Imirasire.rw

Perezida Kagame yashimiye inzego z'igihugu zose zishinzwe umutekamo

Mahame — 2025-12-29T21:22:43Z

Perezida Paul Kagame yashimiye abasirikare bose, abagabo n'abagore bari mu ngabo z'igihugu, RDF n'izindi nzego z'umutekano, ku bwitange, n'ubunyamwuga bakomeza kugaragaza mu gusigasira indangagaciro, n'umutekano w'igihugu.

Muri byinshi banyuzemo, harimo n'ibikomeye, abagabo n'abagore bari mu ngabo z'igihugu n'izindi nzego z'umutekano, Perezida Kagame yavuze ko bakomeje gukora ku rwego rw'ikirenga, haba abari imbere mu gihugu, n'abagiye mu butumwa hanze yacyo.

Yagize ati: “Imbere mu gihugu, kuba muri maso byahaye umutekano abantu bacu, biha umutekano igihugu cyacu, kandi bikomeza ubusugire bwacu umunsi ku wundi.”

Umugaba Mukuru w'Ikirenga w'ingabo z'igihugu, yavuze ko hanze y'igihugu, mu butumwa bwo kugarura amahoro, bakomeje kurinda intego igihugu cyihaye yo kurengera ubuzima bw'abantu ku kiguzi icyo ari cyo cyose, kandi bagaragaza ubumenyi n'imbaraga zabo mu gushaka ibisubizo.

Muri iri jambo, Perezida Kagame yavuze ko igihugu cyageze kuri byinshi harimo kwishimira amahoro, n'ituze, kugera ku iterambere mu nzego nyinshi, ndetse abaturage b'u Rwanda bakaba bashima urwo ruhare rwabo, kuko rwabateye gukomeza gukora mu mudendezo ibikorwa byabo bibateza imbere, batekanye.

Perezida Paul Kagame ati: “Nk'uko bavuze haruguru, ingabo z'u Rwanda n'izindi nzego z'umutekano dufite uyu munsi, ni bo mbaraga (ingabo) nifuje kugira.”

Yabashimiye ko uyu mwaka bakomeje kurengera inyungu z'igihugu bagendeye ku nkingi y'ubumwe bw'igihugu, agaciro, n'imbaraga, kandi bagaragaza ku rwego rwo hejuru ubunyangamugayo no gukunda igihugu.

Muri uyu mwaka uje, nabwo Perezida Paul Kagame yasabye ingabo z'igihugu n'izindi nzego z'umutekano gukomeza uwo mujyo wo kurangwa n'amahame y'ubunyangamugayo, no gukorera mu mucyo biranga ingabo z'igihugu.

Yanabase gukomeza kuba maso, bakaba bahangana n'ikibazo cyabaho, kandi bakomeze icyerekezo cyo kugira u Rwanda rutekanye, ruteye imbere kandi rwunze ubumwe.

Abanyarwanda n'amahanga ntibazibagirwa ko muri uyu mwaka wa 2024, ubwo i Goma habaga imirwano hagati ya AFC/M23, hari bamwe mu ngabo za Congo n'abo bari bafatanyije barashe ku Rwanda, ingabo z'u Rwanda zibyitwaramo kigabo, hakoreshwa uburyo budasanzwe kandi bugezweho ku isi, bwo gusama ibisasu.

Hanze y'u Rwanda, ingabo z'igihugu ziri mu butumwa butandukanye bw'amahoro, kimwe n'Abapolisi. By'umwihariko ku bw'amasezerano ingabo z'u Rwanda zagaruye amahoro muri Central African Republic, ndetse iki gihugu kuri uyu wa Mbere abaturage bagiye mu matora ya Perezida n'izindi nzego batekanye.

Muri Mozambique, naho ingabo z'u Rwanda zabashije kugarura amahoro mu Ntara ya Cabo Delgado yari yarayogojwe n'Ibyihebe bikomeye ku mahame akarishye ya Islam.

Perezida Kagame n'Umuryango we mu bitabiriye igitaramo cya John Legend

Mahame — 2025-02-22T14:44:21Z

Ni igitaramo cyabaye mu rwego rwa Move Afrika, cyitabirwa n'abantu batari bake barimo bamwe mu bagize Guverinoma y'u Rwanda, aho Perezida Kagame n'umuryango we bagaragaje ko bishimiye iki gikorwa cyahurije hamwe ibyamamare n'abakunzi b'umuziki.

Perezida Kagame n'umuryango we barebye igitaramo cyaranzwe n'ibyishimo n'imbyino, aho John Legend yaserutse mu mwambaro wa Made in Rwanda, agasoreza ku ndirimbo ye ikunzwe Love Me Now.

Mu butumwa bwe, Legend yavuze ko yishimiye kuba i Kigali ku nshuro ya mbere, agira ati: "Nishimiye kugera i Kigali, by'umwihariko nejejwe no gutaramira bwa mbere muri Afurika y'Iburasirazuba."

Iki gitaramo cyaranzwe n'ibihe bidasanzwe, aho umuhanzi Bwiza yataramiye abari aho, aririmbana n'abafana be indirimbo Ogera yakoranye na Bruce Melodie, mbere y'uko John Legend afata urubyiniro.

Umuryango wa Perezida Kagame wagaragaye wishimye cyane muri iki gitaramo cy'amateka, aho cyongeye kugaragaza ubushake bw'u Rwanda mu kwakira ibitaramo mpuzamahanga bikomeye.

The Ben yakoze igisa no gusaba imbabazi ku bwo gushyira ku gasozi inda ya Pamella

Mahame — 2024-12-30T15:37:53Z

Mu kiganiro n'itangazamakuru cyabaye kuri uyu wa 30 Ukuboza 2024, cyagarukaga ku myiteguro y'igitaramo azamurikiramo alubumu ku wa 01 Mutarama 2025 muri BK ARENA, The Ben yasabye imbabazi, ariko anagaragaza ko ibyo bakoze we n'umugore we nta kibazo babibonamo.

Ni nyuma y'uko abantu batandukanye barimo umupfumu Rutangarwamaboko banenze imyitwarire ya The Ben na Pamella, kubera amashusho y'indirimbo nshya y'uyu muhanzi igaragaramo umugore we yashyize ku gasozi inda ye.

Rutangarwamaboko yagize ati: "Utwite aratwikira ntatwika ngo yimanukire ejo kuzamuka byamugora amagarukirane muri rwa ruziga rw'ubuzima butazima. Inda y'umubyeyi irubahwa ikubahirizwa ntiyanikwa ku gasozi."

The Ben yagaragaje ko ayo mashusho agaragaza umugore we yashyize inda y'imvutsi ku karubanda mu bo yababaje harimo n'umubyeyi we.

Ati: "Abantu bagira uko bafata ibintu. Kuri twebwe ntabwo twabibonyemo ikibazo, usibye ko na none abantu simbaveba. N'ubwo kuri twe ntacyo byari bitwaye ariko na mama umbyara ntabwo yabyishimiye. Ndanamusaba imbabazi imbere yanyu. Mumbabarire mwese ndanasaba imbabazi abantu babibonye mu yindi shusho."

Uyu muhanzi ariko yongeyeho ko we n'umufasha we bajya gufata ayo mashusho bumvaga ntacyo bitwaye ndetse magingo aya bakaba bumva ntacyo bishinja.

Ati: "Bitanakuraho ko imboni yanjye n'umugore wanjye, ntabwo n'izi saha tubibonamo ikibazo. Twakoze amashusho y'indirimbo twerekana umugisha dufite ku Mana. Ariko mama aho uri hose umbabarire. Akimara kubibona yampamagaye ababaye cyane, ntabwo yigeze yishima."

Ku wa 26 Ukuboza nibwo yashyize hanze amashusho y'indirimbo ‘True love' igaragaramo amashusho y'umugore we, Uwicyeza Pamella, atwite.

The Ben agiye kumurikira album ye ya gatatu mu gitaramo kizabera muri BK Arena ku wa 1 Mutarama 2025 aho ashimangira ko abazakitabira bazagira ibihe bidasanzwe.

Umunyarwenya Steve Harvey yatangaje ko yahuye na Perezida Kagame

Mahame — 2024-11-20T16:17:44Z

Steve Harvey usibye kuba Umunyarwenya, ni n'icyamamare kuri televiziyo muri Amerika, aho azwi cyane mu kiganiro Family Feud.

Uyu munyarwenya amaze kwakirwa n'Umukuru w'Igihugu, yavuze ko yanyuzwe cyane no guhura na Perezida Kagame, cyane ko imbaraga no guca bugufi biri mu byo amufatiraho urugero.

Steve Harvey yagize ati "Twanyuzwe no kwicarana no guhura n'umuvandimwe wanjye Nyakubahwa Perezida Paul Kagame. Imbaraga no kwicisha bugufi bimuranga, byambereye urugero. Ni igihamya cyo gushikama k'u Rwanda n'ibikorwa byo kubabarirana."

Uyu mugabo ku wa 19 Ugushyingo 2024 yagize umwanya wo gutembera Umujyi wa Kigali, nyuma anasura Urwibutso rwa Jenoside rwa Kigali ku Gisozi.

Uyu munyarwenya yageze mu Rwanda ku wa 18 Ugushyingo 2024, aho ku wa Kabiri tariki 19 Ugushyingo 2024 yanasuye Urwibutso rwa Jenoside rwa Kigali ku Gisozi yunamira inzirakarengane zirenga ibihumbi 250 ziharuhukiye.

Umuryango w'iki cyamamare si bwa mbere waba ugeze mu Rwanda kuko, dore ko mu mwaka wa 2021, umugore we Marjorie Elaine Harvey, nawe yaje mu Rwanda maze asura ingagi zo mu Birunga mu muryango wa Muhoza.

Icyo gihe yanditse ku rukuta rwe rwa Instagram, ati: "Mwarakoze Pariki y'Ibirunga gufata neza izi ngagi nziza ndetse no kundeka nkagirana igibe nazo mu buturo bwazo"

Steve Harvey yavutse tariki ya 17 Mutarama 1957, ni umwanditsi, umunyamakuru, umukinnyi w'amafilimi akaba n'umuhanzi.

Ibiganiro bya Steve bitadukanye birimo The Steve Harvey Morning Show, Family Feud, Celebrity Family Feud, Family Feud Africa no kuba yarayoboye amarushanwa y'ubwiza azwi nka Miss Universe byagiye bimuhesha ibikombe bitandukanye byinshi bitandukanye birimo, 7 bya Daytime Emmy Awards, 2 bya Marconi Awards n'ibindi 14 bya NAACP Image Awards.

Nk'umwanditsi w'ibitabo Harvey yanditse bine, ibyamenyekanye cyane mu 2009 birimo icyitwa Act Like a Lady na Think Like a Man.

Steve Harvey yashyingiranywe bwa mbere na Marcia hagati ya 1981 na 1994. Nyuma yo gutandukana yahuye na Marjorie mu 1990, bombi baza gushyingiranwa mu 2007. Nta mwana bafitanye uretse abana batatu ba Marjorie barimo Umunyamideli w'imyaka 26, Lori, Morgan, ndetse we Jason.

Umuhanzi Yago yavuze ko ahunze u Rwanda kubera abashaka kumwica

Mahame — 2024-08-30T06:08:57Z

Mu butumwa yanyujije ku rubuga rwe rwa X, Yago yavuze ko urukundo afitiye u Rwanda ari ntagereranywa, ariko ko mu myaka ine ishize hari agatsiko k'abantu kagerageje kumuhitana, ndetse ngo yakomeje gutaka ntihagire uwumva akababaro ke.

Ati: "Rwanda nkunda, nkuhunze ntakwanga, ahubwo mpunze agatsiko k'abashatse kunyica mu myaka 4 ishize, nkataka ariko ntawanyumvise n'umwe."

Yago yamenyekanye mu ndirimbo nka "Rata" na "Si Swing," ndetse yakoze ibiganiro bitandukanye kuri Radio 10.

Muri ubu butumwa bwe, yashimangiye ko impamvu nyamukuru yatumye ahunga atari urwango afitiye u Rwanda, ahubwo ari iterabwoba ry'abo yise "abarozi" bashatse kumwivugana.

Umunyamabanga Uhoraho muri Minisiteri y'Ibidukikije na Dr. Mujawamariya abari gukorwaho iperereza muri dosiye imwe

2024-07-25T14:35:52Z

Umuvugizi wa RIB, Dr. Murangira Thierry B, yemeje aya makuru avuga ko muri Minisiteri y'Ibidukikije hari abakorwaho iperereza barimo Dr. Jean D'Arc Mujawamariya na Karera Patrick.

Ati: “Nibyo Jean D'Arc Mujawamariya ari gukorwaho iperereza, ku byaha akekwa kuba yarakoze ubwo yari muri Minisiteri y'Ibidukikije, ari Minisitiri w'Ibidukikije. Umunyamabanga Uhoraho ari mu bari kubazwa, ari gukorwaho iperereza. Ubu nta kindi twatangaza .”

Dr Murangira avuga ko ibizava mu iperereza bizatangazwa nyuma niba yakurikiranywa afunze cyangwa adafunze.

Abafana ba Rayon Sports bakiranye ubwuzu n'ibyishimo umutoza wabo Robertinho ageze mu Rwanda

2024-07-25T09:28:33Z

Ku wa Mbere, tariki ya 22 Nyakanga ni bwo ubuyobozi bwa Rayon Sports bwemeje ko Robertinho agiye kuyigarukamo nyuma y'imyaka itanu ayivuyemo aho yayisigiye Igikombe cya Shampiyona iheruka icyo gihe.

Uyu mutoza w'imyaka 64, yageze i Kigali mu ijoro rishyira kuri uyu wa Kane, tariki ya 25 Nyakanga, yakirwa n'Umuvugizi wa Rayon Sports, Ngabo Robben ndetse na Muhawenimana Claude uyobora abafana.

Hari kandi n'abakunzi batandukanye b'iyi kipe bari bafitiye urukumbuzi uyu mutoza uheruka kubaha ibyishimo bidasanzwe ubwo bageraga muri ¼ cya CAF Confederation Cup mu 2018, bakanatwara Shampiyona mu mwaka wakurikiyeho.

Robertinho yavuze ko yishimiye kugaruka i Kigali, ashimangira ko intego ari ukongera guhesha Rayon Sports ibikombe.

Ati “Nishimiye cyane kugaruka hano i Kigali, ni mu rugo kandi Rayon Sports ni umuryango wanjye. Ni umwanya wo gutegura ikipe ikomeye n'abakinnyi beza bo gutwara ibikombe. Intego ni ugusubiramo akazi n'ibihe byiza ikipe yagize n'ahashize hanjye.”

Abajijwe niba nyuma y'imyaka itanu, ashobora kongera guhesha Rayon Sports igikombe nk'uko yabikoze mu 2019, Robertinho yavuze ko bitoroha gusubiramo amateka nk'uko yabikoze mu Rwanda, muri Uganda no muri Tanzania aho yatwaye Shampiyona, ariko ashimangira ko byose biterwa no kugira ikipe nziza.

Ati “Ikintu cya mbere tugomba kumva ubu ni ukubaka ikipe nziza, ni umwanya wo gushaka abakinnyi beza bakajya ku rwego rumwe kandi rwiza.”

Yakomeje agira ati “Ndizera ko abafana ba Rayon Sports bazajya baza buri munsi ku myitozo, ku munsi w'umukino hamwe n'ibyiyumvo byabo ntigeze nibagirwa mu gihe cyashize ubwo twatsindaga APR igitego 1-0 kuri penaliti. Hano ni nko muri Brésil, abantu bafunga buri kimwe bakaza ku muhanda kwishima. Ni yo mpamvu Robertinho yemeye kugaruka kuko nkunda Kigali kandi kugira ngo ntware ibikombe.”

Ku kuba yahagarika APR FC imaze imyaka itanu yarihariye Shampiyona y'u Rwanda n'uburyo yiteguye guhangana na yo mu kibuga, Robertinho yagize ati “Buri gihe izaba ari ‘derbie' ikomeye ‘Rayon-APR', ariko ntabwo watsinda buri ‘derbie'. Njye nitegura ubwanjye. Muri ruhago ntiwatsinda buri mukino, ariko njye ntegura ikipe yanjye ngo ikine neza kandi itsinde. Ni yo ntego yanjye.”

Mu kwitegura umwaka w'imikino mushya wa 2024/25, Rayon Sports imaze gukina imikino ibiri ya gicuti aho yanganyije na Gorilla FC igitego 1-1 mu gihe yatsinze Amagaju FC ibitego 3-1 ku wa Gatatu.

Iyi kipe yambara ubururu n'umweru izakirwa na Musanze FC ku wa 27 Nyakanga mbere yo gukina na Azam FC kuri ‘Rayon Day' tariki ya 3 Kanama 2024.

Umukino wa mbere w'irushanwa kuri Robertinho uzaba ari uw'Umunsi wa Mbere wa Shampiyona ubwo Rayon Sports izaba yakiriye Marines FC tariki ya 17 Kanama 2024.

Dr. Jeanne d'Arc Mujawamariya yirukanwe ku murimo kugira ngo akorweho iperereza

2024-07-25T08:10:23Z

Itangazo ryashyizwe hanze na Minisitiri w'Intebe, rivuga ko iyirukanwa rya Mujawamariya wabaye Minisitiri w'Ibidukikije mbere yo kugirwa uw'Umurimo, ari ukubera ibyo agomba kubazwa akurikiranyweho.

Iri tangazo rigira riti: "Hashingiwe ku biteganywa n'Itegeko Nshinga rya Repubulika y'u Rwanda, cyane cyane mu ngingo yaryo ya 116; None ku wa 25 Nyakanga 2024, Dr. Jeanne d'Arc Mujawamariya yirukanwe ku mirimo yari ashinzwe nka Minisitiri w'Abakozi ba Leta n'Umurimo (MIFOTRA), kubera ibyo agomba kubazwa akurikiranweho."

Nyuma y'iri tangazo ryirukana muri guverinoma Dr. Mujawamariya, umuvugizi w'Urwego rw'igihugu rw'ubugenzacyaha, RIB, Dr. Thierry B. Murangira yatangaje ko uyu mugore akurikiranyweho ibyaha yakoze akiyobora iriya Minisiteri.

Yagize ati: "Nibyo koko Jeanne d'Arc MUJAWAMARIYA ari gukorwaho iperereza ku byaha acyekwaho kuba yarakoze igihe yari Minisitiri w'Ibidukikije."

Nyagatare: Minisitiri w'Intebe Dr Ngirente yafunguye uruganda rw'amata y'ifu

2024-07-24T11:38:12Z

Uru ruganda rwubatswe mu Cyanya cyahariwe Inganda cya Rutaraka mu Murenge wa Nyagatare mu Karere ka Nyagatare rwafunguwe kuri uyu wa Gatatu, tariki ya 24 Nyakanga 2024.

Minisitiri w'Intebe, Dr Edouard Ngirente, yafunguye uru ruganda ari kumwe n'abayobozi mu nzego zitandukanye za Leta, abakozi ba Inyange Industries n'abandi bari mu ruhererekane rwo gutunganya amata n'ibiyakomokaho.

Nyuma yo gufungura uru ruganda, Minisitiri w'Intebe, Dr Ngirente Edouard yatambagijwe ibice bigize uruganda rw'amata y'ifu, anasobanurirwa imikorere yarwo kuva ahakirirwa amata, aho atunganyirizwa kugera aho ahindurwamo ifu n'aho ipfunyikirwa mu bikoresho byabugenewe.

Uruganda rw'ifu rw'amata rwatangiye kubakwa mu mwaka wa 2021, rwuzuye rutwaye miliyoni 54$. Mu ntangiriro zarwo rwatanze imirimo ku bakozi bahoraho 270 n'abandi bari mu ruhererekane rwo gutunganya umusaruro w'ibikomoka ku bworozi bw'inka.

Byitezwe kandi ko uru ruganda ruzakusanya amata y'inka z'aborozi bo mu turere tw'Intara y'Iburasirazuba turimo Nyagatare, Gatsibo, Kayonza na Kirehe nka tumwe mu tubarizwamo umukamo uri hejuru ndetse n'azavanwa mu tundi turere turimo na Gicumbi mu Ntara y'Amajyaruguru.

Ubuyobozi bwa Inyange Industries buvuga ko bwubatse uru ruganda nyuma yo kubona ko umukamo w'inka z'aborozi hirya no hino mu Gihugu wiyongera ndetse wari ukeneye isoko ryagutse.

Mu Karere ka Nyagatare uru ruganda rwubatsemo, umukamo wariyongereye cyane mu myaka irindwi ishize, kuko wavuye kuri litiro zisaga Miliyoni enye ku mwaka ugera kuri litiro Miliyoni 12 ku mwaka.

Muri iyo myaka, mu Gihugu hose umukamo w'amata wavuye kuri litiro miliyoni 776 mu mwaka wa 2017, ugera kuri litiro zisaga miliyari.

Uruganda rw'amata y'ifu rwubatswe na Inyange Industries Ltd, isanzwe itunganya bimwe mu binyobwa bidasembuye.

Inyange Industries Ltd yatangiye urugendo rwo gutunganya ibinyobwa bidasembuye birimo amazi, jus n'ibikomoka ku mata mu 1997. Uru ruganda rufite ishoramari ry'agera kuri miliyoni 100$, rwinjiza asaga miliyari 10 Frw mu bukungu bw'u Rwanda buri mwaka.

Gicumbi: Umusore yasanzwe yapfuye bikekwa ko yishwe n'amacupa 11 y'inzoga yanyoye

2024-07-24T11:10:34Z

Biravugwa ko gutegera nyakwigendera ngo anywe izo nzoga byabaye mu ijoro rishyira kuri uyu wa 24 Nyakanga 2024, ubwo yari mu kabari banyweragamo, hanyuma mugenzi we w' imyaka 24 akamutegera kunywa amacupa 13 y'inzoga yitwa Nesha.

Yanyweye amacupa 11 y'iyo nzoga, atangira gucika intege aribwo yasohotse atashye, nyuma bamusanga ku muhanda iruhande rw'urusengero yapfuye.

Umuvugizi wa Polisi y' u Rwanda mu Ntara y' Amajyaruguru, SP Mwiseneza Jean Bosco yavuze ko abacyekwaho kugira uruhare mu rupfu rwa Nemeyimana batawe muri yombi.

Ati: "Harimo gukorwa iperereza ngo hamenyekanye icyamwishe, hafashwe abantu babiri bacyekwaho kuba nyirabayazana w'urupfu rwa nyakwigendera bashyikirijwe RIB sitasiyo ya Byumba."

SP Mwiseneza yasabye abaturage kujya batangira amakuru ku gihe mu kintu babona gishobora gushyira ubuzima bw' umuturage mu kaga.

Umurambo wa nyakwigwendera wajyanywe ku bitaro bya Byumba gukorerwa isuzuma ngo hamenyekane icyamwishe.

Urupfu rw'uyu musore bikekwa ko yazize intogo yo kunywa inzoga, ruje nyuma y'uko ku wa 17 Nyakanga 2024, mu Karere ka Musanze umugabo yapfuye azize urwagwa yari yanyoye nyuma y'intego yari ahawe n'uwo basangiraga.