Home > Amakuru Yose > Amakuru mashya > Mu Rwanda > Noneho Kwipimisha Covid-19 byashyizwe kugiciro cyoroheye buri (...)

Noneho Kwipimisha Covid-19 byashyizwe kugiciro cyoroheye buri wese

By Imirasire On:1 August
2940
photo

Ikigo cy’Igihugu gishinzwe Ubuzima (RBC) cyatangaje ko igiciro cyo kwipimisha Covid-19 mu buryo bwihuse (rapid test) mu mavuriro cyagabanyijwe, kigashyirwa ku 5000 Frw kivuye ku 10.000 Frw.

Izi mpinduka zije nyuma y’iminsi inzego z’ubuzima mu Rwanda zitangaje ko ziri kwiga ku kugabanya igiciro cyo kwipimisha kugira ngo abaturage benshi bajye babasha kumenya uko bahagaze bitagoranye.

Uyu mwanzuro kandi usa n’uje koroshya ishyirwa mu bikorwa ry’ingamba ziherutse gufatwa n’Inama y’Abaminisitiri, aho ibikorwa bitandukanye bihuza abantu benshi nk’inama, ubukwe n’ibindi kubyitabira bizajya bisaba kubanza kwipimisha Covid-19.

Ubusanzwe mu Rwanda kwipimisha Covid-19 bikorwa mu buryo bubiri. Hari ikizamini gifatwa cyihuta cyizwi nka “Antigen Covid-19 rapid test” ari nacyo cyashyizwe kuri 5000 Frw. Iki kiboneka umuntu apimwa mu mazuru ibisubizo bikaboneka mu minota itarenze 15 cyangwa iri hasi yayo.

Hari ikindi cyitwa “PCR” gifatwa mu kanwa, cyo kiba kigamije gucukumbura ngo kirebe ko umuntu adafite ubwandu bwa Covid-19, ibisubizo biboneka nyuma y’amasaha 24, umuntu akishyura 47.200 Frw.

Itangazo RBC yashyize hanze, ntacyo yavuze kuri PCR, ahubwo yatangaje ko mu gihe cya vuba hazatangazwa urutonde rw’amavuriro yemerewe gufatirwamo Rapid test.

Yagize bati “RBC iramenyesha abantu bose ko guhera tariki ya 9 Kanama 2021 igiciro cyo gupima Covid-19 mu buryo bwihuse (rapid test) mu mavuriro yigenga kizaba 5.000 Frw. Urutonde rw’amavuriro yigenga ashobora gupima Covid-19 muzarumenyeshwa bidatinze.”

Abantu basaga miliyoni ebyiri ni bo bamaze gupimwa mu Rwanda kuva Coronavirus yagera mu gihugu. Mu basanzwemo iyo ndwara, 808 yarabahitanye.

Make A Comment

Izindi Nkuru Wasoma