Monaco cosmetics
Ahabanza  >>  Amateka n’umuco >> 

Urujijo kuri Pyramides zigaragara mu Nyanja ya Atlantics hakunze kurigitira amato n’indege bitagira ingano

Iyi si dutuye ifite amabanga menshi, hari byinshi bigoye gusobanura, hari uduce duhishe ibyananiwe gusobanurwa n’abashakashatsi ndetse n’abahanga benshi.Turagaruka ku gace ka Mpandeshatu ya Bermude (Triangle des Bermude-Bermuda Triangle ) izwi ku izina rya Mpandeshetu y’Amashitani.


Triangle des Bermude/Bermuda Triangle

Ni kenshi wagiye wumva ibivugwa kuri aka gace,ni inkuru nyinshi zanditswe kuri Triangle des Bermude(niryo zina turi bukunde gukoresha), ibyegeranyo byinshi byagiye bikagarukaho. Ni kuki aka gace gakunda kuvugwa cyane?Indege,amato n’abantu bahaburira biterwa n’iki?Haba hari imbaraga zidasanzwe ziri muri kariya gace?Ibivejuru bihavugwa bihurira he n’izimira ry’amato n’indege ndetse n’bantu baba babirimo?

Aho gaherereye
Triangle des Bermude/Bermuda Triangle ni igice kinini giherereye mu nyanja. Triangle des Bermude iherereye mu Burengerazuba bw’Amajyaruguru y’inyanja ya Atlantique. Iyi mpande eshatu iherereye hagati ya Florida, Puerto Rico, n’agace ka Bermuda .
Ubuso bwayo bugenda buhindagurika bitewe n’abanditsi bayandikaho ariko ubuso bwayo bubarirwa hagati ya kilometero kare 500.000 na 4.000.000. Bivugwa ko aka gace kaba karavumbuwe na Juan De Bermudez muri 1515, ubwo yavumburaga ibirwa bito cyane byegeranye(Archipel).

Aka gace gakora kuri leta ya Florida muri leta zunze ubumwe z’ Amerika, ku kirwa cya Bermuda no ku birwa bya Bahamas kanyurwamo n’amato menshi ava i Burayi no muri Karayibe ajya muri Amerika.

Iki kirere kandi gikunda kunyurwamo n’indege nyinshi z’ubucuruzi ziva muri leta ya Florida zerekeza mu birwa bya Karayibe. Ikinyamakuru Livescience muri 2014 cyatangaje ko kugeza n’ubu igisirikare cya Amerika cyo mu mazi(U.S Navy) kitemera ko aka gace Triangle des Bermude kabaho ndetse ntanubwo kagaragazwa ku makarita yakozwe n’urwego rubishinzwe muri Amerika(U.S. Board on Geographic Names)

Amateka y’ibura ry’indege, amato n’abantu babaga babitwaye
Iyi Triangle kandi izwiho kwitwa iya sekibi(The Devil’s triangle) kuko indege nyinshi ndetse n’amato byakunze kuhaburira mu buryo budasobanutse ntihongere kugaragara n’ibisigazwa byabyo. Kuburirwa irengero kw’amato n’indege muri aka gace si ibyubu.

Urubuga Gizmodo rwatangaje ko 1492 mu kwezi kw’Ukwakira, Christopher Colombus ubwo yari mu rugendo ariwe muntu wa mbere wabanje kubona ibintu by’amayobera muri aka gace. Ubwo bari mu rugendo hagati, yabonye ko akuma kamwerekaga amerekezo(Compass) katari kacyerekana amajyaruguru ,ibintu ubundi bidasanzwe kuri aka kuma.

Nyuma yo kubibona yirinze kubibwira abo bari kumwe mu rugendo. Nyuma y’iminsi 3, bakiri muri Triangle des Bermudes, Christopher n’abo bari kumwe babonye urumuri rudasanzwe mu kirere, bagira ubwoba bamusaba ko basubira mu gihugu cya Espanye(Spain).

Ubwato bw’Abanyamerika bwitwa Pickering, bwabuze ahagana muri 1800 nibwo bwabaye ubwa mbere mu kuburirwa irengero muri Triangle des Bermude muri iki gihe turimo . Uko imyaka yicumaga niko amato n’abantu byakomezaga kuzimira.
Ibiburirwa irengero muri Triangle des Bermude byaje kwamamara ndetse binavugwaho cyane ku rwego mpuzamahanga ubwo indege 5 z’intambara z’abanyamerika(TBM Avenger) zari mu myitozo zaburirwaga irengero ku itariki 05 Ukuboza 1945.

Izi ndege zahagurutse ku kibuga cya Fort Lauderdale muri Florida, ku isaha ya saa munani na mirongo itanu z’amanywa(14h50) . Ikirere cyari cyiza , nyuma y’isaha n’igice bari mu rugendo, uwari ubayoboye(Charles Taylor) wari n’inzobere mu kugurutsa indege, yahamagaye avuga ko utwerekana amerekezo twe 2(compasses) twari tutagikora neza ko ndetse batari bazi aho bari. Nyuma gato abari bazitwaye bose baburiwe irengero nazo ubwazo.

Ubwato n’indege z’ubutabazi zihutiye kujya kuzishakisha ariko ntibagira icyo babona na kimwe. Byanditswe kandi n’ikinyamakuru Fate mu nkuru yacyo cyahaye umutwe wagiraga uti ‘ Sea Mystery at Our Back Door ‘, yanditswe na George X.

Indege 5 za gisirikare cy’Abanyamerika zaburiwe irengero muri 1945 nizo zatumye isi yose itangira kwibaza kuri Triangle des Bermude

Kubura kw’izi ndege n’imibiri y’abasirikare 14 bari bazirimo mu buryo budasobanutse kandi zari zimwe mu ndege mu zari zikomeye mu ntambara y’isi ya kabiri ni kimwe mu byatumye abantu batangira kwibaza ikintu cyaba kiri muri Triangle des Bermude , bituma ibyavugwaga kuri kariya gace bikomeza kwiyongera.

Igisirikare cya Amerika cyakomje gushakisha iherezo ry’izi ndege ariko ntizabasha kuboneka. Imiryango y’ababuze ababo niko yakomeje kotsa igitutu iki gisirikare. Nyuma hoherejwe indege irimo abasirikare 13 mu gushakisha ariko nayo irazimira.

Kubura kwa ziriya ndege za Avengers kandi mu buryo budasobanutse nibyo byatumye umwanditsi M. K. Jessup mu gitabo yanditse muri 1955 acyita’The Case for the UFO’ atunga intoki ibivejuru byo mu bwoko bwa Aliens ko aribyo byaba bitera kuzimira kw’ibintu n’abantu biburira muri Triangle des Bermude kuko ababuze bose ntamibiri yabo yagaragaye nyuma.

Izina Triangle des Bermude ryavuzwe bwa mbere muri 1964 n’umunyamakuru Vincent H.Gaddis mu nyandiko yahaye umutwe ugira uti ‘The Deadly Bermuda Triangle’ mu kinyamakuru magazine Argosy . Mu nyandiko ye, icyo gihe Gaddis yahamyaga ko nibura abantu 1000 bari bamaze kuburirwa irengero mu mazi ya kariya gace.

Ibibera muri Triangle des Bermude byatangajwe bwa mbere n’umunyamakuru Edward Van Winkle Jones mu nyandiko yasohowe n’ibiro ntaramakuru by’abanyamerika, Associated Press isohoka muri 1950.

Jones yatangaje amato n’indege zagendaga ziburira muri kariya gace harimo n’indege z’abanyamerika twavuze haruguru, indege y’ubucuruzi ‘Star Tiger’ yaburiwe irengero ku itariki 30 Mutarama 1948 naho indi yitwa Star Ariel ibura ku itariki 17 Mutarama 1949. Nkuko Jones yakomeje abitangaza mu nkuru ye, izi mpanuka zose zaguyemo abantu 135 ndetse akoresha ijambo ry’uko bamizwe bakaburirwa irengero.

Inkuru n’ibitabo byavugaga kuri Triangle des Bermude byasakaye cyane mu myaka ya 1970 harimo icyaguzwe cyane cyanditswe na Charles Berlitz, acyita ‘The Bermuda Triangle’. Muri 1974, umunyamakuru Howard Rosenberg wandikiraga ikinyamakuru Los Angeles Times yatanze imibare y’amato 190 n ‘indege 80 byaba byaraburiye muri kariya gace mu myaka yari yabanje ndetse akemeza ko abarindaga icyambu ku ruhande rwa Amerika (U.S. Coast Guard)nibura bakiriye ubutumwa 8000 bw’abantu babaga bari mu byago babatabaza.

Urutonde rw’amato, indege n’abantu baburiwe irengero muri Triangle des Bermude ni rurerure cyane ariko mu nyandiko yacyo’Vanishing planes, ghostly ships and daredevil hijacks: The greatest travel mysteries explained… and the ones that may never be solved’ yo mu kwezi kwa Gashyantare 2015, ikinyamakuru Daily Mail cyatangaje ko nibura buri mwaka indege 4 n’amato 20 biburirwa irengero muri kariya gace.

Indege Air Bus A330-200 y’Abafaransa muri Mutarama 2009 yakoze impanuka ihitana abantu 216 na 12 bari mu ikipe yatwaraga iyi ndege. Iyi ndege yagombaga kuva Rio De Janeiro muri Brezil yerekeje mu Bufaransa.

Yakoreye impanuka mu nyaja ya Atlantique hafi n’agace ka Triangle des Bemude nkuko byatangajwe n’ibiro ntaramakuru by’Abafaransa. Iyi ndege niyo iheruka kugwa hafi y’aka gace nubwo bamwe mu banditsi n’abashakashatsi bayibarira mu ndege zaguye muri Triangle des Bermude. Ijya kubura, ibyuma bicunga indege (radars) byayibuze ku manywa y’ihangu.

Muri 1975, umwanditsi Larry Kusche, yanditse igitabo acyita The Bermuda Triangle Mystery: Solved . Muri iki gitabo yavugaga ko abanditsi bamubanjirije kwandika kuri kariya gace bagiye bakabya mu mibare batangazaga ku bintu n’abantu byahaburiye.
Larry Kusche yifashishije amakuru yakuye mu gisirikare, ibitaro, amasosiyeti atanga ubwishingizi ndetse n’inyandiko zo mu binyamakuru bitandukanye, yatangaje ko abanditsi bamwe bagiye batangaza imibare irimo amakabyankuru kandi bataranigeze bakora ubushakashatsi bwimbitse.

Kubwe ngo hari ukuzimira kw’ibintu n’abantu bitaga amayobera kandi atari amayobera, ko ndetse hari ibyo batangaje ko byaburiye muri Triangle des Bermude atari naho byabereye.

Ikindi ngo aba banditsi batigeze bagarukaho, ngo ni uko batangaje ibyaburirwaga irengero ariko ntibagaruke ku miraba ikomeye yabaga iri mu nyanja mu gihe cyo kuzimira kw’amato yagiye aburira muri Triangle des Bermudes. Larry Kusche yatangaje ko abanditsi bashobora kuba barabikoraga babizi cyangwa batabizi cyangwa se bikaba byari uburyo bwo kwandika inkuru zizasomwa cyane.

Mu nyandiko yacyo yo mu kwezi kw’Ukwakira 2014 yari ifite umutwe ugira uti “Could Gas Explosions Explain Bermuda Triangle Mystery?, ikinyamakuru Livescience cyanditse ko ubushakashatsi bwakozwe bwagaragaje ko Gaz Methane iri muri kariya gace ishobora nayo kuba intandaro yo kurohama kw’amwe mu mato.

Gaz Methane iri muri Triangle des Bermude ngo ni nyinshi kuburyo hari igihe ijya izamuka ari nyinshi (Explosion)ikagera hejuru ku mazi. Ubwato iyo buri guca aho iyi Gaz yabaye nyinshi, ntibuba bukibashije gukomeza kureremba, ahubwo bumanuka nk’intosho bukagwa mu mazi. Ikindi bamwe mu bashakashatsi bemeje ko cyaba gitera kuzimira kw’amwe mu mato ari imiraba ikomeye ijya iba muri Triangle des Bermude .

Nubwo iyi Gaz ivugwa ntamushakashatsi urabasha gusobanura impamvu n’indege ziburira muri kariya gace. Bamwe mu bashakashatsi bagiye batanga ikirere kibi nka zimwe mu mbogamizi indege zagiye ziburira muri kariya gace zahuye nacyo.

Nyamara indege nyinshi zahaburiye , abari bazitwaye, bumwe mu butumwa bakundaga gutanga mbere yo kuzimira kuva kuri za ndege za gisirikare z’Abanyamerika, bose bakunze kuvuga ko iyo bageraga muri kiriya kirere baburaga amerekezo nkuko byagendekeye Christopher Columbus.

Ikindi kivuguruza ko ikirere kibi kitaba mu mpamvu z’izimira ry’indege, ni uko ubwo za ndege 5 twabonye haruguru zari mu myitozo, ikirere cyari cyiza cyane, gusa ziza kuzimira. Indi mpamvu itangwa mu kuzimira kw’indege n’ubwato ni rukuruzi ibarizwa muri kariya gace ari nayo ngo ituma iyo utwuma twerekana amerekezo tuhageze tutogera gukora, ndetse iyo rukuruzi ikaba yaba ariyo ikurura indege n’amato.

Imiyaga n’imihengeri ikaze, ni zimwe mu mpamvu zitangwa na bamwe mu bashakashatsi nk’ibituma amato arohama muri Bermuda
Abemeza ko haba imbaraga z’ibivejuru bashingira kuki?

Hagati ya 1968-1970 umushakashatsi Raymond Brown, yatangaje ko yabonye Pyramides 2 (soma piramide) mu nyanja ya Atlantique ari naho agace ka Triangle des Bermude kabarizwa.

Ntamuntu wigeze amuhakanya cyangwa yemeze ukuri kw’ibyo yavugaga .Abashakashatsi b’Abanyamerika bafatanyije n’Abafaransa bemeje ko izi Pyramides zihari. Muri 2012, umuhanga mu bijyanye n’ubumenyi bw’inyanja(oceanographer), Dr. Meyer Verlag we yanatangaje ko ubunini bwazo bukubye inshuro 3 Kheops, Pyramide nini yo mu Misiri nyuma y’ubushakashatsi yakoreye muri Atlantique.

Dr. Meyer yemeje ko izi pyramide ziri muri kilometero 2 z’ubujyakuzimu, zikagira ubugari bwa metero 300 n’uburebure bwa metero 200. Hari ihuriro ry’izi Pyramides zivugwa mu gace ka Triangle des Bermudes n’ibura ry’ibintu n’abantu bibera muri kariya gace?

Igisubizo cyaba yego kuko abantu benshi niko babyemeza. Ubushakashatsi bwakozwe kuri izi Pyramides bwagaragaje ko zifite imbaraga zidasanzwe. Dr. Philip Callahan wize no kungufu zitangwa na Pyramides zo mu Misiri, yemeje ko ziriya zo muri Triangle des Bermude zibyara ingufu zitera imihengeri mu mazi . Ese izi mbaraga zazo zaba arizo zituma amato aburirwa irengero muri Triangle des Bermude?

Pyramides zasanzwe mu mazi hagati (centre)muri Triangles des Bermudes zongereye urujijo n’ibyibazwa kuri kariya gace
Raymond Brown wabanje kuvumbura ziriya Pyramides yakuyeyo ibuye rishashagirana rifite ishusho y’umubumbe(crystal sphere) yari azaniye abashakashatsi ngo baryigeho, gusa ngo mu kuvayo yumvise igicucucu cy’ikintu kitagaragara cyamubwiye kutazigera ahagaruka.

Ababashije gukora ku ibuye Raymond Brown yakuye muri imwe muri ziriya Pyramides, bemeje ko hari ibintu byababyeho harimo gukira indwara mu buryo budasanzwe. Iryo buye kandi ngo ryari rifite ubushyuhe n’ubukonje icyarimwe, kugira rukuruzi, n’ibindi.

Ninde wubatse ziriya Pyramides ziri mu mujyi wa Atlantis wazimiye mu myaka amagana ishize?Ikoranabuhanga ryubakanye ko ritaragerwaho no muri iyi minsi, ninde wazubatse?Ibuye ryakuwemo ko ryari ridasanzwe ryavuye he?Hari aho bihuriye n’ibivejuru bihavugwa ?

Muri 2014, mu bushakashatsi bwakozwe n’ubwato’Deep see’, kabuhariwe mu gushakisha ibintu byazimiye mu mazi, bwarangiye batabonye za ndege 5 z’abanyamerika zazimiye muri 1945 bizeraga ko nibura bari bubone ibisigazwa byazo.
Aho kubona ibisigazwa by’izi ndege, ababukoze bagiye babona bimwe mu bice by’amato n’indege byaguye muri kariya gace, gusa imibiri y’abahaguye itarimo.

Richard Crena wari uyoboye ikiganiro cyagaragarijwemo ibyavuye muri ubu bushakashatsi yashoje atangaza ko byanze bikunze hakiri byinshi bitarasobanuka kuri Triangle des Bermude nubwo hari ibyagerageje gusobanurwa byaba bitera kuzimira kw’amato n’indege zimwe na zimwe.
Richard Crenna asoza avuga ko umunsi uzabaho hakamenyekana ikintu nyakuri cyaba kiri muri Triangle des Bermude.


Zimwe mu ndege zaharigitiye

Kugeza nubu ntamushakashatsi uragaragaza ikintu nyakuri gituma zimwe mu ndege n’amato bizimirira muri kariya gace nubwo hatabura gukomeza kugendwa ariko abenshi bakaba batinya kariya gace.

Abdou Bronze

Kanda hano udukurikire kuri Facebook na Twitter

Ibitekerezo

gahindiro - 16/06/2017 saa 11:01

Mugomba kumenya ko Imana ari igitangaza kuko hari ibindi byinshi yaremye tutazigera tumenya.
Kanda hano umusubize

Nshimiyimana jeanclaude - 16/05/2017 saa 17:24

Muzatubwire nokumatekaya alishababu kanditurabashimiye kuabwaya wateka mutugeZAHO
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X