Monaco cosmetics
Ahabanza  >>  Amakuru yose >> Amakuru mashya >> Mu Rwanda >> 

Nyarugenge: Abahoze ari abayobozi muri Nyakabanda barakekwaho kurigisa imibiri ine y’abazize Jenoside yakorewe abatutsi


Bamwe mu bacitse ku icumu n’umuyobozi wa Ibuka barasaba ubuyobozi bw’umurenge wa Nyakabanda kubabariza abahoze ari abayobozi b’ibanze mu kagari barimo uwari chefu de zone n’uwari Responsable kugaragaraza aho imibiri ine y’abishwe bazize Jenoside yakorewe abatutsi mu 1994 aho yashyizwe dore ko bavuga ntayo babonye ku rwibutso rwa Gisozi.

Ibi bivuzwe nyuma bitangajwe ko hari imibiri ine y’abiciwe mu Nyakabanda mu Kagari ka Nyakabanda ya I muri Jenoside yakorewe Abatutsi yakuwe mu cyobo yari yajugunywemo igashyingurwa mu cyubahiro, ariko ntihagaragazwe aho yashyinguwe, hatangiye gukorwa iperereza ryimbitse ngo hamenyekane irengero ryayo.

JPEG - 170 kb
Bacukura inzu bakuyemo iyi mibiri basanze ari 4 kandi baratayemo umunani

Iyo mibiri ine yaburiwe irengero n’iy’umuryango wa Kayiranga Celestin ikaba yari yarakuwe mu cyobo yari yarajugunywemo ishyirwa ahantu hataramenyekana
Bizimungu Boniface, umuturage wo muri aka gace yatanze amakuru avuga ko hari icyobo cyajugunywemo abantu umunani bo muri uyu muryango wa Kayiranga cyubatsweho inzu ariko imibiri ine ikaba yarakuwemo ikajya gushyingurwa.

Umugore we witwa Mukankuranga Alphonsine nawe yatangaje ko Mbarubukeye Hassan wari Chef de Zone na Kigeli Raphaël wari Responsable bakuye iyo mibiri ine muri ako gace ijyanwa gushyingurwa mu cyubahiro ku Rwibutso rwa Jenoside rwo ku Gisozi.

Yagize ati “Imibiri ine yakuwemo bajya kuyishyingura mu cyubahiro ariko ivanwamo sinari mpari. Icyo gihe umugabo wanjye niwe wafatanyije n’uwahoze ari chef de zone na Responsable n’undi wacungaga umutekano (Local Defence).”

Iperereza ryakozwe ryagaragaje ko imyirondoro y’abo bantu bavugwa, imibiri yabo itigeze igezwa mu Murenge ngo isukurwe.

Umuyobozi wa Ibuka mu Murenge wa Nyakabanda, Mukeshimana Béatrice, yabwiye abanyamakuru ko bifuza ko aba bagabo bahoze ari abayobozi b’inzego z’ibanze mu 1997 kugeza mu 1999 bakurikiranwa bakagaragaza aho imibiri y’ababo bayishyize.

Yagize ati “Turifuza ko bakurikiranwa bakagaragaza aho imibiri bayishyize kuko twasanze babeshya nta n’iyagejejwe ku murenge ngo isukurwe ibone kujyanwa gushyingurwa ku Gisozi. Ikindi kandi n’uko iyo tubabajije aho bayandikishije kugira ngo tujye kubisuzuma batubwira ko batabyibuka neza ku buryo dusanga haba harimo uburiganya.”

JPEG - 155.3 kb
Mukeshimana Beatrice umuyobozi wa Ibuka mu murenge wa Nyakabanda

Yakomeje avuga ko bifuza ko bagaragarizwa aho iyi mibiri yajyanwe cyane cyane ko ubwo bacukuraga inzu yari yarubatsweho icyobo yari irimo babonye mike mu gihe amakuru bahabwaga yavugaga ko harimo imibiri y’abantu umunani.

Umunyamabanga Nshingwabikorwa w’Umurenge wa Nyakabanda, Huss Monique, we avuga ko inzego z’umutekano zatangiye gukurikirana iki kibazo.
Yagize ati “Ubu gahunda iriho n’uko polisi yatangiye iperereza kugira ngo iyo mibiri imenyekane aho yashyizwe.”

Yasoje asaba abaturage kuba intwari bagatanga amakuru y’ahantu bakeka ko hari ibyobo byajugunywemo inzirakarengane zazize jenoside yakorewe Abatutsi mu 1994 kugira ngo imibiri yabo ishyingurwe mu cyubahiro.

Nkindi Alpha

Kanda hano udukurikire kuri Facebook na Twitter

Ibitekerezo

kamuh - 17/04/2017 saa 13:35

mwibiyenzaho ubwo haricyomupfa karekose imyaka nimyaka ishyize komutabikurikiranyekare bagiye kuzira ubusa
Kanda hano umusubize

ndere - 18/04/2017 saa 22:01

Ubivuze ukuri rwose kuko igihe cyose gishize siho babyibutse !
Kanda hano umusubize

tesi - 1/05/2017 saa 06:31

jye ndisabira uwaba azi aho bashyize imibiri yabantu bakuye ku inzu iri iruhande yuwo bitaga sebucocero barimo abana batatu, numukobwa nabakobwa babiri, bajyanywe naga suzuki kumweru taliki ya 09/06/94, hari ahagana muma saa cyenda nigice zamanywa, uwo munsi hari uwo munsi harimo umwe munterahamwe wirashe ikirenge atabishaka, ahita agira umujinya babajyana muri iyo modoka,ntituzi aho babiciye, uwo munsi nko muma saa moya uwitwa sebucocero yavugiye ahantu nari nihishe ko babana babishe ko bashakisha abasigaye, ubwo umukobwa waho yahise abyunva ansanga mu cyumba ati ca mu idilishya, ibisigaye ni birebire, hagati aho hari umugore wari wakamejeje ko bagomba kwica abasigaye ngo kuko hari abapadiri bari bishwe ikabgayi taliki
Kanda hano umusubize

tesi - 1/05/2017 saa 07:06

jye ndisabira uwaba uzi aho imibiri yabantu biciwe munyakabanda kunzu iri iruhande rwo kwa sebucocero tariki ya 09/06/1994 ahagana muma saa cyenda nigice, bajyanywe naga suzuki kumweru, karimo interamwe twitaga nyirabukara yari umusore wiraburaga ndetse nuwitwaga mugesera , uwo munsi baza kubajyana hari uwirashe ikirenge agira umujinya arabajyana, barimo abana batatu nabakobwa babiri. Uwo Imana yakoresha yaba akoze.
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X