Imirasire.rw

Ingabire Victoire yasabye guhura n'abo bareganwa mbere yo kuburana ubushinjacyaha bubyita umuteto

Mahame — 2026-06-15T19:10:36Z

Ni ingingo yagarutsweho cyane mu iburanisha ryabaye kuri uyu wa 15 Kamena 2026, aho Ubushinjacyaha bwo bwabwiye urukiko ko iyo mpamvu idafite ishingiro ry'amategeko, buyita ubutesi budakwiye gutuma urubanza rusubikwa.

Mbere y'uko Ubushinjacyaha butangira gusobanura ibyaha bukurikiranye kuri Ingabire, yahise asaba ijambo amenyesha urukiko ko atiteguye kuburana kubera imbogamizi zitandukanye avuga ko zatumye atabasha gutegura dosiye ye uko bikwiye.

Yavuze ko ikibazo gikomeye ari ukutemererwa guhura n'abo bareganwa, nyamara hari ibyaha areganwaho hamwe na bo birimo kurema umutwe w'abagizi ba nabi no gucura umugambi wo kugirira nabi ubutegetsi buriho.

Ingabire yasobanuye ko abo bareganwa ari bamwe mu bitabiriye amahugurwa yabaye mu 2021 ategurwa mu rwego rw'ishyaka DALFA Umurinzi, mu gihe we atayitabiriye, bityo akaba akeneye kubabaza no kumenya amakuru ajyanye n'ibirego bahuriyeho mbere yo kwiregura.

Yagize ati: “Nkeneye guhura n'abo tureganwa hamwe kugira ngo mbone uko ntegura neza urubanza cyane ko duhuriye kuri icyo cyaha cyo kurema umutwe w'abagizi ba nabi n'umugambi wo guhirika ubutegetsi.”

Yongeyeho ko kuba yarangiwe guhura na bo byamugizeho ingaruka mu gutegura urubanza, asaba urukiko kumufasha kubona ubwo burenganzira mbere y'uko urubanza ruburanishwa mu mizi.

Abanyamategeko be barimo Me Gatera Gashabana, Me Bikotwa Bruce na Me Gashema Felicien, bashyigikiye icyo cyifuzo bavuga ko nta mpamvu ikwiye gutuma umukiliya wabo atemererwa guhura n'abo bareganwa, cyane ko bishobora kumufasha gutegura neza uburyo bwo kwiregura.

Me Bikotwa yavuze ko kutemererwa guhura n'abo bareganwa bishobora kugira ingaruka ku burenganzira bwo kuburana yiteguye, mu gihe Me Gatera Gashabana yasabye urukiko gusuzuma icyo kibazo no gushaka uburyo cyakemuka.

Icyakora, Ubushinjacyaha bwamaganye ibyo busobanura ko nta tegeko ryaba ryararenzweho kubera ko Ingabire atahuye n'abo bareganwa.

Uhagarariye Ubushinjacyaha yavuze ko kuba atarabashije guhura na bo bidashobora gufatwa nk'inzitizi y'amategeko yatuma urubanza rusubikwa.

Yagize ati: “Ntabwo ari inzitizi zatuma urubanza rusubikwa, ahubwo ni amarangamutima ye n'ay'abanyamategeko be, twe twakwita ko ari ubutesi. Nashakishije ibintu byose bavuze, mburamo impamvu y'amategeko yatuma urubanza rwe rusubikwa.”

Ubushinjacyaha bwakomeje buvuga ko ikibazo cyari kuba gikomeye iyo Ingabire aza kuba atemererwa guhura cyangwa kuvugana n'abamwunganira mu mategeko, ariko ko kuba atarabonanye n'abo bareganwa bidafite aho bihuriye n'uburenganzira bwe bwo kuburana.

Mu rwego rwo kumva neza icyo kibazo, Umucamanza yabajije Ingabire umubare w'inshuro yumva zakenerwa kugira ngo ahure n'abo bareganwa, asubiza ko nibura yakenera kubabona inshuro enye kugira ngo abashe gutegura neza urubanza.

Nyuma yo kumva impande zombi no gusuzuma impaka zatanzwe, Urukiko rwafashe icyemezo cyo gusubika iburanisha, rutegeka ko urubanza ruzakomeza ku wa 16 Kamena 2026 saa tanu za mu gitondo.

Ubushakashatsi bwa NESA bugaragaza ko mu burezi hari ikibazo gikomeye cy'abana bazi gusoma ariko badasobanukiwe ibyo basoma

Mahame — 2026-06-15T14:25:20Z

Ibi ni ibikubiye mu bushakashatsi bwiswe Learning Achievement in Rwandan Schools (LARS 2025) NESA yashyize ahagaragara kuri uyu wa Mbere tariki 15 Kamena 2026, bukaba bwarakozwe mu rwego rwo gusuzuma urwego rw'imyigire n'imyigishirize mu mashuri yo mu Rwanda no gufasha abafata ibyemezo gushyiraho ingamba zo kurushaho kuzamura ireme ry'uburezi.

Ubu bushakashatsi bwa LARS 2025 bwakorewe abanyeshuri 22,950 bo mu mashuri 592 yo mu turere 30 twose tw'igihugu, harimo n'amashuri y'abana bafite ubumuga.

Bwakozwe ku banyeshuri bo mu mwaka wa gatatu n'uwa gatandatu w'amashuri abanza (P3 na P6), ndetse n'umwaka wa gatatu w'amashuri yisumbuye (S3).

Ibyavuye muri ubu bushakashatsi byagaragaje ko abana benshi bashobora gusoma amagambo mu Kinyarwanda no mu Cyongereza, ariko bagahura n'imbogamizi mu gusobanukirwa neza ibyo basoma.

Mu banyeshuri bo mu mwaka wa gatatu w'amashuri abanza (P3), 44% gusa ni bo bageze ku rwego rwifuzwa mu gusobanukirwa ibyo basoma mu Kinyarwanda, mu gihe mu Cyongereza ari 24% gusa. Ibi bisobanuye ko nubwo abanyeshuri bashobora gusoma amagambo, hari ikibazo gikomeye mu gusobanukirwa ubutumwa buyakubiyemo.

Minisitiri w'Uburezi, Joseph Nsengimana

Atangiza itangazwa ry'ubu bushakashatsi, Minisitiri w'Uburezi, Joseph Nsengimana, yavuze ko ibyavuye muri LARS 2025 bizafasha igihugu kugera ku ntego zacyo z'iterambere zirimo NST2 n'Icyerekezo 2050.

Yagize ati: “Uburezi ni inkingi y'iterambere ry'igihugu cyacu. Ibyavuye muri ubu bushakashatsi biduha ishusho y'aho tugeze kandi bikadufasha kureba niba politiki n'ishoramari dukora bitanga umusaruro ku myigire y'abanyeshuri.”

Minisitiri Nsengimana yavuze ko nubwo igihugu cyateye intambwe mu kongera umubare w'abana bitabira ishuri, hakiri akazi gakomeye ko kureba niba abanyeshuri bunguka ubumenyi n'ubushobozi bukenewe mu buzima bwa buri munsi.

Ubushakashatsi bwagaragaje kandi ko umusaruro w'abanyeshuri uterwa n'ibintu byinshi birimo ubucucike mu mashuri, ibikoresho byifashishwa mu myigire, gahunda yo kugaburira abana ku ishuri, umutekano, ikoranabuhanga ndetse n'intera abana bagenda bajya ku ishuri.

Umuyobozi Mukuru wa NESA, Dr Bernard Bahati

Umuyobozi Mukuru wa NESA, Dr Bernard Bahati, yavuze ko ikibazo cyo gusobanukirwa ibyo abanyeshuri basoma gikwiye gushyirwamo imbaraga zihariye.

Yagize ati: “Dufite ikibazo gikomeye cyane kuba abana basoma ikinyarwanda ariko ntibumve ibyo basoma. Gusoma gusa ntibihagije, ahubwo kumva ibyo wasomye ni yo nkingi yo kumenya ururimi.”

Dr Bahati yongeyeho ko hari n'ikibazo cy'imitsindire mu mibare, aho ubushakashatsi bugaragaza ko hafi umwana umwe muri bane bo mu mwaka wa gatandatu w'amashuri abanza (P6) atagera ku bipimo byifuzwa mu mibare.

Ubushakashatsi kandi bwerekanye ko abakobwa bakora neza kurusha abahungu mu byiciro byo hasi by'amashuri, ariko uko bazamuka mu ntera y'amashuri, abahungu bakagenda babarusha mu masomo menshi, ibintu NESA ivuga ko bikwiye gukorerwa ubushakashatsi bwimbitse.

Ku rwego rw'intara, Intara y'Amajyaruguru yagaragaye nk'iza imbere mu gusoma neza, ariko ikaza inyuma mu gusobanukirwa ibyo abasomyi basoma. Ubushakashatsi kandi bwagaragaje ko abanyeshuri bo mu mijyi bakora neza kurusha abo mu cyaro cyane cyane mu Cyongereza.

Ikindi cyagaragajwe ni uko ubucucike mu mashuri bugira ingaruka ku myigire. Ubushakashatsi bwerekanye ko abanyeshuri bigira mu mashuri afite abanyeshuri batarenze 40 mu ishuri bakora neza kurusha abiga mu mashuri arenga abanyeshuri 60 mu ishuri.

Nubwo ibibazo byagaragajwe muri ubu bushakashatsi bikigaragara, bamwe mu bafatanyabikorwa mu rwego rw'uburezi bavuga ko bagiye gukomeza gushyira imbaraga mu guteza imbere gahunda zifasha abana gusoma no gusobanukirwa ibyo basoma, bashimangira ko ubufatanye hagati ya Leta, amashuri n'abafatanyabikorwa ari ingenzi mu kuzamura ireme ry'uburezi mu Rwanda.

Giramahoro Herriette wo kuri Right to Play

Giramahoro Herriette, waturutse mu muryango utegamiye kuri Leta witwa Right to Play, avuga ko ubu bushakashatsi ari inzira ibafasha gucukumbura nk'abafatanyabikorwa bagashaka impamvu itera ibibazo bidindiza ireme ry'uburezi, no kubishakira ibisubizo birambye.

Ati: “Ni ikintu tugiye gushyiramo imbaraga, ibibazo byagaragajwe tukareba tuti ‘ese niba igihugu cyabitugaragarije, ni iki twe nk'abafatanyabikorwa twakora kugira ngo tubashe gutanga umusanzu mu kwiyubakira u Rwanda', ubwo ni nk'umukoro nkatwe abafatanyabikorwa tuba dufite kugira ngi tubashe gushakisha impamvu ndetse n'ibisubizo byazo.”

Silas Bahigansenga, Umuyobozi wa LIFT Program

Silas Bahigansenga, umuyobozi wa LIFT Program, avuga ko nk'abantu bafatanya na Leta bagiye gushyira imbaraga mu gushaka uburyo ibibazo byagaragajwe bikemuka.

Ati: “Nk'uko mwabibonye ko mu turere tumwe na tumwe hari aho badakora neza, ariko ubushakashatsi nk'ubungubu icyo budufasha ni uko butuma tugira amakuru yimbitse atuma dushobora gukorera hamwe kugira ngo tubone ibisubizo ubuyobozi bwagaragaje. Umukoro ni uko dukomeza gufatanya na Leta mu gukemura ibibazo biba byagaragaye, rero ni ugukomeza gushyiramo imbaraga. Icyo nakwibutsa by'umwihariko LIFT iri mu bijyanye no gusoma kandi mwabibonye ko ariho dufite ikibazo gikomeye, rero turakomeza gushyiramo imbaraga nyinshi, yaba ari iz'ubushobozi no gukomeza gutanga amahugurwa ku barimu, kuko aribo twizeye ko ari byo bazafasha abana gukemura ibyo bibazo.”

Ibyavuye muri LARS 2025 biteganyijwe gufasha Leta y'u Rwanda n'abafatanyabikorwa bayo gushyiraho ingamba nshya zigamije kurushaho kuzamura ireme ry'uburezi no gutegura neza urubyiruko ruzubaka igihugu gishingiye ku bumenyi.

Perezida Kagame yibukije aba Ofisiye Bakuru ko iyo inshingano zabo ziyongereye n'ingaruka z'ibyemezo bafata ziremera

Mahame — 2026-06-12T16:40:13Z

Perezida Kagame yabigarutseho kuri uyu wa Gatanu tariki 12 Kamena 2026, ubwo yayoboraga umuhango wo gusoza amasomo y'aba Ofisiye Bakuru 108 baturutse mu bihugu 20 bya Afurika na Jordanie, bamaze ibyumweru 46 bahugurirwa muri iri shuri riherereye mu Karere ka Musanze.

Yavuze ko aba basirikare bageze muri iri shuri basanzwe ari abanyamwuga bafite ubunararibonye mu kazi ka gisirikare, ariko ko ubu barangije bafite ubumenyi bwisumbuyeho n'ubushobozi bwo guhangana n'inshingano zikomeye kurushaho.

Yagize ati: “Mwageze hano mufite ubunararibonye mu mwuga, none mutashye mufite ubumenyi bwagutse kurushaho ndetse mwatyaje ubwenge mwakira n'inshingano zikomeye.”

Perezida Kagame yavuze ko imwe mu ndangagaciro zikwiye kuranga umuyobozi ari ugutwaza no kubanza gutekereza neza mbere yo gufata icyemezo, kuko umwanya wo hejuru mu buyobozi uzana inshingano nyinshi ndetse n'ingaruka zikomeye zishingiye ku byemezo bifatwa.

Ati: “Uko inshingano zanyu ziyongera ni ko n'ingaruka z'ibyemezo mufata ziziyongera.”

Yasobanuye ko gufata ibyemezo byiza bidashingiye gusa ku bumenyi umuntu afite, ahubwo ko bishingira no ku bunararibonye, gukorana n'abandi no kwemera kwigira ku makosa yabayeho kugira ngo atazongera kwisubiramo.

Yagize ati: “Amahitamo meza n'ibyemezo byiza bituruka ku bunararibonye, gukorana ndetse no kwicisha bugufi ukemera kwigira ku makosa y'ibyahise aho bikenewe.”

Perezida Kagame kandi yasabye aba Ofisiye Bakuru guhora bafite intego isobanutse ibayobora mu kazi kabo, avuga ko ku Ngabo z'u Rwanda iyo ntego ishingiye ku kurinda abaturage n'ubusugire bw'igihugu, ari na ko zigira uruhare mu iterambere ryacyo.

Ati: “Ku Banyarwanda no kuri RDF, iyo ntego ishingiye ku kurinda abaturage bacu n'ubusugire bw'igihugu, ari na ko duteza imbere igihugu cyacu.”

Perezida Kagame yavuze ko ikibazo gikomeye kiri imbere y'aba barangije amasomo atari ukumenya niba bazayobora cyangwa batazayobora, ahubwo ari uburyo bazakoresha bayobora abo bashinzwe.

Yagize ati: “Ikibazo gisigaye hano si ukumenya niba muzayobora, ahubwo ni ukumenya uko muzayobora.”

Yongeye kwibutsa aba basirikare ko icyizere RDF ifitiwe n'Abanyarwanda ndetse n'abafatanyabikorwa kitubatswe mu gihe gito, ahubwo ko cyaturutse ku myaka myinshi yo kwitanga, imyitwarire myiza n'ubunyamwuga.

Ati: “Uko RDF ihagaze uyu munsi si impanuka. Byubatswe mu myaka myinshi kubera kwitanga, discipline n'ubunyamwuga. Ibyo ni byo byaduhesheje kugirirwa icyizere n'Abanyarwanda, abafatanyabikorwa ndetse n'abandi duhurira mu bikorwa bya gisirikare.”

Perezida Kagame yanagaragaje ko isi ikomeje guhinduka bitewe n'iterambere ry'ikoranabuhanga n'ibibazo bishya bigenda bivuka, asaba aba Ofisiye Bakuru gukomeza kwiyungura ubumenyi no kwivugurura kugira ngo bazabashe guhangana n'inshingano z'ahazaza.

Muri uwo muhango kandi, Perezida Kagame yahaye ibihembo by'ishimwe abanyeshuri batatu bahize abandi, barimo Umunya-Ghana, Umunya-Kenya na Lt Col Walter Kageruka wo mu Ngabo z'u Rwanda, ari na we wabaye uwa mbere muri bose.

Abarangije aya mahugurwa bakomoka mu Rwanda, Bénin, Botswana, Burkina Faso, Ethiopia, Ghana, Guinée, Kenya, Malawi, Mali, Niger, Nigeria, Sénégal, Somalia, Sudani y'Epfo, Tanzania, Uganda, Zambia na Jordanie.

U Rwanda rwongereye imbaraga muri gahunda yo guhangana n'ibibazo by'ubudahangarwa bw'indwara ku miti

Mahame — 2026-06-12T09:02:02Z

AMR ibaho igihe udukoko dutera indwara twihinduranyije ku buryo tutakomeza kwicwa n'imiti yagenewe kuturwanya. Ibi bituma indwara zisanzwe zivurwa byoroshye zigorana kuvurwa cyangwa ntizikire, bikaba byanaviramo abarwayi urupfu.

Imibare mpuzamahanga igaragaza ko mu mwaka wa 2021 abantu bagera kuri miliyoni eshanu bapfuye bazize indwara zifitanye isano n'udukoko twari tumaze kugira ubudahangarwa ku miti. Mu Rwanda na ho iki kibazo kirahari kuko hagati ya 2019 na 2021 abarenga ibihumbi 17 bahitanywe n'ingaruka zacyo.

Mu rwego rwo guhangana na AMR, Guverinoma y'u Rwanda yashyizeho gahunda y'imyaka ine izatwara miliyoni 29,6 z'Amadolari ya Amerika, asaga miliyari 43 Frw. Aya mafaranga azifashishwa mu bikorwa bitandukanye birimo gukumira indwara, kugenzura ikwirakwira ry'udukoko tugira ubudahangarwa ku miti, kongera ubushobozi bwa laboratwari no gukangurira abaturage gukoresha neza imiti.

Kimwe mu bikorwa byashyizwemo imbaraga ni ukwagura laboratwari zipima utu dukoko. U Rwanda rwamaze kongera umubare wazo rugera kuri 18, zivuye kuri esheshatu rwari rufite mu 2024. Muri izo laboratwari, 12 zikurikirana ubuzima bw'abantu mu gihe esheshatu zita ku buzima bw'amatungo.

Izi laboratwari zifasha abaganga kumenya imiti ikiri gukora neza ku dukoko twateye indwara, bityo abarwayi bagahabwa imiti ibafasha gukira aho gukomeza gukoresha itagifite ubushobozi bwo kurwanya izo ndwara.

Muri gahunda nshya, ubukangurambaga bwahawe umwanya munini kuko bwagenewe arenga miliyari 6 Frw. Hazahugurwa abaganga, abatanga imiti muri za pharmacie ndetse n'abaturage muri rusange ku ngaruka zo gukoresha nabi antibiotique. Abaturage bazakomeza gushishikarizwa gufata imiti uko bayandikiwe no kwirinda kuyikoresha batagiriwe inama n'abaganga.

Hari kandi miliyari zirenga 16 Frw zizashorwa mu bikorwa byo gukumira indwara binyuze mu kwimakaza isuku n'isukura, kongera uburyo bwo kwirinda indwara zanduza no guteza imbere ubuzima bwiza ku bantu n'amatungo.

U Rwanda rwanibanze ku rwego rw'ubworozi kuko ubushakashatsi bugaragaza ko hafi 70% bya antibiotique zikoreshwa zikoreshwa ku matungo. Inzego z'ubworozi zizafatanya na RAB mu gukurikirana ikoreshwa ry'iyi miti no gukumira uburyo bukoreshwa nabi bushobora gutuma udukoko twubaka ubudahangarwa bukomeye kurushaho.

Abajyanama b'ubuzima barenga ibihumbi 58 na bo bazagira uruhare rukomeye muri iyi gahunda, bafasha kugeza amakuru ku baturage no gukurikirana iyubahirizwa ry'ingamba zo guhangana na AMR.

Abashinzwe ubuzima bavuga ko kongera ubushobozi bwa laboratwari, gushora amafaranga mu bukangurambaga no gukaza igenzura ry'imikoreshereze ya antibiotique bizafasha u Rwanda kugabanya ubukana bw'iki kibazo no kurushaho kurinda ubuzima bw'abaturage mu myaka iri imbere.

Perezida Kagame yakoze impinduka kuri bamwe mu bagize Guverinoma no mu zindi nzego za Leta na za Ambasade

Mahame — 2026-06-10T21:57:33Z

Ni impinduka zatangajwe mu itangazo ryashyizwe ahagaragara n'Ibiro bya Minisitiri w'Intebe ku wa 10 Kamena 2026, aho rivuga ko ashingiye ku biteganywa n'Integeko Nshinga rya Repubulika y'u Rwanda, cyane cyane mu ngingo zaryo, iya 111, iya 112, n'iya 116; Nyakubahwa Perezida wa Repubulika yashyizeho abayobozi mu myanya itandukanye.

Mu bagize Guverinoma bashyizwe mu myanya harimo Damien Murwanashyaka wagizwe Minisitiri w'Ibikorwa Remezo; Judith Uwizeye wagizwe Minisitiri w'Abakozi ba Leta n'Umurimo, mu gihe Antoine Marie Kajangwe yagizwe Minisitiri w'Ubucuruzi n'Inganda.

Armand Zingiro na Col. Claudien Bizimungu bagizwe abanyamabanga ba Leta muri Minisiteri y'Ibikorwa Remezo.

Perezida Kagame yanashyize abayobozi mu nzego z'abahagarariye u Rwanda mu mahanga, aho Lt Gen (Rtd) Karenzi Karake yagizwe Ambasaderi wa Repubulika y'u Rwanda muri Repubulika y'Abaturage y'u Bushinwa, Maj Gen Emmanuel Bayingana agirwa Ambasaderi wa Repubulika y'u Rwanda muri Leta ya Isiraheli, naho Col (Rtd) Jeannot Ruhunga agirwa Ambasaderi wa Repubulika y'u Rwanda muri Repubulika ya Polonye.

Muri abo bahagarariye u Rwanda mu mahanga kandi harimo Amb. Christine Nkulikiyinka wagizwe Ambasaderi wa Repubulika y'u Rwanda mu Bwami bwa Esipanye.

Mu zindi nzego za Leta, Chantal Tuyishimire yagizwe Umunyamabanga Uhoraho muri Minisiteri y'Ubucuruzi n'Inganda, Louise Kanyonga agirwa Umuyobozi Mukuru wa Zigama CSS, Maximilien Byilingiro agirwa Umuyobozi Mukuru w'Ikigo gishinzwe Ingufu (REG), naho Michelle Umurungi agirwa Umuyobozi Mukuru Wungirije ushinzwe Ishoramari mu Rwego rw'Ubwiteganyirize mu Rwanda (RSSB).

Minisitiri Nduhungirehe yagaragaje ko kuzamba k'umubano w'u Rwanda n'u Burundi biterwa na Leta y'i Bujumbura

Mahame — 2026-06-10T14:58:49Z

Ibi Minisitiri Nduhungirehe yabigarutseho mu kiganiro yagiranye na B&B kuri uyu wa 10 Kamena 2026, aho yasobanuye ko nubwo habayeho ibiganiro byinshi byahuje inzego zitandukanye z'ibihugu byombi hagamijwe gushakira umuti ibibazo bihari, nta musaruro urambye byatanze kubera imyitwarire ya Leta y'u Burundi.

Yagize ati: “Ntabwo tubanye neza n'u Burundi kandi na byo ni ikosa ry'u Burundi, kandi ngiye kubisobanura.”

Minisitiri Nduhungirehe yavuze ko imwe mu mpamvu zikomeje gutiza umurindi umwuka mubi ari amagambo yagiye atangazwa n'abayobozi bakuru b'u Burundi, harimo Perezida Evariste Ndayishimiye, yavuze ko yigeze gutangariza i Kinshasa ko azafasha urubyiruko rw'Abanyarwanda gukuraho ubutegetsi buriho mu Rwanda.

Minisitiri Nduhungirehe yavuze ko ayo magambo yafashwe nk'akomeye kuko yavugiwe mu ruhame kandi mu gihe Perezida Ndayishimiye yari afite inshingano zo guteza imbere urubyiruko ku rwego rw'Umuryango wa Afurika Yunze Ubumwe (AU).

Yongeye gushinja u Burundi gukorana n'umutwe wa FDLR uri mu mitwe u Rwanda rufata nk'iteje umutekano muke, avuga ko ingabo z'iki gihugu zikiri mu burasirazuba bwa Repubulika Iharanira Demokarasi ya Congo kandi zigifatanya n'uyu mutwe.

Ati: “Ikizwi ni uko ubu ngubu ingabo z'u Burundi ziracyari muri Congo, ziracyafatanya n'Interahamwe za FDLR kandi n'uwo mugambi ntaho wigeze ujya.”

Minisitiri Nduhungirehe yavuze ko nubwo habaye inama nyinshi zahuje inzego z'ubutasi n'umutekano ku mpande zombi ndetse hakabaho ubwumvikane ku ngingo zitandukanye, byagiye bisubira inyuma bitewe n'amagambo n'ibikorwa byakomeje guturuka ku ruhande rw'u Burundi.

Yatanze urugero rw'ibiganiro byabaye nyuma y'ifatwa rya Goma na Bukavu n'ihuriro AFC/M23 mu ntangiriro za 2025, aho impande zombi zari zatangiye kubona ibisubizo, ariko nyuma Perezida Ndayishimiye akongera gutangaza amagambo ashinja u Rwanda gushaka gutera igihugu cye.

Mu mpera za 2025, Leta Zunze Ubumwe za Amerika na zo zongeye guhuza u Rwanda n'u Burundi mu rwego rwo kugabanya amakimbirane, inzego z'umutekano z'ibihugu byombi zirahura ndetse zumvikana ku ngingo zitandukanye. Icyakora, nk'uko Minisitiri Nduhungirehe yabivuze, ibyo ntibyabujije umwuka mubi gukomeza kubera ibikorwa u Rwanda rushinja Leta y'i Bujumbura.

Nubwo bimeze bityo, yavuze ko u Rwanda rugifite ubushake bwo kubana neza n'u Burundi no gukemura ibibazo binyuze mu nzira y'ibiganiro, ariko ashimangira ko bisaba ko Leta y'i Bujumbura ihindura imyitwarire yayo, ikareka gukorana n'umutwe wa FDLR kandi ikubahiriza ibyo impande zombi zumvikanyeho.

Inama y'Abaminisitiri yemeje ingengo y'imari ya 2026/2027 izibanda ku kwihutisha gahunda z'iterambere no kongera umusaruro w'ubuhinzi

Mahame — 2026-06-08T18:46:31Z

Nk'uko byatangajwe n'Ibiro bya Minisitiri w'Intebe, iyi ngengo y'imari izibanda ku kongera umusaruro w'ubuhinzi, guteza imbere inganda zongera agaciro ku musaruro ukomoka mu buhinzi, no gushyigikira ibikorwa byihutisha iterambere ry'ubukungu n'imibereho myiza y'abaturage.

Iyi gahunda ije mu gihe u Rwanda rukomeje gushyira imbaraga mu rugendo rwo kugera ku ntego z'Iterambere ry'Igihugu ziteganyijwe muri gahunda ya NST2, hagamijwe kuzamura ubukungu bushingiye ku musaruro w'ubuhinzi, guhanga udushya no kongera amahirwe y'akazi cyane cyane ku rubyiruko.

Mu rwego rwo gushyigikira iterambere rirambye, Inama y'Abaminisitiri yanemeje amasezerano mpuzamahanga atandukanye afite uruhare mu guteza imbere ubukungu. Harimo amasezerano hagati ya Repubulika y'u Rwanda na Banki Nyafurika Itsura Amajyambere (AfDB) yerekeye inguzanyo igenewe gahunda y'iterambere rikomatanyije rishingiye ku ikoreshwa ry'amazi ya Muvumba.

Uyu mushinga uteganyijwe kuzamura ibikorwa remezo by'amazi, kongera umusaruro w'ubuhinzi no guteza imbere imibereho y'abaturage batuye muri ako gace.

Abaminisitiri banemeje kandi amasezerano y'inguzanyo azafasha impunzi n'imiryango yazakiriye kwinjira mu buzima busanzwe no kwivana mu bukene, ndetse n'andi masezerano agamije kunoza ibijyanye n'imiturire n'ikorwa ry'ibikorwa remezo byo gutwara abantu n'ibintu mu mijyi.

Mu rwego rwo kwagura ubufatanye mpuzamahanga bufasha iterambere ry'ubukungu, Inama y'Abaminisitiri yemeje amasezerano hagati y'u Rwanda na Botswana agamije gukuraho imisoro ku nyungu zikomoka ku ishoramari ryambukiranya imipaka no kwirinda gusoresha kabiri. Aya masezerano ateganyijwe koroshya ubucuruzi n'ishoramari hagati y'ibihugu byombi.

Hari kandi amasezerano yo gutwara abantu n'ibintu mu kirere hagati y'u Rwanda n'ibihugu birimo Algeria, Azerbaijan, Botswana, Costa Rica, Guyana, Morocco, Senegal, Trinidad and Tobago ndetse n'Ubwami bw'Abongereza na Irilande y'Amajyaruguru. Aya masezerano azafasha kwagura ubuhahirane, ubukerarugendo n'ishoramari mpuzamahanga.

Mu zindi gahunda zitezweho guteza imbere ubukungu, Inama y'Abaminisitiri yemeje ishyirwaho ry'Ikigo cy'Igihugu gishinzwe Ikoranabuhanga ry'Ubwenge Buhangano (Artificial Intelligence), kizafasha kwihutisha ikoreshwa ry'ikoranabuhanga mu nzego zitandukanye z'ubukungu no kongera ubushobozi bw'Igihugu mu guhanga udushya.

Hanemejwe ivugururwa ry'amasezerano hagati ya Guverinoma y'u Rwanda n'Umuryango Mpuzamahanga w'Ibihugu bisangiye Uruzi rwa Nili (Nile Basin Initiative), hagamijwe gukomeza imikoranire mu micungire y'umutungo kamere no kubyaza umusaruro amazi yambukiranya imipaka.

Inama y'Abaminisitiri yanemeje kandi itangwa ry'impushya zo gucukura amabuye y'agaciro na kariyeri, ndetse n'ubutaka bwa Leta buri mu Karere ka Karongi bugahabwa sosiyete Zipline Rwanda Ltd, mu rwego rwo gushyigikira ibikorwa by'ishoramari n'iterambere rya serivisi zishingiye ku ikoranabuhanga.

Inama y'Abaminisitiri kandi yanagarutse ku zindi ngingo zirimo gukomeza gukumira icyorezo cya Ebola, inashyiraho abayobozi mu nzego zitandukanye.

Abasesenguzi bavuga ko ibyemezo byafatiwe muri iyi nama bigaragaza ko Guverinoma ikomeje gushyira imbere iterambere ry'ubukungu rishingiye ku musaruro, ibikorwa remezo, ikoranabuhanga n'ubufatanye mpuzamahanga, mu rwego rwo kongera ubushobozi bw'Igihugu bwo guhangana n'ihindagurika ry'ubukungu ku rwego rw'Isi no guteza imbere imibereho myiza y'abaturage.

Gisagara: Ubuhinzi butangiza ibidukikije bwatumye umusaruro babonaga wikuba inshuro nyinshi

Mahame — 2026-06-08T17:05:28Z

Ni ubuhamya butangwa n'abaturage bo mu Murenge wa Ndora, umwe mu mirenge yungukiye mu mushinga Green Amayaga I wari ugamije gusubiranya urusobe rw'ibinyabuzima no kubaka ubudahangarwa ku mihindagurikire y'ibihe mu gice cy'Amayaga.

Abaturage bavuga ko ubu buryo bukomeje gukwirakwira mu bice byinshi bya Gisagara kubera umusaruro butanga ndetse n'uruhare bugira mu gutuma babona umusaruro ushimishije cyane uguereranije n'uwo bari basanzwe babona mbere yo gukora ubu buhinzi.

Bahamya ko ubuhinzi butangiza ibidukikije ari bumwe mu buryo bubafasha kongera umusaruro, kubungabunga ubutaka no guhangana n'ingaruka z'imihindagurikire y'ibihe.

Urugero batanga ni umusaruro w'igihingwa cy'imyumbati wikubye inshuro zirenga esheshatu aho umuntu yasaruraga ibiro 30 kugera ku buso bw'umurima bungana na metero icumi ku icumi, kuri ubu ashobora kuhasarura ibiro 200.

Nyabyenda Joseph uhinga mu buryo butangiza ibidukikije

Nyabyenda Joseph, utuye mu Mudugudu wa Ramiyaga, Akagari ka Cyamukuza, avuga ko mbere y'uko bahugurwa bakoreshaga uburyo bwa gakondo bwangizaga ubutaka kandi bugatanga umusaruro muke.

Yagize ati: "Mbere twahingaga dutabira, dukora amabimba. Ubutaka bwarasazaga vuba kandi isuri ikabutwara. Wasangaga ahantu ha metero 10 kuri 10 utabonaho n'ibiro 30 by'imyumbati."

Avuga ko nyuma yo guhugurwa gukora ubuhinzi butangiza ibidukikije, ibintu byahindutse ku buryo bugaragara.

Ati: "Uyu munsi metero 10 kuri 10 ushobora kuhasarura ibiro nka 200 by'imyumbati. Ubu buhinzi ntabwo butuma isuri itwara ubutaka kandi bugatanga umusaruro."

Uyu muturage asobanura ko ubu buryo bushingiye ku guhinga hadacokozwa ubutaka cyane, aho hacukurwa ibinogo byo guteramo imyaka aho guhinga umurima wose, bityo ubutaka bugakomeza kugira ubuzima kandi bugafata amazi neza.

Yemeza ko n'aho imyaka yasaruwe ubutaka bukomeza kugaragara neza kandi bugatanga umusaruro igihe kirekire.

Mukarora Beatha yishimira umusaruro asigaya abona

Mukarora Beatha, na we wo mu Mudugudu wa Ramiyaga, avuga ko mbere benshi batizeraga ubu buhinzi kuko batari bazi inyungu zabwo.

Ati: "Ubuhinzi butangiza ibidukikije narabukunze cyane, ariko mbere ntabwo twabukundaga kuko tutari tuzi icyo ari cyo."

Avuga ko bahinduriwe imyumvire n'ubuhamya bwavuye mu murima-shuri washyizweho n'umushinga, aho igiti kimwe cy'umwumbati cyasaruyeho imyumbati 28 ipima ibiro 18.

Ati: "Abantu bose twabahamagaye baza kureba. Bamaze kubona umusaruro wavuyemo, twahise tubikunda natwe dutangira kubikora."

Mukarora avuga ko inyungu ikomeye babonye ari uko bakoresha imbuto nke ariko bagasarura byinshi, mu gihe ubutaka bukomeza kurindwa isuri.

Yagize ati: "Mbere twahingaga imbuto nyinshi tugasarura duke. Ubu uhinga imbuto nke ugasarura byinshi. Ikindi kandi amazi asanga ubutaka bukomeye, isuri ntibubutware kuko tudacokora umurima wose."

Umuyobozi w'Akarere ka Gisagara, Rutaburingoga Jerome

Mu muhango wo gusoza ku mugaragaro icyiciro cya mbere cya Green Amayaga wabereye mu Karere ka Gisagara ku wa 30 Gicurasi 2026, Umuyobozi w'aka karere, Rutaburingoga Jerome, yavuze ko ubuhamya ubutangwa n'abaturage ari ikimenyetso cy'uko umushinga wageze ku ntego wari wihaye.

Yagize ati: “Mu cyiciro cya mbere cy'umushinga wa Green Amayaga hakozwe ibikorwa byinshi byahinduye ubuzima bw'abaturage muri aka karere kacu, kandi abaturage turi kumwe hano ni abahamya bo guhamya ibyiza by'uwo mushinga.”

Yakomeje avuga ko impinduka zatewe n'umushinga zigaragarira buri wese ugeze muri Gisagara.

Ati: “Muri make uyu mushinga hari aho wavanye abaturage b'Akarere ka Gisagara. Iyo winjiye mu Karere ka Gisagara amaso arakwihera ko ibiti byatewe kandi tuzakomeza kubyongera kuko ntituragera aho tujya.”

Meya Rutaburingoga yavuze ko Green Amayaga itafashije abaturage gusa, ahubwo yanafashije akarere kugera ku mihigo yako.

Ati: “Nk'ubuyobozi natwe twabonye inyungu dukesha uyu mushinga. Wadufashije kwesa imihigo ku buryo muri iyi myaka twari kumwe na Green Amayaga twagize imyanya myiza mu mihigo.”

Umuyobozi Mukuru wa REMA, Juliet Kabera

Umuyobozi Mukuru wa REMA, Juliet Kabera, mu kiganiro yahaye abanyamakuru, yavuze ko umushinga watangijwe mu gihe igice kinini cy'Amayaga cyari cyugarijwe n'isuri ikabije ndetse kikaba cyari hafi guhinduka ubutayu.

Yagize ati: “Ni umushinga watangiye ugamije gusana ibidukikije byari byarangijwe hano muri iki gice cy'Amayaga, harimo isuri ikabije, hendaga kuba ubutayu mu by'ukuri.”

Yasobanuye ko kimwe mu byatumye Green Amayaga igera ku musaruro ushimishije ari uko abaturage bawugize uwabo kuva ugitangira.

Ati: “Isomo rya mbere twakuyemo ni ubwitabire bw'abaturage ari na bo ba nyir'ibikorwa. Bitabiriye cyane ibikorwa by'umushinga, ni na yo mpamvu tutaranasoza icyiciro cya mbere twari twaramaze kubona icyiciro cya kabiri.”

Icyiciro cya mbere cy'Umushinga wa Forest Landscape Restoration in Amayaga Region Project uzwi nka Green Amayaga cyatangiye mu 2020 gikorera mu turere twa Gisagara, Nyanza, Ruhango na Kamonyi. Mu myaka itandatu cyamaze gishyirwa mu bikorwa, hatewe ibiti kuri hegitari 13.886, hatewa ibiti by'imbuto 243.834, hatangwa amatungo 3.113, hahangwa imirimo 91.774 ndetse abaturage 6.583 bahabwa amahugurwa ku bikorwa bitandukanye byo kubungabunga ibidukikije, no guhangana n'ingaruka z'imihindagurikire y'ibihe.

Green Amayaga ni umushinga washyizwe mu bikorwa n'Ikigo cy'Igihugu gishinzwe Kubungabunga Ibidukikije (REMA), ku bufatanye n'Ikigega Mpuzamahanga gishinzwe Ibidukikije (GEF), Ishami ry'Umuryango w'Abibumbye ryita ku Iterambere (UNDP) n'Ikigo cy'Igihugu gishinzwe Amashyamba (RFA). Igice cya mbere cyawo kikaba cyaratwaye agera kuri miliyoni 7 z'Amadorali y'Amerika yatanzwe n'abafatanyabikorwa hakiyongeraho ibikorwa bitandukanye b'abaturage n'ibya Leta y'u Rwanda.

Abakozi bo mu rwego rw'ubutabera rwa Eswatini baje kwigira ku Rwanda ikoreshwa ry'ikoranabuhanga mu micungire y'imanza

Mahame — 2026-06-08T15:33:00Z

Iri tsinda ryakiriwe kuri uyu wa Mbere tariki 08 Kamena 2026 na Niwenshuti Richard, Umuyobozi Mukuru w'Ikigo cy'u Rwanda gishinzwe guteza imbere ubufatanye (RCI), mu muhango wagaragaje ubufatanye bukomeje hagati y'u Rwanda n'Ubwami bwa Eswatini.

Uru ruzinduko rugamije gufasha aba bakozi bo mu rwego rw'ubutabera gusobanukirwa no kungukira mu bunararibonye bw'u Rwanda mu gushyira ikoranabuhanga mu mikorere y'inzego z'ubutabera, cyane cyane mu koroshya no kwihutisha imanza n'izindi serivisi zifitanye isano n'amategeko.

Mu gihe cy'icyumweru bazamara mu Rwanda, iri tsinda rizagirana ibiganiro n'inzego zitandukanye zirimo Minisiteri y'Ubutegetsi bw'Igihugu, Minisiteri y'Ubutabera, Ikigo cy'Igihugu cy'Indangamuntu (NIDA), Ikigo cy'Igihugu gishinzwe Ubutaka, Ikigo cy'Igihugu gishinzwe Iterambere (RDB), Ikigo cy'Imisoro n'Amahoro ndetse na IremboGov.

Ibi biganiro bizibanda ku buryo u Rwanda rukoresha sisiteme z'ikoranabuhanga mu kubika no gucunga amakuru y'ubutaka, uburyo bwo gukurikirana imitungo y'abapfuye hifashishijwe ikoranabuhanga, ndetse n'uko imyanzuro y'inkiko ishyirwa mu bikorwa binyuze mu buryo bw'ikoranabuhanga, harimo n'ikorwa rya cyamunara ya “E-Auction”.

Abayobozi b'iri tsinda bavuga ko u Rwanda rufite ubunararibonye bw'ingenzi mu guhuza ubutabera n'ikoranabuhanga, bikaba bitanga umusaruro mu kugabanya igihe cy'imanza no kunoza serivisi zitangirwa abaturage.

U Rwanda na Eswatini bisanzwe bifitanye umubano mwiza ushingiye ku bufatanye mu bya dipolomasi, ikoranabuhanga, ubukerarugendo n'umutekano, ukomeje kugenda utera imbere.

Mu 2024, ibihugu byombi byasinyanye amasezerano akuraho visa ku bafite pasiporo za dipolomate n'iz'akazi, bikurikirwa n'uruzinduko rw'Umwami Mswati III yagiriye i Kigali, byashimangiye intambwe nshya mu mubano w'impande zombi.

Lt Col (Rtd) Nyirimanzi ahamya ko Jenoside itazongera kubaho mu Rwanda mu gihe abayihagaritse bakiriho

Mahame — 2026-06-07T19:50:58Z

Yabitangaje kuri iki Cyumweru mu gikorwa cyo kwibuka ku nshuro ya 32 Jenoside yakorewe Abatutsi mu 1994, cyabereye muri ADEPR Paruwasi ya Gasabo, aho yagarutse ku mateka y'urugamba rwo guhagarika Jenoside, anagaragaza uruhare rw'amadini n'amatorero mu kubaka ubumwe n'ubudaheranwa bw'Abanyarwanda.

Lt Col (Rtd) Nyirimanzi yavuze ko n'ubwo hashize imyaka 32 Jenoside ihagaritswe, hakiri abantu bayigizemo uruhare bakomeje kugira umugambi wo kurangiza ibyo batagezeho mu 1994, cyane cyane abahungiye mu Burasirazuba bwa Repubulika Iharanira Demokarasi ya Congo no mu bindi bihugu.

Yashimangiye ko uwo mugambi udashobora kugerwaho kuko igihugu gifite ubuyobozi bwubakiye ku mateka yo guhagarika Jenoside ndetse n'Abanyarwanda bakomeje kwiyubaka no kwimakaza ubumwe.

Yagize ati: “Nubwo abakoze Jenoside bagikomeje umugambi wabo mubisha aho bahungiye muri RDC, nubwo hari abagifite ingengabitekerezo ya Jenoside, ihakana n'ipfobya ryayo, aho bari hose ku Isi, muhumure Jenoside ntizongera kubaho ukundi mu Rwanda, mu gihe abayihagaritse bakiriho, mu gihe tukiriho kandi tugifite ubuyobozi bwiza burangajwe imbere n'abahagaritse Jenoside no mu gihe n'Abanyarwanda bagenda bahinduka.”

Mu kiganiro yatanze, Lt Col (Rtd) Nyirimanzi yanagarutse ku buryo amahanga yatereranye Abatutsi bicwaga mu 1994, nyamara afite amakuru ahagije yari gutuma Jenoside ikumirwa cyangwa igahagarikwa hakiri kare.

Yavuze ko bibabaje kuba Jenoside yarabereye mu gihugu cyari gituwemo n'abakirisitu benshi, agaragaza ko ukwemera kutajyana n'indangagaciro z'ubumuntu gushobora gutuma abantu bagwa mu byaha bikomeye.

Ati: “Birababaje kubona igihugu cyari kirimo abakirisitu bagera kuri 95% cyarabereyemo Jenoside yakorewe Abatutsi.”

Yasobanuye kandi ko mu rugamba rwo guhagarika Jenoside, gufata ibice by'ingenzi birimo Rebero byagize uruhare rukomeye mu gusenya umugambi wa Leta yari iyoboye Jenoside no gutuma ihunga Kigali.

Nk'uko yabigarutseho, intego nyamukuru y'Ingabo za RPA Inkotanyi yari ugukuraho ubutegetsi bwari ku isonga ry'ishyirwa mu bikorwa rya Jenoside no kurokora Abatutsi bicwaga aho bishoboka hose.

Yagize ati: “Leta ni yo itegura Jenoside. Ntabwo ari abantu ku giti cyabo. Iyo ukuyeho Leta iyitegura uba ukoze ikintu gikomeye. Ni yo mpamvu yirukanwe i Kigali, ihungira i Gitarama, nyuma ikajya i Gisenyi kugira ngo hasimburwe Leta y'Ubumwe.”

Mu butumwa bwe, Lt Col (Rtd) Nyirimanzi yanashimiye ADEPR ku cyemezo yafashe cyo kwambura inshingano z'ubushumba abapasiteri 35 bahamijwe ibyaha bya Jenoside yakorewe Abatutsi.

Yavuze ko iki cyemezo ari urugero rwiza rw'uburyo amadini n'amatorero akwiye guhangana n'ingaruka za Jenoside no kwimakaza ukuri.

Ati: “Birababaje kubona ahandi hari abahamijwe ibyaha bya Jenoside ndetse bakabihanirwa n'inkiko, ariko nyuma bagasubizwa mu nshingano zabo nk'aho nta cyaha bakoze.”

Yasabye kandi abashumba bo muri ADEPR gukomeza gufasha mu rugendo rw'ubumwe n'ubwiyunge, by'umwihariko bashishikariza abagize uruhare muri Jenoside barangije ibihano byabo gusaba imbabazi abo bahemukiye.

Yagaragaje ko kutagira ubutwari bwo gusaba imbabazi bikomeje kuba imwe mu mbogamizi zibangamira ubumwe n'ubudaheranwa bw'Abanyarwanda.

Yanahaye ubutumwa bwihariye urubyiruko, arusaba kwitandukanya n'ingengabitekerezo ya Jenoside n'abashaka kurukururira mu nzira mbi, kabone n'iyo baba ari abo mu miryango yarwo.

Ati: “Rubyiruko mwitandukanye n'abashaka kubakururira muri icyo cyaha gikurura umuvumo udashira, n'iyo baba abo mu muryango wanyu.”

Umushumba Mukuru wa ADEPR, Ndayizeye Isaie, yasabye abantu bose bagize uruhare muri Jenoside yakorewe Abatutsi gusaba imbabazi no kwihana by'ukuri, cyane cyane abahungiye mu mahanga nyuma yo gukora ibyo byaha.

Yavuze ko n'ubwo umuntu ashobora guhunga igihugu cyangwa ubutabera bw'abantu, adashobora guhunga urubanza rw'umutimanama cyangwa urw'Imana.

Yagize ati: “Umuntu ashobora guhunga igihugu ariko hari ibyo atazahunga. Ntawe uzahunga gupfa, ndetse n'urubanza Imana izacira abanze kwihana ntawe uzabihunga.”

Pst Ndayizeye yavuze ko ADEPR izakomeza kugira uruhare mu kubaka abantu bafite indangagaciro zibanisha neza Abanyarwanda no kurwanya ikintu cyose cyasubiza igihugu mu mateka mabi y'ivangura n'urwango.

Muri iki gikorwa kandi, Kayirebwa Vestine warokotse Jenoside yakorewe Abatutsi yatanze ubuhamya bw'uburyo yarokowe n'uwari umwarimu muri ADEPR wamuhishe kugeza Jenoside irangiye, nubwo hari inshuro nyinshi abicanyi bagerageje kumushakisha kugira ngo bamwice.