Imirasire.rw

Rayon Sports yanganyije na APR FC mu mukino waranzwe n'imisifurire itavugwaho rumwe

Mahame — 2026-05-03T08:30:35Z

Uyu mukino wasifuwe na Ishimwe Jean Claude uzwi nka “Cucuri”, wagiye uhagarara kenshi kubera amakosa menshi yavuzweho kutasifurwa kimwe.

Impaka zikomeye zatangiye ku munota wa 39, ubwo APR FC yahabwaga penaliti nyuma y'uko Byiringiro Jean Gilbert agushijwe mu rubuga rw'amahina, icyemezo kitishimiwe na Rayon Sports.

Iyo penaliti yinjijwe neza na Cheikh Djibril Ouattara, yishyura igitego Rayon Sports yari yabanje gutsinda ku munota wa 32, Ndikumana Asman yari yafunguye amazamu arobye umunyezamu Hakizimana Adolphe.

Mu gice cya mbere kandi habayeho guhangana gukomeye hagati y'abakinnyi b'impande zombi, aho bageze n'aho baterana amagambo n'ingumi, umusifuzi agaragaza ikarita itukura ariko ntiyagira uwo ayiha, ibintu byasize benshi bibaza ku byemezo byafashwe.

Igice cya kabiri cyaranzwe n'amakosa menshi n'umukino wahagararaga kenshi, aho abakinnyi benshi bahawe amakarita y'umuhondo barimo Aziz Bassane na Ruboneka Bosco.

Umutoza wa Rayon Sports, Haringingo Francis, na we yahawe ikarita y'umuhondo kubera kutishimira imisifurire.

Nubwo amakipe yombi yabonye uburyo bwinshi bwo gutsinda, nta na nimwe yabashije kubona igitego cy'intsinzi, umukino urangira ari 1-1.

Uyu musaruro watumye Rayon Sports yuzuza imyaka itatu itabasha gutsinda APR FC. Ni mu gihe uyu mukino wongeye kugaragaza ubukana bwa derby ariko unagarura impaka ku misifurire ikomeje kwibazwaho byinshi muri ruhago y'u Rwanda.

Iran yaburiye Amerika ko yiteguye kuyihimuraho bikomeye niramuka yongeye kuyitera

Mahame — 2026-04-30T19:05:15Z

Ibi byatangajwe kuri uyu wa Kane, aho abayobozi ba Iran bagaragaje ko igitero icyo ari cyo cyose cyakorwa na Amerika kizahura n'igisubizo gikomeye kandi kirambye, bagaragaza ko bafite ubushobozi bwo kugaba ibitero bikomeye ku nyungu za Amerika mu karere.

Amakuru aturuka mu nzego za gisirikare za Iran avuga ko bashobora kugaba ibitero “biremereye kandi bibabaza” ku birindiro bya Amerika, mu gihe Washington yakongera ibikorwa bya gisirikare.

Nubwo kuva tariki ya 8 Mata 2026 hari agahenge hagati y'impande zombi, ibiganiro byo gushaka igisubizo kirambye byageze mu marembera. Iran ikomeje gufata ingamba zikomeye zirimo kugenzura neza inzira y'amazi ya Hormuz, mu gihe Amerika nayo ikomeje igitutu cya gisirikare n'ubukungu.

Iyi nzira y'amazi ifite akamaro kanini ku isi kuko inyuramo hafi 20% bya peteroli ikoreshwa ku isi, bigatuma impagarara zayo zigira ingaruka zikomeye ku bukungu bw'isi.

Abayobozi ba Iran bagaragaje ko batifuza gucishwa bugufi n'ibihano cyangwa igitutu cya Amerika, ahubwo ko biteguye kurinda inyungu z'igihugu cyabo kugeza ku ndunduro. Umwe mu bayobozi b'ingabo za Iran yavuze ko “ibyo Amerika yabonye ku birindiro byayo byo mu karere bishobora no kuba ku mato yayo y'intambara,” agaragaza ko igisubizo kizaba gikomeye kurushaho.

Ku ruhande rwa Amerika, haracyari ibiganiro ku ngamba nshya zirimo kongera ibitero cyangwa gukomeza gufunga inzira z'ubucuruzi bwa Iran hagamijwe kuyihatira kwemera ibiganiro ku ngingo zirimo gahunda yayo ya nikleyeri.

Iyi mvururu ikomeje gutuma ibiciro bya peteroli bizamuka ku rwego rwo hejuru, bikagira ingaruka ku bihugu byinshi ku isi. Impuguke zivuga ko gukomeza gufungwa kw'inzira ya Hormuz bishobora guteza ihungabana rikomeye ry'ubukungu ku rwego mpuzamahanga.

Nubwo hari agahenge kariho, amagambo akakaye aturuka ku mpande zombi agaragaza ko intambara ishobora kongera kubura umwanya uwo ari wo wose.

UEFA Champions League: Atletico Madrid yananiwe gutsinda Arsenal iri imbere y'abafana bayo

Mahame — 2026-04-30T05:40:10Z

Muri uyu mukino wakinwe kuri uyu wa Gatatu saa Tatu z'ijoro Atletico Madrid n'iyo yatangiye ihererekanya neza yiga uko isatira.

Ku munota wa 5 Arsenal yabonye uburyo bufatika bwashoboraga kuvamo igitego aho Noni Madueke yahinduye umupira mwiza ubundi Piero Hincapie arekura ishoti ariko rinyura impande y'izamu gato.

Ku munota wa 14 David Raya yatabaye Arsenal ku ishoti ryari rirekuwe na Julian Alvarez ariko arikwedura arishyira muri koroneri.

Amakipe yombi yakomeje gukina agabana igihe cyo guhererekanya umupira gusa Arsenal ikanyuzamo ikagera imbere y'izamu rya Atletico Madrid nkaho Noni Madueke yarekuye ishoti ryashoboraga guteza ibibazo ariko umupira unyura impande y'izamu gato cyane.

Ku munota wa 44 iyi kipe yo mu Bwongereza yabonye penariti ku ikosa ryari rikorewe Viktor Gyokores aba ari nawe uyitera ayishyira mu nshundura.

Mu gice cya kabiri ku munota wa 56 Atletico Madrid yabonhe penariti nyuma y'uko myugaruro wa Arsenal ,Ben White akora umupira ari mu rubuga rw'amahina .

Yahize iterwa na Julian Alvarez ubundi arayinjiza. Nyuma kubona iki gitego Atletico Madrid yakomeje gusatira cyane ndetse hari aho Antoine Griezmann yarekuye yarekuye ishoti ariko rikubita igiti cy'izamu.

Arsenal yakoze impinduka mu kibuga abarimo Bukayo Saka na Eberechi Eze bajya mu kibuga ngo irebe ko yabona igitego cya kabiri ariko kirabura burundu birangira amakipe yombi yamamaza Visit Rwanda anganya 1-1.

Gakenke: Barishimira ko kwegereza amazi meza bibafasha kurwanya igwingira n'indwara ziterwa n'umwanda

Mahame — 2026-04-29T16:20:01Z

Ibi byagezweho binyuze mu mushinga ugamije kurwanya igwingira (Stunting Prevention and Reduction Project - SPRP), uterwa inkunga na Banki y'Isi, ugashyirwa mu bikorwa ku bufatanye n'Ikigo Gishinzwe Ubuzima mu Rwanda (RBC).

Uyu mushinga watangiye muri Gicurasi 2024, aho wavuguruye umuyoboro wa Mugamba I mu Murenge wa Gashenyi ndetse unongerera imbaraga uwitwa Mataba-Gitovu mu Murenge wa Muyongwe, ufite uburebure bwa kilometero 31.8.

Abaturage bamaze kwegerezwa aya mazi bavuga ko ari intambwe ikomeye bateye, kuko mbere byabasabaga gukora ingendo ndende bajya kuyashaka, rimwe na rimwe bakayabura burundu.

Aba baturage bavuga ko ayo mazi meza begerejwe abafasha mu isuku, gutegura amafunguro meza no kunoza imirire, bikagira uruhare mu kurwanya igwingira n'izindi ndwara ziterwa n'umwanda.

Banavuga ko kuri ubu, ubuzima bwabo bwahindutse ku buryo bugaragara, aho isuku yiyongereye, indwara zikagabanuka, ndetse n'iterambere rikiyongera mu miryango yabo.

Uwamariya Chantal wo mu Murenge wa Muyongwe ati: "Mbere amazi twayabonaga bigoranye cyane, tugera aho tuyavana mu bishanga. Hari n'igihe twararaga tudakarabye kubera kuyabura. Ubu turayabona hafi, ubuzima bwarahindutse."

Naho Niyonkuru Jean Bosco wo mu Murenge wa Gashenyi we yavuze ko kubona amazi hafi byagabanyije cyane indwara zaterwaga n'isuku nke: "Abana bahoraga barwaye impiswi n'izindi ndwara. Ubu ayo mazi ari hafi, isuku yarazamutse cyane, n'ubuzima buragenda neza."

Kugeza ubu, ingo 1,653 ni zo zimaze kwegerezwa amazi meza, mu gihe biteganyijwe ko haziyongeraho izindi ngo 1,569 zigizwe n'abaturage barenga 7,000 mu gihe cya vuba.

Umuyobozi w'Akarere ka Gakenke, Mukandayisenga Vestine, yavuze ko iki gikorwa cyagabanyije indwara ziterwa n'isuku nke ndetse kikanafasha abaturage gukora imirimo yabo neza no kohereza abana ku ishuri batagize imbogamizi zo kujya kuvoma.

Yagize ati: "Kwegereza abaturage amazi meza ni imwe mu nkingi z'iterambere. Byatumye imibereho yabo irushaho kuba myiza kandi bigira uruhare mu kubaka umuryango ufite ubuzima bwiza."

Meya Mukandayisenga Vestine

Ubuyobozi bw'Akarere busaba abaturage gufata neza ibi bikorwa remezo, bakirinda kubyangiza no gukoresha amazi neza birinda isesagura, kugira ngo bikomeze kubagirira akamaro igihe kirekire.

Kugeza ubu hari gukorwa imirimo yo kongerera imbaraga umuyoboro wa Bushyombori mu Murenge wa Rusasa, aho biteganyijwe ko uzarangira muri uyu mwaka wa 2026, ukazaba ugeza amazi meza ku ngo 1,569.

Rutsiro: Abarobyi babiri barakekwaho kurohamisha mugenzi wabo

Mahame — 2026-04-29T07:47:23Z

Abo bakekwaho iki cyaha ni Twizerimana Vincent w'imyaka 25 na Mutabazi Daniel w'imyaka 24, bakaba basanzwe bakorera uburobyi muri aka gace. Ibi byabereye mu Murenge wa Boneza Sector, Akagari ka Bushaka, Umudugudu wa Rutagara, ku kirwa cya Bugarura aho bari bacumbitse, ku mugoroba wo ku wa 27 Mata 2026.

Amakuru yemejwe n'Umunyamabanga Nshingwabikorwa w'Umurenge wa Boneza, Muhizi Munyamahoro Patrick, wavuze ko aba basore bakekwaho gukubita mugenzi wabo ku kuboko mu gihe bari bagiye gutsura ubwato ngo bajye kuroba isambaza, bikamuviramo kugwa mu mazi.

Yagize ati: "Nyuma yo gushyamirana bagiye gutsura ubwato, bamukubise ingashyi ku kuboko agwa mu mazi y'Ikiyaga cya Kivu. Hitabajwe Polisi ishami ryo mu mazi, imukuramo yamaze gupfa."

Aba bakekwaho icyaha bahise bafatwa bashyikirizwa inzego z'umutekano, mu gihe iperereza rikomeje kugira ngo hamenyekane neza uko byagenze n'uruhare rwa buri wese muri uru rupfu.

Ubuyobozi bw'uyu murenge bwasabye abaturage kwirinda amakimbirane ashobora kuvamo ibyago nk'ibi, bushishikariza abafitanye ibibazo kujya begana inzego zibegereye bagafashwa kubikemura mu mahoro.

Umurambo wa nyakwigendera wajyanywe mu buruhukiro bw'Ibitaro bya Murunda, mu gihe hagitegerejwe ibyavuye mu iperereza.

Perezida Kagame yakurikiye umukino w'amateka PSG yatsinzemo Bayern Munich

Mahame — 2026-04-29T05:48:35Z

Uyu mukino wabaye mu ijoro ryo ku wa Kabiri tariki ya 28 Mata 2026, ubera kuri Stade ya Parc des Princes iherereye mu Bufaransa, witabiriwe n'ibyamamare bitandukanye birimo Nicolas Sarkozy ndetse na Perezida wa PSG, Nasser Al-Khelaïfi.

Ni umukino wagaragayemo ibitego byinshi bidasanzwe, aho iminota 90 yarangiye PSG itsinze Bayern Munich ibitego 5-4. Wari umukino wihariye wuzuyemo ishyaka, ubuhanga n'udushya twashimishije abafana ku rwego rwo hejuru.

Ibitego bya PSG byatsinzwe na Khvicha Kvaratskhelia watsinze bibiri, João Neves watsinze kimwe, ndetse na Ousmane Dembélé watsinze bibiri.

Ku ruhande rwa Bayern Munich, ibitego byatsinzwe na Harry Kane, Michael Olise, Dayot Upamecano na Luis Díaz.

Uyu mukino wahise wandika amateka mashya, uba umwe mu mikino ya ½ cy'irangiza yatsinzwemo ibitego byinshi kuva mu 1960, ubwo Eintracht Frankfurt yatsindaga Rangers F.C. ibitego 6-3 mu cyahoze cyitwa European Cup.

Amakipe yombi azongera guhura mu mukino wo kwishyura uzabera mu Budage kuri Stade ya Allianz Arena ku wa Gatatu tariki ya 6 Gicurasi 2026, uzagena ikipe izakomeza mu mukino wa nyuma.

PSG yageze muri iki cyiciro isezereye Liverpool F.C. ku giteranyo cy'ibitego 4-0, igaragaza imbaraga zikomeye muri iri rushanwa.

Nyuma y'iyo ntsinzi, Perezida Kagame yifashishije imbuga nkoranyambaga ashima PSG n'andi makipe afitanye ubufatanye na gahunda ya Visit Rwanda, arimo na Atlético de Madrid.

Yagize ati: “Twishimiye abafatanyabikorwa ba Visit Rwanda bageze ku ntsinzi nziza. Bagaragaje umukino mwiza kandi bakwiriye umusaruro babonye. Tubifurije amahirwe masa mu cyiciro gikurikiraho.”

Ubufatanye hagati ya PSG n'u Rwanda binyuze muri Visit Rwanda bwatangiye mu 2019, bukaba bwaravuguruwe mu 2025 aho buzageza mu 2028. Muri ayo masezerano, PSG yamamaza u Rwanda binyuze ku kibuga cyayo cya Parc des Princes no ku myambaro y'abakinnyi mu myitozo.

Kuba Perezida Kagame akurikirana imikino nk'iyi, ndetse n'ubufatanye bw'u Rwanda n'amakipe akomeye ku Isi nka PSG, bikomeza gushimangira uburyo siporo ikoreshwa nk'ikiraro cyo guteza imbere ubukerarugendo no kumenyekanisha u Rwanda ku rwego mpuzamahanga, bigaragaza ko siporo atari imyidagaduro gusa ahubwo ari n'igikoresho gikomeye cy'iterambere n'imikoranire mpuzamahanga.

Kera kabaye Haringingo yabashije kwegukana intsinzi kuva agarutse muri Rayon Sports

Mahame — 2026-04-27T05:30:42Z

Ku gicamunsi cyo kuri iki Cyumweru, tariki ya 26 Mata 2026, ni bwo ikipe ya Amagaju FC yakiriye Rayon Sports mu mukino w'umunsi wa 28 wa Rwanda Premier League wabereye kuri Sitade Kamena mu Karere ka Huye.

Rayon Sports yagiye gukina uyu mukino ibizi neza ko mukeba wayo APR FC yavuye i Huye yemye nyuma yo kunyagira Mukura Victory Sports et Loisirs ibitego bitatu ku busa, ku wa Gatandatu tariki ya 25 Mata 2026.

Ku rundi ruhande Amagaju FC yashakaga kureba ko yatsinda uyu mukino maze agakomeza kwitarura amakipe arwana no kudasubira mu cyiciro cya kabiri.

Umutoza wa Rayon Sports Haringingo Francis , yakoze impinduka imwe yonyine ku bakinnyi 11 yabanjemo mu cyumweru hagati mu mukino ubanza wa ½ cy'Igikombe cy'Amahoro , Rayon Sports yaguye miswi na Gorilla FC ubusa ku busa. Nshimiyimana Emmanuel ‘ Kabange' yabanjemo mu mwanya wa Uwumukiza Obed.

Umukino watangiye ubona Rayon Sports irusha Amagaju FC kugera ku izamu ndetse biza kuyihira ku munota wa 32 ihita ifungura amazamu.

Rayon Sports yafunguye amazamu ku gitego cyatsinzwe na Tambwe Gloire giturutse ku mupira Nshimiyimana Emmanuel ‘Kabange', yahinduye ari ku ruhande rw'iburyo rwa Rayon Sports maze umupira usanga Tambwe ahagaze neza ahita anyeganyeza inshundura n'umutwe.

Ku munota wa 41 w'umukino nyuma yo kugira ikibazo cy'imvune Tambwe Gloire wari umaze gutsinda igitego, yaje gusimburwa na rutahizamu Fall Ngagne.

Iminota 45 y'igice cya mbere yaje kongerwaho iminota ine itigeze ibonekamo uburyo bwinshi, maze umusifuzi w'umukino, Ngabonziza Dieudonne yohereza abakinnyi b'amakipe yombi mu kiruhuko cy'igice cya mbere.

Igice cya kabiri cyatangiranye impinduka ku ruhande rwa Rayon Sports aho Faustin Likau yinjiyemo asimbura Mugisha Didier ‘Taichi' utagize umukino mwiza.

Ku munota wa 77 Rayon Sports yaje gutsinda igitego cya kabiri kuri Coup Franc yatewe neza cyane na Nshimiyimana Emmmanuel ‘Kabange', maze umupira usanga Kapiteni w'iyi kipe, Youssou Diagne wari wasimbutse ari mu kirere ahita atsinda igitego cya kabiri cya Rayon Sports.

Umukino winjiye mu minota icumi ya nyuma abakinnyi ba Rayon Sports bari bamaze kwizera instinzi batangira gukina batuje bahererekanya umupira kuva ku munyezamu Kwizera Olivier kugera imbere kuri rutahizamu Fall Ngagne.

Iminota 90 yarangiye Amagaju FC akigerageza kureba ko yakwishyura byibura igitego kimwe ariko ubwugarizi bwa Rayon Sports bukomeza guhagarara neza.

Hongeweho iminota itatu itigeze igira icyo ihindura maze umusifuzi Ngabonziza Dieudonne yemeza ko umukino urangiye Rayon Sports iva mu Karere ka Huye amahoro icyuye amanota atatu yari ikumbuye cyane

Nyuma yo gutsinda Amagaju FC , ikipe ya Rayon Sports yahise ishimangira umwanya wa Kane yaririho ku rutonde rw'agateganyo rwa Shampiyona, aho yahise igira amanota 47 ni mu gihe Al Hilal SC ariyo ya mbere ifite amanota 61 igakurikirwa na APR FC ifite 55, ni mu gihe umwanya wa gatatu uriho ikipe ya Al Merrikh ifite amanota 52.

Rayon Sports igiye guhita itegura umukino ukomeye w'umunsi wa 29 wa Rwanda Premier League, izakiramo APR FC ku wa Gatandatu, tariki ya 02 Gicurasi 2026 muri Stade Amahoro.

Mali: Guverinoma yemeje ko Minisitiri w'Ingabo yishwe n'inyeshyamba

Mahame — 2026-04-27T05:17:53Z

Igisirikare cya Mali kivuga ko kibabajwe n'urupfu rubi rwa Lt.Gen Sadio CAMARA wari Minisitiri w'Ingabo n'Inkeragutabara.

Ku wa Gatandatu tariki 25 Mata, 2026, igisirikare cya Mali kivuga ko mu gitondo imodoka irimo ibisasu itwawe n'umwiyahuzi yagabye igitero ku rugo rwa Minisitiri ahangana na bo, ariko aza gukomereka ajyanwa kwa muganga nibwo ngo yaje gupfa.

Abandi bapfuye ni abantu bari mu rugo rwa Minisitiri
n'abari mu musigi na wo wagabweho igitero.

Itangazo ry'igisirikare rivuga ko Gen Assimi Goita
Uyoboye Leta y'inzibacyuho nyuma yo guhirika
Ubutegetsi, Guverinoma ayoboye n'abaturage ba Mali
bifatanyije mu gahinda n'umuryango wa Minisitiri.

Leta ya Mali kandi yanihanganishije abantu babuze
ababo mu gitero cy'inyeshyamba cyo ku wa Gatandatu
baba abasivile n'abasirikare cyahitanye.

Kugeza ubu ntiharatangazwa imibare y'abapfuye ariko
ku mbuga nkoranyambaga byagaragaye ko kiriya
gitero cyaguyemo abantu benshi ku mpande zombi.

Lieutenant General Sadio CAMARA yavutse muri Kanama 1979, mu mujyi wa KATI ni naho yiciwe tariki 26 Mata, 2026 mu gitero gikomeye cy'inyeshyamba.

Kicukiro: Abaturage babwiwe ko nta cyagerwaho hakiri ibiyobyabwenge bihungabanya umutekano

Mahame — 2026-04-25T20:52:07Z

Abayobozi mu nzego zitandukanye bagarutse ku ngaruka zikomeye ibi biyobyabwenge bigira ku buzima bw'abaturage no ku mutekano rusange, bashimangira ko bidakwiye gukomeza kwihanganirwa.

Lieutenant Colonel Emmanuel Karuranga

Umuyobozi w'Ingabo z'u Rwanda mu turere twa Kicukiro, Nyarugenge na Gasabo, Lieutenant Colonel Emmanuel Karuranga, yagaragaje ko umutekano w'igihugu ugeze ku rwego rushimishije, ariko ashimangira ko ibiyobyabwenge bikomeje kuba inzitizi ku iterambere.

Yagize ati: “ Murabizi neza ko ikintu kitwa umutekano ushobora guhungabanya igihugu cyacu, twarawukemuye… Njyewe ndabanza kubwira ababyeyi bari hano mbasaba ko urugamba dusigaranye ni urwo kurwanya ibiyobyabwenge, ubu butumwa ndagira ngo mbutange kandi bwumvikane. Hari ikintu kirimo kigaragara cyane cy'ibiyobyabwenge, cyitwa urumogi, izi ngoga z'inkorano.”

Yakomeje agaragaza ingaruka zabyo agira ati: “Twababwiye ko umutekano uhari, ariko iyo dusanze umuntu yishe undi cyangwa undi yishwe n'urumogo, cyangwa n'ibiyobyabwenge, ingo zacu abantu barwana buri munsi, ingo zisenyuka, ntabwo twaba twubaka umuryango, ntabwo twaba twubaka umuryango dufite abana b'inzererezi, bari mu mihanda, ababyeyi bababyara ntibabakurikirane, ntabwo twaba dufite umutekano, ingo zitoborwa, hari ubujura, kuko hari abantu badashaka gukora bamara guhaga ibiyobyabwenge bakaza gutobora amazu no kwiba, ndagira ngo ibi bintu tubihagurukire dufashijwe n'ubuyobozi, abaturage bacu niba hari umutekano igihugu kirinzwe.”

Yanibukije urubyiruko ko arirwo mizero y'ejo hazaza, arusaba kwirinda ibiyobyabwenge.

Ati: “Abantu benshi basigaye banibaza ngo kubera iki inzoga z'inkorano zirwanywa cyane, tuzi ko iyo umuntu yanyoye ibiyobyabwenge, ntanicyo yageraho, ntanicyo yakora. Ndagira ngo mbwire urubyiruko ruri aha niba rwiteguye kuzadusimbura no kurinda iki gihugu, nuko mureba aba bayobozi bari aha babayobora,nimwe muzavamo abayobozi bazasimbura twebwe n'aba bayobozi bari hano kuva ku rwego rw'umujyi kugera hasi, ntabwo rero bazasimburwa n'abantu banywa ibiyobyabwenge, niyo mpamvu igihugu cyacu cyabihagurukiye, turagira ngo tubasabe tubabwira ngo ikintu kitwa ibiyobyabwinge turagihagurukira ku buryo bw'umwihariko.”

SSP Kayihura James

Umuyobozi wa Polisi mu Karere ka Kicukiro, SSP Kayihura James, yasabye abaturage gutanga amakuru ku nzoga z'inkorano, agaragaza ko na zo ari ikibazo gikomeye.

Yagize ati: “Ndashaka ko muzajya mumpa amakuru ku gihe ajyanye n'izo nzoga z'inkorano, niyo baguha inzitiramubu, niyo bakuvura malariya, ntabwo byakubuza kwicwa n'inzoga z'unkorano, rero inzoga z'inkorano nacyo ni icyorezo, tumaze iminsi tuzirwanya ndabinginze, nomero nayibahaye, ntabwo dushaka inzoga z'inkorano zivutsa umunyarwanda ubuzima, nimutanga amakuru tubabirwanya kandi tuzabigeraho.”

Visi Meya, Urujeni Martine

Urujeni Martine, Umuyobozi w'Umujyi wa Kigari wungirije ushinzwe myiza y'abaturage n'iterambere ry'ubukungu, nawe agaragaje ko izi nzoga ari imwe mu mpamvu zikomeye z'amakimbirane yo mu miryango.

Ati: "Hari icyagarutsweho cyerekeranye n'ibiyoga by'ibikorano, ba nyakubahwa mu nzego z'umutekano, imwe mu ngeruka ikomeye iterwa n'ibi biyoga, ni ikintu kitwa amakimbirane mu miryango, tubashije dufatanije n'aba baturage,tukarwanya tukarandura ikintu kitwa ibi biyoga by'inkorano, bitatu bya kane by'amakimbirane dufite mu miryango yacika, ikindi kandi aba bana dukura mu muhanda bitati bya kane by'aba bana bahunga amakimbirane atewe n'induru ziba zaturutse kuri biriya biyoga abantu basinze, bizaba bikemuye byibura bitatu bya kane by'abana bagwingira, imirire mibi."

Yakomeje agira ati: “Ni ukuvuga ngo ipfundo ry'ibi byose ni ibi biyoga byica abantu, ntabwo tuzareka abantu biyica tubareba, biyicisha biriya biyoga, ntabwo bikwiye, …..kuko ingaruka ni ndende kandi zirimo n'abajya bavutsa abantu ubuzima kubera biriya biyoga.”

Abaturage na bo bemeza ko izi nzoga n'ibiyobyabwenge byangiza ubuzima n'imibanire mu miryango.

Umusaza witwa Karisa, wo mu mudugudu wa Nyagafunzo, Akagari ka Kagasa, yagize ati: “Izo nzoga zose iyo zihari abenshi bamaze kumenya ko ari mbi, usanga buri wese yabyimbye amatama, usanga washaje imburagihe, kuzica rwose natwe twumva ko twagombye gutanga amakuru kubera ko zitemewe, amakimbirane rwose usanga havamo kuba umugore n'umugabo batumvikana, iyo baje umwe yagasomyeho, umwe aba abangamiye undi, usanga umugore n'umugabo ntabwo babana, umwe asigaranye umwana wenyine wa mwana ugasanga ntarezwe neza.”

Ndayambaje Eric, nawe yagize ati: “Ibiyobyabwenge sindabona ahantu babikorera ngo ntange amakuru, ariko inzego z'ubuyobozi bwacu zibikurikirana neza, ababikoresha n'ababicuruza ubutumwa nabaha ni uko bava muri ibyo barimo bakayoboka inzira yo kwiteza imbere, ntabwo ari byiza ku buryo bagumya kubyigaraguramo, ahubwo bagomba gushaka icyabateza imbere kugira ngo ubuzima bwabo burusheho kumera neza.”

Muri rusange, ubutumwa bwatangiwe muri uyu muganda bwashimangiye ko ibiyobyabwenge n'inzoga z'inkorano bikomeje guhungabanya umutekano no gusenya umuryango nyarwanda, bityo buri muturage asabwa kugira uruhare mu kubirwanya, cyane cyane atanga amakuru no guharanira imibereho myiza.

Kicukiro/Gahanga: Basabwe kugira uruhare mu kurandura malariya bashyira mu bikorwa ingamba bagezwaho zo kuyirinda

Mahame — 2026-04-25T16:02:19Z

Ibi byagarutsweho mu bikorwa by'Umuganda rusange usoza ukwezi kwa Mata 2026 wabaye kuri uyu wa 25 Mata mu Kagari ka Kagasa, Umurenge wa Gahanga mu Karere ka Kicukiro, byahujwe n'ibikorwa byo kwizihiza umunsi mpuzamahanga wo kurwanya malaria usanzwe uba muri wa 25 Mata buri mwaka.

Iki gikorwa cyateguwe na Minisiteri y'Ubuzima ibinyujije mu Kigo Gishinzwe Ubuzima mu Rwanda (RBC) ku bufatanye n'abafatanyabikorwa batandukanye barimo Strive Foundation Rwanda, Ihuriro ry'Imiryango itegamiye kuri Leta ishinzwe kurwanya Virusi itera SIDA no guteza imbere ibikorwa by'ubuzima (NGO Forum for HIV/AIDS and Health Promotions) na SFH Rwanda, cyaranzwe n'ubukangurambaga bwo kurwanya malaria, gutanga inzitiramubu no gusobanurira abaturage uruhare rwabo mu kurwanya malariya.

Abaturage bahawe inzitiramubu zikoranye umuti basabwe kuziraramo buri joro, no gukaza isuku n'isukura aho batuye, birinda ibizenga by'amazi n'ibihuru bishobora kororokeramo imibu.

Visi Visi Meya w'Umujyi wa Kigali ushinzwe imibereho myiza y'abaturage n'iterambere ry'ubukungu, Urujeni Martine

Umuyobozi w'Umujyi wa Kigali wungirije ushinzwe imibereho myiza y'abaturage n'iterambere ry'ubukungu, Urujeni Martine, yagaragaje ko uruhare rw'umuturage ari ingenzi mu guhashya malaria.

Yagize ati: “Kuri uyu munsi w'umuganda, n'ibikorwa twawukozemo, twabihuje n'umunsi mpuzamahanga wo kurwanya malariya, kugira ngo twingere dukangurire abaturage kwirinda malariya…..Turasaba abaturage bose gukomeza gukaza ingamba zo kwirinda malariya, kubasobanurira ububi bwa malariya, ariko tukabereka n'uruhare rwabo….Turababwira ngo barinde ubuzima bwabo, kuko kwirinda nibyo by'ingenzi kurusha kwivuza.”

Dr Aimable Mbituyumuremyi

Dr Aimable Mbituyumuremyi, Umuyobozi w'Ishami rishinzwe kurwanya malariya n'izindi ndwara ziterwa n'udukoko muri RBC, yagaragaje ko ingamba zishyirwa mu bikorwa hashingiwe ku mibare igaragaza aho ikibazo kiri hejuru, asaba abaturage kuzitabira no kuzikoresha neza.

Ati: “Hari ingamaba twasanze ko zikenewe dushingiye ku makuru dufite, aho twagiye tubona imirenge izahaye kurusha indi mu gihugu, aho twateganijemo ingamba zo gutera imiti, hari ingamba yo gutanga inzitiramubu, ubwo rero ubutumwa ni uko abantu bitabira kuzifata ariko bakazikoresha neza kuko kuyitanga ni kimwe ariko kuyikoresha ni ikindi, ubutumwa bundi ni ukwivuza hakiri kare, abagize ibyago byo kwandura malariya tubagenera imiti ikwiriye ariko tubanza kubapima, isuku n'isukura by'umwihariko nk'uko mwabibonye muri uyu muganda ni ingenzi cyane, ni ubutumwa tugomba guha abaturage ko umuganda ukwiye guhera mu rugo iwawe, ukabanza ukareba ko nta hantu harimo bwa bwororokero bw'imibu.”

Mu izina ry'imiryango itegamiye kuri Leta y'abafatanyabikorwa ba Minisiteri y'Ubuzima ibinyujije muri RBC, Umuyobozi w'umuryango Strive Foundation Rwanda, Muramira Bernard, yashimangiye ko kurandura malaria bisaba ubufatanye bwa buri wese.

Ati: “Murabizi ko tumaranye iminsi namwe dufatanya kugira ngo tugabanye ubwiyongera bwa malariya, uyu munsi rero turi hano mu rwego rwo kwizihiza umunsi mpuzamahango wo kurwanya malariya, ntabwo ari twebwe tubyishoboza kugira ngo serivisi z'ubuzima zibegere, rero turabasaba ko twese hamwe twahuriza hamwe buri wese akagira uruhare mu kurandura malariya, buri wese icyo asabwa akagikora kandi neza.”

Abaturage na bo bagaragaje ko bagiye gukurikiza inama bahawe n'ubuyobozi n'inzego z'ubuzima, ndetse gushyira mu bikorwa ingamba zagenwe, bavuga ko bafite uruhare rukomeye mu kwirinda malaria.

Ufitinema Francine, utuye mu mudugudu wa Nyagafunzo, Akagari ka Kagasa, yagize ati: “Urebye rero natwe turagerageza gusiba bya bingo, nubundi kurangura malariya ni njye biheraho, ndama mu nzitiramubu ikoranye umuti, no gukuraho ibihuru biri hafi y'urugo, no gukuraho ibizenga by'amazi, umuntu akabisiba, ubwo nyine malariya iragenda, icyo turigukora ni ukubahiriza amategeko n'amabwiriza baduha.”

Uwamarayika Alphonsine, nawe utuye mu mudugudu wa Nyagafunzo, ati: “Kurandura malariya biratureba kuko iyo urwaye malariya buri munsi uhora kwa muganga, ni urugendo ugenda ukora kenshi ushiramo amatike, ukabona biragoranye, twebwe rero turabyishimiye kuba batwibutse bakaza kuduha inzitiramubu zikoranye umuti, kuba baje bakatwibutsa ibyo tugomba gukora turishimye kandi twabikurikiranye, tugiye kujya dusiba ibinogo biri hafi y'ingo zacu biba byiretsemo amazi, turare mu nzitiramubu zikoranye umuti, urabibona baziduhaye.”

Ndayambaje Eric, nawe utuye mu mudugudu wa Nyagafunzo ati: “Tugiye gufata ingamba zikomeye dukora amasuku aho dutuye, dukuraho ibihuru bidukikije, dukuraho ibirekamo amazi yororokeramo imibu, ubundi turara no mu nzitiramubu ikoranye umuti.”

Imibare ya RBC igaragaza ko umwaka ushize w'ingengo y'imari wa 2024-2025 abaturage ibihugmi 114 ku baturage barenga ibihumbi 400 batuye mu karere Kicukiro barwaye malariya.

Iyi mibare inagaragaza ko kuva umwaka w'ingengo y'imari wa 2025-2026 watangira ku wa 1 Nyakanga 2025 kugeza ku wa 31 Werurwe 2026, abarwaye Malaria bamaze kugera kuri 928,616.

Muri uyu mwaka, uturere 10 twa mbere twibasiwe cyane kurusha utundi harimo Gisagara yagize abarwayi 216350, igakurikirwa na Gasabo ifite 98077, Bugesera igira 74073, Kicukiro ni 65297, Ngoma ni 62537, Nyagatare ni 50628, Kirehe ni 45347, Nyarugenge ni 40518, Kayonza ni 30227 na Muhanga ikagira 22751, aho utu turere turi mu twagaragayemo umubare munini w'abarwayi.

By'umwihariko mu kwezi kwa Werurwe 2026, imibare yagaragaje ko Malaria ikomeje kwiyongera, aho Ngoma yagaragayemo abarwayi 8527, igakurikirwa na Kayonza ifite 5839, Gasabo 5709, Kicukiro 2941 na Gisagara 2769, tukaba ari two turere dutanu twari twibasiwe cyane muri uko kwezi, dore ko nk'uko bigaragazwa mu mibare utu turere duteranye uko ari dutanu twagize 55% by'abarwaye Malaria bose muri uko kwaze mu gihugu hose.