Monaco cosmetics
Ahabanza  >>  Amakuru yose >> Iyobokamana >> 

Past.Antoine Rutayisire warokowe n’abasirikare ba CND Yatanze ubuhamya bukomeye.

Rev. Dr. Antoine Rutayisire ni umugabo w’imyaka 58 wubatse , akaba afite abana bane n’umwuzukuru umwe. Afite n’abandi bana bagiye barerwa nawe ku mpamvu zitandukanye, akaba yararokotse Jenoside yakorewe abatutsi muri Mata 1994.

Ubuhamya bwe buhera mu myaka ya za 1961, aho kuva mu bwana bwe umuryango we wagiye utotezwa ndetse se akaza kwicwa muri 1962.

JPEG - 59 kb
Past .Antoine Rutayisire

Dr.Rutayisire Antoine mu myigire yo mu bwana bwe n’imikorere mu kazi ke arangije amashuri yagiye ahura n’ibibazo by’itotezwa ishingiye ku bwoko, nkaho yaje kwirukanwa kwigisha muri Kaminuza nkuru y’u Rwanda akajyanwa kwigisha mu mashuri yisumbuye mu Karere ka Rulindo.

Mu gihe twibuka ku nshuro ya 23 Jenoside yakorewe abatutsi mu Rwanda, twifuje kongera kubagezaho incamake y’ubuhamya bw’uyu mugabo bukubiye mu kiganiro yagiranye n’itangazamakuru tariki ya 07 Mata 2015, ubwo twibukaga ku nshuro ya 21, aho ashimangira ko yarokowe n’abasirikare b’Inkotanyi bari muri CND.

Ubu buhamya bukaba bwibanda ku mibereho y’umuryango wa Rutayisire kuva mbere gato ya Mata 1994, n’uburyo yabonaga Kigali mbere gato ya Jenoside na nyuma n’uburyo abona u Rwanda rw’ubu uko aho rugana.

Mbere ya Jenoside yo muri Mata 1994 yari atuye mu Mujyi wa Kigali I Remera ahari muri Zone ya Kagara. Kuri ubu akaba ari umupasitori mu Itorero Angilikalukani, Paroisse ya Remera.

Umunyamakuru: Mwatubwira uko mwabonaga Kigali mbere gato ya Jenoside, Nk’umuturage wari uhatuye, nta kintu kidasanzwe mwabonaga cyacaga amarenga y’uko hari ikintu kidasanzwe kigiye kuba?

Pst.Dr.Antoine Rutayisire: Mu minsi ya mbere mu kwezi kwa kane 1994 kumenya uko ibintu bimeze byari byoroshye, kuko Umujyi wose wari intambara, ku itariki ya 7 Mata 1994 ho byabaye ibindi. .., kuri iyi tariki muri aka gace ko kuva ku kibuga cy’indege, kwa Lando, ku Nteko ishinga Amategeko kariya gace kose amasasu yaraye avuga mu ijoro. Abasirikari barinda Perezida baratangiye birara mu baturage barabica…twarabyutse dusanga imihanda yose bayifunze ndetse batangira no kwinjira muri quartier zose”.

Icyo gihe RTLM nayo yahise itangira gushishikariza abahutu kwica abatutsi ndetse inaranga ahagiye hari abatutsi muri Kigali.

Umunyamakuru : Ese tutarinjira mu birebana na Jenoside, watubwira uko mbere ya Jenoside ubuzima bwawe bwari bwifashe, wigeze utotezwa cyangwa uhigwa ?

Pst. Dr.Antoine Rutayisire: Twagiye duhura n’Interahamwe, abasirikare, abategetsi, badushyiraga mu gitabo cy’abahungabanya umutekano kenshi.., ariko Imana yakomeje kundinda [..] Twari tumeze nk’abantu batagira kirengera uwashakaga wese yarakwicaga, gupfa byari nko guhuhura kuko twabagaho tutariho ,hari ababaga barafashwe ku ngufu, barakubiswe, barafunzwe, abandi baramenetse impyiko..,Muri 1994 twari tumaze kumva ko ari ukurangiza ibyo batangiye.

Ibihe bikomeye byatangiye muri 1990 nakubarira inshuro nyinshi nagiye njya mu modoka bakanyambura indangamuntu ngiye muri GBU [Umuryango wa Gikirisitu muri za Kaminuza] mu gihugu hose mu murimo w’Imana ariko bakansiga. Bigeze kunsaba Gerenade mbabwira ko njye ntwara Bombe..bagiye kunyica mpita mfungura Bibiliya mbabwira ko kwicana no kwangana ntabyo nkora. Abaturage bahise bavuga ngo mwari murenganyije umuntu w’Imana barandeka…. nari mpasize ubuzima”.

Hano I Kigali ho Iyo watindaga gutaha wasangaga bagutegeye mu nzira baguteraga ibyuma, bakakwambura, njyewe inshuro ebyiri banyamburiye amafaranga hariya hafi yo kwa Lando […] gusa nagize umugisha ntibantera ibyuma. Undi munsi nazamutse kuri Stade mbona umugabo uri imbere yanjye bamuteye icyuma ahita apfa hari umutekano mucye cyane, kandi bari bashyigikiwe kuko nuwabafungaga abategetsi bahitaga bamuhamagara akabafungura.

Umunyamakuru: Ese ntago ntimwashoboraga kuba mwahunga niba mwarabonaga ko ubuzima bwanyu buri mu mazi abira?

Pst.Dr.Antoine Rutayisire: Twari guhunga ryari se cyangwa tugahungira hehe ? Ko twari tumeze nk’abari muri Gereza ntiwari guca i Burundi, i Bugande habaga hafunze ….., ikindi ntiwari kwifata ngo usige umugore n’abana ngo ubabwire ngo uragiye. Hari ikintu bita Human Resilience [Kwihanganira ikibi] ugera ahantu ukibwira ko ikibi kizarangira kugera igihe kizagutwarira.

Umunyamakuru: Nk’umuntu wari utuye hafi ya CND ahari Ingabo za RPF(Inteko ishinga amategeko y’ubu) mbere ya Jenoside, wabonaga bimeze gute muri kariya gace?

Pst. Dr.Antoine Rutayisire : Ku Nteko ni ho Inkotanyi 600 zari ziri, hariya hantu twe twari dutuye no mu nzira zaho i Kanombe haturukaga ibisasu byinshi cyane biyiraswaho.., byaducaga hejuru bigakubita iriya nzu.. .twumvaga n’Inkotanyi zitazasigara kuko barayirashe ivumbi riratumuka.
Urebye mu cyumweru cya mbere imbunda zari zibasiye cyane kuri CND ndetse no kuri Rebero…barayirashe imbunda zose zari muri Kigali ari yo mpamvu iriya nzu yagiye ikomereka.

Umututsi wahacaga nawe hari ubwo ataharengaga kuko bahitaga bamukekera kuba yavuye kureba Inkotanyi ku buryo iyo wahanyuraga utanaharebaga.

Umunyamakuru: Mbere gato ya Mata 1994, ese mwabonaga hari ibimenyetso ko Jenoside ishoboka kuba?

Pst.Dr. Antoine Rutayisire: Kuva muri 1990 twari twaramenyereye ikibi ariko twari dufite ibyiringiro kuko Leta y’inzubacyuho yendaga kujyaho ivanzemo na FPR…, twaravugaga ngo Leta y’inzibacyuho irimo na FPR nizajyaho umutekano ukagaruka, ntitumenye ko hari ikibi kizaba nyuma”

Umunyamakuru: Ingabo za RPF zakurokoye gute wowe n’umuryango wawe by’umwihariko?
Pst. Dr.Antoine Rutayisire: Ntabwo ari ukubeshya ndetse si uguhakwa Imana yakoresheje ingabo za FPR kugira ngo tubeho n’ubwo icyubahiro tugiha Imana, ariko na ziriya ngabo turazishima.

Njye zatabaye ubuzima bwanjye by’umwihariko. Nka njye bariya basirikare 600 bari muri CND ni bo bankijije.., Interahamwe zari zizi ko mfite inkotanyi zindinda maze umunsi umwe ziza iwanjye zikandagira. Mu gihe bakirimo kubivuga bari ku irembo haje abana b’Inkotanyi ari babiri, bashinga imbunda babarasamo Interahamwe ziriruka.., iyo bakererwaho nk’iminota itanu twe twari gupfa.
Nyuma yaho twagumye mu rugo hanyuma Inkotanyi zimaze gufata zone turimo batubwira kuzamuka tukajya muri Stade. Gusa muri Stade twabaye nk’abahungiye ubwayi mu kigunda kuko abasirikare ba FAR baturashemo ibicompra (comprant) bigera muri bitanu. Ku itariki 24 Mata 1994 imvura iri kugwa Inkotanyi zaraje ziratubwira abiteguye turagenda bazana n’abari muri CND tunyura Nyarutarama-Batsinda- Kabuye duhura n’abandi tujya i Byumba.., twebwe igihe kinini twakimaranye n’abasirikare b’Inkotanyi.

Umunyamakuru: Uruhare rw’abamadini bagenzi bawe muri Jenoside ndibaza ko rwagutunguye cyane, ese byo wabyakiriye gute?

Pst.Dr.Antoine Rutayisire:
Kuba Padiri cyangwa Pasitori yarakoze Jenoside byarabaye nk’ishyano ndetse bikavugirizwa induru, ni ko nta muntu watekerezaga ko bashobora gukora Jenoside ariko barabikoze. Gusa urebye umubare w’ababikoze ni bakeya ugereranyije n’abatarabikoze ,ahubwo abantu babihaye agaciro cyane kuko bitumvikana na gatoya. Gusa sinakwirengagiza ko umubare munini w’abakoze Jenoside bari abakirisitu ariko buriya n’abayisilamu bayigizemo uruhare nuko abantu bagize uruhare rungana n’uko banganaga.

Umunyamakuru: Tugeranyirize Kigali ya1994 na Kigali y’ubu, wari ufite icyizere cyo kuzabona Kigali imeze nk’iyi turimo nyuma y’imyaka?

Pst. Dr.Antoine Rutayisire: Ohhhh uwakubeshya ngo mu kwezi kwa 7 mu 1994 yari azi iyo tujya yaba abeshya.., ndahamya ko n’abanyapolitiki ntabyo bari bazi. Tuza mu 1994. buri muntu akaza akabohoza nka Minisiteri, undi akandika kuri Biro ngo nyiri iyi nzu yaraje, inzu y’umuntu , undi agafata Stade akayita I farm.., urebye Kigali yari imeze nk’itongo, nta permit yasabwaga mu gutwara imodoka, abasirikari bavanze n’abasivili, imbwa zirya abantu.., nta muriro, umuhanda wuzuye imbwa zapfuye byari ibintu bisa nabi…, m ariko hari ibyiringiro ko ubuzima bwazagaruka.

Wabonaga abantu bari mu buzima bubabaje ariko bunashimishije kuko ikibi cyari cyahagaze wabonaga ubuzima bwagarutse, tuvuye mu nkambi byari akajagari, ubuzima bwari akajagari, nta cyerekezo cyari gihari ariko ubuzima bwagiye bugaruka gahoro gahoro.

Umunyamakuru: Ubumwe n’ubwiyunge mu mezi ya nyuma ya 1994 wabonaga bushoboka?
Pst. Dr.Antoine Rutayisire: Hagati ya 1994 -1999 ubumwe n’ubwiyunge ntibwavugwaga havugwaga ubutabera. Ibyo byaje muri za 1999 ibintu bimaze gushyirwa mu buryo nyuma y’ibiganiro byo mu Rugwiro 1998 ndetse no gushyirwaho kwa Komisiyo y’Ubumwe n’ubwiyunge.
Kandi birumvikana twari tukiri mu kwishakashaka, twari mu kajagari ..twatangiye ari ugukabakaba, tujya mu baturage turabaza, dukora Inama zitandukanye ubumwe n’ubwiyunge butora umurongo bijya mu buryo.

Umunyamakuru: Nyuma y’Imyaka 25 ubona u Rwanda utekereza ko u Rwanda ruzaba ruhagaze gute, ukurikije aho rugeze uyu munsi?

Pst.Dr. Antoine Rutayisire: Burya u Rwanda rwatangiye gusenyuka muri 1990 rubirinduka muri 1994, rutangirira kuri zero. Muri iyi myaka 21 tumaze ngira ngo uwakubwira ngo ko uyu mujyi wigeze gusa n’imva wuzuye imbwa zapfuye, intumbi ntiwabyemera! Uwaza akareba inyubako zihazamutse n’isuku ihari n’ibindi ngira ngo ni ibyo kwishimira n’ubwo tugifite urugendo rwo kurinda ibyo twagezeho no kubaka ibindi bishya ngira ngo uru rugendo “rwabaye rwiza”.
Umunyamakuru: Amadini ukoramo yagize uruhare mu gusenya igihugu…ubona uruhare rwayo mu kugisana no gusana imitima?

Rev.Dr. Antoine Rutayisire: Uruhare rw’amadini ni runini cyane kuko ruzamo kurema, gukunda no gukundana. Ubundi Leta yo ishobora gukoresha imbunda n’amategeko igaturanisha abaturage babiri bangana ariko twe dufite ubutumwa bubwira uwo muntu guturana, gukundana, gusaba imbabazi, gufasha abatishoboye.., gusa ikibazo gikomeye natwe ntitubikora uko bikwiye. Kuko benshi natwe turi inkomere, kuko iyo ndwara yafashe igihugu natwe ntiyadusize ariko nibwira ko buhoro buhoro bizagenda bitungana.

Umunyamakuru: Murakoze ku bw’umwanya wanyu muduhaye.
Pst.Dr.Antoine Rutayisire: Murakoze namwe.

Uretse kuba ari umushumba mukuru w’Itorero Anglican mu Rwanda/ Paruwasi ya Remera, Antoine Rutayisire yakoze imirimo itandukanye mu gihugu, aho kuva mu mwaka wa 1999 yabaye Visi Perezida wa Komisiyo y’Ubumwe n’ubwiyunge, ayobora umuryango nyafurika w’ivugabutumwa AEE- RWANDA, akaba azwiho kuba umwe mu bagabo bazi guhuza ijambo ry’Imana, ubuhamya na Politiki y’u Rwanda.

Christian N.

Kanda hano udukurikire kuri Facebook na Twitter

Ibitekerezo

uwintabera - 13/04/2017 saa 19:23

Paster yavuze ko amadini yagiye agira uruhare muri Genocide bitewe numubare wabayobocye bayo yabaga asnganywe ,nonese nkwibarize usibye no muri Genocide ubu bwo ubona abahamya ba Gehova ari bangahe kuburyo bakora igikorwa cyigagarira buriwese.Muri barubanda nyamucye rwose ntanumuntu ubazi.
Kanda hano umusubize

HITIMANA JACK - 14/04/2017 saa 15:49

Wowe witwa UWINTABERA.Wikwibeshya ko kuba abantu ari bake aricyo cyatuma badakora Genocide.Ubu se ko Abaslamu bali bake muli 1994,byababujije gukora GENOCIDE?Urugero,ARUSHA hafungiye ABASLAMU barenga 7.Muli gereza ya 1930,bahafungiye ABASLAMU batabarika bakoze GENOCIDE.Ariko nta muhamya wa Yehova ufungiye Arusha cyangwa 1930 kubera GENOCIDE.Ubu se ko ABATWA bari bake cyane,byababujije gukora GENOCIDE?Ibyerekeye UBUKE byo ntacyo bivuze.Ahubwo emera ko Abahamya ba Yehova ariryo dini ryonyine rigerageza gutinya imana.Nibo bonyine batajya mu ntambara z'isi.
Kanda hano umusubize

Pekeyake - 13/04/2017 saa 16:43

Mr Rwemalika, wikwihutira kwemeza ibyo utazi! Kuko njye ibyo nzi bihamanye n'ibyo wanditse ku bahamya ba Jéhovah. Ariko singombwa ko mbivugaho kuri uru rubuga.
Kanda hano umusubize

HITIMANA JACK - 14/04/2017 saa 15:55

Wowe witwa PEKEYAKE,ibyo uvuga uzi,kuki ubihisha?Rwemalika yagusabye gutanga urugero rw'umuhamya wa Yehova waba uzi wali umuhamya muli 1994,ubu akaba afungiye Genocide.Upfa kuduha amazina ye,aho yakoraga n'aho yali atuye.Kuki se wanga kubivuga kandi ubizi?Impamvu nuko ntawe uzi.Wikwihagararaho.
Kanda hano umusubize

RWEMALIKA John - 13/04/2017 saa 12:51

Ibyo RUTAYISIRE Antoine avuze nibyo.Yagize imana yo gutura hafi na CND.Otherwise aba yarishwe.Icyo mwunganiraho nuko abanyamadini benshi bagize uruhare runini muli Genocide.Ikindi nongeraho,nuko amadini yatsinzwe ku mugaragaro,uretse Abahamya ba Yehova.Ni nkaho kwigisha ibyimana byabananiye.Urugero,abategetsi b'u Rwanda muli 1994 hafi ya bose bali ABAKRISTU.Ariko kuri jye bali "Ingirwa-bakristu" (bogus christians):Ministers,Prefets,mayors,executives b'imirenge,army officers,etc...hafi ya bose bali Abakristu!!!!Nyamara hafi ya bose (nibuze 95%),bakoze GENOCIDE.Byerekana Failure/Echec y'amadini mu kwigisha ibyerekeye imana.Kandi n'ubu nuko.Ntabwo amadini yahindutse.Usanga icyo bashyira imbere ari icyacumi,ibyubahiro,politics,etc... Abantu batakoze Genocide,ni Abahamya ba Yehova gusa.Urugero,nta muntu numwe wali umuhamya wa Yehova muli 1994 ufungiye Genocide.Wenda wambaza uti ubizi gute?Nakoze iperereza rikomeye mu gihugu hose,njya no muli companies nyinshi zakoragamo abahamya ba Yehova benshi muli 1994. Urugero,nagiye muli Utexrwa,SulfoRwanda,Manumetal,BNR,BACAR,BK,BRALIRWA,etc....Aho hose hakoraga Abahamya benshi b'abahutu.Nta numwe ufungiye Genocide.Nawe wakora Anketi yawe ugasanga ntabeshya.Niba hari uwo uzi,wamuvuga ariko ntubeshye.Ukaduha amazina ye,aho yakoraga,n'aho yari atuye.Gusa uvuge uwari umuhamya muli 1994,ufunzwe ubu.
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X