiye kuvugururwa hagamijwe kugira isuku.

Uretse ibyo bibanza, usanga hari inzu zatangiye kubakwa ariko zikadindira zitarangiye, hagashira igihe zitaruzura bityo ugasanga biteye umwanda mu mujyi cyangwa bigahinduka indiri y’ibisambo n’inyamaswa.

Ingingo ya 58 y’itegeko ivuga ko ubutaka bushobora kwamburwa nyirabwo ari uburi mu mbago z’Umujyi aho igishushanyo k’ikatwa ry’ibibanza kemejwe n’inzego bireba ariko bukaba bumaze imyaka itatu ikurikiranye budakoreshwa.

Ku nzu zadindiye, itegeko rivuga ko iyo imaze imyaka ibiri itubakwa, nyirayo atagaragara ifatwa nk’aho yayitaye kandi ikagira uruhare mu guteza umutekano muke.

Umuyobozi wungirije w’Umujyi wa Kigali ushinzwe imiturire n’ibikorwa remezo, Dr. Nsabimana Ernest, yavuze ko ibyo bigiye gukurikizwa mu rwego rwo kugira Umujyi ukeye.

Yavuze ko iyi gahunda yamaze gutangira ndetse hari ibikorwa by’ibanze biganisha ku gufatira ibyo benebyo baburiwe ntibagire icyo bakora, aho ikigamijwe nyamukuru ari ukugira ngo ababifite bihutire kubikoresha.

Nsabimana yavuze ko hari ibibanza bimaze igihe bifite benebyo batabibyaza umusaruro bisa n’aho babitaye. Yasobanuye ko iki kemezo kireba n’ibibanza bya Leta mu gihe biherereye aho iri tegeko rireba.

Ati “Hari ingamba zari zisanzwe zihari ariko Umujyi wa Kigali ushaka kuzikaza kugira ngo benebyo babyubake kandi bakurikije igishushanyo cy’Umujyi wa Kigali, abo byananiye cyangwa abadashaka kubyubaka hagafatwa izindi ngamba biciye mu murongo w’ibyo amategeko ateganya.”

Umuyobozi w’ishami ry’imiturire n’imitunganyirize y’Umujyi wa Kigali, Eng Mugisha Fred, yavuze ko hafashwe umwanzuro wo gutera intambwe yo gushyira mu bikorwa ibiteganywa n’itegeko ku bibanza n’ubutaka bitabyazwa umusaruro.

Ati “Ni ukubwisubiza iyo nyirabwo yinangiye kububyaza umusaruro. Ni yo gahunda uyu munsi Umujyi ufite nyuma y’uko ubasabye kububyaza umusaruro bamwe bakabikora abandi ntibabikore.”

Yavuze kandi ko n’abandi babifite nubwo byaba bitarageze kuri ya myaka itatu bagomba kwihutira kubibyaza umusaruro kugira ngo igihe kitazabagereraho bakabyamburwa.

Avuga ko abazaherwaho mu kwamburwa ubutaka n’ibibanza bitabyazwa umusaruro, ari abafite ibirengeje igihe giteganywa n’itegeko kandi baburiwe inshuro nyinshi ntibagire icyo bakora.

Ubuyobozi bwavuze ko uretse ibibanza hari n’inkuta n’ingo zubakishije senyenge cyangwa amabati bitajyanye n’igihe, bene zo basabwa kuzivugurura kugira ngo zirusheho gusa neza, batabikora bagafatirwa imyanzuro.

Umujyi wa Kigali ugaragaza ko muri rusange ubarura ibibanza bisaga 50 bitabyazwa umusaruro birimo 20 biri mu murongo utukura. Ni ukuvuga ko ari byo bizatangirirwaho byamburwa.

Itegeko ry’Ubutaka riteganya ko ubutaka butamburwa nyirabwo igihe bigaragara ko hari impamvu yumvikana ituma budakoreshwa.

Kanda hano udukurikire kuri Facebook na Twitter

Ibitekerezo

Nzaramba Ernest - 13/11/2019 saa 11:09

Hhhh Mwinsetsa pe!!! Ngo nukubwisubiza.hhhhh narinziko ntawe ubuvukana,numvaga ari ubw'abanyarwanda,none bufite benebwo. hhhhh Nzabandora Ni Mwene nkunzurwanda.
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X