Monaco cosmetics
Ahabanza  >>  Amakuru Yose >> Ubukungu >> 

Ifaranga ry’u Rwanda ryongeye guta agaciro ku rwego rutarabaho mu myaka 10 ishize

Banki Nkuru y’u Rwanda, BNR iratangaza ko ifaranga ryongeye guhungabana ku kigero cyo hejuru kitigeze kibaho mu myaka 10 ishize nk’uko bimeze muri iki gihe.

Muri iyo myaka, ryataga agaciro ku mpuzandengo iri munsi ya 5% ku mwaka ariko bigeze mu mwaka ushize wa 2015, ifaranga ry’u Rwanda ryataye agaciro ku gipimo cya 7.5%, ndetse byanakomeje mu gice cya mbere cya 2016.

JPEG - 43.3 kb
John Rwangombwa Guverineri wa Banki nkuru y’u Rwanda

Ubwo BNR yagaragarizaga Abanyarwanda n’abanyamahanga imiterere y’ifaranga ry’u Rwanda n’iy’urwego rw’imari muri rusange wa Kane tariki ya 25 Kanama 2016, Guverineri Rwangombwa yavuze ko ibyo igihugu gitumiza hanze byatangiye kuzamuka muri 2005, nyamara ibyoherezwayo bihama ari bike, bikaba byarateye ikinyuranyo mu bucuruzi.

Yanasobanuye ko imishinga ya Guverinoma iba ifatanyije n’urwego rw’abikorera ikenera amafaranga menshi ava ku isoko ryo mu gihugu.

Avuga ko kuba ibyoherezwa hanze bitinjiza amafaranga menshi, bitavuze ko ari bike mu ngano, ahubwo ari uko habaye kugabanuka kw’ibiciro ku masoko mpuzamahanga.

Urugero ku mabuye y’agaciro na kawa u Rwanda rukunze kohereza mu mahanga byinjizaga amadovize menshi, ikilo kimwe cya koluta cyagabanutseho 25% mu giciro, wolufuramu yagabanutseho 38% ku kilo, gasegereti yo yagabanutseho 6% ku kilo. Igiciro cya kawa, cyo cyagabanutseho 10.9 ku kilo ku isoko mpuzamahanga.

Guverineri Rwangombwa ati “Ibyo twohereza mu mahanga byarazamutse, ariko amafaranga avayo ni make. Abasaba idolari ni benshi”.

Uko ifaranga ryagiye rita agaciro

Muri rusange, BNR ivuga ko ifaranga ry’u Rwanda ryataye agaciro ku gipimo cya 6.9% ku wa 16 Kanama 2016, maze idolari rigera ku kuvunjwa amafaranga y’u Rwanda 799.20 rivuye ku mafaranga y’u Rwanda 747.41 mu mpera z’Ukuboza umwaka ushize wa 2015. Ni mu gihe ifaranga ry’u Rwanda ryari ryarataye agaciro ku gipimo cya 4.6% mu mpera za Kanama 2015.

Muri kiriya gihe cyavuzwe, ifaranga ry’u Rwanda ryataye agaciro ku riyero (Euro) ku gipimo cya 9.4%, rigata ku gipimo cya 7.8% ku ishilingi rya Kenya, rigata ku gipimo cya 5.5% ku ishilingi rya Tanzania, rinagata ku gipimo cya 6.7% ku ishilingi rya Uganda.

Ku ifaranga ry’u Burundi, ifaranga ry’u Rwanda ryiyongereye agaciro ku gipimo cya 2.0%, kaniyongera ku ipawundi (Pound) ry’Ubwongereza ku gipimo cya 7.0%.
Mu rwego rwo gufasha amabanki y’ubucuruzi, BNR itangaza ko yongereye uko yajyaga igurisha amadolari ku mabanki ho 40.8%, maze iva ku madolari y’Amerika miliyoni 111.5 muri Kamena 2015, igera ku madolari miliyoni 157.0% muri Kamena 2016.

Guverineri wungirije wa Banki Nkuru y’u Rwanda, Nsanzabaganwa Monique, avuga ko ifaranga ry’u Rwanda rikiri ku rwego ryari risanzweho mu bihugu byo mu karere.
Ati “Mu by’ukuri, nta bwo twari twatandukira bijyanye n’aho duhagaze bitewe n’abo duhahirana, n’abaturanyi Ifaranga ryacu riri ahantu rigomba kuba riri.”

Guverineri John Rwangombwa we avuga ko uko ibintu bimeze atari bibi. Agira ati “Biba bibi iyo uko kuzamuka kw’igiciro cy’idolari bidashingiye ku bipimo by’ubukungu.”
Avuga ko abantu batagombye gufata guta agaciro k’ifaranga nk’ikintu gikomeye cyane. Asaba Abanyarwanda kutita kuri byacitse, kuko nta gikuba cyacitse igihe uku guta agaciro bijyanye n’ibindi bipimo by’ubukungu

Nkindi Alpha

Kanda hano udukurikire kuri Facebook na Twitter

Ibitekerezo

KAMALI Alphonse - 28/08/2016 saa 17:56

Ukuri ku isoko ibintu birahenda pe, imyaka yo se nta kubwira. Abahanga nibasuzume icyakorwa ifaranga ryacu rikomeze kuba "stable". Murakoze.
Kanda hano umusubize

Alp M - 17/09/2016 saa 22:09

Nunganiye Alphonse Nibyo Koko Ifaranga Ryacu Ribuze Agaciro None Nkabantu Baturebera Kure Mwareba Icyakorwa Rikongera Rikagira Agaciro Murakoze.
Kanda hano umusubize

value - 23/10/2016 saa 23:12

NUKO.IBYOKURYA.BYA.BUZE.KUBERAIZUBA.RYATSE.KARE.MURAKOZE!
Kanda hano umusubize

xx - 27/08/2016 saa 08:06

none se ko bavugaga ko caguwa iriyo itera igwa ry'ifranga ry'u rda none ikaba itari kuza rikaba rikomeje,none mwayiretse igakomeza kuza tukareba ko haricyo byamara kuko ubushomeri nabwo bwiyongereye mubayicuruzaga kandi nibenshi cyanee twabuze icyo twahinduriramo akazi namasoko twakoreragamo nayo isigayemo ubusa twabuze imisoro ,murakoze mugihe dugitegereje igisubizo kiza muzaduha nkuko mudahwema kudushakira ibyiza.
Kanda hano umusubize

- 27/08/2016 saa 14:50

murales ha
Kanda hano umusubize

Alp M - 17/09/2016 saa 22:26

Ifaranga Ry'u Rda Ribuze Agaciro None Ubushomeri Buriyongera Mu Batura Rda Turajya Mwiso Tukabura Ibyo Duhaha Amafaranga Ntakintu Agihaha Abacuruzi Ntitukibona Ibicuruzwa Tukaba Tubasaba Ubufasha Muturebere Igikwiye Ifaranga Risubirane Agaciro Karyo Murakoze.
Kanda hano umusubize

cyane - 26/08/2016 saa 17:43

Canga ikarita mzee
Kanda hano umusubize

elineste - 26/08/2016 saa 16:14

Mugabanye amatiku nu burundi ifaranga naryo rizaboneraho rigire agaciro
Kanda hano umusubize

Rungano - 26/08/2016 saa 16:11

Niba riri aho rigomba kuba riri rero ndumva leta yashyiramo ingufu rikahaguma. Esubundi bitunaniza iki kumugani wa Byumvuhore?
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X