Imirasire.rw

Iran yihoreye bikomeye kuri Amerika igaba ibitero ahari ibirindiro byayo

Mahame — 2026-07-21T18:28:34Z

Ibi bitero byabaye kuri uyu wa 21 Nyakanga, ku munsi wa 10 wikurikiranya impande zombi zikomeje guhangana, ibintu bikomeje guteza impungenge ko intambara ishobora gukwira mu Burasirazuba bwo Hagati.

Ubuyobozi Bukuru bw'Ingabo za Amerika (CENTCOM) bwatangaje ko bwari bwibasiye ibigo bya gisirikare bya Iran, ahabikwa intwaro zo mu mazi, ibirindiro byoherezwamo misile na drones ndetse n'ubwirinzi bwo mu kirere, buvuga ko ibyo bitero byari bigamije gusubiza inyuma ubushobozi bwa gisirikare bwa Iran.

Minisiteri y'Ubuzima muri Iran yatangaje ko ibitero bya Amerika byahitanye abasivili 50, mu gihe abarenga 500 bakomeretse.

Mu rwego rwo kwihimura, Iran yatangaje ko yarashe ibirindiro by'ingabo za Amerika biri muri Kuwait, ikibasira kandi ikigo cy'Ingabo zirwanira mu Kirere cya Sheikh Isa muri Bahrain, ndetse n'ibikorwaremezo byo muri Bahrain bifitanye isano na sosiyete ya Amazon.

Iran yavuze ko ibyo bitero byari ubutumwa bweruye bwo gusubiza Amerika ibyo yayikoreye.

Ku ruhande rwa Kuwait, ubuyobozi bwatangaje ko ubwirinzi bwabwo bwashoboye kurasa drones eshanu za Iran zari zinjiye mu kirere cy'icyo gihugu.

Ubwato butwara ibikomoka kuri peteroli bwaturikiye mu Nzira ya Hormuz, bituma abari baburimo batabarwa n'ubwato bw'ubutabazi, mu gihe urujya n'uruza rw'amato muri iyo nzira rwagabanyutse cyane.

Perezida wa Amerika, Donald Trump, yavuze ko ibitero by'igihugu cye byari ibyo guhorera abasirikare b'Abanyamerika bishwe, yongeraho ko Iran izakomeza kubihanirwa igihe cyose izaba ikomeje kwica abasirikare ba Amerika.

Yagize ati: "Igihe cyose Iran izica umusirikare w'Umunyamerika, izabiryozwa inshuro nyinshi."

Hagati aho, Aba-Houthi bashyigikiwe na Iran batangaje ko bashobora gufunga inzira z'ubwato bwerekeza muri Arabie Saoudite, ibintu bishobora kurushaho guhungabanya ubwikorezi bw'ibikomoka kuri peteroli ku Isi.

Ingaruka zatangiye kwigaragaza aho ibiciro bya peteroli byahise bizamuka hafi 2%, mu gihe Amerika yasabye abaturage bayo bari hirya no hino ku Isi gukomeza kwitonda kubera umwuka mubi ukomeje kwiyongera mu Burasirazuba bwo Hagati.

Abanya-Iran barahiye ko uko byagenda kosa bazhihorera ku wishe Ayatollah Ali Khamenei

Mahame — 2026-07-09T19:30:57Z

Khamenei yashyinguwe ku Ngoro yubakiwe Imam Reza, ahantu Abayisilamu b'Aba-Shia muri Iran bafata nk'ahera cyane, aho uyu muhango wasojwe nyuma y'iminsi itandatu y'ibikorwa byo kumwunamira byabereye mu mijyi itanu yo muri Iran ndetse no mu gihugu gituranyi cya Iraq.

Ishyingurwa rye ribaye nyuma y'uko Iran na Leta Zunze Ubumwe za Amerika byongeye gutana mu mitwe, ibintu bikomeje guteza impungenge ku masezerano y'ibanze agamije guhagarika intambara yaguyemo Khamenei.

Mbere y'umuhango wo gushyingura, Ingabo za Iran zashinje Amerika gutera ibisasu ku biraro bibiri byo ku muhanda wa gari ya moshi uhuza umurwa mukuru Tehran na Mashhad mu ijoro ryakeye, zivuga ko byari bigamije guhungabanya umuhango wo kumushyingura.

Khamenei n'abagize umuryango we benshi bishwe n'igitero cya Israel cyagabwe ku rugo rwe i Tehran ku wa 28 Gashyantare, umunsi wa mbere w'intambara ya Iran na Amerika ndetse na Israel.

Yasimbuwe n'umuhungu we Mojtaba Khamenei, ariko kuva icyo gihe ntiyigeze agaragara mu ruhame nyuma y'uko bivuzwe ko yakomerekeye bikomeye mu gitero cyishe se.

Uyu mugabo w'imyaka 56 ntiyitabiriye ibikorwa byo kunamira se byabereye i Tehran n'i Qom.

Ku wa Kane mu gitondo, indege yari itwaye amasanduku y'imirambo ya Ali Khamenei, umwuzukuru we w'umukobwa, umukwe we, umukobwa we ndetse n'umugore wa Mojtaba yageze i Mashhad ivuye muri Iraq, aho abantu benshi bari bitabiriye ibikorwa byo kubaherekeza cyabereye mu mijyi ya Najaf na Karbala.

Ku gicamunsi, amashusho ya Televiziyo ya Iran yerekanye ibihumbi by'abitabiriye umuhango wo kunamira Khamenei bambaye imyenda y'umukara, bagenda mu muhanda munini uri hagati muri Mashhad. Benshi bari bafite amabendera ya Iran ndetse n'ibirango bitukura bigaragaza ko bazihorera.

Hari n'abandi bari bafite amafoto ya Ali Khamenei bafite n'ibyapa byasabaga ko Perezida wa Amerika Donald Trump yicwa. Trump hamwe na Minisitiri w'Intebe wa Israel Benjamin Netanyahu bashinjwa kuba barategetse igitero gihuriweho cyagabwe kuri Iran mu mezi ane ashize, ari na cyo cyahitanye uyu muyobozi.

Hoda, umugore w'imyaka 35 ukora imirimo yo mu rugo, yabwiye AFP ati “Kubura umuyobozi biraremereye kurusha kubura ababyeyi bacu. Gusa urupfu rwa Trump na Netanyahu ni rwo rwonyine rwahosha ububabare dufite.”

Nyuma yaho, ikamyo yatwaye buhoro isanduku ya Khamenei inyuze mu mbaga y'abantu yerekeza ku Ngoro ya Imam Reza.

Imam Reza yari uwa munani mu bayobozi b'Aba-Shia kandi ni we wenyine mu bayobozi 12 byemezwa ko bashyinguwe muri Iran.

Imva ye yubatswe mu kinyejana cya cyenda, ifite umunara w'izahabu n'imyubakire yihariye, ikaba isurwa na ba mukerarugendo babarirwa muri za miliyoni buri mwaka.

Khamenei yavukiye i Mashhad, umujyi wa kabiri munini muri Iran uherereye mu majyaruguru y'iburasirazuba bw'igihugu. Ni na ho yize mu mashuri y'idini mbere yo kwimukira i Qom, ahari icyicaro gikuru cy'abayobozi b'idini y'Aba-Shia muri Iran.

Yagizwe Umuyobozi w'Ikirenga wa Iran mu 1989 nyuma y'urupfu rw'uwashinze Repubulika ya Kisilamu ya Iran, Ayatollah Ruhollah Khomeini.

Ariko ibikorwa byo kumwunamira byahungabanyijwe n'intambara yongeye kubura hagati ya Iran na Amerika.

Trump yavuze ko ibitero bya Amerika bishobora “kurushaho gukomera” nyuma y'ijoro rya kabiri ry'ibitero byabaye ku wa Kane, aho igisirikare cya Amerika cyavuze ko byari bigamije kugabanya ubushobozi bwa Iran bwo kwibasira ubwikorezi bw'ubucuruzi mu Nyanja ya Hormuz.

Ingabo za Iran zagabye ibitero ku birindiro bya gisirikare bya Amerika n'ibikorwa remezo byayo muri Kuwait, Bahrain na Qatar mu rwego rwo kwihimura.

Hashize ibyumweru bitatu, Amerika na Iran byasinyanye amasezerano y'ubwumvikane yari agamije guhagarika imirwano ku mpande zose no kongera gufungura Inzira ya Hormuz.

OMS yatangije igerageza ry'imiti mishya ivura Ebola muri RDC

Mahame — 2026-07-03T17:17:34Z

Iri gerageza mu ndimi z'amahanga rizwi ku izina rya Platform Adaptive Randomised Trial for New and Repurposed Filovirus Treatments (PARTNERS) ryatangiye ku wa 2 Nyakanga, rikaba ryaratangiye handikwa abarwayi bose basanganywe iki cyorezo kugira ngo bitabire igerageza ry'imiti ishobora gutanga icyizere mu kurokora ubuzima.

Abashakashatsi bari gusuzuma imiti ibiri ari yo MBP134, ikoresha antibodies zifasha kurwanya virusi, ndetse na remdesivir, imiti izwi mu kuvura indwara ziterwa na virusi.

Iri gerageza kandi rizareba niba gukoresha iyi miti hamwe byatanga umusaruro urenze uwo buri umwe ushobora gutanga ukwawo.

Uyu mushinga uterwa inkunga na OMS, ukaba uyobowe n'Ikigo cy'igihugu cya RDC gishinzwe ubushakashatsi ku buzima (INRB), ku bufatanye n'Ikigo gishinzwe indwara z'ubushyuhe n'ubushakashatsi mu Bubiligi, ndetse na Kaminuza ya Oxford yo mu Bwongereza, hamwe n'abandi bafatanyabikorwa mpuzamahanga barimo n'Ikigo cya Afurika gishinzwe kurwanya indwara (Africa CDC).

Ibi bikorwa biri gukorwa mu gihe RDC ikomeje guhangana n'icyorezo kimaze kwandurwa n'abantu barenga 1,400, aho abagera hafi 210 bamaze gukira, mu gihe abarenga 440 bamaze kuhasiga ubuzima.

OMS ivuga ko nubwo nta muti wemewe uraboneka ku cyorezo cya Ebola yo mu bwoko bwa Bundibugyo, hari abarwayi bakomeza gukira, ariko hakenewe uburyo bwizewe kandi bufasha kurushaho kurokora ubuzima bwa benshi.

Unyamabanga Mukuru wa OMS, Dr Tedros Adhanom Ghebreyesus, yavuze ko iki gikorwa ari intambwe ikomeye yihuse yagezweho ku bufatanye n'inzego z'igihugu n'abafatanyabikorwa mpuzamahanga.

Avuga ko nubwo nta miti yemewe ihari, hakiri icyizere cyo kurokora ubuzima bwa benshi binyuze mu miti isanzwe ihari kandi ikora neza.

Impuguke mu by'ubushakashatsi ku byorezo, Dr Amanda Rojek, yavuze ko ari ingenzi ko ubushakashatsi bukorwa icyorezo kikiriho kugira ngo ibisubizo biboneke vuba aho gutegereza ko icyorezo kirangira.

Na ho Prof. Jean-Jacques Muyembe-Tamfum, uyobora INRB, yavuze ko iyi gahunda izafasha abarwayi kubona imiti igeragezwa ishobora kubagirira akamaro, inatange ubumenyi buzafasha mu guhangana n'ibyorezo bizaza.

Abarwayi bose bazitabira iri gerageza bazakurikiranwa mu gihe cy'iminsi 28, kandi bazahabwa n'ubuvuzi busanzwe burimo guhabwa amazi n'imiti yunganira mirire, kongerwa imyunyu ngugu, guhabwa oxygen, kugabanyirizwa ububabare no kugenzurirwa umuvuduko w'amaraso.

RDC yemeye gutangira gufasha Abanyekongo barenga ibihumbi 84 bari mu Rwanda gutahuka ku bushake

Mahame — 2026-06-22T19:22:16Z

Uyu mwanzuro wafatiwe mu nama idasanzwe yo ku rwego rwo hejuru yahuje Guverinoma y'u Rwanda, iya RDC n'Ishami ry'Umuryango w'Abibumbye ryita ku Mpunzi (UNHCR), yabereye muri Ethiopia kuri uyu wa Mbere tariki ya 22 Kamena 2026.

U Rwanda rwari ruhagarariwe na Minisitiri ushinzwe Ibikorwa by'Ubutabazi, Maj. Gen. (Rtd) Albert Murasira, washyize umukono ku itangazo rihuriweho n'impande zose, rishimangira ubushake bwo gukomeza gufasha impunzi n'abashaka ubuhungiro bifuza gusubira mu bihugu byabo ku bushake.

Abitabiriye iyo nama bagaragaje ko RDC icumbikiye impunzi n'abashaka ubuhungiro b'Abanyarwanda 196,289, muri bo abarenga 75,400 bamaze kubarurwa ku buryo bwemewe.

Impande zombi zashimangiye ko ziteguye gukomeza gushyira imbaraga mu gucyura impunzi mu buryo bubungabunga agaciro kazo, butekanye kandi bugamije gutanga umusanzu mu kugarura amahoro arambye mu Karere.

Muri iyo nama hanagarutswe ku ntambwe imaze guterwa mu gucyura Abanyarwanda batahutse ku bushake. Guhera muri Mutarama 2025, u Rwanda rumaze kwakira abantu 8,394 batahutse bavuye muri RDC, bakaba barafashijwe kongera kwisanga mu buzima busanzwe.

Muri abo, 2,347 batahutse mu mwaka wa 2026 gusa, mu gihe intego y'u Rwanda ari ugufasha kwakira no gusubiza mu buzima busanzwe abagera ku 10,000 mbere y'uko uyu mwaka urangira.

Ku ruhande rwa RDC, impande zose zemeranyije ko hakenewe kongerwa imbaraga mu gufasha Abanyekongo bari mu Rwanda bagaragaza ubushake bwo gutahuka, u Rwanda rukaba rwasabwe gutanga amakuru yose yafasha mu gutegura neza no korohereza iyo gahunda.

Mu rwego rwo gukomeza gukurikirana ishyirwa mu bikorwa ry'iyi gahunda, u Rwanda, RDC na UNHCR byemeje ko guhera muri Nzeri 2026 hazajya habaho inama nyambukamipaka buri mezi atatu. Izo nama zizibanda ku gusuzuma aho ibikorwa byo gucyura impunzi bigeze no gukemura ibibazo bishobora kuvuka mu ishyirwa mu bikorwa ryabyo.

Nanone, impande zose zemeranyije ko ibikorwa byo gucyura Abanyarwanda bifuza gutaha bizajya bifashisha umupaka wa Kamanyola ku ruhande rwa RDC n'uwa Bugarama ku ruhande rw'u Rwanda. Biteganyijwe ko iyi gahunda izafasha Abanyarwanda barenga 3,600 bari hirya no hino mu Ntara ya Kivu y'Amajyepfo bamaze kugaragaza ubushake bwo gutaha.

Guverinoma ya RDC kandi yiyemeje gukomeza gutanga inzira zitekanye zizafasha impunzi kugera aho ziva no gusubira mu bice byazo nta nkomyi.

Muri iyo nama, u Rwanda rwamenyeshejwe ko hari n'abandi Banyarwanda barenga 400 bamaze igihe kirenga ukwezi bari mu nkambi z'agateganyo muri RDC bategereje gutahuka ku bushake. U Rwanda rwashimangiye ko ruzakomeza kuborohereza gutaha, ariko runagaragaza ko hakwiye kwitabwa ku ngaruka z'icyorezo cya Ebola gikomeje kwibasira bimwe mu bice bya RDC.

Abitabiriye inama bashimiye Guverinoma ya Ethiopia yakiriye ibiganiro, banashimira UNHCR ku ruhare rwayo mu gutuma gahunda yo gucyura impunzi ikorwa mu mucyo, mu bwisanzure no mu mutekano.

Iyi nama yo ku rwego rwo hejuru yakurikiye ibiganiro bya tekiniki byabaye ku wa 20 no ku wa 21 Kamena 2026, byateguye imyanzuro yemejwe n'Abaminisitiri kuri uyu wa Mbere.

Biteganyijwe ko indi nama nk'iyi izongera guterana muri Kamena 2027, mu gihe amatariki nyayo n'aho izabera bizatangazwa mu gihe kiri imbere.

Iran yahagaritse ibiganiro by'amahoro n'Amerika kubera imvugo mbi za Perezida Trump

Mahame — 2026-06-21T20:42:10Z

Intumwa za Iran zivuga ko zafashe iki cyemezo nyuma y'uko Perezida Trump asohoye amagambo yafashwe nko gushotorana, arimo ibikangisho byo gukoresha ingufu za gisirikare no gukubita Iran bikomeye mu gihe idahagaritse ibikorwa ishinjwa muri Libani.

Ibi byavuzwe Iran irakara bikomeye ihita ivuga ko gukomeza ibiganiro bidashoboka mu gihe hakomeje kuba imvugo z'iterabwoba n'igitutu cya gisirikare.

Ibi biganiro byaberaga mu Busuwisi byari byatangiye gutanga icyizere gito cyo kugera ku masezerano hagati y'impande zombi, cyane cyane ku ngingo zirimo kugabanya amakimbirane yo mu karere, kuganira ku bijyanye na gahunda ya nucléaire ya Iran no gushaka ibisubizo ku bibazo by'inzira yo mu nkomane ya Hormuz.

Ariko uwo mwuka mwiza waje guhungabana nyuma y'izo mvugo nshya z'ibikangisho zatangajwe zaturutse i Washington.

Libani ikomeje kuba imwe mu mpamvu zikomeye zituma impande zombi zidakomeza kumvikana, aho Iran ishinja Israel gukomeza ibitero bya gisirikare muri icyo gihugu, mu gihe Israel ivuga ko igamije kurwanya imitwe ifitanye isano na Hezbollah no kurinda umutekano wayo.

Inkomane ya Hormuz nayo ikomeje kuba ikibazo gikomeye, kuko inyuramo igice kinini cya peteroli ikoreshwa ku isi.

Iran ivuga ko ishobora gukomeza gushyiraho ingamba zikomeye ku bwato binyura muri iyo nzira mu gihe ibyo isaba bitubahirizwa, mu gihe Amerika yo ivuga ko urujya n'uruza rugikomeje nubwo hari impungenge z'umutekano.

Nubwo ibiganiro byahagaze, hari icyizere gike ko bishobora kongera gusubukurwa binyuze mu buhuza bw'ibihugu nka Qatar na Pakistan.

Abasesenguzi bavuga ko ejo hazaza h'ibi biganiro hazaterwa ahanini n'uko Amerika izagabanya igitutu n'imvugo zayo, uko Iran izitwara ku biganiro, ndetse n'uko amakimbirane yo mu karere azakomeza kugenda.

Umuriro wa za misile n'ibisasu biremereye hagati ya Iran n'Amerika wongeye kwaka bikomeye

Mahame — 2026-06-11T09:50:35Z

Mu minsi ibiri ishize Israel yagebye igitero kuri Iran, nayo mu kwihorera ihanura indege y'Amerika. Ibi byatumye Amerika nayo ibigira urwitwazl igaba ibitero bishya ku bikorwa remezo bya gisirikare bya Iran, birimo ibigo by'itumanaho, iby'ubwirinzi bwo mu kirere n'ibindi bikorwaremezo bifatwa nk'ingenzi mu mikorere y'ingabo za Tehran.

Amakuru atangwa n'ubuyobozi bwa gisirikare bwa Amerika agaragaza ko muri ibyo bitero hakoreshejwe za misile nyinshi za Tomahawk zoherejwe ku ntego zitandukanye ziri ku butaka bwa Iran.

Iran na yo ntiyacecetse, ingabo zayo zirinda impinduramatwara (IRGC) zahise zisubiza zigaba ibitero bya misile ku birindiro bya Amerika biri mu bihugu byo mu Burasirazuba bwo Hagati birimo Bahrain, Kuwait na Jordan, nubwo bamwe mu bayobozi ba Amerika bavuga ko byinshi muri ibyo bitero byaburijwemo n'ubwirinzi bwo mu kirere, ibi bikorwa byongeye kugaragaza ubukana bw'aya makimbirane.

Uku kongera kugabanaho ibitero biremereye kubaye nyuma y'ihanurwa rya kajugujugu ya gisirikare ya Amerika mu gace ka Strait of Hormuz, Amerika ikavuga ko Iran ari yo yabigizemo uruhare.

Washington yahise ifata icyemezo cyo kugaba ibitero byo kwihimura, ibintu Tehran yamaganye ivuga ko ari ugushotora no kurenga ku gahenge kari karagezweho muri Mata uyu mwaka.

Perezida Donald Trump yongeye kuburira Iran ko niba itemeye ibyo Amerika isaba mu biganiro by'amahoro, ibikorwa bya gisirikare bishobora gukomeza cyangwa bikarushaho gukomera. Ku rundi ruhande, Iran ivuga ko idashobora kuganira iri mu gitutu cy'ibisasu n'ibitero bya gisirikare.

Uretse ibyangiritse n'impfu bishobora guterwa n'iyi ntambara, izamuka ry'umwuka mubi hagati y'ibi bihugu byombi ryatangiye kugira ingaruka ku bukungu bw'isi.

Ibiciro bya peteroli byahise bizamuka nyuma y'uko Iran itangaje ingamba zikomeye ku nzira y'Inkomane ya Hormuz, inyuramo igice kinini cya peteroli icuruzwa ku rwego mpuzamahanga.

Abasesenguzi mu bya politiki mpuzamahanga bavuga ko niba impande zombi zikomeje guhangana muri ubu buryo, hari impungenge ko intambara ishobora gukwira mu bindi bihugu byo mu karere, cyane cyane ko Iran isanzwe ifite abafatanyabikorwa n'imitwe iyishyigikiye mu Burasirazuba bwo Hagati.

Nubwo ibisasu na misile bikomeje gusujwa ku mpande zombi, ibihugu n'imiryango mpuzamahanga bikomeje gusaba Iran na Amerika kugabanya umwuka mubi no gusubira ku meza y'ibiganiro.

Gusa kugeza ubu, nta kimenyetso gifatika kiragaragaza ko imirwano igiye guhagarara vuba, ahubwo ibintu bikomeje gufata indi ntera buri munsi.

Trump yateguje kwihorera kuri Iran nyuma yo guhanura kajugujugu y'igisirikare cy'Amerika

Mahame — 2026-06-09T19:58:54Z

Mu butumwa yanyujije ku rubuga nkoranyambaga, Trump yavuze ko yamenyeshejwe n'abayobozi b'ingabo z'Amerika ko Iran yarashe iyi kajugujugu mu ijoro ryo ku wa 8 Kamena 2026.

Yavuze ko nubwo abasirikare babiri bari bayitwaye barokowe nta nkomyi, Amerika “igomba gusubiza kuri iki gitero.”

Amakuru aturuka mu buyobozi bw'ingabo z'Amerika (CENTCOM) yemeza ko abari muri iyo kajugujugu barokowe, gusa iperereza ku cyayihanuriye rikaba ryari rigikomeje igihe Trump yatangazaga ayo magambo.

Gusa Perezida Trump we yavuze yeruye ko Iran ari yo yayirashe.

Ibi bibaye mu gihe umwuka mubi hagati ya Iran n'Amerika yifatanyije na Israel ukomeje kwiyongera nubwo hari agahenge kari kamaze iminsi gatangajwe nyuma y'amezi menshi y'imirwano.

Guhanurwa kw'iyi kajugujugu ya gisirikare ya Amerika bibaye nyuma y'umunsi umwe gusa Iran itangaje ko Leta Zunze Ubumwe za Amerika zigomba kubazwa no kuryozwa ibikorwa byose bya gisirikare Israel ikorera mu karere.

Ku wa 8 Kamena 2026, Umuvugizi wa Minisiteri y'Ububanyi n'Amahanga ya Iran, Esmaeil Baghaei, yavuze ko nta gikorwa na kimwe Israel ikora idafite ubufatanye cyangwa uburenganzira bwa Amerika, ashimangira ko ingaruka zose z'ibitero Israel igaba zigomba kubarwa kuri Washington.

Ubu butumwa bwari bwatanzwe nyuma y'uko Israel yari imaze kugaba igitero ku butaka bwa Iran by'umwihariko kigasenya ibikorwa remezo by'icyo gihugu ndetse kikanahitana Ubuzima bw'abaturage bacyo.

Abasesenguzi bavuga ko amagambo ya Trump ashobora kongera gusubiza ibintu irudubi, mu gihe impande zombi ziri mu biganiro by'amahoro.

Agace k'Inkomane ya Hormuz kabereyemo iki gitero ni kamwe mu duce tw'ingenzi cyane ku Isi mu bijyanye n'ikorwa ry'ubucuruzi bwa peteroli, bityo ikibazo cy'umutekano muke muri ako karere kikaba gikurikiranwe hafi n'ibihugu byinshi kubera ingaruka gishobora kugira ku bukungu bw'Isi.

Iran yatangaje ko Amerika igomba kuryozwa ibitero Israel iyigabaho byose

Mahame — 2026-06-08T22:25:25Z

Ibi byatangajwe ku wa Mbere tariki 8 Kamena 2026 n'Umuvugizi wa Minisiteri y'Ububanyi n'Amahanga ya Iran, Esmaeil Baghaei, nyuma y'amasaha make Iran na Israel byongeye gusukanaho umuriro wa bya misile biremereje n'ibitero byo mu kirere bisa naho bigiye gusubiza inyuma ibiganiro by'amahoro byari bimaze igihe bikorwa.

Baghaei yavuze ko ibikorwa bya Israel, yaba ibikozwe Amerika ibizi cyangwa itabizi, bigamije gusubiza inyuma inzira y'ibiganiro by'amahoro yari iri gukurikizwa hagati ya Tehran na Washington.

Yashimangiye ko Amerika, nk'umwe mu bagize uruhare mu masezerano y'agahenge yo ku wa 8 Mata 2026, ifite inshingano ku makosa yose akorwa harimo n'ibitero bigabwa na Israel.

Yagize ati: "Amerika ifite inshingano zitaziguye ku bikorwa byose ubutegetsi bwa Israel bukora bihungabanya amahoro n'umutekano by'akarere Iran iherereyemo."

Aya magambo aje nyuma y'uko Israel igabye ibitero ku bigo by'igisirikare cya Irani biri mu burengerazuba no hagati muri Iran, ivuga ko byari ukwihorera ku bitero bya misile Iran yari yari yayigabyeho.

Iran na yo yahise yohereza misile nyinshi ku butaka bwa Israel, ibintu byatumye impande zombi zongera kwinjira mu ntambara ikomeye nyuma y'igihe cy'agahenge kari kamaze amezi abiri.

Nubwo Perezida wa Leta Zunze Ubumwe z'Amerika, Donald Trump, yasabye impande zombi guhagarika imirwano no gukomeza ibiganiro by'amahoro, ibitero byabaye mu mpera z'icyumweru byagaragaje ko umwuka ukiri mubi hagati ya Iran na Israel.

Iran yavuze kandi ko ikomeje kugirana ibiganiro by'amahoro n'Amerika mu buryo butaziguye, ariko ko ibyo biganiro biri kuba hari umwuka wo kutizerana gukomeye.

Tehran ivuga ko ibikorwa bya gisirikare bya Israel bishyira mu kaga amahirwe yo kugera ku masezerano y'amahoro arambye mu karere.

Abasesenguzi mu bya politiki mpuzamahanga bavuga ko kuba Iran ikomeje gushyira igitutu kuri Amerika iyisaba kuryozwa ibikorwa bya Israel bishobora kongera umwuka mubi mu karere k'Uburasirazuba bwo Hagati, mu gihe impande zombi zikomeje gushaka uburyo bwo gukumira ko amakimbirane yahinduka intambara yagutse kurushaho.

Iyi ntambara yatangiye mu mpera za Gashyantare 2026 ubwo Amerika na Israel bagabaga ibitero bikomeye kuri Iran, bavuga ko bigamije guhagarika ibikorwa byayo bya gisirikare n'ibijyanye na gahunda yayo ya nikleyeri. Kuva icyo gihe, amakimbirane yakomeje gukwira mu bice bitandukanye by'Uburasirazuba bwo Hagati, harimo Libani, Yemen n'akarere k'Ikigobe cy'Abaperesi.

WHO yishimiye ko abantu 5 bo muri DRC banduye Ebola yo mu bwoko bwa Bundibugyo bakize

Mahame — 2026-06-01T08:17:27Z

Aya makuru yatangajwe n'Umuyobozi Mukuru wa WHO, Dr. Tedros Adhanom Ghebreyesus, mu muhango wo gutaha ikigo gishya cyita ku barwayi ba Ebola cyubatswe mu Mujyi wa Bunia, umurwa mukuru w'Intara ya Ituri mu Burasirazuba bwa RDC.

Dr. Tedros yavuze ko umurwayi umwe yari amaze gusezererwa mu bitaro ku wa Gatanu, mu gihe abandi bane na bo biteganyijwe ko basezererwa nyuma yo kugaragaza ko bakize.

Yagize ati: “Twishimiye kubona umurwayi wa mbere asezererwa nyuma yo gukira, kandi hari n'abandi bane biteguye gusezererwa mu minsi ya vuba.”]

Aya makuru aratanga icyizere mu rugamba rwo kurwanya Ebola yo mu bwoko bwa Bundibugyo, virusi idafitiwe kugeza ubu urukingo cyangwa umuti byemewe n'inzego z'ubuzima ku rwego mpuzamahanga.

Iki ni cyo cyorezo cya 17 cya Ebola kigaragaye muri RDC, ariko kiratandukanye n'ibyabanje kuko cyatewe na virusi ya Bundibugyo aho kuba Ebola Zaire, yo isanzwe ifitiwe inkingo n'imiti byemewe.

WHO ivuga ko Ebola ya Bundibugyo ishobora guhitana kugeza kuri 50% by'abayanduye, bityo kuba hari abarwayi batanu bamaze gukira bikaba ari intambwe ikomeye mu guhangana n'iki cyorezo.

Nubwo hari iyi ntambwe ishimishije, WHO igaragaza ko urugamba rugikomeje kuko abakozi bo mu rwego rw'ubuzima bagihura n'imbogamizi zirimo ibikoresho bidahagije ndetse n'ibibazo by'umutekano muke mu Burasirazuba bwa RDC.

Dr. Tedros yanahamagariye imitwe yitwaje intwaro ikorera muri aka gace guhagarika imirwano by'agateganyo kugira ngo ibikorwa byo gukumira no kuvura Ebola bikomeze gukorwa neza.

Abayobozi b'inzego z'ubuzima bavuga ko gukira kw'aba barwayi batanu gutanga icyizere ko n'ubwo nta rukingo cyangwa umuti byemewe kuri ubu bwoko bwa Ebola, abarwayi bashobora gukira bahabwa ubuvuzi n'ubwitabire bukwiye.

Umuriro w'ibisasu biremereye wongeye kwaka hagati ya Amerika na Iran

Mahame — 2026-06-01T07:47:08Z

Ingabo za Amerika zikorera mu Burasirazuba bwo Hagati, Centcom, zasobanuye ko uku kurasana kwatewe n'ubushotoranyi bwa Iran, yahanuye drone ya Amerika yo mu bwoko bwa MQ-1 Predator yari hejuru y'amazi mpuzamahanga.

Mu gitondo cyo kuri uyu wa 1 Kamena, Centcom yatangaje ko nyuma y'ubu bushotoranyi, indege y'intambara ya Amerika na yo yahise isenya ubwirinzi bwo mu kirere bwa Iran, sitasiyo igenzurirwamo drones iri munsi y'ubutaka na drones ebyiri.

Amerika yasobanuye ko yagabye ibi bitero mu karere ka Goruk no ku Kirwa cya Qeshm ku wa 30 n'uwa 31 Gicurasi 2026, igaragaza ko ibirindiro bya Iran byahungabanyaga umutekano w'ubwato bunyura mu mazi mpuzamahanga.

Umutwe w'ingabo zidasanzwe za Iran, IRGC, watangaje ko Amerika yarashe ku munara w'itumanaho ku Kirwa cya Qeshm, kandi ko mu gitondo cyo kuri uyu wa 1 Kamena na wo warashe ku birindiro by'ingabo za Amerika.

IRGC yasobanuye ko ibirindiro bya Amerika yarashe ari ibyifashishwaga mu kurasa ku butaka bwa Iran, gusa ntiyagaragaje aho biherereye nubwo ibimenyetso byerekana ko ari muri Koweit.

Muri iki gitondo, igisirikare cya Koweit cyatangaje ko intwaro zacyo z'ubwirinzi bwo mu kirere zazindutse zihangana n'ibitero bikomeye bya drones na misile biri guturuka muri Iran.

Tariki ya 28 Gicurasi ni bwo intumwa za Amerika n'iza Iran byumvikanye ku gahenge k'iminsi 60, kagamije ahanini gufungura Umuhora wa Hormuz kugira ngo unyuremo ubwato butwara ibikomoka kuri peteroli.

Tariki ya 29 Gicurasi, Perezida Donald Trump wari witezweho kugafataho icyemezo cya nyuma, yayoboye inama idasanzwe y'umutekano yabereye mu ngoro y'Umukuru w'Igihugu, White House, ariko yarangiye hatamenyekanye icyavuyemo.