Monaco cosmetics
Ahabanza  >>  Amateka n’umuco >> 

Sobanukirwa amateka y’Umwami w’u Rwanda uzwi ku izina rya Kanyarwanda Gahima

Nk’uko tubikesha Igitabo “Imizi y’u Rwanda” cyanditswe na NSANZABERA Jean de Dieu , 2012 kivuga amateka amwe ya Kanyarwanda Gahima ,Kanyarwanda Gahima ,ni umwami w’u Rwanda wategetse ahasaga mu w’1124 kugeza mu w’1157, akaba abarirwa mu kiciro cy’abami b’umushumi. Izina Kanyarwanda nk’uko turyumva, ni izina rivuga nyir’u Rwanda, gusa n’ubwo abantu batandukanye bibwira ko izina u Rwanda ari iry’iki gihugu gusa ngo siko bimeze.


Izina u Rwanda usanga ryitwa n’uduce tumwe na tumwe two mu Rwanda ndetse no mu bihugu bihana imbibi narwo kuko ngo rimwe na rimwe iri zina ryanahabwaga tumwe mu turere u Rwanda rwabaga rumaze kwigarurira mu gihe cyarwo cyo kwanda (kwaguka).

Ingero zitandukanye nko muri Uganda ahitwa Busoga mu majyaruguru y’ikiyaga cya Victoriya ndetse n’agace ko hafi y’inkiko z’u Rwanda na Uganda bita u Rwanda rwa Gashara.
Uretse no hanze y’inkiko z’u Rwanda, no mu gihugu imbere naho hari uturere dutandukanye dufite iryo zina, nko mu Mutara aho bitaga mu Mubali hitwaga u Rwanda rwa Binaga ari naho haherereye rwa rutare rw’Ikinani tujya dusoma mu mateka ngo : Ibimanuka byamanukiyeho bwa mbere.

Izina u Rwanda turisanga kandi mu bice bya Gasabo hahoze hitwa Gikomero ahari agasozi bitaga ngo ni u Rwanda rwa Ndanyoye, aho i Gasabo akaba ariho hari umurwa mukuru w’ubwami ku ngoma y’Abami b’Abanyiginya,ari nayo mpamvu baheragaho bavuga ko ari u Rwanda rwa Gasabo, ndetse bakongeraho ngo rugari rwa Gasabo.

Si aho gusa, kuko ubwo umwami Mibambwe Mutabazi yigaruriraga i Nduga ako gace nako ngo bahise bakita u Rwanda rwa Kamonyi , bishatse kuvuga ko byari uburyo bwo kwerekana ko aho hantu habaye ahabo rwose.

Muri aya mazina yose rero bikaba byumvikana ko habaga harimo umushinga wo kwagura igihugu nk’uko izina Rwanda ubwaryo ribivuga, kuko inshinga kwanda byavugaga kwaguka mu runyakirima (amagambo atagikoreshwa mu kinyarwanda gikoreshwa ubu).

Kanyarwanda Gahima waje asimbuye se ku ngoma akaba ngo ari yo mpamvu yahawe ririya zina rya Kanyarwanda kubera inshingano yari asigiwe na se Gihanga zo gukomeza kwagura ubutaka yari arazwe.

Bronze

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X