Monaco cosmetics
Ahabanza  >>  Amakuru Yose >> Imyidagaduro >> Hanze y’u Rwanda >> 

Chris Brown yirengagiza abamushinja gukubita umugore i Mombasa aririmba yivuye inyuma

Umuririmbyi ukomeye ku Isi Christopher Maurice (Chris Brown) yaririmbiye mu Mujyi wa Mombasa mu ijoro ryo kuri uyu wa 8 Ukwakira 2016, igitaramo cye cyabanjirijwe n’inkundura y’abantu basabaga Leta ya Kenya kumuhambiriza.

Chris Brown yageze mu Mujyi wa Mombasa mu gitondo cyo kuri uyu wa Gatandatu aherekejwe n’ikipe y’abantu bake bita ku nyungu ze. Agisohoka mu kibuga cy’indege cya Moi International Airport ku rubuga rwa Twitter hatangiye gucicikana amagambo y’abavugaga ko uyu muhanzi yinjiye mu gihugu ahita ahohotera umugore wamusabye ko bifotozanya undi aho kumwemerera ahita ajanjagura telefone.

Inkuru zavugaga ko Chris Brown yamennye telefone y’umugore zakwirakwijwe cyane bikimara gutangazwa ko ‘ageze muri Kenya’. Igusa abateguye igitaramo bagize Mombasa Rocks batangaje ko ‘ibyanditswe byose ari umugambi wacuzwe n’abari bagamije kuburizamo igitaramo cy’uyu muhanzi’.

Umuyobozi ushinzwe iyamamaza bikorwa muri Mombasa Rocks, Adda Justin yavuze ko ‘ibyatangajwe byaturutse ku gatsiko k’abantu biganjemo abakoresha imbuga nkoranyambaga bo mu Mujyi wa Nairobi biturutse kuri bamwe mu batari bishimiye kubona Chris Brown i Mombasa’.

Chris Brown ntiyigeze avuga ku magambo n’ibitutsi abantu bo muri Kenya bamwoherereje cyo kimwe n’abasabaga leta ko yamuhambiriza nka ‘Koffi Olomide aryozwa guhohotera umugore’, amaze kuruhuka yakoze imyitozo ya nyuma yitegura igitaramo cye ndetse cyitabiriwe ku rwego rukomeye n’abafana bataha baryohewe.

Igitaramo cya Chris Brown cyabereye ku kibuga cya Mombasa Golf Club ku nkombe z’inyanja y’Abahinde, cyitabiriwe n’abiganjemo urubyiruko na bake bakuze. Uyu muhanzi wahoze akundana na Rihanna yabanjirijwe na Navio wo muri Uganda, Nazizi wari umaze igihe atumvikana muri Afurika y’Uburasirazuba, Ali Kiba wo muri Tanzania, Vanessa Mdee na Wizkid.

Aba bahanzi bose bishimiwe mbere y’uko Wizkid na Chris Brown baririmba ariko ukumva mu bafana hagati bavuga cyane ko bifuza Wizkid abandi bakazamura amajwi bavuga Chris Brown. Aba bombi kandi ni bo bahanzi basa n’abari bahanzwe amaso na benshi mu bitabiriye iki gitaramo.

Wizkid uherutse kuririmbira i Kigali yageze imbere y’abafana ahagana saa tanu n’iminota 30 ku isaha y’i Mombasa, yaririmbye mu gihe kigera ku minota 40. Ali Kiba yahise aza aririmba indirimbo ebyiri itsinda rya Chris Brown rihita rimuvanaho kugira ngo atica gahunda y’umuhanzi wabo.

Chris Brown yaririmbye mu gihe kigera ku masaha abiri ataruhutse, indirimbo ze zakunzwe mu myaka yatambutse hafi ya zose yaziririmbye. Nta mucuranzi yari afite, yari aherekejwe n’ababyinnyi babiri ubundi agashyiramo CD bagakata umuziki gusa ibitero bimwe na bimwe yabiririmbaga ariko ijwi ryumvikanagamo umunaniro.

Indirimbo ze zishimiwe cyane harimo iyitwa Zero, Beautiful People, Royal, Turn Up the music, Little more, Deuces n’izindi. Yanze kugaruka ku magambo y’Abanyakenya biriwe bashyiditse basaba Leta ko imwirukana ahubwo yashimwe agira ati "Mombasa mwanyeretse urukundo rudasanzwe, ndabakunda bantu banjye.

Yongeye kwibutsa abakunda umuziki muri iki gihugu ko ‘ibyiza bamukorera abibona uko bwije n’uko bucyeye’. Chris Brown yasubiyemo kenshi ko ‘yishimye cyane kandi ko azakomeza guha abafana be muri Afurika icyo bakeneye.’

Abashinzwe kurinda umutekano wa Chris Brown bagiranye amakimbirane n’abanyamakuru ubwo yaririmbaga bababuza gufata amashusho n’amafoto mu gice cyegereye aho yaririmbiraga, byageze nyuma banavuga ko nta wemerewe kongera gufata amafoto ndetse bahanuraga abagiye gufotorera ahirengeye.

Abateguye igitaramo cya Chris Brown i Mombasa bahise batangaza ko nyuma y’igihe gito bagiye gutangira imyiteguro y’urugendo rwa Nicki Minaj na we uzaharirimbira bidatinze.

Igitaramo Nicki Minaj azakorera muri uyu mujyi ngo cyagizwemo uruhare na Guverineri wa Mombasa , Hassan Joho. Uyu ni na we wishyuye Chris Brown na Wizkid, banamushimiye cyane.

Kugira ngo yemere kuza kuririmbira i Mombasa, Chris Brown ngo yahawe amadolari ibihumbi magana arindwi gusa ngo yari yabishyuje ay’umurengera babanza kunaniranwa kugeza ubwo bemeranyije ko azaza ariko ntaherekezwe n’ikipe nini akaririmbira kuri CD.

JPEG - 122.6 kb
Abari bayoboye iki gitaramo
JPEG - 98.2 kb
Vanessa Mdee
JPEG - 104.6 kb
Navio
JPEG - 55.1 kb
Wizkid
JPEG - 58.7 kb
Chris Brown

Kanda hano udukurikire kuri Facebook na Twitter

Ibitekerezo

wemba - 10/10/2016 saa 19:23

Ahaaa, byashoboka ko yamumereye nabi, uyu mu type azwiho kutihangana na gato.
Kanda hano umusubize

c - 10/10/2016 saa 07:34

Kosora uwo Ni Naziz si navio hindura ifoto birashoboka cyane kuko abahanzi ba mombasa baba basa nabahanganye naba nairobi kuburyo iyi propaganda byoroshye cyane kuyikora.
Kanda hano umusubize

c - 10/10/2016 saa 07:30

Kosora uwo Ni Naziz si navio hindura ifoto birashoboka cyane kuko abahanzi ba
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X