Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Gakenke : Imirenge 7 ntikigira abanyamabanga Nshingwabikorwa

Abaturage batuye mu mirenge 7 igize akarere ka Gakenke baratakambira ubuyobozi bw’intara basaba ko bakoroherezwa gusiragira bashaka service kuri iyi mirenge batazibona bitewe n’uko itagira abanyamabanga Nshingwabikorwa.

Kuri iki kibazo ubuyobozi bw’akarere nta cyizere kigaragara butanga kuri iki kibazo gikomeje kugaragara ko kibangamiye abaturage, cyane ko hari aho iki kibazo kimaze igihe kigera ku mwaka kidakemurwa

JPEG - 58.7 kb
Nzamwita Deogratias Umuyobozi w’akarere ka Gakenke

Ubuyobozi bw’aka karere buvuga ko bwashyize imyanya ku isoko n’ubwo butagaragaza igihe iyi myanya izahatanirwa ngo ibone ba nyirayo bityo abaturage baruhuke gusiragira, dore ko hari zimwe muri serivisi babona bigoranye kubera kubura abanyamabanga Nshingwabikorwa.

Ikibazo cy’imirenge itagira Abanyamabanga Nshingwabikorwa gihuriweho na benshi mu karere ka Gakenke cyane ko kuri ubu imirenge igaragazwa n’ubuyobozi bw’aka karere ko idafite abayobozi ibarirwa muri 7, ibintu usanga bibangamira abaturage cyane ko n’ubwo iyi mirenge ifite abasimbura Abanyamabanga Nshingwabikorwa hari zimwe mu nshingano baba batemerewe nk’uko bisobanurwa na bamwe mu baganiriye na Imirasire.com

Nzabahimana Adrien utuye mu Kagari ka Gisiza, Umurenge wa Muyongwe, yavuze ko nk’ubu kugirango abaturage babashe gusezerana mu mategeko bibasaba gutegereza Umuyobozi w’Akarere akazaza kubasezeranya ndetse bikaba ngombwa ko hari umubare runaka babanza kugezaho kugirango babone gutumizaho Meya aze kubasezeranya.

Yagize ati: "Nk’ubu hano ku murenge kugirango badusezeranye bisaba ko tubanza gutegereza tukaba benshi yewe hari n’ubwo batubwira ngo tujye gusezeranira mu yindi mirenge duhana imbibi kandi urumva ko bishobora kuzatugiraho ingaruka mu bijyanye n’irangamimerere".

Si abaturage bagaragaza ko babangamiwe kuko na bamwe muri aba bayobozi baba barasigaye basimbura ubusanzwe baba bafite izindi nshingano zo kuba abashinzwe irangamimerere bavuga ko usanga hari igihe bibagora kuzibangikanya.

Byukusenge Deogratias, Umuyobozi w’Agateganyo w’umurenge wa Muyongwe akaba ari nawe usanzwe ari umukozi ushinzwe irangamimerere muri uyu murenge, avuga ko mu mezi agera hafi ku munani afatanya inshingano zo kuba Umuyobozi w’Umurenge n’Ushinzwe irangamimerere (Etat Civil) hari ibimugora ariko ku rundi ruhande agahamya ko bakora ibishoboka byose bakabasha kubifatanya ndetse bagahaza ababagana mu kubaha serivisi nziza.

Ati "Birumvikana ntihabura serivisi nkeya zishobora gutangwa nabi cyane ko hari na zimwe mu nshingano hano ku murenge ziba zigenewe abanyamabanga Nshingwabikorwa gusa nko kurangiza imanza, gusezeranya n’izindi ariko nyine birumvikana natwe tugerageza gukorana n’inzego zidukuriye tukabasha kuzuza inshingano zose kandi n’abaturage tukabakira neza"

Byukusenge Deo kandi akomeza avuga ko hari igihe inshingano zihurirana cyane nko mu bihe bishize ubwo muri uyu murenge bari mu cyumweru cyahariwe irangamimerere, cyane ko byamusabaga kuba umwanya munini awuharira ibijyanye n’irangamimerere bigatuma izindi nshingano zireba Umunyamabanga Nshingwabikorwa zishobora kutagenda neza.

Ku ruhande rw’Ubuyobozi bw’Akarere, nabwo buzi neza iki kibazo gusa buhakana kukirengagiza no kutumva icyo abaturage bakeneye, ahubwo bukemeza ko bwashyize imyanya ku isoko y’abanyamabanga Nshingwabikorwa b’imirenge n’ubwo nta gihe cya vuba bwizeza abaturage.

Ikinyamakuru Imirasire.com cyagerageje kuvugana n’umuyobozi w’aka karere Nzamwita Deogratias ntibyashoboka kuko atitabaga telefoni.

Cyakora, iki kinyamakuru cyifashishije ibyo aherutse gutangariza kimwe mu binyamakuru bikorera mu Rwanda avuga ku ngamba zafatiwe iki kibazo.

Yagize ati “ "Ibyo kuba nta banyamabanga Nshingwabikorwa iyo mirenge ifite ntabwo bibuza serivisi gutangwa neza, cyane ko n’abo bavuga ngo gutegereza gusezerana birababangamira njyewe ntemeranywa nabo kuko mu minsi ishize hari n’uwo mu murenge umwe nagiye gusezeranya ari umwe urumva rero nta kibazo kirimo kandi n’izindi serivisi tugerageza gukorana n’izindi nzego zikabasha kugenda neza"

Ku bijyanye n’igihe aba bayobozi bazabonekera, Meya Deogratias avuga ko ubuyobozi bw’akarere bwashyize imyanya ku isoko igihe cyo gupiganwa nikigera bazaboneka, gusa ntatangaza igihe ntarengwa aba banyamabanga Nshingwabikorwa bazabonekera.
Itegeko No 87/2013 ryo ku wa 11 Nzeri 2013 rigena imitunganyirize n’imikorere y’inzego z’imitegekere y’igihugu zegerejwe Abaturage zidafite ubuzima gatozi mu Nteruro yayo ya kabiri (2), Umutwe wa Mbere (1), mu ngingo yayo y’196, ivuga ko bitabangamiye ibiteganywa n’andi mategeko, Umunyamabanga Nshingwabikorwa w’Umurenge aba yemerewe guhuza no gukurikirana ishyirwamubikorwa za Politiki za Leta ndetse no kurangiza imanza, ibi akaba ntawundi muyobozi uba abyemerewe mu Murenge.

Nkindi Alpha

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X