Monaco cosmetics

Bane batawe muri yombi bazira kurya inzitiramibu

Polisi y’u Rwanda yatangaje ko mu Mujyi wa Kigali yafunze abantu 4 barimo Umujyanama w’ubuzima, bakekwaho ubufatanyacyaha mu bujura bw’inzitiramubu zigenewe abaturage mu rwego rwo kurwanya Malariya.

Yatangaje ko abakekwaho icyo cyaha ari Karigirwa Claudine, wari Umujyanama w’ubuzima mu murenge wa Ndera; akaba ndetse ari we wari ushinzwe kuziha abaturage mu murenge wa Ndera, Umurerwa Jacqueline, n’abacuruzi 2 ; ari bo: Dukuze Marie Alice na Habineza Emmanuel.

JPEG - 49.2 kb
Abakurikiranywe n’inzitiramibu bakekwaho ko banyereje

Superintendent of Police (SP) Emmanuel Hitayezu, Umuvugizi wa Polisi y’u Rwanda mu Mujyi wa Kigali, yagize ati,”Ku itariki 7 Mutarama, Dukuze (usanzwe ucururiza mu isoko rya Kimironko), yafatanwe inzitiramubu 27 zigenewe abaturage. Nyuma ye, hafashwe Karigirwa; ukekwaho gukorana na Umurerwa kuzishakira abaguzi.”

Dukuze yabwiye Itangazamakuru ko inzitiramubu yafatanwe yaziguze na Umurerwa ku mafaranga y’u Rwanda ibihumbi 27; ni ukuvuga amafaranga y’u Rwanda igihumbi buri imwe.

Yakomeje avuga ko Habineza yafatiwe mu murenge wa Kimisagara, mu karere ka Nyarugenge ku itariki 8 Mutarama afite inzitiramubu 45 zagenewe abaturage.

Nyir’ubwite (Habineza)yavuze ko yaziguze n’abaturage bo mu karere ka Muhanga; buri imwe yayiguze amafaranga y’u Rwanda 400.

Polisi y’u Rwanda mu Mujyi wa Kigali yatangaje ko Nta mucuruzi ndetse n’undi wese wemerewe kugura inzitiramubu zigenewe abaturage; ndetse n’ibindi byose bahabwa ku buntu , mu rwego rwo kubateza imbere no kubarinda uburwayi butandukanye.

Bityo ngo abaturage na bo barasabwa kwirinda kugurisha inzitiramubu bahabwa; kandi bagatungira agatoki Polisi n’izindi nzego zibishinzwe abazigurisha ndetse n’abazigura.

Yongeyeho ko usibye izafatanwe abo 4, hari izindi 25 zafatiwe ahandi hatandukanye; kandi ko iperereza rikomeje kugira ngo hafatwe abagize uruhare mu igura n’igurishwa ryazo.

Umuyobozi mu Kigo cy’igihugu cy’Ubuzima ushinzwe Porogarame yo kurwanya Malariya, Dr Aimable Mbituyumuremyi yagize ati”Mu rwego rwo kurwanya Malariya, Leta yaguze; ndetse iha abaturage inzitiramubu ku buntu; ariko, nk’uko mubibona, hari bamwe batangiye kuzigurisha birengagije icyo baziherewe ndetse n’akamaro zibafitiye. Ababikora bamenye ko batiza umurindi Malariya; kandi ko babangamira gahunda ya Leta yo kuyirwanya. Turasaba buri wese gukoresha inzitiramubu icyo yayiherewe no kuyikoresha mu buryo bukwiriye kugira ngo yirinde Malariya.”

Abacyekwa ngo nibahamwa icyaha , bazahanishwa igifungo kuva ku myaka 7 kugeza ku myaka 10 n’ihazabu y’amafaranga yikubye inshuro kuva kuri 2 ,kugeza kuri 5 z’agaciro k’umutungo warigishijwe cyangwa wononwe; nk’uko biteganywa n’ingingo ya 325 yo mu gitabo cy’amategeko ahana ibyaha mu Rwanda.

Nkindi Alpha

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X