Aya masezerano yashyizweho umukono kuri uyu wa 5 Kanama 2026 hagati ya Minisiteri y’Imari n’Igenamigambi (MINECOFIN) na Banki y’Ishoramari y’Abanyaburayi (EIB), mu rwego rwo gukomeza gushora imari mu bikorwa byo kubungabunga ibidukikije no kugabanya ingaruka z’imihindagurikire y’ibihe ku baturage.
Inguzanyo izifashishwa mu mushinga wiswe Volcanoes Community Resilience Project (VCRP), ugamije kubungabunga urusobe rw’ibinyabuzima, gusana abashyamba n’ubutaka byangiritse, kubaka ibikorwa remezo bihangara ibiza no guteza imbere imibereho y’abaturage batuye mu Ntara y’Amajyaruguru n’iy’Uburengerazuba.
Uyu mushinga uzashyirwa mu bikorwa mu turere twa Burera, Musanze, Gakenke, Nyabihu, Rubavu, Rutsiro, Ngororero na Muhanga, aho uzagera ku baturage basaga miliyoni 2,3, cyane cyane abatuye mu bice bikunze kwibasirwa n’imyuzure, inkangu n’isuri.
Biteganyijwe ko amafaranga azatangwa azashorwa mu kubaka ibikorwa remezo bigabanya ibyago by’ibiza, gusubiranya ubutaka n’amashyamba byangiritse, kubungabunga ibice bifata amazi no guteza imbere ibikorwa by’ubukungu bidahungabanya ibidukikije.
Umushinga uzashyirwa mu bikorwa uyobowe na Minisiteri y’Ibidukikije, ku bufatanye n’Ikigo cy’Igihugu gishinzwe Imicungire y’Umutungo Kamere w’Amazi (RWB), Ikigo cy’Igihugu gishinzwe Ubumenyi bw’Iteganyagihe (Meteo Rwanda), Ikigo cy’Igihugu gishinzwe Kubungabunga Ibidukikije (REMA) ndetse n’Urwego rw’Igihugu rw’Iterambere (RDB).
Kimwe mu bikorwa by’ingenzi biteganyijwe muri uyu mushinga ni kwagura Pariki y’Igihugu y’Ibirunga, aho izongerwaho ubuso bwa hegitari 3.740 ku busanzwe bungana na hegitari hafi 16.000, bivuze ko iziyongera hafi 23%.
Iri yaguka rigamije kurushaho kubungabunga urusobe rw’ibinyabuzima, by’umwihariko ingagi zo mu misozi n’izindi nyamaswa zibarizwa muri iyi pariki, ndetse no kugabanya ibibao bikunze kuvuka hagati y’abaturage n’inyamaswa.
Abaturage batuye mu bice bizongerwa kuri pariki bazimurwa mu buryo bwubahirije amategeko, bahabwe ingurane cyangwa bafashwe kwimukira mu midugudu yubatswe hubahirijwe amahame yo kubungabunga ibidukikije.
Mu cyiciro cya mbere hateganyijwe kubakwa umudugudu w’icyitegererezo uzatuzwamo imiryango 510, aho abazawutuzwamo bazahabwa n’amahugurwa azabafasha kugira imibereho myiza binyuze mu buhinzi bugezweho n’ibindi bikorwa bifasha mu kubungabunga ibidukikije.
Umushinga VCRP ufite agaciro karenga miliyoni 300 z’Amadolari ya Amerika (asaga miliyari 435 Frw), ukaba ugamije gufasha abaturage bo mu bice bikikije pariki y’ibirunga kurushaho guhangana n’ingaruka z’imihindagurikire y’ibihe, kurengera umutungo kamere no guteza imbere iterambere rirambye.
Iyi nguzanyo ya EIB igaragaza icyizere u Rwanda rukomeje kugirirwa n’abafatanyabikorwa mpuzamahanga mu bikorwa byo guhangana n’imihindagurikire y’ibihe, no kubaka ubushobozi bw’abaturage batuye mu bice bikunze kwibasirwa n’ibiza, hagamijwe kubafasha kugira imibereho myiza no kurengera ibidukikije.
Hazabaho kwagura pariki y’ibirunga
