Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Intore Tuyisenge mu myiteguro ikomeye yo gucyuza ubukwe

Tuyisenge Jean de Dieu uzwi nka Intore Tuyisenge nyuma y’igihe adashyira hanze indirimbo nshya, kuri ubu ikimuraje ishinga ni imyiteguro y’amatora y’umukuru w’igihugu ateganyijwe muri Kanama uyu mwaka.

Uyu muhanzi ubusanzwe wibanda ku ndirimbo zibyinitse mu njyana gakondo, avuga ko impamvu yari abuzeho ngo ni uko yari arimo gukora indirimbo zizifashishwa mu matora we yahaye inyito y’ubukwe.

Imirasire.com iganira na Tuyisenge yaboneyeho kumubaza niba bishoboka ko ashobora gukora indirimbo z’andi mashyaka zizakoreshwa mu matora igihe wenda amuhaye ikiraka,yabyamaganiye kure avuga ko yaba atatiriye igihango yagiranye n’umuryango RPF abarizwamo.

Yagize ati” Sinshobora kuririmbira andi mashyaka niyo baba bari bunyishyure kuko ntiwaba ufite ubukwe ngo umuntu n’agutumira mu bwe ngo ubujyemo utaye ubwawe , ntibyashoboka.”

Ibi nibyo yagereranyije no kuba yaririmba indirimbo z’umuryango RPF ngo narangiza ajye kuririmbira andi mashyaka kuko ngo amatora ameze nk’ubukwe kandi umuryango wa RPF Inkotanyi ukazahuriramo n’andi mashyaka.

Uretse kuba Intore ahugiye mu myiteguro yo guhanga indirimbo zizifashishwa mu gihe cy’amatora, ngo arimo no gufasha abahanzi mu buryo bwo gushaka icyabateza imbere by’igihe kirambye dore ko ari nawe muyobozi w’urugaga rw’abahanzi.

Intore Tuyisenge asanzwe aririmba indirimbo zibanda ku mibereho myiza y’abaturage, uburere mbonezamubano, by’umwihariko izibanda kuri Politike, imwe mu zamenyekanye cyane akaba yarayise “Tora Kagame ” hakiyongeraho iyo yise unkumbuje u Rwanda,Karongi Akimuhana….

Nyuma y’uko aherutse gutorerwa kuyobora Federasiyo y’umuziki mu Rwanda mu mwaka ushize, akomeje gukebura abantu barangwa n’ubunebwe mu kazi n’abasuzugura akazi bagenzi babo bakora, abasaba gukunda umurimo, gukorana umwete batitaye ku kimuhana kuko niyo kaje kaza imvura ihise.

Ndacyayisenga Fred

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X