Monaco cosmetics
Ahabanza  >>  Amakuru yose >> Imyidagaduro >> Mu Rwanda >> 

Ubuzima bwa Professor Nigga yabusanishije n’ubwa Bizimana Nello utorohewe n’ibihe arimo

Umuhanzi mu njyana ya Hip Hop Karasira Aimable uzwi nka Professor Nigga yagaragaje akababaro aterwa n’ubuzima Bizimana Emmanuel Nello abayemo maze avuga ko uburyo abayemo wagirango nta muryango afite nk’uko uyu muhanzi ngo ntawo afite.

Mu mafoto ya Bizimana Nello yacicikanye ku mbuga nkoranyambaga agaragaza yashengabajwe n’imibereho ugereranyije na mbere kandi yarigeze kwiha mu gihe cyo hambere hanagarukwa ku bigwi yari afite cyane cyane ubwo yakoraga kuri radio, Nigga yagize icyo abivugaho(Comment) maze ashimangira ko uyu musaza yiregagijwe bikomeye.

Uyu muhanzi (Pro Nigga) yakomeje avuga ko ntawe umwitaho nyamara ngo yigeze gukirigita ifaraga afite imitungo ndetse ngo mu byo yacuruzaga byarimo n’akabari akagerageza gusengerera benshi yewe akanikopa, ariko ubu ngo nta muntu ikimureba n’irihumye ngo wagirango nta muryango afite nk’uko na we amerewe.

JPEG - 38.5 kb
Professor Nigga

Yagize ati”Ese ko ntawe ukomoza ku mateka ye ubwo yakoraga kuri radio Muhabura,!!Njyewe nyuma twaraturanye haruguru ya Stade Regionale hafi ya Baobah yari ahafite akabari aho yinyweraga ibyeri(Bierre) yarangiza akanikopa!!!!Gusa ni ukuri arababaje wagira ngo nawe nta muryango agira nkanjye.”

Uyu Bizimana Nello yamenyekanye cyane mu kwamamaza kuri Radio Rwanda cyane aho yagira ati”Dore amashoti,dore amacenga,dore amakipe nanjye nkaba umufana.”

PNG - 502.8 kb
Bizimana Nello wisanishijweho na Professor Nigga

Si ibyo gusa kuko yaje no kumenyekana mu ndirimbo zitandukanye harimo iyari ifite amagambo agira ati”Impfubyi itagira kirera ako ni agahozo oya wimbeshya nyina wundi muheruka mama akiriho.”

Mu gushaka kumenya koko niba uyu musore atorohewe n’ubuzima ndetse no gushaka kumenya ibyo ahugiyemo bituma yisanisha na Nello,yaganiriye na Imirasire.com ariko asa n’utabishaka kuko ngo atagishaka kuvugana n’itangazamakuru.

Yagize ati”Umva nkubwire wa mugabo we sinkishaka kuvugana n’itangazamakuru rwose sinifuza kujya kuri ibyo bipapuro byanyu kuko ibyo nashakaga mu muziki nabigezeho, indirimbo zanjye nzimenyekanisha ku mbuga nkoranyambaga kuko mwebwe muba mushaka udukoryo (Insolite).”

Uretse kwisanisha na Neros n’ubusanzwe iyo uganira nawe w’umva avugana amaganya cyane cyane iyo bigeze ku bihangano bye usanga atunga agatoki itangazamakuru avuga ko ritita ku bihangano bye.

Mu myaka ishize ubwo itangazamakuru ryasuraga uyu mugabo mu ntara y’Amajyepfo mu gace gaherereyemo icyahoze ari kaminuza y’u Rwanda, atumura agatabi uyu musore yavuze ko kamufasha kuruhuka mu mutwe agakora mu nganzo ariko anavuga ko adashobora kwitabira na rimwe amarushanwa atangwamo ibihembo bitandukanye muri muzika nyarwanda.

Indirimbo Proffessor Nigga azwiho ni nka Shikarete,Cishwaha,Carte Rouge, gusa mu gihe gishize yatangaje ko agiye kujya akora indirimbo ze mu ndimi z’amahanga gusa kugirango ari bo babasha kuzumva kuko ngo mu Rwanda ntawe uzitaho.

Ndacyayisenga Fred

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X