Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Danny Vumbi yagize icyo yisabira abahanzi muri iki gihe cyo kwibuka jenoside yakorewe abatutsi

Muri iki gihe abanyarwanda bagiye kwinjira mu gikorwa cyo kwibuka ku nshuri ya 23 Jenoside yakorewe abatutsi mu mwaka w’1994 , umuhanzi akaba n’ umwanditsi w’indirimbo Semivumbi Daniel uzwi nka Danny Vumbi arasaba abahanzi nyarwanda ndetse n’abanyarwanda muri rusange kwirinda icyasubiza u Rwanda mu kangaratete ahubwo bagaharanira kurimbura ingengabitekerezo ya Jenoside.

Abahanzi ni bamwe mu bifashishwa mu gutanga ubutumwa bwubaka bukagera ku bakurikirana ibihangano byabo ku buryo bwihuse ariko hari n’igihe bakoreshwa batanga ubutumwa bubi bikaba byageza igihugu cyacu ahantu habi nkuko hari bamwe bagiye babikora nka Simon Bikindi wakanguriye abahutu kwica abatutsi ndetse bikaza no gushyirwa mu bikorwa n’abandi.

Umuhanzi Danny Vumbi we asanga abahanzi bagomba kugira uruhare mu kurwanya uwo ari we wese wabakoresha abinyujije muri muzika ngo babe bashishikariza abantu kwangana.

Aganira na imirasire.com yagize ati: “ mbere y’uko abahanzi baba abo aribo mbere na mbere n’abanyarwanda icyo mbasaba n’ukwifatanya n’abanyarwanda mu bikorwa ibyo ari byo byose bijyanye no kwibuka aho bagomba gutanga umusanzu wabo nk’abahanzi bakawutanga kandi birinda ingengabitekerezo ya Jenoside ndetse bakirinda n’ababashuka ngo babakoreshe mu nyungu zabo zigamije gusubiza inyuma igihugu cyacu mu bihe bibi cyanyuzemo.”

Ku bijyanye n’uburyo abahanzi nyarwanda biteguye gusura ndetse no gufasha imiryango y’abahanzi nyarwanda bazize Jenoside yakorewe abatutsi mu mwaka w’1994, Danny Vumbi yavuze ko urugaga rw’abahanzi nyarwanda rwabiteganije muri iki cyunamo.

Yagize ati: “ Nk’abahanzi nyarwanda twabiganiriyeho kandi turi kubitegura n’ubwo tutaratangaza umunsi bizakorerwaho ariko binyuze mu rugaga rw’abahanzi nyarwanda natwe iyi miryango twayitekerejeho kandi tuzakomeza no kuyiba hafi.”

Umuhanzi Danny Vumbi n’umwe mu bahanzi bazwiho ubuhanga byaba mu miririmbire ye ijyanye n’ubuzima abantu babayemo bwa buri munsi ndetse akaba ari n’umwe mu banditsi b’indirimbo bakomeye kuko yagiye yandikira indirimbo abahanzi benshi batandukanye barimo nka Social Mula na King Jemus.

Insanganyamatiko y’uyu mwaka igira iti: ““Twibuke Jenoside yakorewe Abatutsi, turwanya ingengabitekerezo ya Jenoside, dushyigikira ibyiza twagezeho.”

Bruce MUSHUMBA

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X