Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Polisi itewe impungenge n’imodoka zitwara abana ku ishuri

Ishami rya Polisi y’u Rwanda rishinzwe umutekano wo mu muhanda rirasaba abatwara ibinyabiziga bijyana cyangwa bivana abana b’abanyeshuri ku mashuri yabo, kubahiriza amategeko y’umuhanda kuko hari aho bikigaragara ko bamwe muri bo batayubahiriza.

Ubu butumwa buje nyuma y’uko hafashwe imodoka yari itwara abanyeshuri ifite icyapa kiyiranga RAA 879 J ifatiwe mu muhanda wa Vunga - Musanze yarengejeho umubare w’abanyeshuri batanu kubo isanzwe yemerewe gutwara, ndetse nta n’icyangombwa cy’uko imeze neza ifite; gisanzwe gitangwa n’ishami rya Polisi y’u Rwanda rishinzwe gupima ubuziranenge bw’ibinyabiziga rizwi nka “Controleechnique”.

Chief Inspector of Police (CIP) Emmanuel Kabanda Umuvugizi w’ishami rya Polisi y’u Rwanda rishinzwe umutekano wo mu muhanda
Yavuzeko nyuma y’uko habayeho gahunda yo kunoza no gutunganya ibyerekeranye no gutwara abagenzi ku binyabiziga rusange; byakozwe n’ikigo cy’igihugu gishinzwe kugenzura imirimo ifitiye igihugu akamaro (RURA)
Hari imodoka zimwe na zimwe zatakaje akazi cyane cyane izishaje. Ba nyirazo bamwe bahisemo kuzikoresha ibindi bikorwa birimo gutwara abana b’abanyeshuri ku mashuri”.

JPEG - 29.2 kb
Chief Inspector of Police (CIP) Emmanuel Kabanda Umuvugizi w’ishami rya Polisi y’u Rwanda rishinzwe umutekano wo mu muhanda

CIP Kabanda yakomeje avuga ko zimwe muri izo modoka kenshi usanga ba nyir’izo modoka, nta byangombwa bibemerera gukora uyu murimo baba bafite birimo ubwishingizi bw’abantu, icyemezo cy’uko ari nzima kigaragaza ubuziranenge bwazo, kuba ziteyeho amarangi ndetse zanditseho amagambo y’uko zitwara abanyeshuri, ndetse n’abazitwara ugasanga bakora amwe mu makosa arimo nko gutwara ikinyabiziga basinze cyangwa barengeje umubare w’abo bemerewe gutwara; ibyo bakunze kwita “gutendeka”.

Umuvugizi w’iri shami rishinzwe umutekano wo mu muhanda yakomeje agira ati:” Si mu Mujyi wa Kigali gusa aya makosa akorwa kuko no mu Ntara hari abatwara abanyeshuri batubahiriza ayo mategeko y’umuhanda. Nta na rimwe tuzayihanganira, abafashwe bagomba guhanwa hagamijwe kurengera ubuzima bw’abantu”.

Yasabye abafite izo modoka zitwara abanyeshuri kubahiriza ibisabwa gukora uyu mwuga; birimo gukoresha mu kazi imodoka nzima kandi zujuje ibyangombwa, abashoferi bazo bakarangwa n’imyitwarire myiza ndetse no muri izo modoka hakaba harimo umuntu mukuru uri kumwe n’abo bana b’abanyeshuri (umurezi, umubyeyi cyangwa undi ) ushinzwe gukurikirana neza ukuva no kujya ku ishuri kw’abo bana; no kureba ko amategeko y’umuhanda yubahirizwa kugira ngo mu gihe adakurikijwe abimenyesha Polisi y’u Rwanda n’izindi nzego.

Bagabo John

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X