Monaco cosmetics
Ahabanza  >>  Amakuru Yose >> Hirya no Hino >> Mu Rwanda >> 

Gasabo:Akurikiranywe n’ubutabera akekwaho gukora amafaranga

Rutikanga Philbert ari mu maboko y’ubutabera akurikiranyweho gukora amafaranga yarangiza akayakwirakwiza mu baturage.

Polisi y’u Rwanda irakangurira abanyarwanda kwirinda icyaha cyo gukora no gukwirakwiza amafaranga y’amiganano, kandi bakagira uruhare mu kubirwanya batanga amakuru y’ababikora.

Ubu butumwa butanzwe kubera ko hari abayafatanwa hirya no hino mu gihugu.

Urugero rwa hafi ni urwo mu karere ka Gasabo, aho Polisi yafatanye Rutikanga Philbert ibihumbi icyenda by’amafaranga y’u Rwanda y’amiganano agizwe n’inoti imwe y’ibihumbi bitanu n’ebyiri za bibiri.

Yafatiwe mu kagari ka Rukiri ya kabiri, ho mu murenge wa Remera ku itariki 17 Nzeri biturutse ku makuru yatanzwe n’umucuruzi yahaye imwe muri izo noti z’inyiganano.

Agaruka ku buryo Rutikanga yatawe muri yombi, Umuvugizi wa Polisi y’u Rwanda mu Mujyi wa Kigali, Superintendent of Police (SP) Emmanuel Hitayezu yagize ati:"Uwo mucuruzi akimara gutahura ko amafaranga ahawe na Rutikanga ari amiganano, yahise abimenyesha Polisi, hanyuma imufashe, imusangana izindi noti z’inyiganano."

Mu butumwa bwe, SP Hitayezu yagize ati:"Amafaranga y’amiganano ateza igihombo umuntu uyahawe. Buri wese arasabwa kugira uruhare mu kurwanya ikorwa n’isakazwa ryayo atanga amakuru y’ababikora."

Yavuze ko Rutikanga afungiye kuri Sitasiyo ya Polisi ya Remera ndetse n’ayo mafaranga yafatanwe akaba ari ho ari mu gihe iperereza rikomeje.

Yagiriye abantu inama yo gusuzuma amafaranga bahawe mbere y’uko uyabahaye agenda, kandi baramuka batahuye ko ari amiganano bakabimenyesha Polisi y’u Rwanda.

Ingingo ya 601 yo mu gitabo cy’amategeko ahana ibyaha mu Rwanda ivuga ko umuntu wese, ku bw’uburiganya wigana,uhindura cyangwa wonona amafaranga y’ibiceri akoreshwa mu Rwanda cyangwa mu mahanga, impapuro zifite agaciro k’amafarangay’igihugu zisinywe na Leta, ziriho tembure yayo cyangwa ikirango cyayo, inoti zemewe cyangwa izindi mpapuro zikoreshwa mu Rwanda cyangwa mu mahanga, n’uzana cyangwa ukwiza mu Rwanda izo mpapuro n’izo noti azi ko ziganywe cyangwa ko zahinduwe, ahanishwa igifungo kirenze imyaka itanu kugeza ku myaka irindwi.

Ingingo ya 602 yo muri icyo gitabo ivuga ko umuntu wese ukora ibyaha biteganyijwe mu ngingo ya 601 y’iri tegeko ngenga mu rwego mpuzamahanga, ahanishwa igifungo kuva ku myaka irindwi kugeza ku myaka icumi .

Nkindi Alpha

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X