Monaco cosmetics
Ahabanza  >>  Amakuru yose >> Imyidagaduro >> Mu Rwanda >> 

Indirimbo Kami Kid Gaju yakoranye na The Ben yatangiye kumuha umusaruro mu buryo butari bwitezwe

Nyuma y’uko umuhanzi The Ben aje gutaramira abanyarwanda mu gitaramo cyiswe East African Party kiba buri ntangiro z’umwaka, abahanzi batandukanye baboneyeho gukorana indirimbo nawe mbere y’uko asubira muri Amerika n’ubundi asanzwe abarizwa.


Muri abo bahanzi rero harimo umusore Kid Gaju ku ikubitiro wahise akorana nawe indirimbo bakayita “Kami.”

Mu gihe yari imaze kujya hanze mu minsi micye ishize yatangiye gukinwa cyane ndetse kugeza ubu nta watinya kuvuga ko iri mu ndirimbo zikunzwe ku rutonde rw’indirimbo nyarwanda.

Ibi rero byaje gutuma Kid Gaju agira igitekerezo cyo kuyimenyekanisha mu duce dutandukanye tw’igihugu maze ku ikubitiro mu mpera z’icyumweru gishize ajya mu karere ka Huye gukorerayo igitaramo cyo kuyimurika.

Muri aka gace ubwo yageragayo agatangira kuririmba yabonye buri wese ngo arimo kunyeganyega ubona yitaweho bigeze ku ndirimbo “Kami” benshi bananirwa kwifata barirekura barabyina biratinda.

Ibi nyiri ubwite yaje kubigarukaho asanga iyi ndirimbo irimo kumugarurira abafana bikomeye dore ko mu minsi yashize mbere y’uko iyo ijya hanze wasanganga ibihangano bye bizwi ari mbarwa kandi nabwo ku bakurikiranira hafi umuziki nyarwanda.

Aganira n’Itangazamakuru nyuma yo gushyira hanze iyi ndirimbo,Kid Gaju yavuze ko yishimiye kuba yarakoranye na The Ben iyi ndirimbo, kandi ko yizeye ko izakundwa cyane haba muri Uganda ndetse no mu Rwanda.

Kami yatunganyijwe na Nessim, uri mu batunganya indirimbo uri gukora nyinshi mu ndirimbo zigezweho muri Uganda zirimo Tuli Kubigele, Wuuyo n’izindi za A Pass, Muna Kampala ya YKee Benda, Gwabise ya Nutty Neithan, Face to Face ya Charly na Nina na Geosteady n’izindi.

Iyi ni imwe mu ndirimbo Kid Gaju yayikoze abifashijwemo n’umujyanama we mushya witwa Jeff Kiwa wabaye umujyanama w’itsinda rya GoodLyfe, aba umujyanama w’umuhanzi Pallaso n’abandi bakomeye barimo Sheebah Karungi n’ubu bakiri kumwe.

Ndacyayisenga Fred

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X