Monaco cosmetics
Ahabanza  >>  Amakuru Yose >> Hirya no Hino >> Mu Rwanda >> 

Turukiya n’u Rwanda bigiye gufatanya mu gutsura umubano.

Leta y’u Rwanda na leta ya Turukiya bigiye gufatanya mu nzego zitandukanye zirimo uburezi, ubukungu na politi. Ibi bikaba byabimburiwe no gufungura ambasade ya Turukiya mu Rwanda ku nshuro ya mbere.

Minisitiri w’ububanyi n’amahanga wa Turikiya na Minisitiri w’ububanyi n’amahanga w’u Rwanda Louise Mushikiwabo, basinyanye amasezerano y’ubufatanye agamije iterambere hagati y’ibihugu byombi mu burenzi, imigenderanire ndetse n’imikoranire hagati ya za Minisiteri z’ububanyi n’amahanga z’ibihugu byombi.

Uyu muhango wabereye ku cyicaro cya Minisiteri y’ububanyi n’amahanga y’u Rwanda, aho Ministiri w’ububanyi n’amahanga wa Turikiya Mevlüt Çavuşoğlu uri mu ruzinduko mu Rwanda yagiranye ibiganiro na Minisitiri w’ububanyi n’abahanga w’u Rwanda bigamije kongera ubufatanye hagati y’ibihugu byombi.

JPEG - 35.8 kb
Minisitiri w’ububanyi wa Turukiya Mevlüt Çavuşoğlu na Louise Mushikiwabo Minisitiri w’ububanyi n’amahanga w’u Rwanda basinya amasezerano y’ubufatanye

Minisitiri w’ububanyi n’amahanga wa Turikiya Mevlüt Çavuşoğlu yavuze ko yishimira ubufatanye igihugu cye gikomeza kugirana n’u Rwanda by’umwihariko ndetse na Afurika muri rusange, ashimangira ko bazakomeza kwibanda ku gushora imari mu Rwanda .

Ati:”Umugabane wa Afurika ni ingenzi, ufite ibintu by’ingenzi mu bubanyi n’amahanga bwacu ,igihugu cyanyu cy’u Rwanda ni kimwe mu bihugu by’ingenzi kuri twebwe muri Afurika, twishimiye kandi gufungura Ambasade yacu hano I Kigali no muri Accra(muri Ghana)."

Yakomeje agira ati:"Tuzagerageza kongera ishoramari, turabashimira uko mwagiriye icyizere kampani y’Abanya Turikiya imwe mu ma kampani ya Turikiya yubatse inzu ya Kigali Convention center ikazakira inama ya Afurika izakurikiraho. Kandi twishimiye ko u Rwanda ruhinduka, rutera imbere ruyobowe na Perezida Kagame, twizera ko igihugu cyanyu cy’u Rwanda kizakomeza guzamuka mu ngeri zose kigahinduka kimwe mu bihugu ngenderwaho.”

Aya masezerano Turikiya yasinyanye n’u Rwanda kandi ashingiye ku guteza imbere imigenderanire y’ibihugu byombi aho yitezweho ko azafasha amasosiyete y’indege y’ibi bihugu harimo Turkish Airway ku ruhande rwa Turikiya ndetse na Rwanda Air ku ruhande rw’u Rwanda mu ngendo zizajya zikorera mu bihugu byombi.

Minisitiri Mushikiwabo yavuze ko ubu bufatanye ari ingenzi hagati y’ibihugu byombi, avuga ko bidashingiye gusa muri izi nzego 3 basinyanye ahubwo ko binashingiye no mu kuzamura ubukungu hagati y’ibihugu byombi. Minisitiri Mushikiwabo yongeyeho ko mu Rwanda hari amahirwe menshi abacuruzi b’Abanyaturikiya babyaza umusaruro abakangurira gushora imari mu Rwanda.

Ati:”Hari amahirwe menshi abacuruzi b’abanya Turikiya bagirira hano mu Rwanda, amakampani ya Turikiya ubu ngubu yatangiye gukorera mu Rwanda mu bijyanye n’ingufu z’amashanyarazi.

Abacuruzi b’abanya Turikiya hari amahirwe menshi y’ibyo bakora hano mu Rwanda tuzabiganiraho. Turareba amahirwe menshi mu bukungu harimo guhugura mu rwego rw’ubuganga ,mu bwubatsi n’ibindi.”

Aya masezerano ibihugu byombi byashyizeho umukono, aje yiyongera ku yo baherutse gusinyana harimo n’ubufatanye mu by’umutekano biciye mu ngabo z’igihugu.

Aba baminisitiri bombi basoje uyu muhango bahita bajya gufungura ku mugaragaro inzu zikorerwamo na Ambasade ya Turikiya mu Rwanda ibintu bizakemura ibibazo by’abashakaga serivise zivuye muri iyi Ambasade bakarinda kujya kuzishakira muri Kenya aho ambasaderi wa Turikiya mu Rwanda yakoreraga.

Nkindi Alpha

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X