Monaco cosmetics
Ahabanza  >>  Amakuru yose >> Imyidagaduro >> Mu Rwanda >> 

Nduwimana J.Paul waririmbye ’Murabeho ndagiye’ ngo bamwitege nyuma y’amatora

Umuhanzi akaba n’umwanditsi, Nduwimana Jean Paul uzwi nka Noopja wamenyekanye mu ndirimbo "Murabeho" benshi bazi nka ‘Urabeho ndagiye’, nyuma y’igihe asa n’uwaburiwe irengero mu ruhando rwa muzika yongeye kuvuga ku buhanzi bwe, maze avuga ko nyuma y’amatora y’umukuru w’igihugu ateganyijwe mu kwezi gutaha, abantu bakwiye kwitegura umurindi mushya agiye kuzana mu miririmbire.

Uyu musore ahagana mu mwaka wa 2008-2009, ubwo yasohoraga iyi ndirimbo ikubiyemo ubutumwa bwo kwirinda Sida, yakunzwe na benshi ndetse bakajya bayisaba ku maradiyo atandukanye, bimuhesha kubaka izina aramenyekana ndetse aza gusohora izindi ndirimbo nke, ariko bidateye kabiri aza kubura benshi bibaza ibyo yagiyemo.

Mu gushaka kumenya icyatumye atacyumvikana, twagiranye ikiganiro maze atubwira ko yagiye mu bindi bikorwa bitandukanye yikorera ku giti cye, ariko ibyinshi ngo hari aho bihuriye n’umuziki, ariko ngo nyuma y’amatora ibyo bindi azabiharira ababimucungira, maze yongere kumvikana nk’uko mbere byari bimeze.

Impamvu yashinze agati ku kugaruka kwe nyuma y’amatora, ngo ni uko muri iyi minsi ahugiye mu bikorwa byo kwamamaza umukandida w’ishyaka rya FPR Inkotanyi mu duce dutandukanye turimo na Rusizi aho uyu musore avuka, bityo ngo nyuma yaho ahugutse azatangira kwerekana ko inganzo itakamye.

Kwamamaza uyu mukandida anabihuza n’igitabo yise "Komereza aho" aherutse kumurika, avuga ko ari ibaruwa yandikiye Perezida Kagame amushimira ibikorwa by’indashyikirwa yagejeje ku Banyarwanda.

Nduwimana avuga ko akimara kubona aho Perezida Kagame yakuye u Rwanda nyuma ya Jenoside yakorewe Abatutsi, akaruzamura akarugeza ku iterambere riratwa n’amahanga, yifuje kwandika igitabo amushimira aho agejeje.

Tugarutse ku by’ubuhanzi bwe mu kuririmba twamubajije niba gukorera umuziki we muri Rusizi bitaba ari zimwe mu mbogamizi ahura na zo mu kudindiza umuziki we, aha yavuze ko abahanzi bawuhakorera muri rusange baba batorohewe kuko badapfa kumenyekana, ariko kandi we avuga ko atakihabarizwa cyane kuko ibikorwa bye biri i Kigali kandi akaba ari na ho agiye kubikomereza.

Bimwe muri ibi bikorwa yabigarutseho avuga ko ahafite studio yitwa Country Records izatangira gukora ku mugaragaro mu minsi iri imbere, uretse n’ibyo kandi ngo ni na ho akorera akazi ke ka buri munsi.

Nduwimana Jean Paul yagarutse ku mikoranire ya hafi yigeze kuvugwa hagati ye n’umunyamakuru Tidjara Kabendera mu by’umuziki, ariko nyuma bikaza kuvugwa ko batandukanye bashwanye, aha yavuze ko ahubwo urwego ariho abikesha kuba yaramufashije.

Indirimbo "Murabeho" y’uyu muhanzi ashimangira ko kugeza n’ubu ibimutunga mu buzima bwa buri munsi ibyinshi ari yo bikomokaho, kuko urebye n’ibindi bikorwa aba ahugiyemo bimuhuza n’abantu intandaro ni iyo ndirimbo.

Icyakora ngo afite izindi ndirimbo yizeye ko zizongera gukarishya izina rye akarushaho kongera kwigarurira abari baramubuze.

Usibye "Murabeho", Noopja yakoze izindi ndirimbo ariko iyaje kumenyekana ni iyi Yise Ni abagabo, aho yasingizaga intwari muri rusange, iyi na yo yaramenyekanye n’ubwo atari cyane nk’iyo yahereyeho.

Nduwimana Jean Paul yavutse ku wa 7 Kanama 1983, avukira mu karere ka Rusizi, mu Ntara y’Uburengerazuba. Nyuma yo kurangiza amashuri yisumbuye mu bijyanye n’Ibinyabuzima n’Ubutabire, yakoze amahugurwa atandukanye mu bijyanye n’ubuhanzi aza no guharira umwanya we munini uwo mwuga kugeza magingo aya.

Ndacyayisenga Fred

Kanda hano udukurikire kuri Facebook na Twitter

Ibitekerezo

castro - 23/07/2017 saa 11:16

Wellcome Again jpoul we iriyandirimbo yaratwemeje nubwo wayishishuye kuya feruzi
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X