Monaco cosmetics
Ahabanza  >>  Amateka n’umuco >> 

Ese waba uri umusinga?, umwega?...,Dore byinshi ku moko y’abanyarwanda.

U Rwanda rwo hambere rwari rugizwe n’uduce twinshi dutandukanye aho agace kabaga kagizwe n’ubwoko bwihariye. wasangaga buribwoko bwabaga butuye ahantu habonyine ndetse ugasanga bufite ubuyobozi bwihariye bwabwo ndetse ugasanga n’ubwo buyobozi bufite izina ry’ingoma yabo. Nyuma kubera u Rwanda rwari rufite gahunda yo kugenda rwagura I gihugu rwagiye rwigarurira utwo duce twose aribyo baje kubyara u Rwanda tuzi ubu.

Turebe ubwo bwoko aho bwabaga n’ingoma duhereye ku bwoko bw’abazitegekaga

1. Abenengwe
Ingoma yabo yitwaga Nyamibande. Bategekaga u Bungwe. Ni igihugu cyabumbaga u Busanza bw’amajyepfo, u Bufundu, Nyaruguru, Bashumba, Nyakare, u Buyenzi. Ikiranga bwoko cyabo cyari ingwe. Umwami wari uriho ku mwaduko w’Abanyiginya yari Rwamba akaba yari atuye mu bya Nyakizu muri Butare. Hari abamukomokaho bitwa Abenerwamba. Undi mwami w’umwenengwe wategekaga igihugu cye kijya gutsindwa n’u Rwanda ni
Samukende, umugabo wa Nyagakecuru ko mu Bisi bya Huye. Umuhungu w’uwo Samukende, ari we Rubuga, yaratsinzwe maze igihugu cye kigarurwa n’u Rwanda.
2.Abasinga
Abasinga Ingoma yabo yitwaga Mpatsibihugu. Bakunze kuvuga ko akarerebari barimo kari kagari cyane. Twibuke ko Abasinga bari ugutatu: ab’ibanze ari bo Basinga b’abasangwabutaka hakaba n’abandi baje nyuma y’Abanyiginya, ari bo
Abanukamishyo n’Abagahe. Abo Basinga b’abasangwabuta banabitaga “Ababyarabami”, kuko abami ba mbere barindwi b’u Rwanda bikurikiranyije bavuka ku Basingakazi. Umwe mu bami babo w’igihangange ngo yitwaga Rurenge. Ibyo byatumye bamwe banabita Abarenge; ni ukuvuga ariko inzu ivamo abami babo nk’uko tuvuga Abahindiro (Abanyiginya).
Igihe cy’umwaduko w’Abanyiginya, umwami w’umusinga yari Jeni rya Rurenge. Mu by’ukuri bamuvugaho byinshi bisa n’imigani. Icyakora ngo yari atuye ku Rwerere rw’I Bugoyi. Mbese yari akubye ubutaka bungana na Perefegitura ya Gisenyi, iya Kibuye, Bunyambiriri muri Gikongoro. Abasinga b’icyo gihe bari basakaye no mu zindi ntara zo muri Cyangugu y’ubu : Biru, Cyesha,Mpara, Busozo, Bukunzi. Mu karere k’amajyaruguru ya Kivu, hari intara zari ziganjemo Abasinga: Bwishya, Jomba, Gisigari, Bwito, Gishari, Byahi na Kamuronsi. Abasinga babarizwaga no mu Burwi (Mvejuru na Buhanga-Ndara muri Butare y’ubu). Nta gitangaje rero kuba abitwa Abasinga kuri iki gihe ari bo benshi mu moko y’u Rwanda mu ijanisha.

3. Abazigaba
Ingoma yabo yari Sera. Umwami wabo ku mwaduko w’Abanyiginya yari Kabeja, akaba umwami wo mu Rweya (abandi bati: wo mu Mubari). Bavuga ko Abazigaba baje baturuka mu by’ikiyaga cya Victoria (Vigitoriya). Twibuke ko no mu burengerazuba bwa Tanzaniya hari Abazigaba batari bake, cyane mu bya
Karagwe.

4. Abagesera
Ingoma yabo yari Rukurura. Igihugu bategekaga ni Gisaka (Gihunya, Mirenge na Migongo). Izina ryabo rifitanye isano n’iry’ikiyaga cya Mugesera. Hari n’abavuga ko u Bugesera bwigeze gutegekwa n’Abagesera.

5.Abacyaba
Ingoma yabo yari Rugara. Igihugu bategekaga cyitwaga Bugara kikabumba
amahugu akikije ibiyaga bya Burera na Ruhondo, kigashora kuri Mukungwa na Base. Hari n’akarere kagiye mu ruhande rwa Uganda. Umwami wamamaye wabo ni Nzira ya Muramira umwami w’u Bugara wahiritswe ku mayeri na Ruganzu Ndori wigize “ Cyambarantama Izina “ Cyambarantama turisanga no mu migani y’u Burundi bita “ibitito” : uwo Cyambarantama w’i Burundi akora ibintu by’amayeri nk’ibyo bavuga kuri Ruganzu Ndori. Ntibyoroshye rero kumenya ukuri kw’itsindwa ry’icyo gihugu cy’u Bugara.
Abacyaba babarirwa kandi mu moko ya kera cyane mu Bugesera, nk’Abasinga, Abazigaba n’abandi.

6. Abungura Ingoma yabo y’ingabe yitwaga Kamuhagama. Nta wuzi igihugu batwaraga uko cyitwaga n’aho cyagarukiraga. Ariko ikidashidikanywa ni uko
icyo gihugu cyari kigizwe n’utu turere : Bumbogo, Buriza, Busigi, Bwanacyambwe. Birashoboka ko Abungura bategekaga n’igice cy’u Buganza ndetse n’u Rukaryi rutarigarurirwa n’Abahondogo bo mu
Bugesera.

7. Ababanda
Ingoma yabo y’ingabe yitwaga Nyabahinda. Igihugu cy’Ababanda cyitwaga Nduga. Bakundaga kuvuga ngo “ Nduga ngari ya Gisari na Kibanda ”. Gisari ni muri Komini Ntongwe naho Kibanda iri muri Komini Nyamabuye. ”Ndu ngari” yari ibumbye uturere twose twa Perefegitura ya Gitarama, ukongeraho Komini
Nyabisindu (Busanza-Nord), Shyanda, Ntyazo na Muyira zo muri Butare.
8. Abahondogo
Bo mu Bugesera Mu bihugu byabanjirije u Rwanda rw’Abanyiginya, A. Kagame nta mwanya yazigamiye u Bugesera bw’ Abahondogo. Ibyo birumvikana kuko kuri we uwahanze ingoma y’u Bugesera ari we Kanyabugesera, ari mwene Gihanga; bityo rero akaba umuvandimwe wa Kanyarwanda, akabarirwa muri bene wabo b’Abanyiginya.

Igitabo cya Padiri Léon Delmas (Delimasi) wabaye i Nyanza ibwami akora ubushakashatsi mu cya 1940, ahamya byinshi mu gitabo cye “Généalogie” (Jeneyaloji), ndetse nikindi gitabo kitwa R.D.R., UMURAGE W ’AMATEKA nibyo twifashishije mu kubagezaho iyi nkuru.

yanditswe na: NIYIRORA Christian

Kanda hano udukurikire kuri Facebook na Twitter

Ibitekerezo

NDARUGANJE - 17/03/2018 saa 12:51

Mwatubwiye ku bassinga b' Abagahe ???
Kanda hano umusubize

UMWIZA BELLA - 23/12/2017 saa 09:28

ngewe amoko yose sinyemera kuko Imana yaremye umuntu umwe gusa.n'umugore yamukuyemurubavu rw'uwoyariyamazekurema.bisobanura ko Imana Yaremye umuntu umwe gusa.
Kanda hano umusubize

Mazimpaka Sonny Joseph - 20/12/2017 saa 19:59

Christian ko utatubwiye Ku Bega c , ubutaha uzatuvire i Muzingo abavu n' amavuko y' ubwoko bw' Abega.
Kanda hano umusubize

Damascene - 2/01/2018 saa 00:59

Njye Ndemeyepe! Uza Tubwire Nibya Ryangombe Kuko Numva Biteye Ubwoba Kbs.
Kanda hano umusubize

didier - 17/12/2017 saa 08:44

ko mutadusobanuriye kubega
Kanda hano umusubize

- 16/12/2017 saa 12:07

inkuru nkizi ziba zikenewe nka young generation ngo ibashe kumenya amateka
Kanda hano umusubize

MIGAMBI Joel - 16/12/2017 saa 10:28

ko mutatubwiye ku bwoko bwabanyenduga hamwe nabasindi
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X