Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Mudandi Frank yasohoye amashusho ya “Ni Miss” n’indirimbo ebyiri zisobanuye

Umahanzi Mudandi Frank yasohoye amashusho y’indirimbo ye yakunzwe n’abatari bake yitwa “Ni Miss” ivuga ku kuntu umusore aba abona ntawe uruta umukunzi we n’umugabo akabona ntawe uruta umugore we amufata nka Miss we ( Nyampinga we”.)

Uretse kuba yasohoye ayo mashusho, yanasohoye indirimbo ebyiri z’inyamerika zisobanuye mu Kinyarwanda mu rwego rwo kurushaho gushimisha abakunda ibihangano bye.

Aganira na Imirasire.com ku ruhande rw’amashusho y’iyo ndirimbo yavuze ko yiteguye ko agomba kumuzamura mu ntera mu muziki we bitewe n’umwanya yayahaye mu kuyakora n’ukuntu uwayatunganyije uzwi nka Spark G azwiho ubuhanga n’ubunararibonye mu byo gutunganya amashusho y’indirimbo.

Yagize ati “Nkurikije ukuntu ayo mashusho nayahaye umwanya uhagije mpamya ntashidikanya ko hari urwego azanzamuraho mu muziki wanjye”.

Izindi ndirimbo ze yavuze ko arimo guteganya gukorera amashusho ni iyitwa “ Fou de toi” n’iyitwa “ Nzaza” ngo gusa afite n’ibindi bikorwa bijyanye na muzika bizaza nyuma y’ayo mashusho.

Umuhanzi Mudandi Frank ubusanzwe witwa Ndamyirokoye François ariko akaba avuga ko yatangiye kumenya ubwenge afite akabyiniriro ka Mudandi yemeza ko yakuze agakomeza kugakunda cyane yanatangaje ko mu mishinga ya vuba ateganya kuzajya gukorera indirimbo muri Uganda kwa producer Nessim ubu uri gukorera abahanzi Charly na Nina ndetse n’abandi bakomeye muri Uganda nka Ykee Benda.

Ibi abisobanura yavuze ko ubwo Nessin aheruka I Kigali ari kumwe na Ykee Benda yabimuganirijeho bemeranya guhama mu biganiro nyuma bakazafata umwanzuro akajya gukorerayo indirimbo.

Ariko mbere yo kujya gukorera indirimbo muri Uganda ngo azabanza akorere indirimbo kwa Producer Junior cyangwa producer Paster P.

Yahaye impano abakunda umuziki we y’indirimbo zisobanuye
Mu rwego rwo kurushaho gushimisha abafana be, Mudandi Frank yahaye abafana be indirimbo yitwa “ Always and forever” ya Shania Twain na “Let me love you” ya Ne-yo zisobanuye mu Kinyarwanda.

Gusobanura indirimbo, nabyo yavuze ko ari ibintu akunda ngo kuko hariho abakunda indirimbo zo mu mahanga ariko batumva icyo zisobanura.

Ati “Izo ndirimbo nazo nazisohoye mu rwego rwo kurushaho gushimisha abantu kandi iyo umuntu atumva icyo indirimbo ivuze nyuma akakimenya biramushimisha cyane”.

Yongeye avuga ko kandi uko azajya asohora indirimbo azajya anasohora n’indi yo muhanga isobanuye.

Guhuza ubuhanzi bwe no gusobanura indirimbo avuga ko byose ari mu rwego rwo kugira ngo arusheho gushimisha abantu mu buryo bunyuranye.

Intego ye mu muziki, ashimangira ko ari ukugeza umuziki we kure hashoboka aharanira ko muzika nyarwanda irushaho kumenyakana ku Isi hose.

Abakunda umuziki we kandi abizeza ko ibihangano bihari ko atazigera abatenguha habe na rimwe. Asaba kandi abahanzi bagenze be kurushaho gushyigikirana mu rwego rwo kugira ngo bafatane urunana muziki Nyarwanda igere kure.

Imvano y’ubuhanzi bwe

Mudandi Frank yavuze ko akiri muto yakundaga kuririmba akajya mu makorali y’abana ngo gusa amaze gukura buhoro yagiye muri korali y’abakuze aho yasengeraga.

Ubwo yigaga mu mashuri yisumbuye mu mwaka wa kane ahitwa I Karengera ku Kibuye mu Ntara y’Iburengerazuba yavuze ko ari bwo yatangiye kwandika indirimbo ze.

Mu muryango we ngo nta muhanzi wigeze abamo biri no mu byatumye ahanini bamwe mu muryango batarishimiraga ko yaba umuhanzi.

Ariko ngo n’ubwo bamwe mu bo muryango we batabishakaga, yavuze ko kuko ari impano Imana yamuhaye yakomeje kubikunda ngo kuko ntawe usiga ikimurimo.

Bruce MUSHUMBA

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X