Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Burundi: HRW iravuga ko Imbonerakure zigiye kubazwa ibikorwa by’ubugizi bwa nabi byakorewe mu Burundi

Umuryango mpuzamahanga uharanira uburenganzira bwa muntu (HRW) watangaje ko ushingiye ku bushakashatsi wakoze, imvururu zabaye mu bice binyuranye by’u Burundi kuva muri Mata 2015, ubwo Perezida Pierre Nkurunziza yari amaze gutangaza ko aziyamamariza manda ya gatatu, zagizwemo uruhare n’umutwe w’abarwanyi ushamikiye ku ishyaka riri ku butegetsi CNDD-FDD, uzwi nk’Imbonerakure.

Inkuru y’ijwi rya Amerika ivuga ko ibyo byasohotse muri raporo nshya uyu muryango washyize ahagaragara, ushinja Guverinoma y’u Burundi kurebera ibyakorwaga n’uyu mutwe, bityo bakabona ukwiye kubazwa imvururu zose zabaye muri iki gihugu.

Umuyobozi mukuru wungirije w’uyu muryango muri Afurika, Leslie Lefkow, yagize ati “Ibyo ni ibirego bikomeye kandi ibyo twagaragaje ni nk’igice cy’imvururu zose. Ni ibigaragara ko abagize Imbonerakure batigeze bahanirwa ibyo bikorwa byakozwe muri icyo gihe cyose i Burundi.”

HRW ivuga ko ibyo yagaragaje bishingiye ku biganiro (interview) yakoranye n’abantu banyuranye mu mezi atatu ashize aho igaragaza ubwicanyi, iyicarubozo n’ibindi bikorwa by’ubunyamaswa byakozwe hirya no hino mu gihugu.

HRW igaragaza aho Imbonerakure zakubise umusore w’imyaka 15 kugeza apfuye, umugabo zakuyemo amaso ndetse zikanamwica ndetse n’aho zagendaga zitera abantu zifite ibyuma, ibibando n’ibindi bikorwa by’ubunyamaswa. Hari n’igihe kandi ngo Imbonerakure zashyiraga bariyeri mu mihanda maze zigakubita abahanyuze, abandi bagafungwa ndetse hakaba n’abo biba amafaranga n’ibindi.

Ibirego bisa n’ibi ariko Leta y’u Burundi yakunze kubyamaganira kure ndetse inanzura gutandukana n’amasezerano ya Roma ashyiraho Urukiko Mpuzamahanga Mpanabyaha (ICC), nyuma y’uko rutangaje ko rugiye gukora iperereza ku mvururu zabereye muri iki gihugu.

Imibare igaragazwa n’abarengera uburenganzira bwa muntu, yerekana ko izo mvururu zaguyemo abantu barenga 500 mu gihe abandi bakabakaba ibihumbi 300 bahunze igihugu.

Bruce MUSHUMBA

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X