Imirasire.rw

Abayisilamu bo mu Rwanda basabwe kurangwa n'urukundo n'ubufatanye

Mahame — 2025-06-06T16:52:17Z

Uyu munsi wizihirijwe mu bice bitandukanye by'igihugu, aho igikorwa cy'isengesho rusange ku rwego rw'igihugu cyabereye kuri Kigali Pele Stadium i Nyamirambo kuva saa kumi n'ebyiri za mu gitondo, kikitabirwa n'abayisilamu batagira ingano.

Mu butumwa bwatanzwe n'abayobozi b'idini ya Islam, hagarutswe cyane ku kamaro ko kwimakaza urukundo, ubufatanye n'ubupfura nk'inkingi za Islam, aho basabye abayisilamu kutizihiza uyu munsi gusa nk'igisanzwe, ahubwo bagaharanira gusangira no gufasha abandi.

Mufti w'u Rwanda, Sheikh Sindayigaya Mussa, yavuze ko Eid Al-Adha atari umunsi wo kwizihiza gusa ahubwo ari umwanya wo kwereka Imana urukundo, no kurugaragariza bagenzi babo binyuze mu gufasha abatishoboye.

Yavuze ko igitambo gifite inyungu yo kwimakaza urukundo, ariko kikaba n'ifunguro rifasha n'abatishoboye kugira ngo na bo bishimane n'imiryango yabo.

Yashimangiye ko Umuryango w'Abayisilamu mu Rwanda wateguye igikorwa cyo kubaga inka 300 zifite agaciro karenga miliyoni 190 Frw, zigahabwa abatishoboye hirya no hino mu gihugu, kugira ngo bazabashe kwifatanya n'abandi kwizihiza uyu munsi.

Sheikh Omar Suleiman Iyakaremye na we yagarutse ku butumwa bw'uyu munsi, avuga ko icyifuzo cy'Imana kuri Aburahamu kitari ugutamba umwana we Ismail ahubwo kwari ukwemeza ko amukunda by'ukuri, kandi yemera kwitanga nta shiti.

Yavuze ko amasomo akomeye twiga kuri Aburahamu ari urukundo, kwitanga no guca bugufi, kandi ko iyo umuntu yemeye gutanga ibimugora ku bw'Imana no ku bw'abandi, aba ageze ku rwego rwo hejuru rw'ukwemera.

Uyu munsi mukuru uzwi nka Eid Al-Adha uba umwanya wo kwibuka igikorwa cy'igitambo Imana yasabye Aburahamu, aho abayisilamu babaga amatungo ihene, intama, inka cyangwa ingamiya bakagabira abatishoboye, abaturanyi n'imiryango yabo.

Minani Hemedi, umwe mu bayisilamu bizihije uyu munsi i Nyamirambo, yavuze ko kuri bo ari umwanya wo kwegerana n'abandi no kwereka abababaye ko badasigaye inyuma.

Yavuze ko kuri bo ari nk'umuganura, kuko Eid Al-Adha ari umunsi wo gusabana no gusangira n'abandi batitaye ku myemerere yabo.

Eid Al-Adha izamara iminsi itatu, kandi abayisilamu basabwe gukomeza kugira urukundo mu buzima bwabo bwa buri munsi, bakubaha Imana n'igihugu cyabo.

Papa Leo XIV: Umunyamerika yatorewe kuba Umushumba mushya wa Kiliziya Gatolika

Mahame — 2025-05-08T13:51:09Z

Itorwa rya Papa mushya ryemejwe n'umwotsi w'umweru wazamutse kuri Chapelle ya Sistine, ahaberaga iri tora kuva tariki ya 7 Gicurasi.

Bisobanuye ko mu itora, umukandida kuri uyu mwanya yabonye amajwi ari hejuru ya 89 muri 133 y'Aba-Cardinal bitabiriye itora.

Cardinal Robert ukomoka muri Leta Zunze Ubumwe za Amerika yatowe nyuma y'aho habaye ibyiciro bitanu by'itora birimo kimwe cyabaye tariki ya 7 Gicurasi n'ibindi bine byabaye ku ya 8 Gicurasi. Yafashe izina ry'ubutungane rya Leo XIV.

Papa Leo XIV yavukiye mu mujyi wa Chicago muri Leta ya Illinois tariki ya 14 Nzeri 1955. Yagizwe Cardinal na Papa Francis tariki ya 15 Mata 2023, amuragiza Diyosezi Gatolika ya Callao muri Peru.

Ni we Cardinal wa mbere ukomoka muri Leta Zunze Ubumwe za Amerika utorewe kuyobora Kiliziya Gatolika. Ibi byashimishije Perezida Donald Trump wagaragazaga ko yifuza kubona uwo mu gihugu cye aba Papa mushya.

Perezida Trump yagize ati “Nashimwe Cardinal Robert Francis Prevost, wagizwe Papa. Ni icyubahiro kubona ko ari we Papa wa mbere w'Umunyamerika. Mbega ibyishimo, mbere icyubahiro gikomeye ku gihugu cyacu! Niteguye guhura na Papa Leo XIV. Bizaba ari ibihe by'ingenzi!”

Mu 2023, Papa Leo XIV yagaragaje ko Kiliziya Gatolika idakwiye kwigisha amahame yayo gusa, ahubwo ko ikwiye kubwira Isi igisobanuro cyo kumenya Yezu Kirisitu.

Ati “Akenshi tuganzwa no kwigisha amahame…ariko bikarangira twibagiwe ko umurimo wacu w'ibanze ari ukwigisha icyo kumenya Yezu Kirisitu bisobanuye. Umurimo wacu ni ukwagura ihema, tukareka buri wese akinjira muri Kiliziya.”

Ubu butumwa buca amarenga ko Papa Leo XIV yiteguye kugendera mu murongo wa Papa Francis yasimbuye kuri iyi nshingano, urimo kudaheza uwo ari we wese ushaka umugisha w'Imana, uko yaba ateye n'imibereho yose yaba abayemo.

Icyakoze, ntabwo avugwaho rumwe kuko, nk'uko byatangajwe n'ikinyamakuru The Pillar muri Nzeri 2024, Papa Leon XIV ntiyigeze akurikirana ikirego cy'abagore bashinjaga abapadiri babiri kubahohotera mu 2007.

Aba bapadiri bakoreraga muri Diyosezi ya Chiclayo muri Peru, yayobowe na Papa Leon XIV kuva mu 2014 kugeza mu 2023 ubwo yahabwaga inshingano i Roma.

Mbere y'uko Papa mushya agera imbere y'abateraniye mu mbuga ya Bazilika ya Mutagatifu Petero, yabanje guherekezwa mu cyumba cyihariye kiri iruhande rwa Chapelle ya Sistine.

Iki cyumba kizwi nk'Icyumba cy'Amarira kigaragara nk'igisanzwe, ni gitoya ariko gifite igisobanuro gikomeye kuko giha Papa mushya ishusho y'umurimo agiye gutangira.

Izina ryacyo rikomoka ku marangamutima menshi Papa mushya agira iyo amaze kukigeramo, avanze n'ubwoba, ndetse n'amarira y'ibyishimo.

Aha ni ho Cardinal watowe yiyamburira ikanzu itukura y'Aba-Cardinal, akambara iyera ya Papa mushya. Biba bisobanuye ko ubuzima asigaje ku Isi azabumara afite iyo nshingano y'ubutungane.

Muri iki cyumba, haba harimo amakanzu atatu ya Papa, arimo intoya, iri mu rugero ndetse n'inini. Kuko abadozi b'i Vatican baba batazi niba Papa mushya azaba abyibushye cyangwa ananutse. Bivuze ko iyo amaze kugeramo, yambara imukwiye.

Haba harimo kandi inkweto zitukura za Papa, ingofero yera ndetse na ‘furari'. Ibi byose bifite ibisobanuro bitatu bikomeye: guca bugufi, ubutware ndetse n'umuco shingiro wa Kiliziya Gatolika.

Nyuma y'umwanya kuri Chapelle ya Sistine hasohotse umwotsi w'umweru, Cardinal ubifite mu nshingano agera ku ibaraza rya Bazilika ya Mutagatifu Petero mbere, akavuga amagambo y'Ikilatini agira ati "Habemus Papam" asobanura ati "Dufite Papa".

Iyo aya magambo amaze kuvugwa, ni bwo Papa mushya agera kuri iri baraza, akageza ijambo ku bakirisitu bateraniye kuri iyi mbuga na Kiliziya Gatolika yose muri rusange.

Ni ko byagenze y'itora rya Papa Leo XIV. Ubwo abakirisitu bari kuri iyi mbuga bamubonaga, bagaragaje ibyishimo by'ikirenga.

Umushumba wa Kiliziya Gatolika Papa Francis yitabye Imana

Mahame — 2025-04-21T10:49:16Z

Karidinali Kevin Farrell mu butumwa yatangiye muri Casa Santa Marta yavuze ko Papa Francis w'imyaka 88 yitabye Imana mu gitondo cyo kuri uyu wa Mbere ku isaha ya saa moya n'iminota 35.

Yakomeje avuga ko Papa Francis, ubuzima bwe bwose yabumaze yiyegurira umurimo wa Nyagasani na kiliziya ye.

Ati: "Yatwigishije kubaho mu ndangagaciro z'Ubutumwa bwiza mu budahemuka, ubutwari, ndetse n'urukundo ruhebuje dukesha urugero rwiza rwa Nyagasani."

Tariki 23 Werurwe 2025, nibwo Papa Francis yasezerewe mu bitaro nyuma yo kumara hafi ukwezi n'igice mu bitaro ari kuvurwa indwara z'ubuhumekero.

Papa Francis yabaye Umushumba wa Kiliziya Gatolika mu 2013, aba Umunyamerika y'Amajyepfo wa mbere wari uhawe izo nshingano.

RGB yahagaritse amatorero n'amadini abiri atujuje ibisabwa

Mahame — 2025-03-07T08:14:53Z

Mu itangazo RGB yasohoye kuri uyu wa Kane, tariki ya 6 Werurwe 2025, yavuze ko “Rwamenyesheje inzego z'ibanze ndetse n'iz'umutekano ko iyi miryango itemerewe gukorera mu Rwanda kubera ko itanditswe nk'uko bisabwa n'amategeko, bityo ibikorwa byayo bigomba guhagarara ako kanya.”

RGB yibukije ko imiryango ishingiye ku myemerere igomba gusaba no guhabwa ubuzimagatozi mbere yo gutangira ibikorwa byayo, mu rwego rwo kubahiriza amategeko n'amabwiriza agenga imikorere yayo.

Iki cyemezo kije gikurikira ibindi byafashwe muri Mutarama uyu mwaka, aho RGB yahagaritse amadini atanu yagaragaweho n'ibibazo birimo kutubahiriza amategeko, imiyoborere idahwitse, ndetse n'amakimbirane yo mu buyobozi bwayo.

Mu myaka ishize, RGB yakoze igenzura ku nsengero mu gihugu hose, maze izirenga 5,600 zirafungwa kubera kutuzuza ibisabwa. Hari n'izahagaritswe burundu, ku buryo kugeza mu Ugushyingo 2024, amatorero 43 yari amaze kwamburwa ubuzimagatozi.

Mbere y'uko iri genzura ritangira, mu Rwanda habarurwaga amadini n'amatorero 345, arimo n'imiryango iyashamikiyeho igera kuri 563.

Icyemezo cyo guhagarika iyi miryango gikomeje politiki ya Leta yo kugenzura ibikorwa by'amadini no gukumira ibitagenda neza, mu rwego rwo kurinda inyungu rusange z'abaturage.

Umuyobozi wa Anglican ku Isi yeguye nyuma yo kunanirwa gukemura ikibazo cy'ihohoterwa

Mahame — 2024-11-13T06:31:36Z

Mu itangazo yashyize ahagaragara, Welby yagize ati: "Mbisabiye uburenganzira, Nyiricyubahiro Umwami, nafashe icyemezo cyo kwegura nka Arikiyepisikopi wa Canterbury."

Ubu bwegure bwe buje nyuma y'aho hagaragaye amakuru y'uko yakiriye raporo ivuga ku ihohoterwa ryakorewe abahungu n'umuhungu Musenyeri John Smyth, ariko ntiyayishyikiriza inzego zishinzwe iperereza.

Iyo raporo ivuga ko Musenyeri Smyth yahohoteye abana 130 mu bikorwa bya gikirisitu yari ayoboye mu myaka ya 1970 na 1980.

Byamenyekanye mu cyumweru gishize ko mu mwaka wa 2013, Welby yashyikirijwe iyo raporo ivuga ku bikorwa bya Smyth, ariko ntiyabimenyesha inzego zishinzwe umutekano kugira ngo zikurikirane iki kibazo mbere y'uko Smyth apfa mu 2018.

Musenyeri Smyth, wagiriye muri Afurika mu 1984, bivugwa ko yakomeje ibikorwa by'ihohoterwa kugeza apfuye.

Ibi byateye impungenge zikomeye ku mikorere y'ubuyobozi bw'Itorero Angilikani, bikaba aribyo byatumye Welby afata icyemezo cyo kwegura.

Ni igihe gikomeye cy'ubusesenguzi ku mikorere n'uburyo Itorero ryakwitanga mu kurinda abana n'abakene mu murimo w'Itorero.

Perezida Kagame asanga gushyiraho imisoro ku nsengero zambura abaturage iricyo gikwiriye

Mahame — 2024-08-15T07:23:56Z

Ibi Perezida Kagame yabigarutseho mu Nteko Ishinga Amategeko kuri uyu wa 14 Kanama 2024, ubwo abadepite na Minisitiri w'Intebe bari bamaze kurahirira gutangira imirimo ya manda nshya izamara imyaka itanu.

Mu ijambo rye, Perezida Kagame yibanze ku ngingo eshatu zirimo imikorere idahwitse y'abayobozi barya ruswa, ikijyanye n'ifungwa ry'insengero, ndetse n'ibibazo by'umutekano muke mu burasirazuba bwa Repubulika ya Demokarasi ya Congo (DRC).

Ku kibazo cy'ifungwa ry'insengero, Perezida Kagame yagaragaje ko ashyigikiye ibikorwa byo kurwanya insengero zishuka abaturage.

Ati: "Niba mushaka kuba aba Pasiteri muve mu budepite, ibyo bindi mujyamo gushuka abantu mukabahanurira, wabanje ukihanurira se wowe, ibitubahirije Amategeko ntibikwiye kubaho!"

Perezida Kagame yagarutse ku bikomangoma byagiye bivuga ko gufunga insengero ari icyaha, ariko we ashimangira ko abizi neza kandi atazihanganira bene ibyo bikorwa.

Ati: "Nabonye ku itangazamakuru bavuga ngo, ‘ubanza Perezida atabizi, ibintu byo gufunga insengero ni icyaha', [...] ndabizi ahubwo simbishaka na busa, nzabirwanya rwose, niyo mpamvu mwebwe nk'Abadepite, mufatanyije n'inzindi nzego, hajyeho uburyo buyobora abantu mu nzira yumvikana, budafite uwo muhutaza."

Yongeyeho ko abaturage bajyanwa mu nsengero bagomba kurindwa no guhabwa umutekano.

Ati: "Aho badakwiye kuba bajya, bakamburwa na bike batunze, biraza gutuma dushyiraho umusoro, ayo wiba abaturage tuzayagabana!"

Perezida Kagame yasobanuye ko imisoro izajya ifatirwa ku bikorwa by'ivugabutumwa bizashyirwa mu bikorwa hagamijwe gufasha abo Leta izasanga baragiriwe nabi, kugira ngo bakomeze guhabwa uburenganzira n'umutekano bikwiriye.

Abayisilamu basabwe kurushaho kurangwa n'ibikorwa byiza mu gisibo cy'ukwezi gutagatifu kwa 'Ramadhan'

2024-03-11T13:32:45Z

Sheikh Salim Hitima, asaba abayislam ko bakongera ibikorwa byiza bakoraga birimo gusenga cyane no gufasha abafite ubushobozi bucye. Yanaboneyeho kuvuga ko abiyiriza ubusa muri uku kwezi ariko nyuma y'igisibo bagasubira mu byaha ntacyo baba bakoze nubundi bashaka bakabireka.

Yagize ati: "Ibyo rero bagomba kwitwararika ndetse bagomba no kwitaho cyane ni uko bagomba kongera ibikorwa byiza bakoraga, uhereye ku bikorwa by'igandukiramana n'imyemerere, amasengesho bagomba kuyongera, abari bararetse amasengesho y'imigereka uyu ni umwanya wayo ndetse no gukurikirana inyigisho mu musigiti n'izindi gahunda zose zikwegerez Uwiteka, ikindi bagomba kwitaho ni ukwita kuri babandi bafite integer nkeya, bafite ubushobozi bukeya, kubafasha no kubatera inkunga."

Abayislam bo mu mujyi wa Kigali, bavuga ko igisibo ari umwanya wo kurushaho kwiyegurira Imana no kuyereka ibyifuzo byabo ikabaha ibisubizo.

Mu gace ka Nyamirambo mu karere ka Nyarugenge, usibye ko hatuye abayislam benshi, ahazwi nko mu marange hakorerwa ubucuruzi bwiganjemo amafunguro.

Abahacururiza bavuga ko mu gihe k'igisibo ababagana aba ari bacye, ariko nk'abacengewe n'imyemerere ya Kislam bavuga ko ntacyo bibatwara.

Bati: "Ikintu numva ngiye guhindura ni uko maze kureba no gusobanukirwa neza inyigisho twahawe……zo kumenya icyo tugomba gukora kurusha ibindi, ndahindura cyane kuzagira uruhare gusangiza abayisilamu bagenzi banjye ifutari, ndashaka gusaba Imana ko yamfasha guhinduka muri byose, ngasabiria n'abayisilamu bagahinduka, tugahinduka tugasingiza Imana kuko niyo ikwiriye ibisingizo ibihe byose."

Igisibo cy'ukwezi gutagatifu kwa Ramadhan, ni inkingi ya 4 muri 5 zigize idini ya Islam, ni igisibo cyitabirwa n'abayisilamu babarirwa hagati ya 70% na 80% by'abayoboke b'idini ya Islam hirya no hino ku isi, kikaba itegeko ku bageze mu bugimbi n'ubwangavu kugeza ku bantu bakuru, keretse abafite uburwayi bwihariye , aba nabo bafasha abatishoboye kubona amafunguro, ababyeyi batangira gutoza abana kwiyiriza nibura igice cy'umunsi kuva bagifite imyaka 10.

U Rwanda n'u Bwongereza bashyize umukono ku masezerano mashya yo gukemura ikibazo cy'abimukira

2023-12-05T14:55:34Z

Ni amasezerano yasinywe na Minisitiri w'Umutekano mu Bwongereza, James Cleverly hamwe na Minisitiri w'Ububanyi n'Amahanga w'u Rwanda, Dr Vincent Biruta.

Aya masezerano yari yarasinywe bwa mbere mu 2022, icyo gihe Priti Patel ni we wari Minisitiri w'Umutekano mu Bwongereza mbere y'uko ava kuri izo nshingano agasimburwa na Suella Braverman.

Yongeye gusinywa kugira ngo asubize ibibazo byagaragajwe n'Urukiko rw'Ikirenga rw'u Bwongereza, rwayanenze ko adakurikije amategeko. Rwavuze ko u Rwanda ari igihugu kidatekanye, ndetse ko hari impungenge ko abimukira bazoherezwa mu Rwanda, bashobora kuzajya basubizwa aho baturutse bahunga.

Minisitiri w'Umutekano mu Bwongereza, James Cleverly, yavuze ko u Rwanda rumaze kugaragaza ko rufite uruhare runini mu bikorwa byo kwita ku buzima bw'abantu ndetse kandi ko rukorana ubunyamwuga mu bikorwa byo kwita ku mpunzi n'abimukira.

Ati “Ibi ni ibintu u Bwongereza bubona ndetse n'Umuryango Mpuzamahanga. Aya masezerano twasinye uyu munsi yubakiye kuri ubwo bufatanye.”

Yashimye Guverinoma y'u Rwanda kuri iyo mikorere, avuga ko ubu bufatanye buzafasha impande zombi mu gukemura ikibazo cy'abimukira ndetse n'ubucuruzi bw'abantu bucyubakiyeho.

Yavuze ko u Bwongereza buharanira ko abantu babaho mu mutekano ndetse no mu bwisanzure.

Ati “Turabizi ko abantu bazahunga ahantu hari imvururu n'inzara, kandi biri mu nshingano zacu mu gukemura iki kibazo.”

Minisitiri w'Ububanyi n'Amahanga, Dr Vincent Biruta, yavuze ko hakozwe andi masezerano kugira ngo hasubizwe ibibazo byagaragajwe n'Urukiko rw'Ikirenga mu Bwongereza.

Biruta yavuze ko mu masezerano mashya, hashyizweho uburyo bwo gukorana n'u Bwongereza mu kongerera imbaraga Urwego rw'Igihugu rushinzwe Abinjira n'Abasohoka kuko arirwo rushinzwe gusuzuma ibyifuzo by'abashaka ubuhungiro,

Mu byongewemo harimo “uburyo abo bireba bashobora kwitabaza inkiko mu gihe ubusabe bwabo butakiriwe”. Yavuze ko hazashyirwaho “ izindi nzego zishobora kwakira bene ibyo bibazo bikeneye kujya mu nkiko. Ibyo ni byo twongereye mu masezerano yari asanzweho kugira ngo dusubize ibyo bibazo byabajijwe n'Urukiko rw'Ikirenga rw'u Bwongereza.”

Yavuze ko u Bwongereza buzatera inkunga u Rwanda, ariko ibizakorwa bizaba bishingiye ku mategeko y'u Rwanda ndetse abazabikora ni Abanyarwanda nubwo igihugu gishobora kubona abagifasha mu buryo bw'ubuhanga.

Biruta yasobanuye ko atari umutwaro ku Rwanda kuko hari inyungu kubakira bizagirira abenegihugu n'igihugu muri rusange.

Ati “ Ntabwo ari ukwakira abimukira gusa cyangwa abasaba ubuhunzi. Harimo n'ikijyanye no gutanga uburyo bwatuma babasha kugira icyo bimarira, bakabasha kubona imirimo […] nibayibona bari mu Rwanda bizaba bifite icyo bimariye ubukungu bw'igihugu cyacu.”

“Niba tugiye no kubatuza, ntabwo tuzabatuza mu mudugudu wabo bonyine. N'abanyarwanda bazajya batuzwa muri iyo midugudu tuzubaka kugira ngo bifashe n'abazaba baguma mu Rwanda muri abo b'abimukira, nabo babashe kumenyera igihugu kandi babashe no guhabwa ibyangombwa bakeneye kugira ngo babashe kwibeshaho ariko bagire n'uruhare mu bukungu bw'igihugu cyacu.”

“Ntabwo dukwiriye kubibona nk'umuzigo gusa, hashobora kubamo n'amahirwe kugira ngo igihugu cyacu kibibonemo inyungu.”

Kuva uyu mwaka watangira, mu Bwongereza hamaze kwinjira abimukira barenga ibihumbi 29 mu buryo bunyuranyije n'amategeko. Ni mu gihe umwaka ushize, abari binjiye mu gihugu bari ibihumbi 45, umwaka iki gihugu cyakiriyemo benshi kurusha izindi nshuro.

Minisitiri w'Umutekano w'u Bwongereza yavuze ko aya masezerano yasinywe kuko ari ingenzi atari uko “ari ibintu byoroshye cyangwa se bifasha mu kwigwizaho igikundiro”. Ati “Twiyemeje kubikora nubwo ari ibintu bikomeye kandi bifite icyo bisobanuye kinini”.

Cleverly yavuze ko iki kibazo kiramutse kidakemuwe, abagizi ba nabi bazakomeza kubyungukiramo.

Ati “U Rwanda rwateye intambwe ifatika birugira umufatanyabikorwa mu gukemura iki kibazo mpuzamahanga.”

Yavuze ko atemeranya n'abanenga u Rwanda, ko bavuga ko ari igihugu kidatekanye n'ibindi.

Urukiko Rwisumbuye rwanzuye ko Apôtre Yongwe akomeza gufungwa by'agateganyo

2023-12-04T10:42:21Z

Urukiko rw'Ibanze rwa Gasabo rwari rwategetse ko Apôtre Yongwe afungwa by'agateganyo iminsi 30 ngo kuko hari impamvu zikomeye zituma akekwaho icyaha cyo kwihesha ikintu cy'undi hakoreshejwe uburiganya.

Yahise ajuririra icyo cyemezo avuga ko nta mpamvu zikomeye zituma akurikiranwa afunzwe.

Ku rundi ruhande, Ubushinjacyaha bwagaragaje ko icyo cyemezo kimufunga by'agateganyo cyagumaho kuko ibyo yakoze bigize icyaha.

Kuri uyu wa 4 Ukuboza 2023, Urukiko Rwisumbuye rwa Gasabo, rwategetse ko Apôtre Yongwe akomeza gufungwa by'agateganyo.

Urukiko rwasuzumye niba impamvu zatumye ajuririra zifite ishingiro, rusanga hari amashusho bigaragara ko ari gushishikariza abantu gutanga amaturo ngo nawe ategeke kugira ngo ibitangaza bibe.

Rusanga bigize impamvu zikomeye zituma akekwaho icyaha cyo kwihesha ikintu cy'undi hakoreshejwe uburiganya kuko atari kubwira abantu ko abakorera ibitangaza hanyuma ngo abake amafaranga mbere yo kubasengera.

Rwagaragaje kandi ko atari akwiye kwizeza abantu ibitangaza atashobora kandi nyamara abamwizeye bakamuha amafaranga batayasubizwa.

Ku bijyanye no kuba hari abamureze, Apôtre Yongwe yagaragaje ko bagiranye amasezerano Urukiko rusanga bitagize impamvu zikomeye zituma akekwaho icyaha cyo kwihesha ikintu ahubwo bigaragara ko ari inshingano mbonezamubano atubahirije.

Urukiko rwategetse ko icyemezo cy'Urukiko rw'Ibanze rwa Gasabo kidahinduka bityo Apôtre Yongwe azakomeza gufungwa by'agateganyo.

Abafite ubumuga bwo kutabona bishimiye ko bagiye kujya bisomera Bibiliya

2023-09-11T18:42:01Z

Ni Bibiliya yanditswe kubufatanye n'Umuryango wa Bibiliya mu Rwanda n'Inama ku bufatanye n'Igihugu y'abafite ubumuga (NCDP), ikaba yari imaze imyaka isaga icumi yandikwa, ndetse ubu yarangije gukorwa ku bufatanye n'Umuryango wa Bibiliya wo mu gihugu cy'u Budage.

Dr Donatile Kanimba, Umuyobozi w'Ihuriro ry'Abafite ubumuga bwo kutabona mu Rwanda (RUB) yavuze ko bashimishijwe n'uko habonetse Bibiliya bashobora kwisomera ubwabo, anabomeraho gusaba ko harandurwa akato kakigaragara muri zimwe mu nsengero. Yanavuze ko imyumvire yo gufata abafite ubumuga nk'umuzigo ku muryango bikwiriye gucika ahubwo bagafashwa kubona ibituma bagira umumaro mu muryango.

Yagize ati: “Ubu rero twishimiye ko hasohotse Bibiliya yacu, umuntu ubu yajya imbere y'abantu akigisha akoresheje Bibiliya yacu.”

Dr Donatile Kanimba kandi yavuze ko ubujiji bwo kutita ku bafite ubumuga butari mu baturage no mu nsengero gusa ko no mu bayobozi hari ababufite, aho yagizeti: “Ugasanga aho kugira ngo bamufashe baramushungera.”

Jean Marie Mukeshimana, uyobora ikigo gifasha gusubiza mu buzima busanzwe abafite ubumuga bwo kutabona cya Masaka, yasabye amadini n'amatorero kwigisha abakristu bafite ubumuga bwo kutabona gusoma no kwandika kuko usanga batitabwaho, aho yavuze ko abafite ubumuga bagihura n'ihohoterwa ribatera ibikomere bigatuma bata icyizere cy'ubuzima.

Yagize ati: “Ijambo ry'Imana riraduhumuriza, Umuryango wa Bibiliya mu Rwanda uradufasha wenda iki kibazo kizaba amateka.”

Umunyamabanga Mukuru w'Umuryango wa Bibiliya mu Rwanda, Pasiteri Ruzibiza Viateur, yasabye abantu kugabanya mu kanwa kabo amagambo asesereza abafite ubumuga, ndetse yemeza ko bafite imishinga itandukanye irimo kwigisha abafite ubumuga bwo kutabona kugira ngo bashire ihungabana bahuye naryo mu bihe bitandukanye. Aha yavuze ko bari gukorana n'umuryango w'abafite ubumuga bwo kutumva no kutavuga kugira ngo na bo babashe kwisomera ijambo ry'Imana mu buryo bw'amarenga.

Nk'uko byatangajwe ubwo kuri uyu wa 11 Nzeri 2023 habaga ikiganiro n'itangazamakuru, hashyirwa ku mugaragaro izi Bibiliya zikoze mu nyandiko ya Braille, ababishinzwe bavuze ko izi Bibiriya z'abafite ubumuga bwo kutabona zizabanza guhabwa amashyirahamwe y'abafite ubumuga kugira ngo bazishyikirize abo zagenewe.