Monaco cosmetics
Ahabanza  >>  Amakuru yose >> Imikino >> Mu Rwanda >> 

FERWAFA yasobanuye iby’amakosa yo kwihunza imisoro byashinjwaga Perezida wayo Degaule

Ishyirahamwe ry’Umupira w’amaguru mu Rwanda, FERWAFA ryasobanuye amakosa arimo kwihunza imisoro, kwiyshyuza amafaranga y’umurengera ndetse no gufata ibyemezo atagishije inama abo bafatanyije ubuyobozi, byashinjwaga Nzamwita Vincent ‘Degaule’.

Kuwa mbere tariki ya 21 Kanama 2017, FERWAFA yakiriye ibaruwa ivuye muri bamwe mu bagize Komite Nyobozi yayo, bandikiye Umuyobozi mukuru Nzamwita Vincent ‘Degaule’ bamusaba ibisobanuro ku mafaranga yagenewe nka Perezida wa FERWAFA nk’uko byemejwe na Perezida wa CAF Bwana Ahmed mu nteko rusange ya CAF yabaye mu kwezi kwa Gatatu uyu mwaka.

Nzamwita Vincent bagenzi be bamwe bamushinja byinshi ariko we akavuga ko ari abashaka kumwangisha abandi banyamuryango mbere y'amatora

Muri iyo baruwa hagaragajwemo ibibazo bitatu, birimo kuba yarasabye kwishyurwa 20.000 by’Amadolari ya Amerika, mu gihe yari yaramenyesheje Inteko rusange ko we azajya ahabwa 10.000 andi agasaranganywa abanyamuryango.

Muri iyo baruwa kandi hagaragajwemo ikibazo cy’uko yihungije imisoro agashaka kuyegeka kuri FERWAFA abereye umuyobozi mukuru. Ndetse no kuba akunda gufata ibyemezo atagishije inama abo bafatanyije muri Komite nyobozi.

Kuri uyu wa 22 Kanama, FERWAFA ibicishije ku rubuga rwayo rwa Internet yasohoye itangazo rigenewe abanyamakuru, rigira riti:

Ishyirahamwe ry’umupira w’amaguru mu Rwanda (FERWAFA) riramenyesha abakunzi ba ruhago ibi bikurikira:

1. Icyemezo cyo gusaba kwishyurwa mafaranga ($20,000):

Kuwa 08/06/2017, CAF yagejeje kuri FERWAFA ibaruwa yandikiye amashyirahamwe yose yo muri Afurika bayemerera amafaranga angana na $100,000. Ayo mafaranga yemejwe na Perezida wa CAF Bwana Ahmed mu nteko rusange yabaye mu kwezi wa Gatatu uyu mwaka.

Ibaruwa bamwe muri Komite Nyobozi bandikiye Degaule bamusaba ibisobanuro atabikora bagahita begura bose

Muri aya mafaranga yoherejwe kuri konti ya FERWAFA, harimo $20,000 (titre d’indemnités compensatrices pour chaque Président de federation) agenewe Perezida wa FERWAFA, $50,000 agenewe iterambere ry’umupira w’amaguru w’abana hamwe na $30,000 agenewe gufasha abasifuzi bo mu Rwanda.

Nk’uko Perezida wa FERWAFA, Bwana Nzamwita Vincent yabyemereye abanyamuryango mu Nteko Rusange isanzwe iheruka kubera I Rubavu kuwa 25/03/2017, 50% by’ayo mafaranga agenewe ku giti cye nka Perezida wa FERWAFA, azahabwa abanyamuryango ba FERWAFA. Perezida wa FERWAFA arasaba ko n’undi muyobozi wa FERWAFA uzatorwa yakomeza n’uyu muco wo gufasha abanyamuryango.

2. Ku kibazo cy’imisoro cy’aya mafaranga:

Nyuma yaho Pereziza wa FERWAFA Bwana Nzamwita Vincent aboneye ibaruwa ivuye muri CAF imwerera ayo mafaranga, yasabye Umunyamabanga Mukuru wungirije ushinzwe Imari muri FERWAFA ko aya mwishyura yose (net) kuri konti ye hanyuma FERWAFA ikazishyura imisoro isabwa. Gusa nyuma yaho Umunyamabanga Mukuru wungirije ushinzwe Imari yagiriye inama Perezida ko imisoro y’ayo mafaranga itakagombye kwishyurwa na FERWAFA ahubwo ariwe bwite wakagombye kuyishyura. Ibi byatumye Perezida wa FERWAFA yegera Ikigo cy’imisoro n’amahoro (RRA) kugirango asabe ubusobanuro buhagije ku misoro y’ishyurwa ku mafaranga nk’aya y’inkunga aba yoherejwe na CAF.

Komite nyobozi ya FERWAFA isigaje iminsi itageze ku kwezi manda ikarangira

Ikigo cy’imisoro n’amahoro (RRA) cyagiriye inama Perezida wa FERWAFA ko yishyura imisoro nk’uko itegeko ribigena hanyuma akozohereza ubusobanuro by’ayo mafaranga y’imisoro yishyuwe (justificatifs) muri CAF kugirango ayo mafaranga asubizwe (reimbursement), bityo amafaranga y’imisoro azishyurwa ntago azava muri FERWAFA ahubwo azava kuri aya $20,000 yagenewe Perezida wa FERWAFA, kandi ibi birimo gukorwa.

3. Ku kibazo cyo gufata imyanzuro bitanyuze muri Komite Nyobozi ya FERWAFA:

Nta cyemezo na kimwe Perezida wa FERWAFA, Bwana Nzamwita Vincent yari yafata mw’izina rye bitanyuze mu nama ya Komite ya Nyobozi ya FERWAFA muri iyi myaka ine amaze ayobora ishyirahamwe ry’umupira w’amaguru mu Rwanda. Rero ibyo bamwe mu bagize Komite Nyobozi ya FERWAFA bagenda batangaza ntaho bihuriye n’ukuri. Imyanzuro y’izi nama za Komite Nyobozi zagiye zifata ibyemezo bitandukanye zirahari kandi zabihamya.

4. Gutumiza inama ya Komite Nyobozi mu gihe cy’amasaha mirongo ine n’umunani (48) kugirango Perezida wa FERWAFA abahe ibisobanuro;

Nta burenganzira nta bumwe abagize Komite Nyobozi ya FERWAFA bafite bwo gutegeka Perezida wa FERWAFA gutumiza Inama ya Komite Nyobozi kugirango atange ibisobanuro ku kibazo runaka. Ibisobanuro birebana n’ikoreshwa ry’aya mafaranga bizahabwa Inteko Rusange ya FERWAFA.

FERWAFA itangaje ibi mu gihe Albert Mwanafunzi na Nzamwita Vincent bahatanira kuyobora iryo shyirahamwe muri manda itaha bakomeje kwiyamamaza, amatora akaba ateganyijwe ku itariki ya 10 Nzeri uyu mwaka.

Kanda hano udukurikire kuri Facebook na Twitter

Ibitekerezo

kubwayo jean baptiste - 31/08/2017 saa 16:36

ariko she habuze umuntu cyadukurira degoli muri FERWAFA koko nimudukorere ubuvugizi
Kanda hano umusubize

Tanga igitekerezo

Amazina yawe

Email yawe

Igitekerezo cyawe

Niba igitekerezo cyawe kidatukana, ntigisesereze.

Gihawe ikaze.

Close X