Monaco cosmetics

Icukumbura : Impamvu nyayo yatumye Kigeli yanga gutaha kugeza aguye ishyanga


Ku itariki ya 3 Mutarama 2016, Abagize umuryango w’Umwami Kigeli V Ndahindurwa uratangira kuburana ku buryo umugogo we watabarizwa n’aho watabarizwa ikibazo cyatumye umuryango ucikamo ibice. Ariko se ni iki cyatumye umwami gutaha bikamuviramo gutanga aguye ishyanga bikaba bitumye umuryango we usa nk’usubiranamo.

Umwami Kigeli V Ndahindurwa yatanze tariki 16 Ukwakira 2016, nyuma y’imyaka ibarirwa mu 20 ibyo gutahuka mu gihugu cye byarananiranye.

PNG - 587.6 kb
Umwami Kigeli V Ndahindurwa

Hagiye havugwa byinshi bijyanye n’itahuka ry’umwami, ariko ibyari ukuri ni uko atari kuzigera ataha mu buryo bworoshye bitewe n’ibyo yasabaga Perezida Kagame, ndetse bikanaterwa n’ibyo abajyanama be bamubwiraga ku bijyanye no gutaha bamwereka ko agomba gutaha ari uko azahita ayobora igihugu ibya Perezida bikavaho.

Dusubiye inyuma gato ku mateka y’u Rwanda, Kigeli V Ndahindurwa yabaye umwami kuva tariki 25 Nyakanga 1959, kugeza tariki 28 Mutarama 1961, ubwo yahirikanwaga n’ingoma ya cyami, muri kudeta bamukoreye bahengereye yagiye i Kinshasa aho yagombaga kubonana n’Umunyamabanga mukuru w’Umuryango w’Abibumbye, maze Mbonyumutwa Dominique afatanyije n’agatsiko ke ndetse banashyigikiwe n’abakoloni b’Ababiligi, bamuvana ku ngoma bahita banasezerera burundu ingoma ya cyami maze himikwa ubutegetsi bushingiye kuri Repubulika.

Kigeli V Ndahindurwa yahise ahungira mu cyahoze ari Tanganyika (Tanzania y’ubu), aho yabaga mu mujyi wa Dar Es Salaam. Nyuma yanabaye i Kampala n’i Nairobi, nyuma aza guhungira muri Leta Zunze Ubumwe za Amerika aho yanahawe ibyangombwa nk’impunzi ya Politiki mu 1992, kuva ubwo akaba yariberaga hafi y’umujyi wa Washington DC. Yarinze atanga atarataha ariko yari yarabisabwe inshuro nyinshi, nawe agasaba ibintu byari bigoye cyane.

Perezida wa Repubulika y’u Rwanda, Paul Kagame, yagiye agaragaza kenshi uburyo ubuzima bw’ubuhunzi ari bubi nk’umuntu wabubayemo igihe kirekire, bityo avuga ko n’abayobozi bakwiye kujya bagerageza gushaka uko hatabaho ibituma abantu bahunga.

Urugero rumwe, ni nko muri Kamena 2015 ubwo Perezida Paul Kagame yaganiriga n’umunyamakuru James Chau wa Televiziyo y’Abashinwa mu kiganiro cyitwa “Talk Africa” aho yavuze ku buzima bwe mu nkambi z’impunzi n’uko abona abayobozi bakwiye kujya bitwara.

Icyo gihe yagize ati “ Njye n’umuryango wanjye duhungira mu gihugu cya Uganda numvaga ntacyo bimbwiye kuko nari muto cyane, ariko dutangiye gukura twatangiye kubona ko hano atariho twagakwiye kuba turi, kubera ibibazo bya buri munsi byo mu nkambi harimo kubura ibikoresho by’ibanze nk’ibiryo.

Maze kugira imyaka 11 nabajije data umbyara icyo twakoze kugirango tube turi muri ubu buzima, umubyeyi wanjye yansobanuriye imvano y’amacakubiri guhera mu gihe cy’ubukoloni, uko bamwe mu Banyarwanda bimakaje amacakubiri abakoloni babirebera, naje kumva bicye ariko ibindi sinabyumva neza, nibwo natangiye kumva ko tutakomeza kubaho gutya, ko hari umuntu ugomba kubihindura... Twigiraga munsi y’ibiti aho tutari dufite n’ibikoresho, mu nkambi abantu bakuru barihuje bigisha abana aho kwirirwa bakina mu nkambi, nibwo twabashije kubona abarimu... Abayobozi bagomba gukora ibishoboka byose bagahagarika ibitera ubuhunzi, ubutumwa naha impunzi ni uko zitagomba guta icyizere kuko muri bo hari abazagera ku bikorwa by’indashyikirwa mu bihugu byabo”

Perezida Paul Kagame wabaye impunzi igihe kirekire, yabashije kugaruka mu Rwanda hakoreshejwe inzira y’urugamba aho we n’ingabo yari ayoboye za FPR Inkotanyi babashije kubohora u Rwanda.

Kuko yari azi ubuzima bubi bw’impunzi, yashatse ko abantu benshi bagiye bahunga u Rwanda bazira ubusa bagaruka mu gihugu cyabo, urwo rugamba akaba yararutangiye akiri Visi Perezida, anarukomeza nyuma yo kuba Perezida.

Nk’uko Umwami Kigeli ubwe yabitangaje muri 2008, bigashimangirwa n’umuvugizi we Boniface Benzige muri 2014 ndetse na Perezida Kagame ubwe akaba yarabigarutseho, mu mwaka w’1996 nibwo Paul Kagame wari Visi Perezida w’u Rwanda yagiye gusaba Umwami Kigeli V Ndahindurwa ko yataha kandi Leta ikamuha ibizamufasha kubaho neza nk’uwigeze kuba umukuru w’igihugu, ariko ibi ntibyashobotse kuko Umwami n’abajyanama be bifuzaga ko yagaruka mu gihugu nk’umwami, ingoma ya cyami ikongera igahabwa umwanya.

Abisobanura muri 2008, Umwami Kigeli mu magambo ye yagize ati: "Kagame yaje inaha ambwira ngo ntahe njye mu Rwanda, ngo banyakira neza... Ariko nawe mwibutsa ko hari Itegeko Nshinga ryabaye , Ababiligi bashyizeho, ryo guca ubwami n’Umwami Kigeli, nkaba rero ntarenga ayo mategeko. Ndavuga nti kubwanyu, nkawe Kagame n’abandi ntimushobora kubihindura mudafatanyije n’Abanyarwanda.

Kugirango nsubire mu gihugu, wenda Abanyarwanda baba bankunze cyangwa batankunze, rero nkwiriye kumenya ko Abanyarwanda bakinyifuza kugirango mbabere Umwami, nsubire no mu gihugu. Ni uko ambwira ko agiye kubyigaho na Leta n’Abanyarwanda akazansubiza."

Umwami Kigeli yavuze ko ibyo gutaha kwe byagombaga kujya mu mategeko y’u Rwanda bikemezwa, byarangira nawe akababwira ibindi ashaka ko bikorwa kugirango atahe. Yashimangiye kandi ko aramutse atashye, yataha yitwa Umwami byanze bikunze kuko ntawigeze abimunyaga, kandi ko niba Leta y’u Rwanda itemeye ko azataha nk’umwami azemera akagwa mu mahanga.

Umuvugizi w’umwami, Boniface Benzige, nawe mu kwezi k’Ukuboza 2014 yagaragariye Ijwi ry’Amerika ko ntako Leta y’u Rwanda itagize ngo Umwami atahe kuko bamwemereye kuzahabwa byose akitabwaho nk’uwigeze kuba Umukuru w’igihugu.

Boniface yagize ati: "Leta y’u Rwanda yohereje delegation (itsinda) iyobowe na Pasiteri Ezra Mpyisi. Leta y’u Rwanda yamusabaga ko yataha nk’abandi banyarwanda bose, ndetse bongeraho ko yafata pension (ikiruhuko cy’izabukuru) bakamugenera ibikenewe byose, nk’inzu, amamodoka, amafaranga yo kumutunga n’ibindi nk’ibyongibyo... "

Ikindi gishimangira ko Umwami yanze gutaha kubera ko yifuzaga kugera mu gihugu akayobora igihugu akabona bitarimo kumukundira, ni uko abajyanama be nabo bamugiraga inama nk’iyo. Tariki 26 Nyakanga 2016, Pasiteri Ezra Mpyisi wari umujyanama wa Kigeli V Ndahindurwa, yatangarije itangazamakuru ko kizira cyane kuba umwami yataha mu gihugu ameze nka rubanda kandi yarahunze ari umwami akaba atarigeze anasimburwa, bityo avuga ko yataha ari uko Perezida Paul Kagame azamubera Minisitiri w’Intebe akayobora nk’umunyapolitiki naho Kigeli akibera umwami uganje.

Mpyisi kandi icyo gihe yavuze ko ibyo gutaha yabiganiriye na Kigeli V Ndahindurwa ubwo yamusangaga muri Amerika mu minsi yashize, akamugira inama ebyiri, imwe akayimugira nk’umunyarwanda wubaha umuco na kirazira, indi akayimugira nka Pasiteri.

Mpyisi ati: "Namugiriye inama ebyiri ngo yihitiremo. Nka Pasiteri namubwiye ko yakwitahira mu Rwanda kuko nta cyaha kirimo ku Mana, ariko nk’umunyarwanda uzi kandi wubaha iby’umuco mubwira ko yareka akazagwa mu mahanga kuko atashye yaba ahemukiye igihugu nk’umuntu uzi ko kizira gutaha nka rubanda yarahunze ari umwami, hanyuma ndamubwira ngo ahitemo."

Mu minsi yashize ubwo yabazwaga iby’itaha ry’Umwami Kigeli, Perezida Kagame nawe yagaragaje ko yamusabye ibyo atari afite mu bubasha, kuko Kigeli we yashakaga gutaha akaba umwami kandi Perezida Kagame we akaba adafite ububasha bwo kumwimika.

Yagize ati: "Byari mu 1996, i Washington ndi kumwe icyo gihe n’uwari Ambasaderi w’u Rwanda, Theogene Rudasingwa, hari n’abandi twari kumwe... Ndumva ibyo namubwiye naranabisubiyemo kenshi n’ahandi, njye nifuzaga ko... ngomba kuba narakoze n’icyaha kumwita umunyarwanda, kuko njye naravuze ngo turakora uko dushoboye ngo Abanyarwanda bose batahe noneho ibibazo bafite bishobore gukemuka bari mu Rwanda n’u Rwanda rumeze neza rufite amategeko rugenderaho, Abanyarwanda bashobora guhitamo icyo bashaka. Ariko icyo mvuze wenda ko nakoze amakosa kumwita umunyarwanda, ni uko avuga ko atari umunyarwanda, we ni undi uri hejuru y’ibindi ariko njye ntabwo nari mbizi ko hari ibindi, ariko ibyo ntabwo ari rwo rubanza. Hanyuma icyo naganiriye nawe icyo gihe, namubwiraga ko numvaga ko akwiye kuba yataha, icyo gihe ambwira ko we atataha atyo gusa, agomba gutaha nk’umwami. Mubwira ko [icyambere], ibyongingo ntabwo ari njye ubigena, ntabwo ari njye ubitanga. Kwanza ntabwo ari njye wamwambuye ubwami, icyo gihe ngirango bajya kubumwambura nari muto...nta ruhare nabigizemo, icya kabiri nta n’ubushobozi mbifitiye kuba nakwimika umuntu uwo ari we wese, nawe ngo mbe nabasha kumugarura kumugira umwami."

Yakomeje agira ati:"Ariko njye n’abandi Banyarwanda, icyo twakoze, byari uguhindura u Rwanda tukarugira u Rwanda Abanyarwanda bisanzuye, bashobora guhitamo icyo bashaka, bashobora kugenga ibihe byabo biri imbere uko bizamera... Agarutse ashobora kujya mu Banyarwanda akabemeza ko bakwiye kongera bakamugira umwami, ibyo bakabikora cyangwa se baba batabimuhaye akaba yabaho uko abyifuje kundi. Nta kindi rero namusezeranyije, icyo namusezeranyije gusa namubwiye ko niba ahisemo uko yumva yabaho mu Rwanda cyangwa icyo yakora, yazabimenyesha ambasaderi wacu tukabimenya tukareba uko tubimufashamo ibyo gutaha, musezeranya ko icyo twagerageza gukora, ni ukureba uko twamufasha imibereho, n’umutekano, ibisigaye, ibyo kuba umwami cyangwa kutaba umwami, ntabwo ari njye wabigena. Kuva ubwo rero nta kindi nigeze numva, nta kundi mfite nabisobanura."

Imirasire.com

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X