Imirasire.rw

Abanyamakuru basabwe kwirinda kubogama mu gihe cyo gutara no gutangaza inkuru z'ubutabera

Mahame — 2026-07-24T05:00:36Z

Ubi byagarutsweho mu mahugurwa y'iminsi itatu ku gutara no gutangaza inkuru z'ibyaha (Crime Reporting), yateguwe na Fojo Media Institute igashyirwa mu bikorwa na AFRI-MEDIA Ltd, ari kubera mu Karere ka Kamonyi kuva tariki ya 22 kugeza ku ya 24 Nyakanga 2026.

Aya mahugurwa agamije kongerera abanyamakuru ubumenyi n'ubushobozi bwo gutara np gutangaza inkuru z'ibyaha mu buryo bwubahiriza amahame y'umwuga, zishingiye ku makuru yagenzuwe neza, zirengera abakorewe ibyaha n'andi masoko y'amakuru ashobora kuba mu kaga, zubaha uburenganzira bw'abakekwaho ibyaha kandi zigakorwa mu nyungu rusange.

Me Jean Paul Ibambe

Me Jean Paul Ibambe, impuguke mu mategeko akaba n'inzobere mu mategeko agenga itangazamakuru, watanze inyigiho muri aya mahugurwa, yavuze ko umunyamakuru agomba guhora azirikana ko inshingano ze ari ugutanga amakuru, aho kuba umwe mu bagize uruhererekane rw'ubutabera.

Yagize ati: "Umunyamakuru ntabwo ari umugenzacyaha, si umushinjacyaha, si umucamanza, yewe si n'umurangizamanza. Inkuru yawe ntabwo igomba kuba imeze nka statement y'ubugenzacyaha cyangwa iy'ubushinjacyaha. Akazi k'umunyamakuru ni ugutanga amakuru, si ugufata imyanzuro cyangwa guca urubanza."

Yasobanuye ko kubogamira ku ruhande rumwe bishobora gutuma inkuru ibura ubunyamwuga, igatesha agaciro ihame ry'uko umuntu afatwa nk'umwere kugeza igihe urukiko rumuhamije icyaha.

Yongeyeho ko abanyamakuru bagomba kwirinda gukoresha amagambo cyangwa imyanzuro ishobora kuyobya rubanda, cyane cyane mu nkuru z'ibyaha n'impanuka.

Mu gutanga urugero, yavuze ko iyo habaye impanuka y'imodoka igahitana umuntu, bidahagije kuvuga ko yishwe n'impanuka gusa.

Ati: "Hari abantu benshi bagongwa ntibapfe. Ni muganga, nyuma yo gukora isuzuma ry'umurambo (autopsie), ushobora kwemeza icyateye urupfu. Iyo umunyamakuru yihutiye kuvuga icyishe umuntu mbere y'uko byemezwa n'ababifitiye ububasha, aba yakoze amakosa."

Me Ibambe yanagarutse ku nshingano abanyamakuru baba bihaye iyo batangaje inkuru y'urubanza bagaragazamo amazina y'abaregwa, amafoto yabo cyangwa andi makuru aberekeye.

Yagize ati: "Iyo mutangaje inkuru y'ubutabera mukavugamo umuntu amazina ye, mugashyiramo amafoto cyangwa mukavuga andi makuru amwerekeye, muba mufite inshingano zo kuzatangaza n'icyemezo cya nyuma cy'urukiko kuri urwo rubanza, nk'uko biteganywa n'amahame ngengamyitwarire y'umwuga."

Yasobanuye ko kutagaragaza uko urubanza rwarangiye bishobora gukomeza gusigira umuntu icyasha mu maso y'abaturage, kandi bishoboka ko yaba yaraje kugirwa umwere n'urukiko.

Yakomeje asaba abanyamakuru guhora baha amahirwe impande zose zivugwa mu nkuru, bakagenzura amakuru mbere yo kuyatangaza no kwirinda ururimi rushobora kugaragaza ko babogamiye ku ruhande rumwe.

Bamwe mu banyamakuru bitabiriye aya mahugurwa bagaragaje ko amasomo bayakuriyemo azabafasha kurushaho kunoza uburyo batangazamo inkuru z'ibyaha n'iz'ubutabera, cyane cyane mu kubahiriza amahame y'umwuga no kurinda uburenganzira bw'impande zose zirebwa n'inkuru.

Bavuze ko hari igihe umuvuduko wo gushaka kuba aba mbere mu gutangaza amakuru watumaga bamwe bihutira gutangaza amakuru ataragenzurwa bihagije cyangwa gukoresha amagambo ashobora kugaragaza ko umuntu runaka yamaze guhamwa n'icyaha kandi urubanza rutararangira.

Banagaragaje ko amahugurwa yabibukije akamaro ko guha ijambo impande zose, kwitondera imikoreshereze y'amagambo no gukomeza gukurikirana imanza kugeza zifatiwe imyanzuro ya nyuma, kugira ngo abaturage bahabwe ishusho yuzuye y'ibibera mu butabera.

Bashimangiye ko ubumenyi bungutse buzabafasha gukora inkuru zifitiye rubanda akamaro, zirangwa n'ukuri, uburinganire n'ubunyamwuga, bityo itangazamakuru rikomeze kuba umufatanyabikorwa mu kwimakaza ubutabera aho kuba intandaro yo guca imanza mu ruhame.

Aya mahugurwa yitezweho kongerera abanyamakuru ubushobozi bwo gukora inkuru zijyanye n'ubutabera hubahirizwa amategeko, amahame ngengamyitwarire y'umwuga n'uburenganzira bwa buri wese, ari na byo bigira uruhare mu kubaka igihugu cyiza kandi kirangwa n'ubutabera bunogeye buri wese.

Flolup muri gahunda nziza zo guhindura iterambere ry'umuziki Nyarwanda

Mahame — 2026-07-23T14:34:58Z

Flolup imaze imyaka itatu itegurwa, igamije kubaka urubuga ruhuza abahanzi n'abakoresha ibihangano byabo binyuze mu ikoranabuhanga, hagamijwe koroshya ubucuruzi bw'umuziki no gutuma inyungu ziwukomokaho zirushaho kugera ku bawukora.

Frank Mario Sebudandi, Uhagarariye Flolup mu Rwanda

Uhagarariye Flolup mu Rwanda, Frank Mario Sebudandi, yavuze ko intego bafite ari ukubaka urubuga ruzafasha abahanzi nyarwanda kubona amahirwe menshi yo kubyaza umusaruro ibihangano byabo no kubigeza ku isoko ryagutse.

Yasobanuye ko Flolup izahuza serivisi zirimo gutambutsa umuziki (streaming), gutanga uburenganzira bwo gukoresha ibihangano mu bikorwa by'ubucuruzi ndetse no koroshya uburyo bwo gutumira abahanzi mu bitaramo n'ibirori.

Yavuze ko abazajya bakoresha uru rubuga bazashobora kumva umuziki ku buntu binyuze mu matangazo yamamaza cyangwa bagakoresha uburyo bwa Premium bubafasha kuwumva nta matangazo arimo.

Sebudandi yavuze ko kugeza ubu Flolup ikiri mu cyiciro cyo kubaka ububiko bw'ibihangano by'abahanzi, ari na yo ntambwe ya mbere izatuma serivisi zose ziteganyijwe zitangira gukora neza.

Ati: "Turishimira intambwe tumaze gutera. Abahanzi benshi bakomeje gufungura konti kuri Flolup no gushyiraho ibihangano byabo. Kugeza ubu tumaze kwakira indirimbo zigera ku 150 z'abahanzi nyarwanda, kandi umubare ukomeje kwiyongera uko iminsi ishira."

Yakomeje avuga ko intego atari ugukusanya ibihangano gusa, ahubwo ari ukubaka urubuga ruzafasha umuziki nyarwanda kubona agaciro n'isoko rirambye.

Ati: "Kugeza ubu turi mu cyiciro cyo gukusanya ibihangano kugira ngo twubake ububiko bukomeye bw'umuziki nyarwanda. Icyo ni cyo kizadufasha mu minsi iri imbere gutangira gutanga inyungu zitandukanye ku bahanzi, zirimo amafaranga ava mu gutambutsa umuziki, gukoresha ibihangano mu bucuruzi no kubafungurira amasoko mashya haba mu Rwanda no hanze yarwo."

Yanagaragaje ko gushyira ibihangano kuri Flolup bitabuza umuhanzi gukomeza gukoresha izindi mbuga asanzwe acururizaho umuziki, ahubwo ko ari uburyo bwo kongera aho ibihangano bye bigera.

Ati: "Turashishikariza abahanzi bose gushyira ibihangano byabo kuri Flolup. Iyo ibihangano biri hamwe biroroha kubikurikirana, kubicunga no kubibyaza umusaruro mu buryo bwizewe kandi bugaragarira buri wese."

Umuyobozi wa Dream Records, Mutoni Juliet

Umuyobozi wa Dream Records, Mutoni Juliet, ari na we uhagarariye Flolup mu karere u Rwanda ruherereyemo, yavuze ko icyerekezo cyabo ari ugukorana bya hafi n'abahanzi no kubaka urubuga rutazafasha u Rwanda gusa, ahubwo ruzagera no ku bahanzi bo mu bindi bihugu byo mu karere.

Yagize ati: "Tuzakomeza gukorana n'abahanzi umunsi ku munsi hagamijwe guteza imbere inyungu zabo. Dutangiriye ibikorwa byacu mu Rwanda ariko mu minsi iri imbere tuzagukira no mu karere."

Abateguye Flolup bemeza ko uru rubuga ruzagira uruhare rukomeye mu kuzamura ubucuruzi bw'umuziki nyarwanda, aho abahanzi bazajya babona inyungu zishingiye ku buryo ibihangano byabo bikoreshwa, bikanabafasha kugera ku bakunzi b'umuziki benshi ku rwego mpuzamahanga.

Uko ukora account kuri flolup kugirango utangire gushyiraho indirimbo unyuze ku rubuga www.flolup.com

Ubumuntu Arts Festival igiye kuba ku nshuro ya 12 ihurije hamwe ibyamamare mu buhanzi

Mahame — 2026-07-08T08:18:19Z

Iri serukiramuco rimaze kuba kimwe mu bikorwa by'umuco bikomeye mu Rwanda no ku rwego mpuzamahanga, rikaba rizwiho gukoresha ubuhanzi nk'urubuga rwo gusigasira amateka, kwimakaza amahoro no guteza imbere ubumuntu.

Umuyobozi wa Ubumuntu Arts Festival, Hope Azeda, yavuze ko intego nyamukuru y'iri serukiramuco ari uguhuza abantu b'ingeri zitandukanye bakoresheje ubuhanzi, kugira ngo bafatanye kwibuka amateka, gukira ibikomere no gutekereza ku hazaza heza.

Yagize ati: “Turashaka kubaka urubuga aho abantu bafata umwanya bakibuka, bagakira ibikomere kandi bagatekereza ku hazaza. Intego yacu ni ugukoresha ubuhanzi nk'uburyo bwo kubaka Isi aho ubumuntu budasigara mu magambo gusa ahubwo bugashyirwa mu bikorwa.”

Ubumuntu Arts Festival yatangijwe na Hope Azeda mu 2015, kuva icyo gihe ikaba yarakomeje kwaguka, ikitabirwa n'abahanzi n'abashyitsi baturuka mu bihugu bitandukanye.

Buri mwaka iba nyuma y'iminsi 100 yo Kwibuka Jenoside yakorewe Abatutsi mu 1994, igamije gukomeza ibiganiro byubaka amahoro, ubwiyunge n'ubumwe binyuze mu bikorwa by'ubuhanzi.

Ibikorwa by'uyu mwaka bizatangira ku wa 13 Nyakanga 2026, umunsi wahariwe ubuzima bwo mu mutwe, bikazabera muri Inzira Creative, aho hazibandwa ku biganiro n'ibikorwa byerekana uruhare rw'ubuhanzi mu gufasha abantu gukira ibikomere no guteza imbere imibereho myiza.

Ku wa 14 Nyakanga hazakurikiraho umunsi wahariwe ubuvanganzo, uzahuza abanditsi n'abakunzi b'ibitabo mu biganiro no gusangira ubunararibonye ku ruhare rw'inyandiko mu kubungabunga amateka no guteza imbere umuco.

Ku wa 16 Nyakanga hazaba igitaramo cyiswe "Ikaze Night & Music Is Humanity" kizabera muri Camp Kigali, aho abahanzi bazasusurutsa abazacyitabira binyuze mu muziki ugamije guhuza abantu no kwimakaza indangagaciro z'ubumuntu.

Iri serukiramuco rizasozwa n'iminsi itatu ya Ubumuntu Classic, izabera ku Rwibutso rwa Jenoside rwa Kigali kuva ku wa 17 kugeza ku wa 19 Nyakanga 2026. Muri iyi minsi hazerekanirwa ibikorwa bitandukanye by'ikinamico, imbyino, umuziki n'ubundi buhanzi butanga ubutumwa bw'amahoro, ubwiyunge n'icyizere.

Abateguye iri serukiramuco batangaje ko muri uyu mwaka hitezwe kwitabira abahanzi benshi bo mu Rwanda n'abo mu mahanga, bikazongera gutuma Kigali iba ihuriro ry'abakoresha ubuhanzi mu kwimakaza amahoro no kubaka sosiyete ishingiye ku gaciro ka muntu.

Mu myaka ishize, Ubumuntu Arts Festival yagiye iba urubuga rw'ibiganiro n'ibikorwa byafashije abantu gutekereza ku mateka, gukira ibikomere no gushimangira ko ubuhanzi bushobora kuba igikoresho gikomeye mu kubaka amahoro arambye no guteza imbere ubumwe bw'abaturage.

Urujijo ku mubano wa Bruce Melodie na Coach Gael

Mahame — 2026-06-29T11:27:54Z

Bruce Melodie yanditse aya magambo ku mbuga nkoranyambaga ze, ahita akurura ibitekerezo byinshi by'abakurikiranira hafi imyidagaduro. Benshi bahise bayafata nk'ubutumwa bwerekana ko hari ibitagenda neza hagati ye n'umujyanama we umaze imyaka itanu amufasha mu rugendo rw'umuziki.

Nubwo aya magambo yakomeje kuvugisha benshi, Bruce Melodie ntiyasobanuye icyo yashakaga kuvuga, bituma abakunzi be bakomeza kuyasesengura mu buryo butandukanye.

Uru rujijo ruje rwiyongera ku makuru amaze igihe avugwa ko umubano wa Bruce Melodie na Coach Gael ushobora kuba warajemo agatotsi. Gusa, igihe umuhanzi yabazwaga kuri ayo makuru mu bihe byashize, yakomeje kuyahakana, avuga ko nta kibazo kiri hagati yabo.

Hari kandi abakomeje guhuza ubu butumwa n'amafoto ndetse n'amashusho aherutse gukwirakwira agaragaza Coach Gael ari kumwe na The Ben nyuma y'igitaramo Summer Country Tour cyabereye i Bugesera. Bombi bagaragaye mu birori bya After Party byabereye muri Goldonne Sonne Hotel, ibintu byatumye bamwe bongera kwibaza ku mubano wa Coach Gael na Bruce Melodie.

Kugeza ubu ariko, nta gihamya igaragaza ko aba bombi batandukanye cyangwa bahagaritse gukorana, kuko nta ruhande na rumwe ruragira icyo rutangaza kuri ayo makuru.

Bruce Melodie na Coach Gael batangiye gukorana mu mwaka wa 2021, ubufatanye bwagize uruhare rukomeye mu kuzamura ibikorwa by'uyu muhanzi.

Muri iyo myaka, Bruce Melodie yagabye ibikorwa bye ku rwego mpuzamahanga, akorana n'abahanzi bazwi barimo Diamond Platnumz, Joeboy, Shaggy na Bien, anitabira ibitaramo bikomeye ndetse agirana ibiganiro n'ibitangazamakuru mpuzamahanga.

Mu 2025 yasohoye album yise "Colorful Generation", yamamajwe mu bukangurambaga bwashowemo amafaranga menshi, ikomeza gushimangira izina rye ku rwego mpuzamahanga.

Eric Semuhungu akurikiranyweho ibyaha birimo gukoresha undi imibonano mpuzabitsina ku gahato

Mahame — 2026-04-15T09:07:24Z

Umuvugizi w'Urwego rw'Igihugu rw'Ubugenzacyaha (RIB), Dr. Murangira B. Thierry, yemeje aya makuru avuga ko iperereza ry'ibanze ryarangiye, dosiye igahita ishyikirizwa Ubushinjacyaha kugira ngo itangire gukurikiranwa mu mategeko.

Yagize ati: “Semuhungu Eric yatawe muri yombi ku wa 9 Mata 2026, akurikiranyweho ibyaha bitatu birimo gukoresha undi imibonano mpuzabitsina ku gahato, gushyira ahagaragara amashusho y'imikoreshereze y'ibitsina hakoreshejwe mudasobwa cyangwa urusobe rwa internet, ndetse n'icyaha cyo gusebanya.”

Ibyaha akurikiranyweho n'ibihano biteganywa

Icyaha cya mbere akurikiranyweho ni icyo gukoresha undi imibonano mpuzabitsina ku gahato, giteganywa n'ingingo ya 134 y'itegeko nº 68/2018 ryo ku wa 30 Kanama 2018 riteganya ibyaha n'ibihano muri rusange. Uhamijwe n'urukiko iki cyaha, ahanishwa igifungo kiri hagati y'imyaka 10 na 15, ndetse n'ihazabu iri hagati ya miliyoni 1 na miliyoni 2 z'amafaranga y'u Rwanda.

Hari kandi icyaha cyo gushyira ahagaragara amashusho yerekeranye n'imikoreshereze y'ibitsina hakoreshejwe ikoranabuhanga, giteganywa n'ingingo ya 34 y'itegeko rijyanye no gukumira no guhana ibyaha bikoreshejwe ikoranabuhanga. Uhamijwe n'urukiko iki cyaha, ahanishwa igifungo kiri hagati y'imyaka 3 na 5, ndetse n'ihazabu iri hagati ya miliyoni 1 na miliyoni 3 z'amafaranga y'u Rwanda.

Icyaha cya gatatu ni icyo gukangisha gusebanya, giteganywa n'ingingo ya 129 y'itegeko riteganya ibyaha n'ibihano muri rusange. Uhamijwe n'urukiko iki cyaha, ashobora guhanishwa igifungo kiri hagati y'umwaka umwe n'imyaka itatu, ndetse n'ihazabu iri hagati y'ibihumbi 100 na 300 by'amafaranga y'u Rwanda.

Bruce Melodie na The Ben batangiriye umwaka wa 2026 mu rusengero

Mahame — 2026-01-01T10:24:01Z

Bruce Melodie yatangiriye umwaka mu rusengero “Hope For Jesus”, aho yifatanyije n'abakristu mu masengesho no mu kuramya Imana.

Imbere y'iteraniro ry'abakirisitu muri uru rusengero, yaririmbye indirimbo ze zifite ubutumwa bwo guhimbaza Imana zirimo “Urabinyegeza”, “Nzaguha Umugisha” n'izindi, azifatanyije na korali.

Mu magambo ye, Bruce Melodie yagaragaje ibyishimo byo kurangiriza umwaka no gutangirira undi mu nzu y'Imana.

Ati: “Nanjye ndishimye cyane kuba Imana yanyemereye kurangiriza umwaka ndi hano, turi mu rusengero.”

Ku rundi ruhande, The Ben we yatangiriye umwaka mu rusengero rwa Eglise Vivante Rebero, aho yaturiweho umugisha n'abashumba b'iri torero mbere yo kwerekeza ku gitaramo cye cyo ku nshuro ya kabiri cya The Nu-Year Groove.

Uyu muhanzi yavuze ko yari yiyemeje ko umwaka mushya ugomba kumusanga ari mu nzu y'Imana, n'iyo byasaba gutinza urugendo rwe.

Ati: “Nabonye amasaha agiye kumfata ndi kumwe n'inshuti zanjye, mbwira umushoferi nti ‘camera' zo mu muhanda zose ndazishyura ariko ntugire umuntu uhutaza, umwaka utangire turi mu nzu y'Imana. Turashima Imana.”

The Ben na we yaririmbye indirimbo ze zakunzwe cyane, ndetse n'izindi zisanzwe zikoreshwa mu nsengero, azifatanyije na korali, ibintu byakoze ku mitima y'abari bitabiriye ayo masengesho.

Aba bahanzi bombi biteganyijwe ko bahurira ku rubyiniro rumwe muri BK Arena kuri uyu wa Kane tariki ya 1 Mutarama 2026, mu gitaramo “The Nu-Year Groove”, cyitezweho gususurutsa abakunzi b'umuziki batandukanye.

Igitaramo Israel Mbonyi yari gukorera i Rubavu cyasubitswe ku busabe bw'abafatanyabikorwa

Mahame — 2025-12-29T08:17:34Z

Amakuru aturuka mu itsinda ryari riri gutegura iki gitaramo avuga ko icyemezo cyo kugisubika cyafashwe nyuma y'ibiganiro byimbitse byabaye hagati y'abagiteguraga n'abafatanyabikorwa batandukanye, bagaragaje ko igitaramo kimwe cyonyine kidahagije ugereranyije n'icyerekezo cyari kigamijwe.

Umwe mu bateguraga iki gitaramo yatangaje ko abafatanyabikorwa bagaragaje kenshi ko bakifuza ko iki gikorwa cyahinduka umushinga wagutse w'ibitaramo bizenguruka igihugu.

Yagize ati: "Twari twatekereje gukora igitaramo i Rubavu ariko abafatanyabikorwa bacu badusabye kenshi ko twabihindura bikaba ibitaramo bizenguruka igihugu, kugeza ubu turifuza gukore mu Ntara eshanu z'igihugu. Rero biradusaba kurushaho kwitegura ari nayo mpamvu twimuye amatariki."

Mu itangazo ryashyizwe hanze n'abateguraga iki gitaramo, bamenyesheje abakunzi ba Israel Mbonyi bari bamaze kugura amatike ko bazahamagara bagahabwa amahitamo yo gusubizwa amafaranga yabo cyangwa kugumana amatike bakazayakoresha mu bitaramo bizategurwa mu minsi iri imbere.

Nubwo iki gitaramo cyasubitswe, abategura ibitaramo bya Israel Mbonyi bashimangiye ko intego ari ugutegura ibitaramo bifite ireme, bizagera ku bafana bo mu gihugu hose, aho kuba igitaramo kimwe cyonyine.

Israel Mbonyi yari ateganyije gukorera i Rubavu nyuma yo gukora amateka akomeye mu muziki wo kuramya no guhimbaza Imana, ubwo yakoreraga igitaramo gikomeye muri BK Arena ku wa 25 Ukuboza 2025, cyitabiriwe n'abantu benshi kandi kikagenda neza cyane.

Rutsiro: Abitabiriye Kivu Beach Expo and Festival batahanye ibyishimo by'ibirori bidasanzwe yaberetse

Mahame — 2025-12-10T06:03:20Z

Iki gikorwa cyateguwe na Sosiyete Yirunga Ltd ifatanyije n'Akarere ka Rutsiro, cyatangijwe ku mugaragaro kuri uyu wa Kabiri, tariki ya 09 Ukuboza 2025, kikaba cyagaragayemo umwihariko utari usanzwe ugera mu karere ka Rutsiro.

Ibi birori byo kugitangiza ku mugaragaro, byitabiriwe n'abayobozi bo mu nzego zitandukanye, bibera kuri Palega Beach Inn Hotel, iherereye ku nkengero z'Ikiyaga cya Kivu.

Abitabiriye barenga ibihumbi bitanu, barimo n'abaturage bavuye ku Kirwa cya Bugarura, aho kuhagera bisaba kunyura mu nzira y'amazi bakoresheje ubwato gusa.

Abaturage bagaragaje ibyishimo bikomeye cyane ko ari ku nshuro ya mbere umuhanzi Igisupusupu ataramiye mu Karere ka Rutsiro.

Indirimbo z'uyu muhanzi zatumye imbaga y'abantu bari aho basusuruka, barabyina, baririmba, bose bagaragaza ko Bari mu birori bya mbere by'amateka yabereye muri Boneza ku rwego rurenze ibisanzwe.

Abenshi mu bitabiriye bagaragaje ko bishimiye cyane umwihariko w'ibirori byabereye hafi y'amazi, aho ingendo zo mu mazi zagaragaye nk'udushya twatumye abenshi biyumva nk'abari mu bihugu byateye imbere mu bukerarugendo bwo ku nyanja.

Abaturage benshi bavuze ko ibi birori byabahaye ibyishimo batigeze bagira, cyane cyane kuko babashije kunywera no kurira muri hoteli ku nshuro ya mbere.

Bamwe mu baganiriye n'itangazamakuru bavuze ko byabatinyuye, bemeza ko bagiye kujya bisohokera muri hoteli kenshi.

Ibi birori byaranzwe n'umuziki, imbyino, imikino, kumurika ibikorwa bitandukanye by'ubukorikori n'ibikorerwa mu Rwanda, ndetse n'ibiribwa n'ibinyobwa byagabanyijwe ibiciro kugira ngo abaturage bose bishimire umunsi wabo.

Ikigeretse kuri ibyo ibiciro byagabanijwe byatanze ibyishimo byiyongereyeho, aho amahoteli menshi yatangaje yagabanyije ibiciro ku kigero cya 50%, ndetse n'ibiribwa bimwe bigurishwa ku giciro abantu bose bashobora kwigondera.

Yves Iyaremye, Umuyobozi wa Yirunga Ltd ageza ijambo ku bitabiriye Kivu Beach Expo and Festival

Yves Iyaremye, Umuyobozi wa Yirunga Ltd, yavuze ko yishimiye cyane uko abaturage bitabiriye, ashimira by'umwihariko ubuyobozi bw'igihugu n'ubw'akarere ku mutekano n'inkunga batanga mu bikorwa bigamije guteza imbere imyidagaduro n'ubukerarugendo.

Yagize ati: “Ibyishimo mboneye hano ntibisanzwe kubera dufite inzira zose zitworohereza, ngiye kujya ntegura ibirori byinshi muri Rutsiro bishimisha abaturage bizana n'inyungu zigera kuri bose.”

Yves Iyaremye, Umuyobozi wa Yirunga Ltd ageza ijambo ku bitabiriye Kivu Beach Expo and Festival

Umuyobozi w'Akarere ka Rutsiro, Kayitesi Dativa, yavuze ko ibi birori byatanze icyizere gishya ku baturage, abizeza ko ibimeze gutya bizajya bibera mu karere kabo kenshi, mu rwego rwo gukomeza kubaha ibyishimo no guteza imbere ubukerarugendo.

Yagize ati: “Ndashima kuba imbaraga twashize mu myiteguro y'igikorwa zatanze umusaruro,Ndashima Yirunga Ltd n'ikipe bakoranye ndashima Igisupusupu cyaduhaye ibyishimo,cyadutayemo ibyishimo natwe turagitamo. Ibi birori ni ubwa mbere tubibonye iwacu bimeze gutya tugiye guharanira ko biba kenshi dufatanyije tunashimira abafatanyabikorwa bacu batadutenguha.”

Kivu Beach Expo and Festival 2025 Edition Rutsiro ikomeje kubera mu Karere ka Rutsiro guhera tariki ya 9 kugeza tariki ya 15 Ukuboza 2025.

Biteganyijwe ko ibirori bishyushye bizanakomeza no kuri Hoteli nk Kinunu Wonders hazakira amarushanwa yo gutwara ubwato kuwa gatanu 12/12/2025, nibihava bijye kuri Rushel Kivu Resort hazabera VolleyBeach na Swimming competition no gusura inyambo zoga mu kiyaga ndetse na Brochete yaguraga 13.000 ikazaba igura 1500 ku wa 13/12/2025.

Ibi birori kandi bizakomeza mu mukino wa Triathlon uzabera ku Umutuzo Lodge, aho abazawitabira bazaba bazatangirira mu mazi bakoga, bagasiganwa ku magare, hanyuma bagasoza biruka n'amaguru, byose bikozwe mu irushanwa rimwe ridahagarara.

Hazakurikiraho Kaysun ahazabera Badminton no ku Kariba Beach hazabera Hiking ku wa 14/12/2025.

Si ibyo gusa kuko Kivu Beach Expo and Festival Edition Rutsiro hazaberamo ibirori byo ku mazi Boat Party itegerejwe n'abantu benshi izamara iminsi 3 kuva kuwa 12-14/12/2025.

Bafungura ku mugaragaro Kivu Beach Expo and Festival Edition Rutsiro

Rutsiro: Imihanda yari yarangiritse yatunganijwe neza bitegura kwakira Kivu Beach Expo & Festival 2025

Mahame — 2025-12-06T13:24:21Z

Kimwe mu bibazo byari bimaze igihe bibangamiye abagenda muri aka gace k'ubukerarugendo kegereye ikiyaga cya Kivu mu karere ka Rutsiro ni imihanda itari imeze neza, by'umwihariko ahazabera Expo na Festival.

Ubu ibikorwa byo gusana iyo mihanda byarangiye gukorwa ku muvuduko ushimishije, bigamije gutuma iri serukiramuco riba neza ridakomwe mu nkokora no kubangamirwa k'urujya n'uruza rw'abantu n'ibikorwa byabo.

Yves Iyaremye, Umuyobozi wa Yirunga Ltd

Yves Iyaremye, Umuyobozi wa Yirunga Ltd itegura Kivu Beach Expo & Festival, yavuze ko bahuje imbaraga n'Akarere ka Rutsiro mu rwego rwo gutuma ibikorwa byose bijya mu murongo uboneye.

Yagize ati: “Ni ubwa mbere hagiye kubera igikorwa nk'ikingiki mu Karere ka Rutsiro gifite umwihariko wo kumenyekanisha akarere ibigakorerwamo, kuzamura ubukerarugendo, noneho nyuma yo kuzamura ubukerarugendo, turifuza kumenyekanisha aya mahoteri ari hano nk'ibikorwa remezo twifuza ko mu myaka iri imbere bizarushaho kuzamura ishoramari, bikazamura abaza gusura Rutsiro, bikazamura abashaka gushorayo imari n'ibindi bitandukanye.”

Yves akomeza avuga ko hari byinshi biri gukorwa bitegura kwakira abashyitsi benshi biteganyijwe kuza muri Rutsiro.

Ati:“Ubungubu rero harimo hakorwa umuhanda Gahabwa, tunashomira cyane Perezida wa Repubulika Kagame, waduhaya kaburimbo iva mu Nkomero, ikamanuka ikagera ku Ishusho, iri kugenda ikorwa, ndetse hari n'undi uzava Mushubati ugere hano ku Ishusho, umanuka werekeza hano ku mazi, kuri iyi nshuro rero hari gutsindagirwa umuhanda wari usanzwe uhari, ariko warabaye ibinogo, ariko ubungubu watsindagiwe ku buryo imodoka nto, imodoka ngufi, amavatiri, zishobora kuba zahamanuka mu buryo bworoshye. Ubu rero umuhanda urava ahantu bita Gahabwa ukamanuka ukagera kwa Senateri Chrisologe, ndetse ukagera no kwa Senateri Nyiramirimo, kwa Chrisologe ni kuri Boneza Coffee, wagera ahongaho ugahita ukumeraza kuri RUSHEL Kivu Resort.”

Imyiteguro irimo gukorwa ntigarukiye ku mihanda gusa, ahubwo irimo no gutunganya ahazashyirwa ibikorwa by'ubucuruzi, imbuga zizakira ibitaramo, ndetse no kunoza uburyo bwo kwakira ba mukerarugendo n'abitabira baturutse mu bice bitandukanye.

Yves ati: “ Kuba imihanda yubatswe bigiye gutuma urujya n'uruza rw'abantu rwiyongera, kuko muri EXPO turateganya gushyiramo n'ama Taxi yakorohereza abaturage kugera mu gasantire ka Shusho, no kugera mu Nkomero mu gihe baje kwitebira igitaramo bashaka gutaha, amamodoka yagorwaga no kugera hano harimo amagufi ari hasi n'izindi modoka zifuza kugera hano kuri aya mahoteri y'ubukererugendo kugera ku kiyaga, kugera kuri Plage, ariko biratuma urujya n'uruza rw'abantu rwiyongera ndetse n'abaza gusura Expo and Festival yacu bazaba ari benshi kandi nta mbogamizi bahura nazo.”

Uwizeyimana Emmanuel, Umuyobozi wungirije w'Akarere ka Rutsiro ushinzwe Iterambere ry'Ubukungu

Uwizeyimana Emmanuel, Umuyobozi wungirije w'Akarere ka Rutsiro ushinzwe Iterambere ry'Ubukungu, yavuze ko aka karere kari gasanzwe gafite gahunda yo guteza imbere imihanda igana ku mahoteri n'ahari ibikorwa by'ubukerarugendo, ariko ko Kivu Beach Expo & Festival yabaye umwihariko wo kwihutisha ibyo bikorwa.

Yagize ati: “ Mu rwego rwo kugira ngo iriya mihanda izabe imeze neza ndetse abaturage n'abashyitsi tuzagira babashe kugera ku mazi bitabagoye banakoresheje n'imodoka ngufiya, byabaye ngombwa ko tugira igitekerezo cyuko mbere y'uko akarere gashobora kuba kakora iyi mihanda hashobora kuba hakorwa uburyo bwo kuyiringaniza ku buryo umuntu wahanyura yahagenda neza ndetse akahagenda mu buryo bworoshye.”

Visi Meya Uwizeyimana yagaragaje ko iri vugururwa ryimihanda ryashobotse kubera ubufatanye bw'Akarere n'abafatanyabikorwa bako.

Ati: “ Ku bufatanye n'ubuyobozi bw'akarere twakoze ubukangurambaga bwo kubona imashini, ariko nabo bakadufasha kuzibonera mazutu yo gukoresha muri izo mashini.”

Yongeyeho ko nubwo bitoroshye kugena agaciro k'iyo mirimo mu mafaranga, ariko ifite agaciro gakomeye mu iterambere ry'akarere.

Visi Meya Uwizeyimana Emmanuel yagarutse ku nyungu z'igihe kirekire Kivu Beach Expo & Festival ifitiye Akarere kabo.

Ati: “Icya mbere kiriya gikorwa kiraza gufasha kumenyekanisha akarere bitume dukurura abashoramari benshi, abo bashoramari imari bazashora izafasha mu bukungu bw'akarere kacu, bizafasha mu kubonera abaturage akazi. Muri make rero navuga ko iyi Festival ifitiye ibintu nka bitatu akarere kacu; kumenyekanisha Akarere kacu, gufasha mu gukurura abashoramari, ndetse no gufasha abaturage bacu kwiteza imbere.”

Abaturage bo muri Rutsiro bavuga ko iyi Festival itegerejwe, kandi bamaze kubona inyungu za mbere.

Bavuga ko imihanda ivuguruwe izagirira akamaro ubukerarugendo, ubucuruzi, ndetse no korohereza ingendo za buri munsi n'imibereho yabo.

Biteganyijwe ko Kivu Beach Expo and Festival 2025 Edition Rutsiro izaba guhera kuwa 9 kugeza ku wa 15 Ukuboza 2025, hakazaba harimo ibikorwa bitandukanye birimo: Urugendo rw'ibilometero 20 rutangirira kuri Palega Beach Inn, imikino inyuranye izabera kuri KaySun Hotel, amarushanwa yo gusiganwa mu bwato no koga mu Kivu, beach Volleyball ku nkengero z'ikiyaga cya Kivu, ubukerarugendo bushingiye ku bidukikije harimo gusura kawa ya Boneza, urugendo rugana ku kirwa cya Napoleon, n'iserukiramuco ry'Inyambo zizaseruka zinoga mu Kivu..

Biteganyijwe kandi ko abazitabira iri serukiramuco ry'ubukerarugendo, ubucuruzi n'imyidagaduro bazasusurutswa n'abahanzi barimo Papa Cyangwe, Young Grace, Impala, Igisupusupu, Theo Bosebabireba, Moco The Best, na Platine P.

Mu mafoto: Ubwiza bw'Ahazabere Kivu Beach Expo and Festival 2025 Edition Rutsiro

Polisi yemeje ko yafunze Ariel Wayz na Babo

Mahame — 2025-09-11T15:16:00Z

Amakuru avuga ko aba bahanzi batawe muri yombi mu ijoro ryo ku wa 5 rishyira ku wa 6 Nzeri 2025 barengeje amasaha y'akabari ubundi baza no gupimwa ibiyobyabwenge ari na byo bakurikiranyweho gukoresha.

Ibi byagize ingaruka ku rugendo Ariel Wayz yari ari kwitegura gukorera muri Kenya aho yari afite ibikorwa bya muzika birimo kuhakorera indirimbo kuko byari byitezwe ko tariki 6 Nzeri 2025 yagombaga kuba yagiye ariko birangira bitabaye.

Umuvugizi wa Polisi, ACP Rutikanga Boniface, yahamije ko aba bombi bafunzwe, gusa ibijyanye n'ibyaha baba bakekwaho yirinze kugira icyo abivugaho, ngo kuko birera Urwego rw'Igihugu rw'Ubugenzacyaha (RIB).

Ati “ Twe icyo dukora ni uburinzi, turabacumbikiye, ariko iki ni ikibazo cya RIB .”