Home > Amakuru Yose > Imikino > Sugira Ernest na Bizimana Yannick mu bakinnyi 7 batagikomeje umwiherero (...)

Sugira Ernest na Bizimana Yannick mu bakinnyi 7 batagikomeje umwiherero w’ikipe y’igihugu Amavubi

By Imirasire On:26 October 2020
795
photo

Ikipe y’Igihugu ‘Amavubi’ yari imaze icyumweru kimwe mu kiruhuko, irasubukura umwiherero kuri uyu wa Mbere yitegura imikino ibiri izahuramo na Cap-Vert mu kwezi gutaha mu gushaka itike ya CAN 2021 izabera muri Cameroun mu 2022, uyu mwiherero ukaba atazagaragaramo abakinnyi 7 yari yahamagaye barimo Bizimana Yannick wa APR FC na Sugira Ernest wagize ikibazo cy’imvune.

Abatoza b’ikipe y’igihugu Amavubi bayobowe na Mashami Vincent nk’umutoza mukuru, babwiye bamwe mu bakinnyi bari bahamagaye ko urwego rwabo ruri hasi, bityo ko bagomba kuguma mu makipe yabo, kandi Amavubi arasubira mu mwiherero kuri uyu wa mbere.

Nyuma y’umwiherero wa mbere w’ikipe y’igihugu Amavubi, abakinnyi bagahabwa ikiruhuko, kuri uyu wa mbere ikipe y’igihugu irasubira mu mwiherero wo gukomeza gutegura imikino iteganyijwe.

Mu bakinnyi bari bahamagawe mu mwiherero wa mbere, hari abagaragaje urwego ruri hasi kurusha baganzi babo, ari nayo mpamvu abatoza b’ikipe y’igihugu bahise babwira abakinnyi batandatu ko batari bukomezanye mu rugamba bafite, undi umwe akaba yaragize imvune.

Bizimana Yannick rutahizamu wa APR FC yasezerewe mu ikipe y’Amavubi ataragera mu mwiherero, bivugwa umutoza yabonye urwego rwe ruri hasi mu mikino ibiri iyi kipe y’ingabo z’igihugu yakinnye na AS Kigali.

Abo bakinnyi batandatu batajya mu mwiherero w’Amavubi kubera urwego ruri hasi bagaragaje, ni:

1. Bayisenge Emery (As Kigali FC)
2. Ndekwe Felix (As Kigali FC)
3. Kalisa Rashid (As Kigali FC)
4. Usengimana Faustin (Police FC)
5. Iradukunda Eric (Police FC)
6. Bizimana Yannick (APR FC)

Mu gihe undi mukinnyi utari bujye mu mwiherero kubera imvune, ari rutahizamu Sugira Ernest wavunikiye mu myitozo y’iyi kipe y’igihugu.

Biteganyijwe ko abakinnyi 28 bitabira umwiherero babanza gupimwa COVID-19 mu gikorwa kibera ku cyicaro cya FERWAFA i Remera kuri uyu wa Mbere.

Amavubi azabanza kwakirwa n’Ikipe y’Igihugu ya Cap-Vert tariki ya 11 Ugushyingo mu gihe umukino wo kwishyura uzabera i Kigali tariki ya 17 Ugushyingo 2020.

U Rwanda ni urwa nyuma mu itsinda F n’amanota 0, nyuma yo gutsindwa na Mozambique ibitego 2-0 ndetse na Cameroun igitego 1-0 mu mikino ibiri imaze gukinwa, yombi yabaye mu Ugushyingo 2019.

Cap-Vert ifite amanota abiri inyuma ya Cameroun na Mozambique zifite amanota ane, ni nyuma yo kunganya n’ibihugu byombi ubusa ku busa n’ibitego 2-2.

Make A Comment

Izindi Nkuru Wasoma