Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Rulindo:Gutangira amakuru kugihe byafashije police guta muri yombi abibye amabuye y’agaciro

Abaturage bo mu murenge wa Shyorongi mu kagari ka Bugaragara mu ijoro ryo kuri uyu wa kabiri tariki 09 Ukwakira bagize uruhare mu gufata abasore batanu(5) bitwikiraga ijoro bakajya gucukura amabuye y’agaciro rwihishwa mu kirombe cy’amabuye y’agaciro.


Abafashwe ni Ikirizamukwiheba Eric ufite imyaka 23, Twizeyimana Jean Claude w’imyaka 26, Hakizimana Alphonse w’imyaka 25 , Hakorimana Emmanuel ufite imyaka 28 na Nteziryayo John ufite imyaka 24.Bafatanywe ibiro 19 by’amabuye y’agaciro yo mu bwoko bwa Walflam.

Umuvugizi wa Polisi mu Ntara y’Amajyaruguru Chief Inspector of Police(CIP) Alex Rugigana yavuze ko abaturage bari bamaze iminsi batanze amakuru ko hari abantu bitwikira ijoro bakajya mu kirombe cy’amabuye y’agaciro bakayacukura.

Ni ikirombe ubusanzwe gicukurwamo na sosiyete izwi ku izina rya ETI Nyakabingo Mining Company.

CIP Rugigana yagize ati:”Abaturage bahawe akazi ko kugenzura umutekano wa kiriya kirombe nibo batubwiye ko hari abantu bitwikira ijoro bakaza kwiba amabuye, badusabye ubufasha bwo kuzabafata,iri joro nibwo twateguye igikorwa,turagenda dusangamo bariya basore.”

Yakomeje avuga ko bariya basore bose bafashwe bari abaturage basanzwe baturiye kiriya kirombe usibye abasore babiri muri bo bigeze gukorera iriya sosiyete y’ubucukuzi bw’amabuye y’agaciro nyuma bakaza kwirukanwa kubera imyitwarire mibi.

CIP Rugigana yakanguriye abaturage kwirinda kujya mu birombe by’ubucukuzi bw’amabuye y’agaciro batabifitiye uburenganzira ndetse n’ibikoresho byabugenewe kuko bishobora kubagwira.

Yagize ati:” Bariya bantu bapfa kujya mu kirombe nta bikoresho byabugenewe bafite nk’amatoroshi cyangwa inkweto n’imyenda, ndetse nta n’ubwishingizi baba bafite.Ntibanatekereza ko bashobora kugeramo bakagwirwa n’ikirombe bakaburirwa irengero , byongeye bajyamo bihishe byagorana ko babona ubutabazi.

Yasabye abaturage kujya bashaka imirimo bakareka ingeso zo kwiba.

Yashimiye abaturage ku ruhare rwabo bagize rwo gutangira amakuru ku gihe bigatuma bariya bajura bafatwa bose nta n’umwe ucitse.Yabasabye gukomeza ubwo bufatanye mu kurwanya ibyaha.

Abayobozi ba sosiyete isanzwe icukura ariya mabuye yashimiye Polisi y’u Rwanda ku gikorwa cyiza cyo kuba yabashije gufata bariya bajura.

Kugeza ubu bariya basore n’amabuye bari bamaze kwiba ndetse n’ibikoresho bari bafite byashyikirijwe urwego rw’Igihugu rushinzwe ubugenzacyaha(RIB),kugira ngo hakorwe iperereza.

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X