Home > Amakuru Yose > Imikino > Mu Rwanda > Rayon Sports mu myambaro mishya izakoresha mu gikombe cy’Amahoro

Rayon Sports mu myambaro mishya izakoresha mu gikombe cy’Amahoro

By MAHAME On:15 March
3465
photo

Kuri uyu wa Kabiri ikipe ya Rayon Sports ifatanyije n’umuterankunga wayo mukuru Skol, bamuritse ku mugaragaro umwambaro uzambarwa n’abakinnyi b’iyi kipe ndetse n’ umwambaro w’abafana baziba bambaye mu mikino yo guhatanira gikombe cy’Amahoro itangira kuri uyu wa Gatatu.

Ni umuhango wabereye mu Nzove, iyi ikaba ari imyambaro yaguzwe ku bufatanye na Skol nk’umuterankunga mukuru wayo usanzwe unabagururira imyenda bakinisha muri shampiyona.

Ni imyambaro irimo iyiganjemo ibara ry’ubururu izajya yambrwa mu gihe ikipe yakiriye imikino, umwambaro wiganjemo umweru ku mipira izajya yambarwa ku mikino ikipe itazaba yakiriye, ndetse n’umwambaro ufite imipra y’umuhondo n’amakabutura y’umukara uzaba ari umwambaro wa gatatu.

Usibye iyi myambaro y’ikipe, hanamuritswe umwambaro w’abafana uzajya ugurishwa ibihumbi 15 Frws ku mufana wifuza kuwambara, ikazajya igurishwa ku biro by’ikipe ya Rayon Sports.

Mu kumurika uyu mwambaro hasobanuwe mu kuwukora hagendewe ku mateka y’ikipe ya Rayon Sports ikomoka mu karere ka Nyanza, akarere gafatwa nk’igicumbi cy’umuco ari nayo hashyizwemo imigongo ifatwa nk’ikirango cy’umuco nyarwanda.

Ivan umuyobozi w’uruganda rwa Skol yavuze ko iyi myambaro yakozwe hashingiwe ku bitekerezo by’abadozi (designers) aho ifite umwihariko w’imigongo ifitanye isano n’i Nyanza aho iyi kipe ikomoka.

Yagize ati: "Uburyo ikozwemo byakozwe hashingiwe ku bitekerezo by’abadozi (designers), hari inzu yabidufashijemo. Ifitanye isano no kuba Rayon Sports ikomoka i Nyanza, muri yo murabona imigongo, yakozwe hashingiwe ku bwiza nyaburanga bwaho. "

Perezida wa Rayon Sports, Uwizeye Jean Fidele yavuze ko impamvu bahisemo gushyiramo imigongo ari uko igaragaza ubwiza ndetse mu muco Nyarwanda imigongo ifite inkomoko i Nyanza aho Rayon Sports ikomoka.

Yakomeje avuga ko bifuza kubaka Rayon Sports ikomeye bazaraga n’abazukuru babo

Yagize ati: "Turifuza kubaka Rayon Sports igasubirana agaciro kayo, tukayubaka duhereye mu mizi, tukubaka Rayon Sports tuzaraga abazukuru bacu, ibyo tuzabigeraho dufatanyije na Skol."

Yavuze ko bafite imishinga myinshi na Skol aho harimo no kuvugurura ikibuga cyo mu Nzove aho bazashyiramo n’amatara ku buryo hanakinirwa imikino ni njoro.

Make A Comment

Izindi Nkuru Wasoma