Imirasire.rw

Abantu 220 nibo bamaze guhitanwa na Ebola muri DR Congo

Mahame — 2026-05-25T09:09:59Z

Iyi Minisiteri yatangaje ko abapfuye barimo 88 bo muri Mongbwalu, 69 bo muri Rwampara na 48 bo mu Mujyi wa Bunia; hose mu Ntara ya Ituri.

Ibi bice ni na byo byagaragayemo benshi bikekwa ko banduye Ebola, kuko nka Mongbwalu imaze kugaragaramo 339 barimo 19 byemejwe ko banduye, Bunia yagaragayemo 249 barimo 24 byemejwe ko banduye, mu gihe Rwampara yo imaze kugaragaramo 228 barimo 32 byemejwe ko banduye.

Mu Ntara ya Kivu y'Amajyaruguru hamaze kuboneka abantu 20 bikekwa ko banduye Ebola barimo barindwi bo mu Mujyi wa Butembo na 13 bo muri Katwa muri Teritwari ya Lubero. Bane bo muri ibi bice ni bo byamaze kwemezwa ko banduye iki cyorezo.

Ihuriro AFC/M23 ryatangaje ko kugeza ku wa 24 Gicurasi 2026, umuntu umwe ari we wanduye Ebola mu Mujyi wa Goma, bikaba bikekwa ko hari undi umwe ushobora kuba yaranduye iki cyorezo.

AFC/M23 yasobanuye ko mu Mujyi wa Bukavu na ho habonetse umuntu umwe wanduye Ebola, ndetse ikaba yaranamwishe. Byemejwe ko yari aherutse mu Mujyi wa Kisangani mu Ntara ya Tshopo.

Iki cyorezo cyageze n'i Kampala muri Uganda, kuko Minisiteri y'Ubuzima yaho yatangaje ko kugeza tariki ya 23 Gicurasi, habonetse abarwayi bacyo batanu, barimo Abanye-Congo batatu bari baherutse muri RDC. Umwe yarapfuye, undi ntakigaragaza ibimenyetso nyuma yo guhabwa ubuvuzi.

Ishami rya Loni rishinzwe Ubuzima, (OMS) ryagaragaje ko ibihugu byo mu karere bifite ibyago byinshi byo kwibasirwa n'iki cyorezo. Ibi byatumye u Rwanda rukaza ingamba zo kugikumirira ku mipaka yo ku butaka no ku kibuga cy'indege.

Mu rwego rwo gukumira iki cyorezo, guhera tariki ya 22 Gicurasi, nta munyamabanga uheruka muri RDC mu giha kitarenze iminsi 30 wemerewe kwinjira mu Rwanda. Ku Banyarwanda n'abafite ibyangombwa byo gutura baherukayo, bazajya babanza gushyirwa mu kato.

Tariki ya 23 Gicurasi, Minisiteri y'Ubuzima yatangaje ko nta muntu wanduye Ebola uraboneka mu Rwanda, ariko ko Abaturarwanda bakwiye gukomeza kwitwararika kugira ngo kitazahagera.

Ebola iterwa na virusi yitwa Ebola. Iyo virusi iba mu mubiri w'ubwoko bumwe bw'uducurama, ntidutere indwara ariko tukayikwirakwiza. Yibasira abantu ndetse n'inyamanswa z'inyamabere zo mu ishyamba nk'impara, isha, ingagi, inkende n'ibitera.

Umuntu urwaye Ebola atangira kugaragaza ibimenyetso by'uburwayi hagati y'iminsi ibiri na 21 nyuma y'uko yanduye virusi yayo. Ikimenyetso cya mbere cy'umuntu urwaye Ebola ni umuriro mwinshi utagabanyuka, kurwara umutwe, kubabara mu muhogo, gucika intege, kuribwa mu ngingo, kuribwa mu nda, kuruka no guhitwa cyane kandi kenshi, gusesa ibiheri ku mubiri, gutukura amaso no kuva amaraso ahantu hose hari umwenge ku mubiri.

OMS igaragaza ko uwanduye Ebola yo mu bwoko bwa Bundibugyo iri kwibasira abo mu burasirazuba bwa RDC aba afite ibyago biri hagati ya 30 na 50% byo kwicwa na yo. Ntigira umuti ariko havurwa ibimenyetso byayo kandi uwivuje kare aba afite amahirwe yo gukira.

Perezida Kagame yagiriye uruzinduko rw'akazi muri Qatar

Mahame — 2026-05-24T13:59:04Z

Ku Kibuga Mpuzamahanga cy'Indege cya Doha International Airport, Perezida Kagame yakiriwe n'Umunyamabanga wa Leta muri Minisiteri y'Ububanyi n'Amahanga ya Qatar, Dr. Mohammed bin Abdulaziz bin Saleh Al Khulaifi ndetse na Ambasaderi w'u Rwanda muri Qatar, Igor Marara Kayinamura.

Uruzinduko Perezida Kagame aheruka kugirira i Doha ni urwabaye mu Ugushyingo 2025 ubwo yari yitabiriye Inama Mpuzamahanga yiga ku iterambere (World Summit for Social Development).

Rwakurikiwe n'urwo Emir wa Qatar, Sheikh Tamim bin Hamad Al Thani, yagiriye i Kigali muri uko kwezi.

Uruzinduko rwa Perezida Kagame i Doha ruje mu gihe muri Mata 2026, yari yoherereje ubutumwa bwanditse Sheikh Tamim bin Hamad Al-Thani.

Ubu butumwa bwa Perezida Kagame bwajyanywe i Doha na Minisitiri w'Umutekano w'Imbere mu Gihugu, Dr. Vincent Biruta, bwakirwa na mugenzi we wo muri Qatar, Sheikh Khalifa bin Hamad bin Khalifa Al Thani, nk'uko byatangajwe na Minisiteri y'Umutekano muri Qatar.

U Rwanda na Qatar bifitanye umubano w'ubufatanye mu nzego zitandukanye, zirimo ishoramari, ubukerarugendo n'ubwikorezi.

Ibihugu byombi kandi bifitanye imikoranire mu bijyanye n'ubwikorezi bwo mu kirere, aho biteganyijwe ko mu minsi iri imbere Qatar Airways izegukana imigabane 49% muri RwandAir.

Uretse RwandAir, Qatar inafite imigabane ingana na 60% mu mushinga w'Ikibuga cy'Indege cya Bugesera.

Abakozi b'Ibitaro bya Kibungo basanga kumenya neza amateka ya Jenoside yakorewe abatutsi bizabafasha kurushaho kurinda ubuzima bw'ababagana

Mahame — 2026-05-22T17:44:14Z

Aba bakozi basuye Urwibutso rwa Jenoside rwa Ntarama, bashyira indabo ku mva zishyinguyemo imibiri y'inzirakarengane zizize Jenoside yakorewe abatutsi mu 199, banasobanurirwa amateka y'ubwicanyi ndengakamere bwabaye mu 1994, harimo uburyo abana, abagore n'abatwite bishwe urw'agashinyaguro.

Nyuma yo gusura urwibutso, bagaragaje ko ibimenyetso babonye bibahaye isomo rikomeye rizabafasha kurushaho kwita ku buzima bw'abarwayi, cyane cyane mu rwego rw'akazi kabo ka buri munsi ko gutanga serivisi z'ubuvuzi.

Dr. Munyemana Jean Claude

Umuyobozi Mukuru w'Ibitaro bya Kibungo, Dr. Munyemana Jean Claude yavuze ko gusura urwibutso byabaye umwanya wo guhuza amateka n'inshingano zabo nk'abaganga.

Yagize ati: “Twasuye uru rwibutso rwa Ntarama… twabonye aho abana bagiye bicirwa, tubona aho abagore bari batwite biciwe, abandi bagakorerwa ihohoterwa… nk'abo kwa muganga tuba twumva icyo bivuze kuko dukwiye kwita ku buzima bw'abarwayi.”

Yakomeje avuga ko ibyo babonye bibaha imbaraga zo kurushaho kunoza umurimo wabo no guharanira ko ubuzima bw'abantu burindwa uko bikwiye.

Safi Olivier, umukozi muri ibyo bitaro, yavuze ko gusura Ntarama byabongereye ubumenyi n'ubushishozi ku kamaro ko kurinda ubuzima.

Yagize ati: “Tubona ko mu by'ukuri ari umwanya mwiza wo kugira ngo tubashe kumenya ububi bwa Jenoside… duharanire ko ibyabaye bitazongera kuba.”

Cyurinyana Marie na Nsengiyumva Anselme bagaragaje ko ibimenyetso babonye bizabafasha gukomeza inshingano yo kurinda ubuzima bw'abantu bakeneye serivisi batanga no kurwanya ingengabitekerezo ya Jenoside.

Cyurinyana yagize ati: “Ubutumwa nkuye hano ni ukwigira ku mateka igihugu cyacu cyanyuzemo… Jenoside yarabaye kandi n'ibihamya birahari.”

Nsengiyumva na we yagize ati: “Tukimara kuhagera twabonye byinshi byakorewe ahangaha by'agahomeramunwa… tugomba gufata ingamba zo kurwanya abapfobya Jenoside yakorewe Abatutsi.”

Aba bakozi b'Ibitaro bya Kibungo bashimangiye ko amasomo bakuye ku mateka ya Ntarama azakomeza kubayobora mu kazi kabo ka buri munsi, by'umwihariko mu kurushaho kurinda ubuzima bw'ababagana no gutanga serivisi z'ubuvuzi zishingiye ku bumuntu n'ukuri kw'amateka.

Safi Olivier

Cyurinyana Marie

Nsengiyumva Anselme

Musanze: Polisi yahaye abanyeshuri n'abarezi basaga 1000 inyigisho zo gukumira no kurwanya inkongi

Mahame — 2026-05-20T18:00:02Z

Abahuguwe bibukijwe uruhare rwabo mu gukumira no kwirinda inkongi ndetse banagaragarizwa uko bakwitwara igihe ingongi ivutse. By'umwihariko bigishijwe imikoresherezwe y'ikizimyamuriro ndetse n'uko bakwirinda inkongi ishobora guturuka kuri gaz itekesha no kuyirwanya igihe yavutse dore ko bamwe mu bahuguwe barimo n'abiga ibyo guteka.

Umuyobozi w'ishuri Padiri Remedi Didier DUSHYIREHAMWE yashimiye Polisi y'u Rwanda, k'ubumenyi yabunguye ku birebana no gukumira inkongi ndetse n'ibindi byaha, ashimangira ko bizabafasha ubwabo ndetse bakazasangiza ubu bumenyi n'abandi.

Ati: "urashimira abaduhuguye ndetse n'urwego rwabohereje. Ubu ntabwo aritwe duhuguwe twenyine ahubwo tuzasangiza ubu bumenyi imiryango n'inshuti zacu batari babufite bityo bugere kuri benshi."

Polisi y'u Rwanda ishimangira ko muri gahunda zayo ishyiramo no gusangira ubumenyi n'abaturage by'umwihariko urubyiruko kugira ngo bakure bazi uruhare rwabo mu gukumira no kurwanya ibyaha ndetse n'inkongi.

Umuvugizi wa Polisi mu Ntara y'Amajyaruguru, CIP Ignace Ngirabakunzi yasabye abahuguwe kuzirikana ubumenyi bahawe kandi bakazabusangiza n'abandi.

Ati: "Inkongi iri mu biteza umutekano muke. Ubumenyi mwahawe ni ingenzi mu gukumira inkongi no kuyirinda ndetse n'igihe yabaye mukamenya uko mu byitwaramo, mukoresheje ikizimyamuriro cyangwa ubundi buryo mweretse."

U Rwanda rwashyizeho ingamba zo gupima abantu Ebola ku mipaka ruhuriyeho n'ibihugu bya DR Congo na Uganda

Mahame — 2026-05-20T07:36:48Z

Izi ngamba zafashwe mu rwego rwo kwitwararika no kurinda ubuzima bw'abaturage.

Inzego z'ubuzima zivuga ko ibi bikorwa ari uburyo bwo gukumira hakiri kare, hagamijwe kwirinda ikwirakwira ry'ubwandu bushobora kwambuka imipaka.

Nk'uko tubikesha ikinyamakuru The New Times cyasuye imwe mu mipaka ihuza u Rwanda n'ibyo bihugu, Minisiteri y'Ubuzima yohereje amatsinda y'abakozi bashinzwe kugenzura no gusuzuma abinjira n'abasohoka.

Nubwo imipaka ikomeje gukora nk'uko bisanzwe, byagaragaye ko urujya n'uruza rw'abantu rwagabanutse kubera igenzura ryongerewe.

Izi ngamba zafashije inzego zibishinzwe gukurikirana neza buri muntu wambuka umupaka, hagamijwe kumenya hakiri kare uwaba waragize ibyago byo kwandura Ebola.

Mu turere twegereye imipaka, hashyizweho ibigo byo gukurikiraniramo abinjira mu gihugu, cyane cyane abaturuka mu bice bifite ibyago byinshi byo kuba byaragaragayemo ubwandu.

Umwe mu bayobozi bo mu Karere ka Rubavu yagize ati: “Ibi bigo bidufasha kugenzura abantu mu gihe kingana n'igihe Ebola ishobora kumara itagaragaza ibimenyetso, kugira ngo tumenye neza ko nta bwandu bafite. Twashyizeho n'uburyo bwo gukurikirana umuntu wese waba yarahuye n'abo mu bice byagaragayemo icyorezo.”

Yongeyeho ko kugeza ubu nta muntu n'umwe uragaragarwaho n'icyorezo cya Ebola mu Rwanda.

Umuvugizi wungirije wa Guverinoma y'u Rwanda, Uwera Jean Maurice, we yavuze ko imipaka ifunguye ariko ko u Rwanda rwafashe ingamba zo kwirinda ko icyorezo cya Ebola cyakwinjira mu Rwanda.

Mu butumwa yanyujije ku rukuta rwe rwa X, Uwera Jean Maurice yavuze ko imipaka ifunguye ariko ko abambuka basabwe kwigengesera mu kwirinda ikwirakwira ry'iki cyorezo.

Yagize ati: "Nubwo imipaka ifunguye harasabwa kwigengesera ku bambuka kuko kujya mu gihugu cyagaragayemo icyorezo bisaba ubwitonzi, abagenda barasabwa kubimenyesha ubuyobozi, abacuruzi bagakorera muma groups ya cooperatives bakoreramo."

Ebola ifite igihe ishobora kumara mu mubiri w'uwaysnduye ibimenyetso byayo bitaragaragara (incubation period) gishobora kugera ku minsi 21, bivuze ko umuntu ashobora kumara icyo gihe atagaragaza ibimenyetso nyuma yo kwandura.

Ibi bituma igenzura rikomeye rikenerwa cyane ku mipaka, kugira ngo umuntu ushobora kuba yaranduye akurikiranwe kugeza igihe yemejwe ko nta kibazo afite.

Uturere dukomeje gushyirwamo ingamba zidasanzwe zirimo Rusizi, Karongi, Rubavu, Burera, Gicumbi na Nyagatare, aho ibikorwa byo kugenzura n'ubukangurambaga bikomeje gukazwa.

Nubwo ingamba zikomeje gukazwa, inzego z'ubuzima zirasaba abaturage gukomeza kugira isuku no kubahiriza amabwiriza yatanzwe, ariko zikanabasaba kutagira ubwoba.

Zishimangira ko kugeza ubu Rwanda nta murwayi wa Ebola uragaragaramo, kandi ko abashinzwe ubuzima bakomeje kugenzura neza uko ibintu bihagaze ku mipaka no mu gihugu imbere.

Raporo ya RGB ya 2024/2025 igaragaza ko Abanyarwanda bishimira serivisi z'umutekano ku kigero cya 92,1%

Mahame — 2026-05-19T05:45:20Z

Iyi raporo yatanzwe n'iyi Komisiyo iyobowe na Depite Nabahire Anastase, ishingiye ku bushakashatsi bwa RGB bugaragaza uko imiyoborere n'imitangire ya serivisi bihagaze mu gihugu, ndetse n'uko abaturage babibona.

Depite Nabahire yavuze ko isesengura ry'iyi raporo ryibanze ku nshingano z'ibanze za RGB nk'uko ziteganywa n'itegeko n° 56/2016 ryo ku wa 16/12/2016, aho hasesenguwe inkingi zitandukanye zirimo iyubahirizwa ry'amategeko, uburenganzira bwa politiki, ubwisanzure bw'abaturage, imiyoborere idaheza, umutekano n'ituze, imibereho myiza, kurwanya ruswa, gukorera mu mucyo no kubazwa inshingano, ireme rya serivisi ndetse n'imiyoborere mu bukungu n'ubucuruzi.

Raporo igaragaza ko RGB yakoze igipimo cy'imiyoborere cya 12, kikerekana ko inkingi eshanu ku munani ziri hejuru ya 80%, mu gihe eshatu zisigaye ziri hagati ya 60% na 79,99%.

Muri izo nkingi, umutekano waje ku isonga n'amanota 90,02%, bikagaragaza ko igihugu gikomeje gutera imbere mu gucunga ituze n'umutekano w'abaturage, mu gihe inkingi yo kuzamura imibereho myiza y'abaturage ari yo yaje ku mwanya wa nyuma n'amanota 64,69%.

RGB yanakoze ubushakashatsi bwa Citizen Report Card 2025 bugamije gusuzuma uko abaturage babona imiyoborere n'imitangire ya serivisi mu nzego zibegereye, bugaragaza ko abaturage bishimira serivisi rusange ku kigero cya 76,7%.

Ibyavuye muri ubu bushakashatsi byerekana ko ibyiciro 8 kuri 16 byasuzumwe biri hejuru ya 75%, aho umutekano wongeye kugaragara nk'uwaje ku isonga n'amanota 92,1%, mu gihe ubutaka, imiturire n'ibidukikije byaje ku mwanya wa nyuma n'amanota 65,7%.

Ibi byagaragajwe nk'ikimenyetso cy'uko serivisi z'umutekano zikomeje kugirirwa icyizere gikomeye n'abaturage, mu gihe hakiri n'indi mirongo igomba kongerwamo imbaraga hagamijwe kuzamura imibereho myiza n'ireme rya serivisi zitandukanye.

Imipaka ihuza u Rwanda na RDC yo mu Karere ka Rusizi nayo yafunzwe kubera Ebola

Mahame — 2026-05-18T09:42:05Z

Ni icyemezo cyatangajwe kuri uyu wa Mbere tariki ya 18 Gicurasi 2026, aho ubuyobozi bw'Akarere ka Rusizi bwemeje ko imipaka ya Rusizi ya 1 na Rusizi ya 2 ifunzwe by'agateganyo, hagamijwe gukumira ko iki cyorezo cyambuka kikagera ku butaka bw'u Rwanda.

Umuyobozi w'Akarere ka Rusizi, Sindayiheba Phanuel, yavuze ko gufunga iyi mipaka ari imwe mu ngamba zihutirwa zafashwe mu kurengera ubuzima bw'abaturage.

Yagize ati: “Imipaka ya Rusizi 1 na 2 ifunzwe by'agateganyo mu rwego rwo gukumira Ebola yagaragaye mu gihugu duturanye cya RDC. Icyakora hari ibyiciro byihariye bizakomeza koroherezwa gutambuka birimo abanyeshuri, abakora ibikorwa by'ubutabazi, abatwara ibiribwa ndetse n'abasubira iwabo.”

Iki cyemezo kije gikurikira ikindi cyari cyafatiwe mu Karere ka Rubavu, aho na ho imipaka imwe yari yafunzwe kubera impamvu nk'izi zo gukumira Ebola.

Amakuru aturuka mu nzego z'ubuzima agaragaza ko iki cyorezo gikomeje gukwirakwira mu Ntara ya Ituri muri RDC, aho mu cyumweru gishize hagaragaye umurwayi mushya, bigateza impungenge ku bihugu bihana imbibi na yo.

Ikigo Nyafurika gishinzwe gukumira no kurwanya indwara z'ibyorezo, Africa CDC, cyatangaje ko abanduye Ebola bageze kuri 336, mu gihe abamaze guhitanwa na yo ari 87.

Na none kandi, World Health Organization (WHO) yatangaje ko iki cyorezo kitagarukira muri RDC gusa, kuko no muri Uganda hagaragaye umurwayi umwe wahise apfira mu bitaro byo mu murwa mukuru, Kampala.

Mu gihe ingamba zo gufunga imipaka zikomeje gushyirwa mu bikorwa, ubuyobozi bw'Akarere ka Rusizi burasaba abaturage gukomeza kwitwararika, bubakangurira kubahiriza amabwiriza yo kwirinda arimo gukaraba intoki kenshi, kwirinda gusuhuzanya bakorakoranaho no kugabanya ingendo zitari ngombwa.

Abaturiye umupaka wa Kamanyola unyuze mu Murenge wa Bugarama bavuga ko wo ugifunguye, ariko na ho hashyizweho ingamba zikomeye zo gukumira ikwirakwira ry'iki cyorezo.

Icyemezo cyo gufunga iyi mipaka kigaragaza ko u Rwanda rukomeje gushyira imbere ubuzima bw'abaturage, rufata ingamba zihuse kandi zifatika mu gukumira indwara z'ibyorezo zituruka hanze, mbere y'uko zigera mu gihugu.

MINISANTE yavuze ko iri gukurikirana ibya Ebola nubwo nta murwayi uragaragara mu Rwanda

Mahame — 2026-05-17T22:32:39Z

Ibi MINISANTE yabitangaje mu gihe icyorezo cya Ebola gikomeje gutera impungenge mu bihugu birimo Repubulika Iharanira Demokarasi ya Congo na Uganda, aho gikomeje gukwirakwira mu bice bimwe na bimwe.

MINISANTE yasobanuye ko iri gukoresha uburyo butandukanye mu gukurikirana iki cyorezo, harimo gukaza ingamba zo gusuzuma no gukurikirana abinjira n'abasohoka ku mipaka, cyane cyane ihuza u Rwanda na RDC.

Yagize iti: “Kugeza ubu nta muntu urabonekaho Ebola mu Rwanda, ariko twongereye imbaraga mu gukurikirana uko icyorezo gihagaze no gusuzuma abambuka imipaka.”

Iyi Minisiteri yanagaragaje ko iri gukorana bya hafi n'Ishami ry'Umuryango w'Abibumbye ryita ku Buzima (OMS), ryashyize iki cyorezo mu rwego rw'Ikibazo Mpuzamahanga ku Buzima Rusange gikeneye kwitabwaho byihariye (PHEIC).

MINISANTE yijeje Abanyarwanda ko abakozi b'ubuzima biteguye, kandi ko hashyizweho uburyo bugezweho bwo gukurikirana indwara z'ibyorezo, ku buryo uwagaragaraho ibimenyetso bya Ebola yahita atahurwa agahabwa ubuvuzi bwihuse.

Hagati aho, imibare ya OMS igaragaza ko abantu barenga 80 bamaze guhitanwa n'iyi ndwara, mu gihe abakekwa kuyandura bagera kuri 246.

Ku rundi ruhande, amakuru aturuka mu Mujyi wa Goma uhana imbibi n'u Rwanda, agaragaza ko hagaragaye umurwayi wa Ebola wahise ashyirwa mu kato, mu gihe ibikorwa byo gukumira ikwirakwira ryayo bikomeje.

Mu Rwanda, ubuyobozi bw'Akarere ka Rubavu bwamaze gufata icyemezo cyo gufunga imipaka by'agateganyo, mu rwego rwo gukaza ingamba zo kwirinda iki cyorezo.

Kabuga Félicien apfiriye i La Haye atarabona igihugu kimwakira

Mahame — 2026-05-16T17:45:57Z

Urupfu rwe rwemejwe n'Urwego Mpuzamahanga rushinzwe gukora imirimo y'insigarira z'inkiko mpanabyaha, IRMCT, rwari rumaze igihe rumufunze nyuma yo guhagarika urubanza rwe bitewe n'uburwayi bukomeye.

Perezida wa IRMCT, Graciela Gatti Santana, yatangaje ko hagiye gukorwa iperereza rigamije kumenya icyateye urupfu rwe, anagena Alphons Orie kugira ngo ariyobore.

Kabuga yari umwe mu bashinjwa kugira uruhare rukomeye mu gutegura Jenoside yakorewe Abatutsi mu 1994. Yabaye umushoramari ukomeye mu Rwanda mbere yo gutangira kwihisha ubutabera, aho yamaze imyaka 26 ataraboneka.

Yafatiwe mu U Bufaransa muri Gicurasi 2020, akurikiranyweho ibyaha birimo Jenoside, umugambi wo gukora Jenoside no gushishikariza abantu gukora Jenoside, ndetse n'ibyaha byibasiye inyokomuntu birimo ubwicanyi n'ihohoterwa rikabije.

Ku wa 26 Ukwakira 2020, yoherejwe gufungirwa i La Haye aho IRMCT ifite icyicaro, kugira ngo aburanishwe kuri ibyo byaha.

Urubanza rwe rwatangiye ku wa 29 Nzeri 2022, ariko ruza guhagarikwa muri Nzeri 2023 nyuma y'aho abaganga n'urukiko bemeje ko atagifite ubushobozi bwo kuburana kubera uburwayi.

Nubwo urubanza rwe rwahagaze, yakomeje kuguma mu maboko ya IRMCT mu gihe hagishakishwa igihugu cyakwemera kumwakira.

Leta y'Rwanda yari yagaragaje ubushake bwo kumwakira no kumwitaho, ariko umuryango we n'abanyamategeko be babitera utwatsi bavuga ko uburwayi bwe butamwemerera urugendo rurerure.

Kabuga ubwe yifuzaga gutura mu U Bufaransa, ariko iki gihugu n'ibindi byo mu Burayi ntibyemeye kumwakira, mu gihe U Buholandi bwari bumucumbikiye na bwo bwagaragaje ko budashaka ko aguma ku butaka bwabwo igihe yaba afunguwe.

Ubushinjacyaha bwa IRMCT bwari bwaragaragaje ko ibyaha bya Jenoside akurikiranyweho bitamwemerera guhabwa ubuhungiro mu bihugu by'i Burayi, ndetse ko kuba yaramaze igihe kirekire yihisha ubutabera byamugize uwo ibyo bihugu bitakwakira.

Hari hanatanzwe igitekerezo ko yakoherezwa mu Rwanda, igihugu cyari cyiteguye kubahiriza uburenganzira bwe, ariko urupfu rwe rubaye mbere y'uko hafatwa umwanzuro wa nyuma.

Urupfu rwa Kabuga rufatwa nk'iherezo ry'urugendo rurerure rw'ubutabera ku umwe mu bakekwaho uruhare rukomeye muri Jenoside yakorewe Abatutsi mu 1994, nubwo hari ibibazo bisigaye ku buryo imanza nk'izi zisozwa ku rwego mpuzamahanga.

Kicukiro: Abiga muri G.S Kimisange basabwe kwigira ku mateka bakarwanya ingengabitekerezo ya Jenoside n'igisa nayo

Mahame — 2026-05-16T10:10:00Z

Ni igikorwa cyabaye kuri uyu wa 15 Gicurasi 2026, gihuriweho n'ibigo bitatu bw'amashuri aribyo G.S Kimisange cyagiteguye, EP Zuba na Garuka VTC ndetse hiyongeraho n'ikigo cyigisha abana b'incuke cyitwa Urugero Nursery School.

Uyu muhango waranzwe n'amagambo yuje impanuro zatanzwe n'abarimo abayobozi mu nzego zitandukanye ndetse n'abaharokokeye Jenoside, aho bose bahurije ku kamaro ko kwibuka mu buryo burambye, by'umwihariko bigafasha urubyiruko gutandukanya ikibi n'icyiza.

Umuyobozi wa GS Kimisange, Berthilde Nyiraminani

Umuyobozi w'Urwunge rw'Amashuri rwa Kimisange, Madamu Berthilde Nyiraminani, yashimiye abitabiriye iki gikorwa ndetse asaba abana gukurikira neza impanura bagezwaho kugira ngo bizabafashe guhangana n'umuntu wese ushaka kugoreka amateka y'igihugu cyabo.

Ati: “Turabashimiye cyane kuba mwitanze mugafata umwanya wanyu mukaza, uyu rero ni umwanya kandi ababyeyi abarezi n'abandi bose tuba twafashe kugira ngo dusobanurire abana bacu amateka asharira igihugu cyacu cyaciyemo kugira ngo ibyabaye bitazongera kuba ukundi, bana bacu rero turabasaba kugaragaza ubwitonzi, icyo tubasaba nu ugukurikira mutuje mukumva impanuro kugira ngo mumenye amateka y'ukuri, kugira ngo uzashaka kuyagoreka muzamurwanye.”

James Niyongira, Visi Perezida wa Ibuka mu Murenge wa Kigarama

James Niyongira, Visi Perezida wa Ibuka mu Murenge wa Kigarama, akaba ari nawe watanze ikiganiro ku mateka yaranze u Rwanda mbere ya Jenoside yakorewe abatutsi mu 1994 na nyuma yayo kugeza ubu, yashimye Leta y'u Rwanda ku ruhare rwayo mu kwimakaza igikorwa cyo kwibuka no guharanira ko amateka atibagirana, by'umwihariko asaba urubyiruko kwamagana ikibi icyo aricyo cyose cyakurura amacyakubiri mu banyarwanda.

Ati: “Abenshi mu bahagaritse Jenoside bari urubyiruko, bari bato ariko batari gito, hashyizweho politiki y'uburezi budaheza, ubu abana bose bariga, mufite amahirwe y'uko murimo mwiga, kera abana b'igihugu bose siko bigaga, nta mwana rero uhezwa iyo ari umuhanga, mugomba gukora cyane kugira ngo mube abahanga. Urubyiruko rero rurasabwa iki? Urubyiruko murasabwa kwiyemeza kurwanya ivangura, ryaba iry'uturere, kuko moko yo mu Rwanda ntayakibaho, yabaga ari mu irangamuntu, abakoloni bari barayanditse mu irangamuntu, ubungubu nta moko akibaho, ubwo ni ivangura iryo ariryo ryose, imvugo z'urwango n'ingengabitekerezo ya Jenoside mu mashuri, ku mbuga nkoranyambaga n'aho mutuye, mwamagana ikibi, kabone nubwo cyaba giturutse ku muntu ugufiteho ububasha.”

Ntaganira Bosco, Umukozi ushinzwe imiyoborere myiza mu Murenge wa Kigarama

Ntaganira Bosco, Umukozi ushinzwe imiyoborere myiza mu Murenge wa Kigarama, wari umushyitsi mukuru, yibukije abanyeshuri bari aho kwiga neza amateka yaranze igihugu bikazabafasha kurwanya abagoreka amateka y'u Rwanda bagapfobya Jenoside yakorewe abatusi mu 1994, ndetse abasaba ababyeyi n'abarezi kwigisha neza no gusobanurira abana amateka y'ukuri yaranze u Rwanda kugira ngo bizabafashe kubaka igihugu kizira amacakubiri.

Ati: “U Rwanda rwapfuye rimwe ntiruzongera gupfa, rero mubyige mushyizeho umwete kuko ibyo igihugu kibakeneyeho ni ukwiga mugateza imbere igihugu cyanyu, imiryango yanyu namwe ubwanyu, kugira ngo muzagire ejo hanyu heza, rero ndagira ngo nshishikarize ababyeyi n'abarezi bari aha gukomeza kubakka abana mu buryo bigirira icyizere, mu buryo bishakamo ibisubizo hashingiwe ku mateka yaranze u Rwanda,…nizera ko tuzagira u Rwanda rwiza tuzaraga abazadukomokaho.”

Nyirimana Jean Bosco

Nyirimana Jean Bosco, watanze ubuhamya bw'inzira y'umusaraba yanyuzemo muri Jenoside yakorewe abatutsi mu 1994, yagarutse ku bibazo bahuraga nabyo mbere ya Jenoside biga mu mashuri abanza, aho bakorerwaga ivangura rikomeye.

Yaboneyeho kwibutsa abanyeshuri ko bari mu gihugu kiza kitarimo ivangura byityo bakwiye kwiga bashyizeho umwete, barwanya ibyatuma igihugu gisubira mu icuraburindi, by'umwihariko barwanya ivangura iryo ariryo ryose.

Ati: “Nk'abantu b'abana, Imana ikomeze ibahe abayobozi beza, mukomeze mutozwe neza, kandi biragaragara neza ko mufite ishyaka n'urukundo rwo kuba mutakora ibibi, kuko turi muri Leta nziza itavangura.”

Muri iki gikorwa cyo Kwibuka ku nshuro ya 32 Jenoside yakorewe abatutsi mu 1994, mu Rwunge rw'Amashuri rwa Kimisange, hatangijwe ku mugaragaro Club y'Ubumwe n'Ubudaheranwa.

Muri iki gikorwa kandi habayeho kuremera umubyeyi utishoboye warokotse Jenoside yakorewe Abatutsi mu 1994.

G.S Kimisange ni kimwe mu bigo by'amashuri byahozeho mbere ya Jenoside yakorewe abatutsi mu Rwanda mu 1994, iki kigo kikaba cyarigifite abana bo mu mashuri abanza mu 1994, ndetse bamwe mu bana bigaga muri iki kigo n'imiryango yabo bakaba barishwe muri Jenoside yakorewe abatutsi.

Hatangijwe Club y'Ubumwe n'ubudaheranwa

Baremeye umubyeyi utishyoboye warokotse Jenoside yakorewe abatutsi mu 1994