Home > Amakuru Yose > Amakuru mashya > Mu Rwanda > Ibiri kuvugwa mbere y’umukino wa Kiyovu Sports na Rayon Sports

Ibiri kuvugwa mbere y’umukino wa Kiyovu Sports na Rayon Sports

By On:11 November
585
photo

Mu gihe habura amasaha make Kiyovu Sports yakire Rayon Sports mu mukino w’Umunsi wa cyenda wa Shampiyona y’u Rwanda, imihigo n’ubushotoranyi ni bwose ku bakunzi b’amakipe yombi.

Umukino uteganyijwe kubera kuri Stade ya Kigali i Nyamirambo saa 18:00, ku wa Gatanu, tariki 11 Ugushyingo 2022.

Kuva iki cyumweru cyatangira ku mbuga nkoranyambaga no mu biganiro bitandukanye by’imikino, uwa Kiyovu Sports na Rayon Sports watangiye gushyushywa binyuze mu guterana amagambo n’ubushotoranyi hagati y’abafana.

Ku wa Gatatu, Kiyovu Sports ibinyujije ku mbugankoranyambaga zayo yasangije abakunzi bayo n’abayikurikira amashusho y’abafana bayo bari gukubura icyo bise Rayon Sports ngo muri gahunda ya “Sukura umujyi”.

Yagize iti “Muri gahunda ya sukura umujyi, Kiyovu Sports n’abakunzi bayo bari muri gahunda y’isuku izarangira ku wa Gatanu saa 21:00, aho gahunda ari ugusiga Nyamirambo yera deee!! By’umwihariko muri Stade ya Kigali.”

Munyakazi Sadate wabaye Perezida wa Rayon Sports, abinyujije kuri Twitter ye we yavuze ko uyu mukino ugiye kuba nyuma y’imyaka itanu ikipe ye ishyinguye Kiyovu Sports, ni imvugo yakoreshejwe ubwo iyi kipe yo ku Mumena yatsindwaga ikamanuka mu Cyiciro cya Kabiri ariko ikaza kurokoka kugikina.

Yagize ati “Nyuma y’imyaka itanu Rayon Sports ihuhuye Kiyovu Sports, uno munsi haraba umuhango wo kwibuka nyakwigendera Kiyovu Sports, saa Kumi n’Ebyiri Nyamirambo, imyiteguro yo kwakira Umwami wa ruhago uzitabira uyu muhango irarimbanyije ndetse n’imihanda yarakubuwe!’’

Ku ruhande rwa Rayon Sports, Perezida w’abafana, Muhawenimana Claude avuga ko nubwo Kiyovu Sports imaze iminsi ibatsinda ubu ikipe yahindutse ikomeye bitandukanye n’iyo mu bihe biheruka.

Yagize ati “Ni byo Kiyovu Sports imaze iminsi idutsinda ariko ubu twariyubatse bikomeye ntabwo izongera. Dufite imvune nyinshi ariko Rayon sports ifite abakinnyi benshi kandi beza.’’

Yakomeje avuga ko nubwo ibiciro byo kwinjira byazamuwe ariko abafana biteguye kugota stade.

Ati “Amafaranga asa nk’aho ari hejuru ariko nta kibazo tuzaza stade tuyigote n’imifanire iri hejuru n’udushya twinshi kuko abantu bamaze kumenya udushya mu bafana ba Rayon.”

Si mu bafana gusa kuko by’umwihariko Perezida wa Kiyovu Sports, Mvukiyehe Juvénal, akanira cyane nk’uko yakomeje kubivuga inshuro nyinshi.

Ubwo yatsindaga Rayon Sports ku mukino wa nyuma wa ‘Made in Rwanda Cup’ yavuze ko mu gihe akiri ku buyobozi Rayon sports itazigera itahana amanota atatu.

Yagize ati “Njye nakuze mbona Rayon Sports ari akana kuri twe, yaje kutwigaranzura, ni yo mpamvu navuze nti oya, kuva nkiri umuyobozi turashaka kuyibutsa bya bihe tuyitsinda imyaka myinshi aho twigeze kuyigira umugore, ngira ngo n’uyu munsi yabaye umugore.’’

Rayon Sports itaratsindwa uyu mwaka iri ku mwanya wa mbere n’amanota 18 mu mikino itandatu imaze gukina, ikurikiwe na Kiyovu Sports iri ku mwanya wa kabiri n’amanota 17 mu mikino umunani.

Mu gihe Rayon Sports yatsinda Kiyovu Sports yahita iyishyiramo ikinyuranyo cy’amanota ane kandi ifite n’ibirarane bibiri.

Nubwo Rayon Sports uyu mwaka imeze neza ntiheruka gutsinda Kiyovu Sports kuko mu mikino itanu iheruka iyi kipe y’Urucaca yatsinze ine, amakipe anganya umwe, bivuze ko iyi kipe y’abafana benshi mu Rwanda iheruka gutsinda Kiyovu tariki 1 Ukuboza 2019.

Ibiciro byo kwinjira kuri uyu mukino ni ibihumbi 5 Frw ahasanzwe, ibihumbi 10 Frw ahatwikiriye, VIP ni ibihumbi 25 Frw mu gihe VVIP yagizwe ibihumbi 50 Frw.

Make A Comment

Izindi Nkuru Wasoma