Monaco cosmetics
Ahabanza  >>  Amakuru yose >> Imikino >> Mu Rwanda >> 

Olivier Karekezi ngo ntazi impamvu Diarrah asigaye ajenjeka muri iyi minsi

Umwuka si mwiza hagati y’umutoza Olivier Karekezi n’umukinnyi Ismael Diarrah nyuma y’uko nta musaruro agaragaje mu mukino wahuje Rayon Sports na LLBs4 y’i Burundi mu mpera z’icyumweru gishize.

JPEG - 63.7 kb
Imikinire ya Diarrah yaranenzwe cyane

Nyuma yo kunganya na LLB S4 Academique y’i Burundi, Umutoza wa Rayon Sports, Karekezi Olivier ntiyanyuzwe n’umusaruro wa rutahizamu Ismailla Diarra utarashyize igitutu kuri ba myugariro bari bahanganye, ndetse ngo imikinire ye ni icy’ibanze agomba guhindura mu mukino wo kwishyura.

“Mwarabibonye ku mukino twakinnye na APR FC wabonaga ko adashaka gukurikira, n’umupira bateye mu gace aherereyemo uba ubona ameze nk’uwifitemo umunaniro, gusa Diarra sinamutindaho, kuko nk’amakipe y’ino, uhuye na Police FC ukayitsinda ibitego 3 ntabwo ari igitangaza.”

“LLB yo ifite abakinnyi bazi ubwenge nabitegereje mu kibuga, rutahizamu nka Diarra rero udashaka kotsa igitutu ba myugariro bayo, ni ikibazo kuri twe, ni yo mpamvu nafashe icyemezo cyo kumukuramo nkahashyira Tchabalala nkanazanamo Kevin. Nyuma yo gusimbuza twabaye nk’abahinduye umukino kandi byatanze umusaruro kuko ni bwo twabonye igitego.”

Yakomeje avuga ko imikinire ya Diarra ari cyo cy’ibanze azahindura mu gutegura umukino wo kwishyura uzabera i Bujumbura mu mpera z’iki cyumweru.

Ati “Mbere na mbere icyo navuga nzahindura ni imikinire ya Diarra, kuko ntabwo arimo gukurikira, ndibugerageze kumwegera menye neza ikibazo afite. Dukina na APR FC yavugaga ko afite ikibazo cy’imvune ariko uyu munsi ni yo mpamvu mwabonye ko namukuyemo.”

Uwo mukino Diarra anengwamo imyitwarire wari ubanza w’ijonjora ry’ibanze (1/32) mu irushanwa rihuza amakipe yabaye aya mbere iwayo ku mugabane wa Afurika (CAF Champions League).

Muri uwo mukino, Jamali Bazunza winjiye mu kibuga asimbuye, yafunguye amazamu ku ruhande rwa LLB muri uyu mukino, ku gitego kinjiye ku munota wa 75 w’umukino, ubwo yahabwaga umupira mwiza na Sefu Ndizeye wabanje gucenga ba myugariro ba Rayon Sports, igitego cyishyuwe na Shaban Hussein ’Tchabalala’ nyuma y’iminota umunani gusa.

Nyuma y’ikiruhuko kigufi ikipe ya Rayon Sports yari yahaye abakinnyi, kuri uyu wa mbere irasubukura umwiherero igomba gukorera i Muhanga yitegura umukino wo kwishyura izakina na LLB kuri Stade Prince Louis i Bujumbura.

Umutoza Karekezi Olivier avuga ko agiye kwita cyane ku gusatira mu myitozo agiye gukoresha abakinnyi be, kuko ngo azajya i Burundi ari cyo kimujyanye aho kujya kugarira.

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X