Monaco cosmetics
Ahabanza  >>  Amakuru yose >> Imikino >> Mu Rwanda >> 

Shampiyona nyafurika:U Rwanda rwabonye imidali ine

U Rwanda rwatangiye rwitwara neza mu irushanwa nyafurika ry’amagare aho abakinnyi babonye imidali ine.


Nk’uko byari byitezwe, kuva mu gitondo cyo kuri uyu wa Gatatu tariki ya 14 Gashyantare 2018, mu Rwanda hatangijwe shampiyona nyafurika y’umukino w’amagare igomba kumara iminsi ine. Umunsi wa mbere waranzwe n’igihugu cya Eritereya cyegukanye imidari 2 ya zahabu mu gihe u Rwanda rwegukanye imidari ine harimo umwe wa zahabu.

Kuri uyu munsi wa mbere wakiniwe ku muhanda wa Kicukiro-Nyamata habayeho icyiciro cyo gusiganwa n’ibihe nk’ikipe(Team Time Trial) mu byiciro bine harimo icyiciro cy’abangavu, ingimbi, ikipe nkuru z’abagore hamwe n’abagabo(Women/Men elite).

Ibintu byatangiye neza ku ruhande rw’u Rwanda aho ikipe y’abangavu yegukanye umwanya wa mbere irushije Abarundi aho bakoresheje iminota 36’06’’44 ku ntera y’ibilometero 18,6 mu gihe Abarundi bakoresha iminota 50’22’’60. Izi nizo kipe zonyine zari zitabiriye muri iki cyiciro bivuze ko u Rwanda rwahise rwegukana umudari wa zahabu naho abarundi begukana silver.

Hahise hakurikiraho icyiciro cy’ingimbi nazo zanyongaga ku ntera ya kilomotero 18,6. Aha hari amakipe 6 yitabiriye aho ikipe y’igihugu ya Eritereya yaje ku isonga ikoresheje 26’07’’12 yegukana umudari wa zahabu mu gihe u Rwanda rwaje ku mwanya wa kabiri rusizwe amasegonda 49’’16 rwegukana umudari wa silver naho Namibia iza ku mwanya wa 3 isizwe iminota 2’11’’88 yegukana umudari wa bronze.

Hakurikiyeho icyiciro cy’abakobwa bakuru(Women elite) ahari amakipe 3 gusa. Iki nacyo ntabwo cyoroheye ikipe y’u Rwanda kuko Ethiopia yaje ku isonga ikoresheje 1:02’38’’60, ikurikirwa na Eritereya yakoresheje 1:02’47’’35 naho u Rwanda ruza ku mwanya wa 3 rusizwe 07’04’’32 ku ntera y’ibilometero 40 bakoze.

Hari hatahiwe icyiciro cy’abagabo bakuru aho abanyarwanda bari bahanze amaso ikipe yari iyobowe na Adrien Niyoshuti, ikabamo Areruya Joseph, Ndayisenga Valens na Nsanzimana Jean Bosco. Ariko iyi nayo ntabwo yabashije kwegukana umudari wa zahabu kuko yarushijwe amasegonda 17’’20 na Eritereya yabaye iya mbere ikoresheje 51’28’’28 ku ntera ya kilometer 40 mu gihe Algeria yabaye iya 3 isizwe amasegonda 46’’87.

JPEG - 112.3 kb
Ikipe ya Ethiopia nayo yitwaye neza

Biteganijwe ko kuri uyu wa Kane iyi shampiyona izakomeza aho hazaba hakinwa icyiciro cyo gusiganwa n’isaha buri muntu ku giti cye. Ahazakomeza gukoreshwa umuhanda wa Kicukiro-Nyamata wanifashishijwe kuri uyu munsi wa mbere.

Nyuma y’uko ku wa Gatanu bazaba bafashe akaruhuko, ku wa Gatandatu iyi shampiyona izakomeza hakinwa icyiciro cyo gusiganwa mu muhanda ngimbi, abangavu n’abagore (Road Race) na ho ku cyumweru hasiganwe mu muhanda mu bagabo bakuru n’abatarengeje imyaka 23 (Road Race), aha hakazifashishwa umuhanda wa Stade Amahoro (Mu migina)-Controle Technique-Hotel Le Printemps -Kimironko (deviation Kibagabaga) -Kibagabaga Hospital – Deviation Kinyinya – Mu Kabuga ka Nyarutarama (Kwa Ndengeye) – MTN Center – RDB – Mu Rwego – Airtel – Stade Amahoro.

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X